Ka Naʻi Aupuni, Volume I, Number 152, 23 May 1906 — KA Moolelo Hawaii Kahiko. [ARTICLE]

KA Moolelo Hawaii Kahiko.

(ANCIENT HISTORY OF HAWAII.) Hoomakaukauia e J. M. Poepoe no KA NA'I AUPUNI. MOKUNA III. (Hoomauia.) I aiwa-iwa no Haumea i ka noho Nonoho I na moopuaa I ka momoe i na keiki Moe moopuna kualima aku ilaila Moe moopuna kuaono mai ia nei Moe kuahiku aku ilaila Moe moopuna kuawalu mai ia nei Moe moopuna kuaiwa aku ilaila Moe moopuna kuaumi mai ia nei Moe keiki ia Kauakahi o Kuaimehani ka wahine Moe moopuna ia Kauahulihonua O Hulihonua ka wahine Moe moopmia ia Haloa, o Hinamanoulua'e ka wahine Moe moopuna ia Waia, o Huhune ka wahine Moe moopuna ia Hinanalo, o Haunuu ka wahine, Moe moopuna ia Nanakahili, o Haulani ka wahine Moe moopuna ia Wailoa, o Hikapuanaiea ka wahine Hanau o Kio, ikea o Haumea Ikea o Haumea, he pi-alualu Hookahi no; he lehu ka inoa Lehu ka lani, menehune na liko na lau. *** *** O keia ke mele a ka poe kahiko, e hoike ana i ko Haumea noho ana i Kalihi a iho i kai nei lilo 'i oia i ulu, a kapaia kela kino ulu, o Kamehaikana. E kakoo ana keia mele i ka mae i hoikeia ma ka moolelo e pili ana i ko Haumea iho ana mai uka mai o Kalihi a hoea i Waikahalulu ae nei, kahi ona ame Wakea, kana kane i komo ai iloko o ka ulu; a kapaia ai ka ulu o Kamehaikana; a oia hoi ke kino ulu o Haumea. A ma keia wahi aku o ka kaua moolelo, e ka makamaka heluhelu, e hoomau ai kaua i ka nana i ka moolelo o Wakea ame Haumea. A e nana ae kaua i ka haakai a ka elele i hoouna ai e ka ilamuku o Kumuhonua 'la. *** *** I ka hoea ana aku o ka elele imua o Kumuhonua, ia wa no oia i ninau mai ai i ua wahi elele nei, "Pehea mai la ke pio a oukou?" (E HOOMAUIA AKU ANA)