Ka Nonanona, Volume IV, Number 23, 4 March 1845 — Page 104

KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." SOLOMONA.
Buke 4. HONOLULU, OAHU, MAAKI 4, 1845. Pepa 23

KA MAKE ANA O REV. S. DIBELA.

                I ka la 22 o Ianuari i hala ae nei, make aku la Rev. S. Dibela, ma kona hale i Lahainaluna, i ke 36 makahiki o kona ola ana.
                Oia ke kahunapule mua ka i make ma Hawaii nei, o na misionari a pau i hele mai i keia pae aina.
                Ua hanau oia ma Nu Ioka Ian. 26 1809. He umikumamakahi mau keiki o kona makuwahine, a ua make ka nui o lakou i ka mai o ke akemama.
                Huli no o Dibela nei i ke Akua a lilo i haipule i kona wa kamalii, he umi paha kona mau makahiki ia manawa. I ka 15 o kona mau makahiki, komo oia i ke Kulanui o Hamitolo i Nu Ioka, a noho malaila eha mau makahiki. Alaila, komo koke aku la i ke kula kahuna ma Aubuna; ekolu makahiki i noho ai oia malaila, a lilo i kahunapule. Nui iho la kona aloha i ko na aina pouli, a paa iho la kona manao e hele io lakou la e hai aku i ke ola ma o Iesu Kristo la. Ua kohoia mai ia e hele mai i Hawaii nei, a holo mai la no ia me Baluina a me Tineka ma, a hiki ia nei i ka makahiki 1831.
                Hoonohoia mai oia ma Hilo i Hawaii. Nui ko laila poe i ike i kona ikaika e ao aku i na kanaka mai Hilo a Kau i na makahiki ekolu.
                Loohia oia i ka mai ma kela aina ua, a holo mai la i Lahaina; a mahope iho, ua hoonohoia oia ma Lahainaluna, e kokua ma ke Kulanui. Ua ike na haumana o ia kula i kona makemake nui ma ia hana. Iloko o ka nawaliwali o ke kino, he ikaika no kana hana. Nui kana mau palapala i kakau ai, i mea e naauao ai na kanaka o keia pae aina.
                I ka makahiki 1837 make aku la kana wahine i Lahainaluna; a hala kekahi mau malama, hu ke koko o ke akemama o Dibela, maopopo iho la ka pono e hoi hou ai oia i Amerika, i ikaika hou kona kino. Hoi aku la no ia, a noho iho la malaila i hookahi makahiki, e kaapuni ana i ka aina, e hooikaika ana i na haipule e imi i ke ola o ko na aina naaupo.
                Mare hou aku la oia, a hoi hou mai la i Hawaii nei, a hiki mai i ka makahiki 1840. Hoomaka hou iho la i kana hana i Lahainaluna. Malaila oia i hooikaika ai ma na mea e pomaikai ai o Hawaii nei, a hiki i ka malama o Augate o keia makahiki i hala aku nei. Ia manawa hu hou mai ke koko; imi na kahunalapaau e hoopaa: aole i paa; hu hou no, a nui kona nawaliwali; he oluolu nae kona naau e hilinai ana maluna o ka Haku. A hala na malama elua, hoi iki mai la kona ikaika; ee hou maluna o ka lio, hoomaka hou no hoi i kana hana ma ke kula; aka, ua paa ka mole o ka mai iloko ona. I ka malama o Okatoba, hu hou ke koko, a hu pinepine, a aneane e nawaliwali loa. Mohala iki no nae, a noho iluna a hele mai kekahi keena a i kekahi. I ka malama o Detemaba, malama pu kekahi poe hoahanau me ia i ka ahaaina a ka Haku. Hauoli no ia iloko o ia hana, o kona noho ana no ia me na hoahanau ma ko honua nei ma ka papaaina a ka