Ka Nupepa Elele, Volume X, Number 7, 1 September 1888 — Ka Ahahui Elele. [ARTICLE]

Ka Ahahui Elele.

Ma ka helu o kela pule aku nei o ka ELELE ua noi malie aku makou, me ke akahai, i na makamaka e hui pu a e kokua pu mai me makou e kukulu i Ahahui Hawaii kuka pili Aupuni no ka pono pilikino o na Hawaii a pau. Ua hoomaopopo no ko makou poe makamaka heluhelu i ke ELELE mai ko makou manawa i lawe ae ai i keia nupepa, i ko makou kalai mau i ke kupono e hoala ia kekahi ano Ahahui mawaena o na Hawaii, i hiki ai ia la-

kou ke kuka a noonoo no ko lakou mau pono a me na kumu pilikia paha. O na ano lahui o na aina e iwaena o kakou he mau Ahahui ko lakou, a heaha hoi ke kumu e nele ai ka Hawaii? O ka hana nui i manao ia no keia mau ano Ahahui, oia no keia: Ua makemake kela me keia ano lahui e loaa ia lakou kekahi leo mana ma na hooponopono ia ana o ke Aupuni; ua makemake lakou e komo ko lakou ano lahui iloko oia poai. Makemake ka poe Amerika i kekahi kanaka o ko lakou lahui iwaena o ka Ahahui kuka pili Aupuni o ka aina; a pela no me ka lahui Beretania; a pela me kekahi mau lahui e ae; a pela aku ana no ke Pukiki. He mau Ahahui ko keia mau ano lahui, a malaila e kuka-

kuka ia ai na kumuhana a me na ninau pili i ka pono o ko lakou mau lahui pakahi, a e ulu mai auanei na noonoo a me na hookele ana no ko lakou mau pono. O ke kanaka hupo wale no ke ike ole ana i ka pono a me ka maikai o ka makou mau kuhikuhi i ka Lahui Hawaii—e kukulu i kekahi hana no ko lakou pono iho. A o ka hoike kupono loa a makou e waiho aku nei no ka pono o na kalai ana a ka ELELE, oia keia. Eia i keia la ka mana a pau o ke Aupuni Hawaii, malalo o na haole, a he poe kakauha wale no. He poe ma ko makou ano haole i hoowahawaha ma na mea pili Aupuni. Aole loa o makou manao a hilinai he poe hana oiaio a hana pono lakou. Ma ko makou manao, he poe hao a pakaha lakou i na mea a pau a lakou e ike ana no ko lakou mau pomaikai pilikino, a aole loa o lakou wahi lihi manao iki no ka Lahui Hawaii aloha a akahai. O ke kumu a makou i poloai aku ai i na makamaka Hawaii e hui a e kuka pu, i hoakaka ia'ku ai a kuhikuhi ia'ku hoi i ka mea a makou i manao ai he hoonaauao kiekie ae i ka Lahui Hawaii ma na mea pili kalai Aupuni.