Ka Nonanona, Volume IV, Number 18, 24 December 1844 — Page 85

KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." SOLOMONA.
Buke 4. HONOLULU, OAHU, Dekemaba 24, 1844. Pepa 18.

KA MAKE O KUAKINI.

Kailua, Dek. 10, 1844.
                E Limaikaika, ua olelo au me Kuakini, Dekemaba 7, iho nei.
                Ma ia po iho, i mai la o Kuakini ia'u, e Davida, o aku la wau, eo; i mai kela ia'u, e hooikaika mai oe ia'u i lana ae ko'u manao.
                I aku au, pehea la kou manao? I mai kela ia'u, ua olelo au me ka'u kumu, me Mi. Tatina; ninau mai oia ia'u, heaha la ka mea i make ai na kanaka? I aku wau, o ke aha la, nau paha e hoakaka mai, no ka mea, he naaupo au; o ke oki no ia, aole i olelo hou mai.
                Alaila ninau aku au, pehea kou manao ia oe? I mai kela, he hewa ka'u hana ana, a me ka'u mihi ana, a me ka'u mau hana a pau imua o ke Akua; no ka mea, aole no i lana ko'u manao, e loaa ke Akua ia'u ma ko'u pono; a me ko'u maikai, aole no au i manao e loaa ke Akua ia'u ma ka'u mau hana maikai, aole loa wau i manao pela.
                Aka, eia wale no ka mea i lana ai ko'u manao, e loaa mai ke Akua i Akua no'u, no ka lokomaikai wale mai o ke Akua, a me ka make ana o kana keiki, a hanini mai kona koko i kalahala no ke ao nei; malaila wale no i lana ai ko'u manao, e aloha mai paha ke Akua.
                Alaila i aku au pela io no, aole no e loaa mai ka pono mai ke Akua mai, ma ka kakou hana ana, aka, ma ka make ana o Iesu e loaa mai ai ka hoomaikai ia mai ke Akua mai, ke hoolilo kakou ia kakou no Iesu; a pau keia olelo a maua.
                I hou mai o Kuakini ia'u, e Davida, o aku la wau, eo, i mai kela, e pule mai oe. Ae aku au, alaila, pule au, a pau ka'u pule ana, alaila pule iho la o Kuakini. I ko'u hoolohe ana aku i kana pule ana, hai aku no oia ma kana hana hewa ana, imua o ke alo o ke Akua, a hai aku oia i ko ke Akua maikai, a me ko ke Akua Hemolele, pela kana pule ana.
                A ma ka la 9 o ua Dekemaba nei, ua nawaliwali loa o Kuakini. Ninau aku au, e Kuakini, ke manao nei oe e hele me Iesu? i mai la oia, ae paha, pela paha. I aku au pela e manao ia Iesu.
                Alaila, hoouna o Kekauluohi, e kii ia Mi. Takina, a hiki mai o Mi. Takina, ninau mai o Takina, e Kuakini aloha oe; ae o Kuakini, ae. I mai o Takina, e hoomakaukau; i mai o Kuakini, ae paha, pela paha, a pau ko Takina ninau ana, alaila, hai oia, a hiki i ka hora eiwa o ke ao, Monede ka la, ma ka hora 9 minuke 20, oia kona wa e make loa ai.
                E ka Nonanona, ua make o Kuakini, ua pau na'lii mua o keia aina.
                E na'lii hou e, e noonoo pono i ka oukou hana ana ma ko oukou aupuni, no ka mea, ua hoopau ke Akua i na'lii kahiko, a ke haawi mai nei i ka hana ma ko oukou mau lima, pehea oukou? i ka pono paha oukou? i ka hewa paha?
                Aloha ino kakou e na'lii, ke hoholo mai nei ka make maluna o makou na kanaka, a maluna no hoi o oukou e na'lii; e pau ana paha kakou i ke poho, a nalowale keia la-