Ka Naʻi Aupuni, Volume I, Number 66, 12 February 1906 — Ka Pono e Pono ai ke hanaia. [ARTICLE]

Ka Pono e Pono ai ke hanaia.

I ka hoomananao ana ae o ke kanaka Roma i kekahi o na olelo kaulana o kona aina makuahine, ka aina hoi o kona mau makua ame na kupuna, aole ana e ole kona haili haupu ana ae i keia mau mamala olelo: "Fiat Justitia, ruat cælum," a ma ka olelo hoi a ka oiwi ponoi o Hawaii, "O ka Pono ke hanaia a haule mai na Lani." O na koii koi ana ae a ka manao o ke kanaka e imi, e huli a e lapulapu i na mea e oluolu ai ka nohona a e maha ai oia mai na inea mai a ka anai ana a ka nele ame ka hune, he "Pono" no ia e "pono ai ke hanaia. O ko ke kanaka na'i ana ma na hana e lilo ai oia he makaainana hoopono a hoowaiwai hoi i ka aina ame ke aupuni ana i noho makaainana ai, he "Pono" no ia "e pono ai ke hanaia." O ke aloha i ka aina, ke aloha i ka home, ke aloha i ka lahui ame ke aloha o ke kanaka iaia iho, he mau "Pono" no ia "e pono ai ke hanaia." A ua kupono hoi ia i ka hookaau ana a ko Hawaii haku mele: "Pono oe, pono au, pono pu hoi kaua." Aka, ma ka nana ana i ka manao honua maoli o ka makia o Roma i hoikeia ae la, ua pili no ka Pono i manaoia malaila, oia hoi ke "Justitia" i ka Pono Kaulike maoli i pono ke hanaia mawaena o ka hoa kanaka ame ka hoa kanaka, o ka oi aku nae ka mana hoomalu a kiai aupuni me kona mau makaainana. Aole no nae, he hewa ke hooliloia keia Pono i kahua no ka imi pomaikai ana o ke kanaka ma ke ano pili makaainana no kona mau pono noho lanakila maluna o na hana o kona aina hanau iho, oia ka Pono a makou i hookaukoo ae la, e hanaia e kakou e pono ai.