Ka Nonanona, Volume IV, Number 15, 12 November 1844 — Page 87

1844.) KA NONANONA. 87

na elemakule, a me na luahine a pau loa. Mai kuhi oukou, he ekalesia waiwai keia, a kaulana no ka lakou ikaika i ka hana. Aole loa pela. He poe kuaaina wale no. Ua kaulana mamua no ka palaualelo i ka hana. Aka, o ka malama kumu, oia paha ka mea e pau ai ka lakou hana palaualelo ana. Ua lana ko'u manao malaila.
                Aole ma Makawao wale no keia hana maikai. Ua palapala mai ia'u o Kalaka ma Wailuku, i ka mua o keia malama, no ka lakou hana ana malaila. Menei kana: "A pau ka ahaaina a ka Haku, a noa ka Sabati, ua kukakuka pu na hoahanau o nei, no ka malama kumu ana. Ua hala aku la na malama eono, mai ko lakou hoomaka ana ia hana. I keia hapalua o ka makahiki, ua haawi mai lakou i na dala 200. Aole lakou manao e hoi ihope. O ka hoomau ma ka lakou hana ka manao. Ua haawi mai kekahi hoahanau a me kana wahine, 15 dala maoli." Pela ko Wailuku poe hoahanau. Nui ko'u hauoli ana i ko'u lohe ana i ka lakou. Owai na hoahanau, e hele a hana like?
                I ko'u noonoo ana ma keia mau mea, ua akaka lea, e na hoahanau, e hiki no ia oukou ke malama i ka oukou poe kumu, ke manao paa oukou e hana pela. A he hana mama no hoi ia ke hapai like na hoahanau a pau. Aole nae he hana keia e like me ka holo pea. O ka mahuahua loa i na hana maikai; o ka hana me na lima; o ke kuai lilo aku, a me ke kuai lilo mai; o ka malama waiwai, aole hoomaunauna iki; o ka makemake i ke Akua, oia na mea e hiki ia oukou ke malama kumu, ke kuai baibala, a ke hana no hoi ma na mea e ola'i ko ke ao nei. Ua akaka lea i ko'u manao, aole loa e hiki ia oukou ke hana ia mau mea, i ko oukou noho molowa ana, aole hooikaika ma ka lulu hua, mahi, waele, lawaia, kukulu hale, kalai, hanai holoholona, hana lole, humuhumu, a me na hana like. Mai kuhi hewa oukou. He hana mau keia ma ka malama kumu, aole e pau ia i ka makahiki hookahi. Aole i na makahiki elua, elima, umi. Aole e pau a make oukou. No ia mea, e ikaika oukou i ka hana maikai. E hana mau no ka Haku, a no kona aupuni. "Mai hoopalaleha i ka hana, a i ka wa pono, e hoiliili oukou, ke hoonawaliwali ole oukou." E lilo oukou he poe makaukau no na hana maikai a pau, a e kupaa malaila a hiki wale aku i ka hopena. Oia ko'u makemake, a me ka'u pule i na la a pau loa no oukou a pau e na hoahanau mai Hawaii a Kauai, e aloha nui ia mai oukou e Iesu Kristo. Amene.
                Owau no ko oukou hoahanau.
J. S. GELINA.

HE KANIKAU ALOHA NO HONOLULU KE KULANAKAUHALE NUI O KO HAWAII NEI PAE AINA.

                Kalihi, Oahu, Okatoba 24, 1844.
Aloha oe, e Honolulu, ka makuwahine hanohano aloha,
Aloha no hoi oe, e ka anoi kaulana,
Ua kahikoia kou poo i ka lei gula, a me ke sinamona.
Ua aahu hoi oe i ke silika omaomao.
Ua poniia oe e ka la i alii wahine Kristiano.
Na ka mahina hoi oe i hamo i ka aila kumukuai nui.
Na na hoku hoi oe o ka lani i malama mai i ka po.
A na ka manu leo nui hoi o ka mauna oe i malama mai i ke ao.
O kou alii a me kou hanohano ana, mai ka piko mai o na mauna kiekie.
O na mea kani a me na halelu, ma kou kulanakauhale no ia.