Ka Naʻi Aupuni, Volume III, Number 45, 4 March 1907 — Na Bila Kanawai Hou a ka Home Rula. [ARTICLE]

Na Bila Kanawai Hou a ka Home Rula.

Ma ka noho ana o ka Hale o na Lunamakaainana ma ka Poalua aku nei, Feb. 26, i waiho aku ai o Hon. H. M. Kaniho i kekahi mau Bila Kanawai a ke Komite haku kanawai o ka Aoao Kuokoa Home Rula i hoomakaukau ai elike tne ke Kahua Hana a ia Aoao. 1. He Bila Kanawai e hoomaopopo ana i ka poe hiki e kiola loa ia no ke kahua ma'i Lepera ma Molokai, a wahi e ae paha a ka Papa Ola e hookaawale ai no ia poe, oia hoi, oia na poe ma'i lepera i hoohikiia ma ka palapala af[i]devita a kekahi mea i pili i ka Papa Ola a e lawelawe ana malalo o ka mana oia Papa, e hooia aua he ma'i lepera ko ua kanaka la i hiki ke hoolaha aku i ua ma'i lepera nei i kahi mea okoa aku, a he ma'i hoi ia i hiki ole ke hoolaia. A e hoopau loa ana keia kanawai i ka mana o na kanawai apau, na rula a hooponopono hoi a ka Papa Oia i kue i na olelo o keia kanawai.

Ha kanawai hou loa keia akahi no a hookomoia iloko o kekahi noho ana a ko Hawaii nei Ahaolelo. A he hooko ana keia a ka Aoao Kuokua Home Rula i kana kahua hana o keia kau koho balota aku nei i hala. 2 He kanawai e hoololi ana i ka Pauku 1013 o ua kanawai Hooponoponoia, e pili ana i ke o i na keiki liiiii; oia hoi, aia no i ka makemake o ka mea nana ke keiki e hiki e lawe aku e o. A e hoopau loa ana i na Pauku 1017 me 1018 o ua kanawai la, pili i na hoopai. Na Hon. S. K. Mahoe i hookomo akku i ka Bila Kanawai e hoihoi ana i na loaa koina me hoopai o na Aha Hookolokolo apana, pela me kekahi mau loaa e ae o loko o ke Klana iloko o ka waihona o ke Kalana i hoiia mai ai ia mau loaa. Eia ke komite hooponopono kanawai o ka Aoao Kuokoa Home Rula ke hoomakaukau nei i ka Biia Kanawai no ke kohoia o na Luna Helu me Luna Ohi Auhau.