Ka Naʻi Aupuni, Volume I, Number 66, 12 February 1906 — Na Leo Ohohia No Ka Na'i Aupuni. HE MAU HOAKAKA NO KA LAHUI HAWAII. [ARTICLE]

Na Leo Ohohia No Ka Na'i Aupuni.

HE MAU HOAKAKA NO KA LAHUI HAWAII.

Hoomauia. Nolaila, e kuu lahui, ina eia no ke pumehana nei ke aloha o kakou ia kakou iho, ano ka wa e mihi ai imua o ke Akua no ka hoole ana o kakou i ka mea Ana i haawi mai ai (kumu honua no ka lahui Hawaii) no kakou, a ina e ike ole ana ka lahui, alaila, ua paa ka noho pio ana o ka ka lahui, nolaila ke waiho aku nei au i keia imua o kuu lahui e imi a e hookuku iho i keia Mokuna Baibala ma Halelu 53. E nana iho i ka mokuna holookoa. Na kela a me keia e hoomaopopo nona iho, a ina e hoomaopopo pono, alaila e loaa ana ia kakou ka ulu hou ana o ka lahui, ka nohona kuokoa, ka lako a me ka pomaikai a e makau ana i na hana pono ole a me ka hoino wale aku i kela a me keia, noho iloko o ka maluhia, a hemo pu ka hipuu i nakii ia no ka ma'i hookaawale ohana, a moe kahi ka manao o ka lahui ma na hana a pau i ku i ka pono (e ku-e ole ana i ke Akua). E hoihoi hou mai no ke Akua i ko kakou a pili me kakou, a me ko kakou mau pono kumu i lilo i na lahui e. O ka mihi me ka oiaio, oia ka laau hoola no kakou a pau (a eia nae, aole o ka mihi i keia la apopo hana hewa hou, aole ia he mihi oiaio) me ka manao e hana hou ole aku i ka mea i ike ai i ka hewa. A ke nonoi nei au i ke Akua Kahikolu e kau mai Kona aloha maluna o kakou apau loa, a e launa mai Kona Uhane Hemolele no ka wa mau loa. Amene. No kou manao e Mr. Lunahooponopono. Ua lawa na kumu hooia i hoikeia'ae nei mamua. O ka mea hoole i ke kumu kahiko a ke Akua i haawi mai ai i ko kakou mau kupuna, oia no ko kakou hoole ana i ke Akua, a hoole pu iho la aohe o kakou kumu. Ina e huli aku ana oe e Mr. L. H. me ka akahele e loaa ana no ia oe he mea oiaio keia. Me ke aloha no ia oe e ka Lunahooponopono a me na keiki o ka papa kahuihuli a pela hoi me ka Ona. Kou oiaio, J. KAUAHIULAWENAOKALUA.

Eia mai no KA NA'I AUPUNI, me ka Ui Palekoki Uwila. He ui hoi kau i ka Ui Hapa Paniolu!