Ka Nonanona, Volume IV, Number 22, 18 February 1845 — Page 110

1845.) KA NONANONA. 110

mawaho e walaau ae, ina ua wela pu kekahi ma ko lakou hale, no ka pauhia i ka hiamoe.
                Aole nae i lilo ke ola o kekahi, o ka waiwai wale no.
                Ahea la e ao na kanaka a "paulele i na mea o luna, aole i na mea ma ka honua nei."
                Ahea la hoi e ao lakou, o ka baka ka mea e poho ai? No ke ahi baka, nui na hale, nui ka waiwai i pau wale.  NA FOREBE.
Kealakekua, Dekemaba 10, 1844.

ANA HEWA.

Kona, Hawaii, Dek. 23, 1844.
                Aloha oe e ka Nonanona,—
                He palapala hoakaka keia ia oe; ka lunawaiwai o Kona, ua hana paewaewa i ka ia lole, aole like me ke ana o Masakuseta. Lawe makou i ka lole e hookaa i ko makou makamaka. Ia no ka luna i kona Ia, aole i pono, poho ka lole. Hoohewa makou ia ia, ua ana makou i ka lole ma ke ana o Masakuseta a ua pololei.
                Lalau oia i ka palapala hoolilo luna nona, a heluhelu penei; "Ke hoolilo aku nei au a me ke Kuhina malalo, o'u ia Kawaihoa i lunaauhau ma Kona: ma kona pono, malaila wale no e hana'ku ai." Lalau Kawaihoa i ka Ia a ana oia ma kona lima. Aia, ua ike makou, pokole ka Ia, a loloa kona lima.
                Ua oi aku nae kona Ia mamua o ka Ia pono; 1 1/2 iniha ka oi ana'ku. Ua pau hoi ko Kona i ke anaia mahope o kona ia pono ole. A huipuia na kanaka o Kona, nui na dala i poho ia ia.
                Aole anei e pono ke uku papalua mai oia, ia mau dala i poho; no ka mea pela ka uku o na kanaka ke kaa ole ko lakou kino?
                Eia ko makou manao; o ka olelo o ke kanawai, e uku paha ia ka mea ana pono ole, me he aihue la. KALENA.
KAPA.
G. W. LILIKALANI.

                E Lilikalani ma;—
                Ua ike oukou i ka hewa o ka Luna, no ke aha la, aole oukou i hoopii imua o na lunakanawai, a o ke Kiaaina paha?
                A ina i pono ole ia lakou, alaila e hoopii imua o na Lunakanawai Kiekie. Aole makemake ka Moi a me na'lii e hana paewaewa na lunaauhau; aole loa. A ina i lohe lakou i keia pilikia, e hiki no ia lakou ke hooponopono iho.
                E Kawaihoa, pehea keia olelo a Lilikalani ma? oiaio anei? e hoakaka mai oe. Ina he oiaio, hewa loa oe, ina aole, e hoakaka mai oe.

NO KA OIHANA MARE. HELU 1.

                KA PONO O KA OIHANA MARE. No ke Akua mai keia oihana. I ka ke Akua hana mua ana i ke kanaka, "hana mai la ia i kane a i wahine."
                I aku la ia, "E haalele aku ke kanaka i kona makuakane a me kona makuwahine, a e pili aku oia i kana wahine: a e lilo laua i io hookahi." Kinohi 2: 24.
                Olelo mai la hoi o Iesu; Nolaila hoi e haalele ai ke kanaka i kona makuakane a me kona makuahine, a e hoopili ia i kana wahine; a e lilo no laua elua i hookahi; no ia mea, aole elua hou aku laua, aka, hoakahi wale no io. O ka mea a ke Akua e hoopili mai ai, mai hoohemo ae ke kanaka." Mar. 10: 7—9. I mai hoi o Paulo; "E mahaloia ka mare no na mea a pau, a e hoopaumaele ole ia hoi kahi moe: no ka mea, e hoowahawaha mai ana no ke Akua i ka poe hoopiopio, a me ka poe moe kolohe." Heb. 13: 4.
                Ma keia mau olelo, ua maopopo, na ke Akua mai keia oihana; nolaila, he oihana maikai, he mea ia e pono ai na kanaka. Eia kekahi mau mea e maopopo ai ka pono o keia oihana,
                1. He mea ia e mahuahua ai na kanaka. Kauoha mai la ke Akua ia Adamu ma, "E hoohua ae olua, e hoolaha hoi, e hoopiha i ka ho-