Ka Nonanona, Volume IV, Number 15, 12 November 1844 — Page 92

92 KA NONANONA. (NOVEMABA,

NO KE AUPUNI.

                I ka la 12 o Feberuari 1844, ua hoopaaia ke kuikahi Beritania ma Lahaina: ua kau na inoa o na lii i keia kuikahi, me ke kanalua nae i kekahi mau pauku; eia na pauku i makemake ole ia, no ka paewaewa, a me ke kapakahi,
                PAUKU III. Ina e hoopii ko Beritania maanei e hewa maoli, aole ia e hookolokolo ia e hai, i ka Iure no i kohoia e ke Kanikele Beritania no loko o na haole, a ae ia e na'lii o ko Hawaii Pae Aina.
                PAUKU VI O ka waiwai Beritania, ua maopopo he mau mea no ke kauwahi mai o ko Beritania Aupuni, aole e hookapuia kekahi o ia mau mea, aole hoi e oi aku ke dute o ka lawe ana mai mamua o elima hapa haneri nui ke ano o ke kuai ana.
                No keia mau pauku o ke kuikahi, nolaila, hoopii keia aupuni i na aupuni nui o Beritania a me Farani, e hoololi hou i keia mau pauku i pono like kela aoao me keia aoao. A ke lohe nei makou ma ka nupepa o ke aupuni, e kuka pu ana na lii o Beritania, a me Farani ma keia mau pauku; a ina i holo ka olelo malaila, alaila hoakaka mai. Pomaikai keia aupuni, ke hoololi hou ia kela mau pauku, a pono like keia mau aupuni a pau; o ka pono maoli ia.
                Eia hoi kekahi mea i ikea ma ka nupepa o ke aupuni, ua launa oluolu na lii o Belegiuma, he wahi aupuni kokoke ma Farani, me Mi. Rikeke laua o Haalilio. Ua ae mai ke aupuni o Belegiuma i keia aupuni o Hawaii nei, e ku okoa, a ua oluolu loa ka manao o kolaila alii i keia aupuni. Ma ka lakou olelo ana, ua like a like na pono a pau o kolaila kanaka ke holo mai maanei, a me koonei kanaka ke holo aku ilaila. Pono keia.

PUALI INUWAI HAOLE.

                Halawai keia puali inuwai haole ma Polelewa i na ahiahi la hoomalolo a pau. He 69 lakou ke huiia a ua hoi hope kekahi poe e 6. He poe inu rama ka nui o keia poe mamua; ua ike ko Honolulu nei a pau i ko lakou ano ino i kela wa; aka hoi, ua pau lakou i ka puali inu wai i keia wa. Ua noho malie lakou me maemae; hana pono i ka lakou hana; kokua kekahi i kekahi; malama i na wahine a me na keiki. Ua holo mua keia hana maikai i keia wa, ke komo mai nei ka poe inu rama me ka hoohiki e inu wai wale no.
                Pomaikai Honolulu nei i keia oihana kinai rama.

MAI PAU I KE AHI.

                I kela poalua mai pau i ke ahi ka hale kuai o Mi. Lemi ma Honolulu nei. Penei ka wela ana, kii aku kekahi mau kanaka elua ona i ka barani iloko o ka lua malalo iho o ua hale nei, me ke kukui iloko o ko laua lima, a pili koke ka barani i ke ahi o ke kukui a wela iho la. Pakele nae ka hale.

KANAKA LAWELAWE.

                Makemake kekahi haole ma Honolulu nei, i kane me ka wahine, e noho hoolimalima me ia, e lawelawe ma ka holoi, aiana, uwi bipi, a me kela hana keia hana. O ke kanaka makaukau ka mea i makemakeia, aole o ka mea ike ole. E ninau ka mea imi hana i Limaikaika.

WAHINE HIIKEIKI.

                O ka wahine makaukau i ka hiikeiki a makemake e hana hoolimalima e hele mai a ninau ia Limaikaika.