Ka Naʻi Aupuni, Volume I, Number 67, 13 February 1906 — PUHI IA E KA MAKANI KONA, A PAE OLULO I KE ONE O KAPUEOKAHI, KAIHALULU I KE ALO O KAUIKI. [ARTICLE]

PUHI IA E KA MAKANI KONA, A PAE OLULO I KE ONE O KAPUEOKAHI, KAIHALULU I KE ALO O KAUIKI.

Hoomau ana. Ma ka hora 8 oia kakahiaka Poalima, ike aku la makou he wahi puu me ka lae e oni ae ana i ke kai, hoopuka ae nei au, o kahi puu kela o Haleolono, o ka lae iho kela o Kalaau, eia kakou mawaena o Molokai ame Oahu, ia manawa, hooholo like ae nei na manao o makou me ke Kapena Kaaikaula, ma kahi a kakou e ike la i ka aina, malaila kakou e holo ai. Ia wa kukulu ke kia, a o kahi pe'a ihu wale no, he hora paha a oi keia holo ana o makou, oia mau ko liuliu no o ua puu nei me ka lae pane mai nei ke kapena, kulai ke kia a huki ka pe'a ihu. Me ka eleu keia hana ana, li ka pe'a, o ka halakika mai la no ia iluna o na ale, a ma ka'u hoomaopopo iho, ua hapa ka holo o Maunaloa me Kinau i ko makou pakela pakika launa ole mai iluna o na ale, e pae ana makou elua a ekolu ale, alo ae ana, a akahi no au a ike i ke akamai o Kapena Nautilo Kaaikaula, iloko oia makani kuakea o ka moana me na ale kawahawaha e ku lalani mai ana mahope o ko makou halelana (waapa) pulewa i ka moana, he puupale wale no ia i ke keiki holo moana o ke kai o Pailolo mai kona mau la opio mai a hiki i kona elemakule ana i ke kai. I keia wa, ke kiekie loa mai la ka puu, a ke moakaka loa mai la ka lae, pane anei au; oia ka kakou ke iho nei i Kauai, olelo mai nei o Paaoao, ia po no a ao hiki kakou i Kauai, oiai ke paa nei no ka aina i ka noe. Aohe no he ikeia o Maunakea ma, oiai ke uhi pouli nei no ka aina, ia wa pu-a mai la ka wahi o ka hale wili o Hana, alaila, o ka lae io no kela o Kalaau, a o Maunaloa kela e pii mai nei, a e hoopololei ae ko kakou ihu ilaila, oiai, o ka Pualiula keia. Me ka piha hauoli makou a pau, me na huaolelo, laki maoli kakou.