Ka Nonanona, Volume IV, Number 17, 10 December 1844 — Page 84
84 KA NONANONA. (DEKEMABA,
e pili ana i Potugala; i kela makahiki i hala ae nei, ua hoohewaia e na lunakanawai ua wahine la e make loa, no kona hoole ana i kekahi mau olelo wahahee a ka poe pope. Eia na olelo ana i hoole ai; olelo ka poe pope, o ka berena a me ka waina iloko o ka ahaaina a ka Haku, o ko Kristo kino maoli no ia; aole ia he hoailona. Hoole keia wahine wiwo ole: aole ia o kona kino maoli: a me kona koko maoli, he berena a he waina wale iho no. No kona paakiki loa i ka hoole, hoomau loa lakou ia ia.
Eia kekahi hoole a ua wahine nei; hoole oia i na kii; aole pono e hookomo i na kii iloko o na oihana pule. Oia kekahi kumu o ko lakou huhu, a nolaila, hoopai na lunakanawai ia ia e make.
A lohe na'lii o Beritania i keia make pono ole, hoopii pololei lakou imua o na'lii o Potugala i keia hana ino.
Heaha ka hewa o kela wahine? Aole ona hewa e make ai. Ia ia no kona manao, aole hiki i na lunakanawai ke hooponopono ma ko ka Uhane. No ke kanaka wale no kona manao.
KA WEHEWEHE ANA O KELA NINAU MA KA PEPA 13.
Penei e wehewehe ai.
E kapa aku i ke kiekie o ka moku o E oia ka aoao ku pono o ka huinakolu. A o ka loa mai ka moku o E a hiki i ka moku o A oia ka aoao moe, oia hoi ka aoao e imi ai.
A e hoolawe 2 deg. noloko o 90 deg. a loaa mai ka huina e moe ana ma ke kia o moku o E he 88 deg.
Alaila, penei ka imi ana;
Me ka like ana o ka hanai 10.00000
i ke kiekie o ka moku o E 100 kapuai 2.00000
Pela no ke kapili o ka huina maluna
o ke kia o ka moku o E 88 deg. 13.45692
13.45624
10.00000
I ka loa mai ka moku o E a i
ko A 285 kapuai 3.45699
A ma na kapuai 285, ua like ia me 2 setadia 3 kaulahao 4 anana a me 13 kapuai, Oia ka mea i ninau ia.
Na'u na IOANE R.
MOKU ILI.
I ka la 17 o Nov. nei, ili kekahi moku okohola Amerika i ka akoakoa, ma ke awa o Honolulu nei, ili a paa loa. O Pakeke kona inoa; he 3,000 barela aila maluna iho. Hooikaika loa ke Kapena me kona poe kanaka e hemo; aole hemo iki ia lakou. Pihoihoi iho la, a kaumaha loa. Ia la ae, he la Sabati ia, ae like ke Kapena laua me ka Kiaaina e hana. Holo aku la ia i kai me na kanaka 200 paha, hoolei koke i na pahu aila nui iloko o ke kai, a lawe pakahi na kanaka i kona pahu a hoopae iuka, a pau koke ka aila iuka. Mama koke iho la ka moku, a hemo a hoihoi iuka. Nani ka pakele ana o ua waiwai nui nei. Ua naha no nae ka moku, a ke haohao nei kekahi ia ia, aole paha pono ke holo hou aku.
MANUWA BERITANIA.
I ka Ia 26, o Nov. nei, ku mai ka manuwa Beritania, o ka Modeste kona inoa ma Honolulu nei. Mai Kalifonia mai keia moku i holo mai nei, o Bele ka inoa o kona kapena. Ua hoi pu mai nei o Mi. Ioane, ke kumu kula haole no Honolulu nei, maluna o keia manuwa.
Aole mea hou ma Kalifonia a makou i lohe ai. Ma Monetere, he kulanakauhale me na kanaka 1,000 paha, keia moku a holo mai nei; a he 10 na hale kuai rama malaila! Hookahi barela i pau i kela hebedoma keia hebedoma! Nolaila nui ka haunaele; nui ka ino. Nui hoi ka aihue, a me ka pepehi, a me ka hokai wale. Mamua aku nei, hakaka maoli kekahi moku okohola Farani me na koa iuka, a make na koa elua a pau i ka moku loa na lima elua o ka malamamoku! Auwe Kalifonia! He aina pope ia; ahea la kau ka malamalama oiaio maluna ona? Ahea hoi puali inuwai malaila? Ma Kolumebia hoi keia moku mamua aku nei. Aole nae he mea hou malaila; mahuahua na kanaka Amerika ma Oregona i keia wa, a ua holo mua na hana a pau malaila; mahiai, hanai bipi; hana palaoa, olo papa, hana hale a pela aku no.