Ka Nonanona, Volume IV, Number 20, 21 January 1845 — Page 95

1845.) KA NONANONA. 95

ia'u oia kana e lawe, ua ninau wale aku ia i na loi ai me ko'u lohe ole. Pau ia. Eia kekahi. O ka noho Luna ana o ke kanaka naaupo maluna o ka poe naauao; aole pono ke noho luna ke kanaka naaupo ma na oihana o ke Aupuni. Pela mai ke kanawai. A i ke Kahukula, pehea la keia Kahukula naaupo i hooliloia ai i Kahukula? A pau na olelo a ka Luna.
                Ninau na Luna Kiekie i ke Kahukula, "Ua hoopoho io no oe i na loi ai e like me ka olelo a ka Luna"? I aku ke Kahu, "i ko'u nana ana i kela mau loi ai, he nui no, he loihi, a he laula, aka aole i kanu pono ia kela mau loi, he kawalawala ke kanu ana, aole pono na puepue o ka lalani, aole oia nei hele e nana pono i ke kanu ana o na loi paahao; he kuhi lani wale no ka ia nei, na ka ia nei mau luna wale no e hana ka paahao.
                Ninau hou na Luna, "ea! Ua lawe wale ka oe i ko ka Luna wahi? Ua hoouna ka oe i au lunakula e kakau i na kanaka pili i ka la paahao"?
                "Ae! penei ko'u mea i hoouna ai. Ua ninau mua aku au ia ia nei i ke dala o ka poalua, hoole mai keia; no ia hoole a ia nei, hoouna au ia'u luna e kakau i ka poe pili i ka la paahao.
                I ko lakou kakau ana i ka poe pili i ka la paahao, ike au he nui loa ke dala i loaa mai. He $100 a keu i na la elua, he $50 a keu i ka la hookahi. No ia hana ana a'u, kapa keia ua lawe au i ko ia nei wahi. Aole o'u manao pela, aka, makemake au e ike i ka nui o na dala i loaa mai no na la paahao, no ka ia nei hoole mai i ke dala.
                Ninau hou na Luna Kiekie ia Keikenui. "Ua lawe wale ka oe i na loi ai me ka lohe ole o ka Luna? I aku ke Kahu," ua lawe au i na loi ai i ka huna o ia hei, ninau aku au ia ia nei i ka ai, hoole mai keia, nolaila, hele au e ninau i ka ai paahao. A loaa ia'u he nui wale na loi; nolaila lawe au i na loi ai me ka lohe ole o ia nei. Ina oia nei e hai mai ia'u, aole au e lawe wale."
                Ninau hou na Luna kiekie. "Ua i mai o Hooliliamanu i ko naaupo, he naapo io no anei oe?" I aku ke Kahu, "he naaupo no au, aole au i ao nui ia ma na oihana naauao a pau. Aka, o ka hiki ana'e o ka palapala a ke Alii ia'u, i ko'u nana ana, e hoolilo mai ana kela palapala ia'u i Kahukula. I ko'u nalu ana, ua hemahema ia mea i ko'u manao. Hele au i ke Kiaaina, a hoike aku i keia palapala. Olelo mai oia, e hana no au e like me ka ololo a ke Alii; Nolaila hana au a hiki i keia la. A loaa ko'u hoopiiia mai e Hooliliamanu, a ke hookolokoloia nei au imua o ke alo o ke Alii, a me na Lunakanawai Kiekie a me na Jure.
                A pau ka olelo a ke Kahu, haawi na Luna Kiekie ia laua i ka lima o na Jure, a lilo ia lakou ka hana no laua.
                A i ka la 17 pau ko lakou imi ana no laua; huiia ka hoopii a me ka lawehala, a me ke Alii a me na Lunakanawai Kiekie. A weheia ka palapala a na Jure, a heluhelu mai la o I. Kapena, e olelo mai ana, "aole i ko ka hoopii, aole i hewa ke kanaka ana i hoopii mai ai." Alaila maopopo i na mea a pau, ua pono o Keikenui. A pau ia, olelo mai la na Luna Kiekie, e hoi ka lawehala a me ka hoopii, a e imi makou i ka uku no kekahi o olua.
                A i ka la 20 o Dekemaba, hai ia mai ka uku o ka Lunaauhau, he $50 dala, oia kona uku ponoi.
                He nui no na hoopii ia manawa, aole nae i kakauia; aole no hoi pau loa na olelo i ke komo i keia pepa.
NA KEAKA.