Ka Nonanona, Volume IV, Number 15, 12 November 1844 — Page 89

1844.) KA NONANONA. 89

                2. I makaukau na kanaka Hawaii e hai aku i ka olelo a ke Akua.
                3. I lilo ole i ko oukou hanauna ka hooponopono; i koe mai kela mau hana na makou no e hana.
                Eia kahi, ina o Bele ma keia kula, ua pono no; ia Aneru ke kula kaikamahine. Ia oukou nae ia wahi.
                Eia kahi; aole pono e hooleia mai ko makou manao i keia makahiki, no ka mea, ia makou no ka uku. Aole o makou manao i mau haole kupono ole i ko makou manao, ke ao mai i ka makou mau keiki, o oukou no."
                Na Kaauwai i palapala mai i keia; aole nae pau kona mau hua i ka paiia no ka loihi.
                E na misionari a me na kanaka noonoo a pau, pehea keia manao o ko Wailuku poe? Pono anei? Holo anei? E ko Molokai pehea ko oukou manao?
                Ikaika loa no nae ko Wailuku poe! Ka! akahi no ka ikaika i ka imi naauao. Pono ia, e imi no, mai hoohuakeeo, a mamuli loaa e like me ko oukou makemake.

NA LUNA MARE MA HAWAII.

                Eia na luna hooponopono mare ma Hawaii; mai Kiokiaha a Keahualono, o Leleiohoku; mai Keahualono a Kaula, G. D. Hueu; mai Kaula a Okiokiaho I. D. Puuloa.

KA HOOPII ANA MA HILO.

                Ua hoopii mai o Kanakaahuahu no ka hoopai hewa ana o Puuloa kekahi lunakanawai ia ia. Olelo mai ia, no ka huhu maoli o ka lunakanawai, nolaila, hoopai hewa ia ia he $30. Pela anei? Ina pela, eia ka pono e hoopii i na lunakanawai kiekie, a na lakou e hooponopono iho. O ka hana no ia o na lunakanawai kiekie, o ka wehe i ka pilikia o ka poe i hoopai hewa ia. E hoopii pololei imua o lakou.
                No ka loihi o ka palapala a Kanakaahuahu, aole pono e pai ma ka Nonanona.

LAAU KANU.

                Eia keia wahi manao i na lii a me na kanaka o Honolulu nei, e ala a e kanu nui i na laau maikai i keia wa; no ka mea, ke haule nui nei ka ua, a ua oluolu loa ka lepo, ulu koke na laau ke kanuia i keia wa. Eia na laau a'u e paipai nei e kanu koke i keia wa.
                1 O KA LAAU FARANI. Ma kekahi olelo ana o Alegeroba, ka inoa o keia laau. Eia no ke ulu nei ma ka pa o Limaikaika; aia ma ka hale pule Farani a ma kela wahi, keia wahi. He nui wale ka anoano maluna o ua laau la, a oia ka mea kanu. Ina i loaa ka mea opiopio ke kawowo e hehu a e kanu hou iho.
                He laau maikai loa keia laau Farani: he laau hanohano maoli: leaea ka maka ke nana'ku. Nani Honolulu nei, ka paapu i keia laau.
                E kanu ma na pa a me na alanui.
                2. O KA HAAHEO INIA. He laau kiekie keia; aia ma ka pa o Mi. Hupa, ma ka pa o Kap. Dominis ma Beritania; ma ka pa o Limaikaika a me Rokeke, a ma na wahi e ae.
                E kanu i keia laau ma kapa alanui, iloko hoi o na pa.
                3. O ka hau. Ua kamaaina loa ka hau ma keia wahi: ua kanuia ma ke alanui, aole nae he nui loa. E kanu no ma kela kapa, keia kapa o ke alanui a nui loa; e uhuki a e kiola i na laau maloo, a e kanu hou iho i laau maka. Eia ka wa pono. E kanu lalani pololei no, mai kanu kekee.