Ka Nonanona, Volume IV, Number 22, 18 February 1845 — Page 107

107 KA NONANONA. (FEBERUARI,

lakou i kahi e pau ai ko makou pilikia.
                Eia ko makou pilikia.
                1. Pilikia loa makou i na kanawai. Ina aihue makou, moekolohe, hakaka, hoopunipuni, aki wahahee, inu uala awaawa, a uwa i ka po, paa makou i ka hao, ukuia makou. E nana mai oukou; aole anei makou i hookaumaha ia i na kanawai?
                2. Manao makou, o ka olelo a ke Akua a me ka naauao kekahi kumu o ko makou pilikia. No ka mea, ua pau na lii a me na luna i ka hahai mamuli o ka ke Akua olelo a me ka hana naauao o Amerika.
                Eia ko makou pilikia; nolaila e aloha mai paha na'lii i ko makou manao malalo iho a e ae mai paha lakou. Eia ko makou manao kuikahi.
                1. E kinai loa ia na kanawai a pau. E hoopau ia ka luna ana, me na makai.
                Eia ka maikai o ia.
                AKAHI: Lanakila loa makou, aole e paa i ka hao, aole e ukuia.
                ALUA: aole e hiki i ka poe noho malie a hana pono ke hooweliweli mai ia makou.
                AKOLU: E hiki ia makou ke puhi rama, inu awa, inu uala awaawa moekolohe, aihue, puhi kauhale, hakaka, hoohaunaele, pepehi kanaka, a lanakila loa, maikai.
                II. E kinai loa ia na kula a me ka naauao a pau.
                No ka mea, akahi; Ina mau ka naauao a naauao loa na luna, poino loa makou.
                ALUA; Aole makau makou i na kanawai, ke naaupo na luna me na lii. Eia ko makou hopohopo, ina e mau ka naauao, mamuli pau keia poe luna naaupo a me na lii naaupo. Oia wale no ka poe i oluolu mai ia makou! Auwe makou! ke hemo lakou.
                Lanakila loa makou ma Hilo i i kela lunakanawai mamua. Aloha wale ia ia! Ke u nei ko makou naau no ka hemo ana o ko makou makamaka: ko makou hoaaloha, ko makou puuhonua. Pilikia loa makou nei ia Puuloa laua o Kaiwi; manao makou, o ko laua hahai ana i ka olelo a ke Akua me ka naauao ke kumu o ko laua oluolu ole ia makou i keia wa; ina manao makou e inu a ona, e moekolohe, e inu uala, aia maloko loa o ka oi ka pono! aole e hiki ke hana ma kauhale e like me ka wa mamua. Ia wa lanakila loa makou.
                III. E kinai loa ia ka olelo a ke Akua a me ka sabati.
                Eia ka pono o ia manao.
                AKAHI. Heluhelu na'lii i ka ke Akua olelo a makau lakou i ka hewa.
                ALUA. Aia na kanaka ma ka ke Akua olelo e hoowahawaha lakou i ka makou oihana; kue lakou ia makou.
                AKOLU. O ka poe hahai i ka olelo a ke Akua, ikaika lakou e hoomalu. Iini lakou e pau na hana ino a e noho pono na kanaka me na lii a e ikaika na kanawai.
                AHA. Ma ka sabati ua hoakoakoa na kahunapule i na kanaka a me na na'lii e ao ia lakou ma ka olelo a ke Akua.
                ALIMA. Ina lanakila ia hana, alaila pio loa ka makou oihana.
                Nolaila ea! Mahalo makou i na aina pope, no ka mea, ua lohe makou, ua kinai loa ia ka olelo a ke Akua malaila, a me ka sabati, aohe malamaia ka sabati ma na aina