Ka Nupepa Elele, Volume X, Number 19, 24 November 1888 — Na Kanawai a me ke Kumuhana o ka Ahahui Kalaiaina Hawaii. [ARTICLE]

Na Kanawai a me ke Kumuhana o ka Ahahui Kalaiaina Hawaii.

1. E ikeia, a e kapaia keia Ahahui o ka "Hui Kalaiaina Hawaii." 2. O ka poe a pau i kuleana, a i ole e loaa aku ana paha ke kuleana mahope aku, no ke koho ana i na Alii a me ua Lunamakaainana, e hoolilo ia i poe lala no ka Ahahui. 3. E hookohuia ma kona halawai mua ana, he "Peresidena," me ekolu Hope Peresidena, i "Kakauolelo," i "Puuku," a me ka Papa Hooko o Umikumamalua (12) lala, a maloko o ia papa o na Luna Nui i kohoia kekahi o na lala. 4. Aole he uku komo, a uku mau, a i ole, he mau koi lulu, aka, ''He Waihona Dala no na lilo" ke hoala ia mai ko poe hookupu maoli mai ana o na lala, a i ole mai ko lakou mau hoa'loha mai. 5. Ua hiki no i ka Ahahui ma o kona Papa Hooko la ke hana i mau Rula a me na Kanawai no ka hoomalu ana i ka Ahahui. 6. O ke Kumuhana o ka Ahahui, oia no ka hoohoihoi ana i na pono Kalaiaina a me na Rula o ka hookele ana i ke Aupuni Hawaii. A o kekahi mea nui oia no ka hooikaika no na mea e pili ana i ke Koho ia ana o na Alii a me na Lunamakaainana o ka Ahaolelo, i ke kau Koho e malama ia ana iloko o ka M. H. 1890, ka poe hoi e hoohiki ana ia lakou iho ke Kohoia, e hana a hooko i ke Kumuhana malalo iho. KUMUHANA. 7. O na Luna Oihana a pau o ke Aupuni Hawaii e noho nei malalo o keia Kumukanawai i hookohuia e ke Alii ka Moi a mo ka Aha Kuhina. E hoololiia ma o ka hoololi ana i ke Knmukanawai, ma ka haawi ana na ka lehulehu e hookohu [i] na Luna Oihana Aupuni a pau. 8. O makou na lala o ka Hui Kalaiaina Hawaii, ke hoohiki nei makou ia makou iho e malama me ka hooko pono i ke Kumuhana ma luna ae, no keia Kau Koho ae o M. H. 1890. 9. Ke hoohiki nei makou o koho a e hooko pono no na Alii a me na Lunamakaainana wale no i hoapono ia e ka Hui Kalaiaina Hawaii. 10. Ke hoohiki nei makou e koho a hooko pono no na Alii a me na Lunamakaainana wale no, ka poe hoi he lala no ka Hui Kalaiaina Hawaii, a i hoapono i kona Kumuhana. 11. O makou o ka Hui Kalaiaina Hawaii ke pahola aku nei i ko makou hooikaika like ana me ka lokahi no ke kokua ana i na Ahahui o keia ano, ma ka hoala ana i poe hui o keia ano like ma na Apana a pau maloko o keia Aupuni. 12. O makou o ka Ahahui Kalaiaina Hawaii ke hoomana aku nei makou ia Hon. Daniel Lyons, Lunahooponopono o ka Nupepa ELELE e hoala e like me ka pono o kana mea e manao ai i mau Ahahui o keia ano like ma na apana e ae maloko o ke Aupuni Hawaii, me ka waiho mai i kana hoike i keia Ahahui a me ka Papa Hooko ma ko lakou mau manawa halawai. 13. Oiai ka Nupepa Elele ka Mea nana i hookumu [i] na kahua o keia Ahahui, nolaila, e hopmaopopoia, oia no ka Wahaolelo o ka Hui Kalaiaina Hawaii. 14. E malama ia na halawai ma o ke kahea ana o ka Peresidena. Ma ka ninau ia ana, ua hoaponoia na Kanawai a me na Kumuhana o ka Hui Kalaiaina Hawaii. Hookuuia ka halawai ma ka hora 9 p. m. me ka maluhia. Ma o FRANK METCALF Kakauolelo Leta no ka Hui Kalaiaina Hawaii.