Ka Nonanona, Volume IV, Number 19, 7 January 1845 — Page 92
92 KA NONANONA. (IANUARI,
kekahi hua o keia hana. Eia ka hua. 1. O Ka noho malie o na kamalii. I mai o Haleole ia'u menei. "Mai ka wa o ko lakou hoomaka ana e hoopaa i ka olelo a ke Akua. ua pono ke kula, ua emi ke kolohe, ua hoolohe na haumana, ua malu ke kula, mahuahua ka naauao. 2. Ua hoolohe na kamalii i ko lakou mau makua. Hele oluolu na kamalii i ke kula. Hele pu no hoi me na makua i ka pule kakahiaka. Oluolu na makua haipule i ke ano hou o ka lakou poe keiki. 3. Ua lilo kekahi poe, he poe noonoo, me na makua la. Aole makemake nui i ka paani. Makemake no i ka palapala; heluhelu no a paa naau. Makemake lakou i ka pule. Hele no i ka pule Sabati, a hele no hoi i ka pule kakahiaka. Pule no na kamalii, a kamailio no me na hoahanau ekalesia ma na mea e pono ai ko lakou poe uhane. Ua hiki mai paha ka Uhane Hemolele e hoomaemae i ka naau o na kamalii, a e hookomo ia lakou iloko o ke aupuni o ke Akua.
Pehea na kula Sabati mai Hawaii a Kauai? Pehea ka hana? Ua paa naau anei na haumana i ka ke Akua olelo? I ko'u manao, he hana pono loa ia. E nana oukou i ka Paulo 2: 15—17. 2 Petero 1: 19. Heaha ka hua i loaa mai i ko keia pae aina ke hana na lii, na kanaka, a me na kamalii e like me ka Davida. "Ua huna au i kau olelo iloko o ko'u naau i ole au e hana hewa aku ia oe"? NA'U NA GELINA.
Makawao, Maui Hikina, Dek. 6, 1844.
E na keiki o Haiku:
Aloha nui oukou. Ua olioli maoli kuu naau i keia palapala a Gelina. Aia paha ka Uhane o ke Akua me oukou, e hoohuli ana i ko oukou naau, a he pomaikai lua ole ia; ua oi loa aku i na waiwai a pau o keia ao.
Aka, ea, eia ko'u manao ia oukou.
1. Mai kinai i ka Uhane Hemolele, ma ka hoopaakiki ana i ko oukou naau, a me ka minamina ana i ka hewa iloko o ka naau, a me na hana lealea o ke kino.
2. Alia e manao ua huli io oukou i ke Akua, a ua loaa ka naau hou: alia e manao pela. E akahele loa ma ia wahi, no ka mea, ua piha loa ko oukou naau i ka hoopunipuni a me na hewa a pau: mai paulele iki ia ia. Ua ike au i na kamalii malaila mamua, ua nui ka pule a me ka noonoo a me ka mihi; aka, ua pau i ka hoi hope, a ua lilo ko lakou mihi i mea ole.
Ka oukou kumu mamua. LIMAIKAIKA.
HOKU WELOWELO.
I keia mau la iho nei hoea mai la keia malihini: aia ke kau nei keia hoku ma ke komohana hema; e nana malaila i ka hora 7 o ka po, i ka wa hoa i ke kukui, a ike oukou a pau loa he hoku puhi baka malaila, e kau mai ana.
MAKE POMAIKAI.
I ka la 26 o Dek. iho nei, make o Pika Anikana (Anderson) ma Honolulu nei. He haole Amerika ia, a nui na makahiki o kona noho ana ma keia pae aina. Noho oia me Kamehameha I. a ukuia oia e ia i kekahi mau aina.
Mamua ma ka aoao hewa keia haole, inu rama, kuamuamu, hana ino, a i ka makahiki 1832, loaa ia ia ka makau a me ka noonoo a me ka mihi i kona hewa. Ma ia hope mai komo oia iloko o ka ekalesia mua o Honolulu nei, a ua maemae kona noho hoahanau ana; aole luliluli, aole hihia. Noho malie ia me ka haahaa a me ke akahai; hele mau loa ia i na halawai hoomana a pau; aole halawai haule ia ia a pau kona hele ana.
I kona wa mai hope iho nei, lana loa kona manao ia Kristo; piha loa kona waha i ka olelo hoomaikai i ke Akua, a nui hoi kona aloha i ka poe haipule. Paipai oia i ka poe hele i kona hale e imi i na mea maluna. Olelo mai ia, aole ona mea minamina ma keia ao, o ka hele e noho pu me Iesu kona makemake. A o kona make ua oluolu a me ka pomaikai. Eia kona mau makahiki-74. Elua ana keiki, a he wahine kana e noho nei.