Ka Naʻi Aupuni, Volume II, Number 60, 11 August 1906 — Kela Ame Keia. [ARTICLE]

Kela Ame Keia.

KAHILIAULANI KA ELELE I WASINETONA. Noenoe kilihune ua liilii o Kamanuwai i kakahiaka nui nei. O Honolulu me Punahou, Kamehameha me Oahu, na keiki olohu poka o Hinakahua i keia auina la. Ke pii ae nei ke ola kino maikai o Kapena Elena o ka Mauna Loa mahope iho o ke oki-ia ana e na kauka. Mahalo. Ma ka la inehinei i haalele mai ai ka mokukuna Mary E. Foster no Kapalakiko me ka piha kopaa. He nui k aua o Kauai i keia pule wahi a na leta a na makamaka. He 8 iniha ua ma Hanalei. Ma ka la inehinei i hooloheia ai ka hihia o na kepani pepehi kanaka o Ewa, a ua hoomoe ia a keia Poalua ae. E kukuluia aha ka hale hana uwila o Kauai i ke awawa o Wainiha, alaila, holo ka uwila a olapa i Eleele. He olelo hooholo hoohalahala ka na Repubalika o ka Mahele 4 Apana 5, i ka hookohu hope makai nui a Ilamuku Hanare no Waianae. Pehea ana la nei Repubalika? He hulahula Europa ko Kahiliaulani Hall i keia ahiahi. Ke konoia nei ka poe puni le'ale'a e naue nui mai e ike i ka "Po Le'a o Halalii!" Eleu mai.