Ka Naʻi Aupuni, Volume I, Number 85, 6 March 1906 — KA MOOLELO O Hiiaka-i-ka-poli-o=pele KA WAHINE I KA HIKINA A KA LA, A O KA UI PALEKOKI UWILA O HALEMA'UMA'U [ARTICLE]

KA MOOLELO o Hiiaka-i-ka-poli-o-pele

KA WAHINE I KA HIKINA A KA LA, A O KA UI PALEKOKI UWILA O HALEMA'UMA'U

"Ua pono," wahi a Hiiaka i pane mai ai me ka hoomau hou ana mai: ''Helu ekahi kaua maluna o ka make. A nolaila, e kahea au i ke kane a kakou." " E Lohiau-ipo—e! Pehea oe?" Pane ae la ka leo o Lohiau mai loko ae o ka ipu puniu e paa ia ana e Hiiaka: "Kuu wahi—ne! I nui ke aho a hui aku kaua he maka no a he maka i ke kai o Kolokini." Ia wa uhau hou iho la no o Hiiaka i keia pule: KAU HOOKAHI HANERI AME EONO O KA MOOLELO O HIIAKA. 1 Kulia e Uli, ka pule ia Kananaola 2 Kulia i Kealohilani 3 Imihia kupua o luna nei 4 Owai kupua o luna nei? 5 O Ilio uli, o Kalani 6 O Ilio ehu, o Ku, o ke Ao iki 7 O Ku, ke Ao loa 8 O Ku, ke Ao poko 9 O Ku, ke Ao awihiwihi ula o Kalani 10 O kanaka o ka mauna 11 Na hoa o ka ululaau 12 Ha Keololani 13 I ku ai e Laka 14 O Makaapule 15 Kahe ka wai o Nahoalii 16 Nei wale ka pili mokomoko 17 Wawa o kupinai 18 O Ku-wawa 19 O Ku-haili-moa 20 O Haihai-lauahea 21 O na wahine i kapa-ku 22 I kapa eleele 23 Na ke aloha i kono e hele 24 Hele mai la au, o Hiiaka 25 I ke aloha a ka hanau 26 Hanau ke ola— 27 E ola hoi 28 A ola—a—ola—e. Pau no keia pule a Hiiaka, huli mai la ia, a ninau mai la i ke aikane: "Pehea kuu pule?" He a maikai wale no ka Wahineomao i ka pule a ke aikane a Hiiaka. "Ae, helu elua ka kaua maikai, alua no hoi ko kaua lanakila maluna o ka make." Alaila, kahea iho la no o Hiiaka i ka uhane o Lohiau:

"E Lohiau-ipo—e! Pehea oe?" Alaila, pane ae la no ka leo o Lohiau: "Kulia imua i ka nuu. Moea i ke kai o ka haku o kaua." Ia wa paeaea hou aku la no o Hiiaka i keia kau. KAU HOOKAHI HANERI AME EHIKU O KA MOOLELO O HIIAKA. 1 A ka luna i Kilauea 2 A Wahinekapu i ka lua 3 Kapu na Papa elima o ka lua 4 Kapu Kilauea i ke ahi a ka wahine 5 Kapu ia Kamohoalii, he alii hanau kapu 6 E hoi ae au e ike me kuu haku, 7 Ke hakuikui mai nei ka lani, 8 Owaowa ka honua 9 Ua moe kanaka kai o ka honua 10 Ua ala kukui a Kane 11 Kane-po hooulu mai 12 He hiamoe kapu kou hoala ana 13 E ala e Kahiki-ku 14 E ala e Kahiki-moe 15 E ala hoi au 16 Ua hiki mai oe 17 Ua ala ka lani 18 Ua ala ka honua 19 Ua ala ka uka 20 Ua ala ka kai 21 Akahi la o ke aloha i hiki mai ai 22 Ke hoonaue nei, naue kuu houpo 23 I ka houpo ka lele hewa a Kane 24 Ilaila ke kiai hoihoi aina 25 Ala a moe i ke kai o ko haku 26 Ala mai no—e 27 Eia au o Hiiaka 28 Ala mai hoi 29 I—e. Holo—e. [Aole i pau.] O ka poe hookaa mua ma no ka mahina hookahi, ekolu mahina, eono mahina, a makahiki hookahi no ke ola o KA NA'I AUPUNI, no ia mau wa, 75 keneta, ka $2.00, ka $4.00 ame $8.00. O na poe kaulua i ka hookaa ana a ia apau ka mahina hookahi, e uku lakou i $1.00 ma ka Poakahi o ka pule e pau ai ia mahina Aole aeia ka aie a oi aku mamua o hookahi mahina.