Ka Nonanona, Volume IV, Number 24, 18 March 1845 — Page 113
113 KA NONANONA. (MARAKI,
i manao oluolu kekahi i kekahi, i lilo laua elua i hoakahi.
4. I hookahi ka pomaikai e imi ai. Ina i imi okoa ke kane i kona pomaikai, a imi okoa ka wahine i kona pomaikai, aole pono, aole oluolu ka noho pu ana. Ina imi ke kane i kona pomaikai ma ka hana uhauha a lealea hewa, aole pono ka wahine ke kokua aku ia ia malaila, no ka mea, e lilo ia pomaikai i mea e make ai. E pono e imi laua elua i ka pomaikai hookahi ma ka noho pono ana, ma ka imi naauao ana, ma ka malama ana i na keiki, ma ka noho haipule ana, alaila, oluolu ka noho pu ana, a loaa mai ka pomaikai io.
Ina i lilo na mea mare elua i hookahi ma keia mau mea eha, alaila, pomaikai no laua ma ka noho mare ana, lilo no keia oihana a ke Akua i mea e oluolu ai, a e pomaikai ai. E noonoo oukou, e ka poe mare, a hana naauao.
KA MAKE ANA O BATESEPA PUHIA, KA WAHINE A D. MALO.
Keauhou, Hawaii, Ianuari 6, 1845.
E ka Nonanona e. Ua make o Batesepa Puhia ka'u wahine, ma ka la elima o Ianuari, ma ka hora elima o ka po kapu a ao ae noa, oia no kona wa i make ai.
He wahine hemahema ia i ka haipule ma na makahiki ona i mai ole ai, he palaka kona ano ia wa; he ano apiki kona: aka, no ka hooikaika nui o kana kane ia ia, e hoopau i kela ano ona, ua pau no.
He umi ona mau makahiki maloko o ka ekalesia, aole nae i ike ia kona ikaika nui ma ka haipule, a ma ka umi o kona makahiki maloko o ka ekalesia, loaa oia i ka mai, he mai nui loa.
Alaila, paipai aku au ia ia e pule oia, a e hoomakaukau no kona make ana, a ae mai no oia, a pule no oia me ke ano oiaio.
A, ekolu makahiki o kona mai ana, ma keia mau makahiki ekolu, ua maopopo ia'u, he haipule no ia ma keia mau makahiki. Ua manao nui oia ma ko Iesu kea, ua hookokoke aku oia i ka make maloko o Iesu, pule pinepine au me ia ma ko maua wahi moe a hiki i kona wa i make ai, pau ka maua pule pu ana me ia, hele aku no ia, a noho no hoi au.
Eia kekahi mau mea pono ona a'u e manao nei ia ia, o kona kokua pu i ka'u mau hana, aole ona koi nui mai ma kona makemake wale no, ke ike oia he hana ka'u, aole e huhu mai, aole e nuku mai, aole e hoeha mai.
He iwakaluakumamakolu ko maua mau makahiki i noho pu ai me ia mai ko maua hoao ana mai; aole oia i hoino mai ia'u, he umi a me kumamakolu paha ona mau makahiki maloko o ka ekalesia, aole maua i kue me ia; ua pumahana ke aloha mawaena o maua, a hiki i kona wa i hele aku ai.
EIA KONA WAHI MELE KANIKAU.
Oialoha kia i ka'ula haili aka;
I ke ohana lau opua haili aloha;
He ae he aka.
He aka he haili aloha no kuu wahine;
E ie.
Kuu wahine mai ka ua lilipua;
Mai ka ua lililehua hee koko.
Ma ka'u pili hee koko ula i ke kula;
Ua ka na ula wai ka naha e.
Naha kaawale ka pili me ka wahine;
Me kuu wahine aloha i nalo aku la.
I hele hookahi aku nei, aole;
Aole ke ho e; ie.
Kuu hoapili i ka ua ulalena;
He ua ulalena leno Lilikoi.