Ka Nonanona, Volume IV, Number 15, 12 November 1844 — Page 91

1844.) KA NONANONA. 91

le: me ka pepa, inuawa, palaualelo; haalele i ka olelo a ke Akua, a me ka hale o Iehova; hana ino i ka la Sabati, nui wale ka ino e kupu ana mai loko ae o keia mau hana lealea.
                Eia kekahi; o kekahi poe a'u i lohe ai, e hana i keia mau hana, he poe i okiia mai ka ekalesia o ke Akua aku, aole lakou he poe pono; he poe ku e i ka pono.
                Eia kekahi: he ninau ko'u ia Davida Malo, no ka hiaka, hula, olioli? E Davida e, e palapala iki mai oe i ke ano o keia mau hana kahiko o Hawaii nei, i lohe makou ka poe ike ole. Heaha ka hewa o keia mau hana?
                Eia kekahi mea ino ma Honolulu nei, o ka paani ana o na kamalii iloko o ke awa, a ma na wapo kahi o na moku e ku ai me ke kapa ole, a me ka aahu ole. He ino maoli keia, a e pono e hoopaiia na makua malama ole i keia poe keiki. Ahea la pau keia mau mea hilahila ma Hawaii nei? o na kaikamahine kekahi i ikea e hele wale ana a e paani ana ma na wapo me ke kapa ole. He mea ino loa keia. Pehea la e maemae ai na kaikamahine hele wale pela?

LAAU KANU.

                Ma ka Nonanona pepa 10 me 11, ua loaa ia'u kekahi olelo no ke kanu ana i na laau, o kela ano keia ano, i mea e oluolu ai ka noho ana o kanaka, a i mea hoi e waiwai ai. Ua pono no ia olelo, he mea maikai no na laau kanu, aka, ke ike nei makou, aole pono ia makou ke hana pela, no ka maopopo ole o kahi e kanu ai.
                Ma ke kanawai o ka aina, aoao 9 penei ka olelo:—"Ua hoomaluia ke kino o na kanaka a pau, a me ko lakou aina, a me ko lakou mau pahale, a me ko lakou waiwai a pau: ke malama lakou i na kanawai o ke aupuni, aole hoi e laweia kekahi mea, ke olelo ole ia kela mea ma ke kanawai."
                He mau laau kanu ka makou, na kanaka o Hanalei, Kauai;—he mau alani, he mau lemi, he mau ulu, a ia mea aku ia mea aku, a ko makou mau lima i kanu, a me ka lima o ko makou mau makua. Hoolimalima aku la na'lii me kekahi haole, i keia wahi o ka aina, lilo iho la na mea kanu a makou i kanu ai. Hua mai no na laau, no hai ka hua; aole na makou! pela no ka lemi, a a me ka ulu. Nolaila, manao au, aole ku pono keia hana me kela pauku o ke Kanawai i kakauia maluna.
                E ka Nonanona, Ina hiki ia oe ke hoomalu i ko makou mau aina, i lilo ole aku i na mea a ko makou mau lima i kanu, alaila, hiki ia makou ke hoolohe i kau olelo, a e hana aku hoi e like me kana ao ana.
NA MAKAAINA.
Hanalei, Okatoba 16, 1844.

                Auhea oe, e Makaaina, Ua oiaio no keia olelo au maluna iho, no ka lilo wale aku o ka aina a me na laau kanu pu. Aka, ea, ua kokoke pau ia pilikia. Pela ko makou lohe ma ka pepa o ke aupuni; aia hoi mai o Rikeke laua o Haalilio, alaila ahaolelo koke na lii, a ma ia ahaolelo e hooponopono ia ana na mea o ka aina. Alaila paha pau keia pilikia au i olelo mai; no ka mea, i ko makou lohe, e hoihoiia ana na aina na ka poe makemake aina, na lakou ponoi no; aole noho konohiki, a hoaaina e like me keia wa. O ka paa no ia o ka aina aole hemo wale.