Ka Nonanona, Volume IV, Number 21, 4 February 1845 — Page 100

101 KA NONANONA. (FEBERUARI,

weli,— kanaiwa kanaka o'u i make.
                Olelo mai lakou he kanalima o lakou i make, aka, ua ike lea ia, ua nui loa ka poe i make.
                Aole o lakou i hahai i na kanaka o'u i kahi hiki ole na pu nui o ka moku; ua ike lakou i ka hope, ina hana lakou peia. Oluolu lakou e hoi i Papeite. Mahope kaua hou lakou, a kaua i ko'u poe kanaka ma Haapape, a me Faaa. Emi ko lakou lanakila ma keia mau wahi, i ko lakou kaua ma Mahaena. Ko lakou moku ahi o ko lakou puuhonua no ia. Nui na mea a Bruat i kakau, no keia mau kaua ana, me he mea la he mau lanakila nui lakou, aka ma ia mau mea ua paupauaho nui na naau o na koa Farani, a ua lana ka manao o ko'u poe kanaka. Oia ka oiaio.
                E ninau oe i kekahi o na haole, ina aole pela; a i ole e ninau i na luna Farani, i ike maka i na kaua, ka poe e olelo mai i ka oiaio. E hoakaka hoi lakou ia oe, i ka mea a'u e olelo aku nei ia oe, aole makemake ko'u poe kanaka i na aoao, a me ka hana a na koa Farani, aole hoi makou i ae i ko na misionari pope. Ua aoia makou e manao, a e manaoio i na mea like ole me ia.
                Aole i loaa kekahi o ko'u poe kanaka ko lakou manao ia, aole hoi i haalele i ka mea ana i manaoio ai i kinohi;—aole au i ike i kekahi, aole na'lii i hoopunipuniia me ka moni. A no ke aha la i hooleiia keia poe maluna o makou me ka hoopaakiki?
                Aka, E ke Alii! he kanaka oiaio oe; a me ka naauao. E hana oe e like me ia mau mea.
                He mea kaumaha keia, a ke olelo nei au me ka ehaeha, ko'u mea e olelo ai; aole au makemake e huna i ka mea uuku loa.
                Aole liuliu mahope o ke kaua hou ma Haapape a me Faaa, eha paha mahina mamua aku nei, a ua pepehiia o Iosepa Lefevre, ke kanaka a'u i olelo ai mamua, e na kanaka o'u, no ka hoomoana o Bunaavia. He kiu oia, a alakai oia i ke kanaka hewa o Major Fergus, no Farani oia, i hoouna ia e Bruat e hopu i kekahi alii o'u; a nui na mea ana i hana ai e kumakaia ai kou poe kanaka, i kona wa i noho ai iwaena o makou.
                Ua pepehiia no hoi o Nicolas, a me kekahi kanaka Farani e ae, aole au i ike ia ia, ma ia manawa hookahi no.
                Aole au hoapono i keia mau pepehi ana; ua pepehia no nae lakou i ka wa kaua, a i ka wa e luku loa ana na koa Farani i na lahuikanaka o'u.
                O ka make ana o keia mau kanaka ekolu, aole ia he mea oluolu ia'u, a ina i pono i kanawai e hoopaiia lakou, e hoopaiia no lakou.
                Ua lohe iho nei makou, aole oluolu oe, E ke Alii i ka Du Petit Thouars hana ana, a ua kauoha oe e hoihoiia mai ko'u aupuni.
                Ua oluolu loa wau i kau hana ana peia, a oia no hoi ka olelo a ko'u poe hoalauna i olelo mai ai ia'u, e hanaia e ke Alii nui a pono o Farani.
                Aka, aole i hoihoi mai o Bruat i ko'u hale a me ko'u aina; aole hoi i kau i ko'u hae; aka ke hana nei oia i na papu, a kukulu hale me ka hoopaakiki no. Ke uku pakahi nei oia i $1,000 no ka makahiki, i na kiaaina, o Tati, Hitoti, a me Paraite.
                Hoole o Utami i kona uku, aole ona uku i keia manawa. Hoolima-