Ka Naʻi Aupuni, Volume I, Number 44, 17 January 1906 — Ko Kakou Moolelo Hawaii Kahiko. [ARTICLE]

Ko Kakou Moolelo Hawaii Kahiko.

He mea na makou i minamina nui i keia wa, ma ka hoomaopopo ana iho, he lahui kakou i nele maoli i ko kakou moolelo Hawaii kahiko; aole hoi i paa maloko o kekahi buke a mau buke paha i paiia ma ka kakou olelo makuahine maoli. Ia makou e hoopuka nei i ka moolelo o Kamehameha I, ua loaa na mea e hoouluia mai ai ko makou mau noonoo no na mea e pili ana i ko kakou moolelo Ha- waii kahi o. Ke hoomanao nei makou, ua kakau o S.M. Kamakau i kana moolelo Hawaii a ua hoolahaia ma na Nupepa Kuokoa ame ke Au Okoa; aka, ua nalowale ia mau Nupepa mai loko aku o na home Hawaii o keia mau la; nolaila, ua hooneleia mai kakou o keia au i kela moolelo waiwai nui o ko kakou aina nei; ka moolelo i imiia a i huli hoomanawanui ia e kela kanaka kakau moolelo kaulana o Hawaii nei. O ka moolelo Hawaii a Davida Malo i paa ma kana buke kakaulima, ua {illegible} ae nei ia ma ka Olelo Beritania a eia kela buke i kapaia, "Hawaiian Antiquities" maloko o ke Kula Kamehameha. O ka loaa ana he moolelo Hawaii kahiko ia kakou ma ka kakou olelo ponoi, oia ka mea waiwai nui; a ke lana nei ko makou manao e haawi i na hoao ana e loaa he mau mahele o keia moolelo ma keia mua aku.