Ka Nupepa Kuokoa, Volume I, Number 1, 1 October 1861 — Page 2

Ka Nupepa Kuokoa.

HONOLULU , OKA . 1861.

NO KEIA PEPA HOU.

He Pepa Ku i ka Wa !

Aloha oukou, e na kanaka e noho ana mai Hawaii a Niihau . I na wa kahiko, i na la mamua ae o ka hiki ana mai o na haole, i ka manawa aole i ike ia aku na pe-a keokeo o Lono ma ke one o Waimea, Kauai, a maloko hoi o ke awa lai o Kealakekua e pili ana na hana a me ka manao o na kanaka i na mea hana mau a na kupuna, oia na hana o ka wa kahiko loa mai. O ko lakou kapa ka ili o ka wauke, a oia wale no ko lakou aahu. Ua lohe ia ke kani ana o ka laau kua i kela la i keia la ma na hale a pau, mai ka uka a hiki i kahakai. Ua ku-i ka lono o ia walaau me ka leo o na mele, a me na kanikau o na keiki a me na luahine.

O ka waa wale no ka mea holo kahiko ma na kai ewalu o keia pae aina, i hooholo ia e na lima ikaika o ka poe e paa ana i na hoe, a me na kaula pe-a. Noho wale iho na'lii me na makaainana o lakou ma na wahi kuaaina, me na keiki hanau kinikini a lakou. Ua hopu ia ka manu oo o ka mauna, a lawe ia kona mau hulu melemele e hoonani i na ahu ula o na'lii, a hookuu hou ia e hoi i kona punana e hanai i na keiki ana, a e hooulu hou i na hulu i huki ia.

Oia na wa kahiko i hala, aole no e hoi hou mai ana ia manawa. Ke waiho nei na kino o na kupuna o kakou i kahi e maha ai ko lakou luhi. Ua koe no nae ka mooolelo no ka lakou mau hana, e waiho pu ana me na mele a lakou iloko o na naau o ka lakou poe mamo e noho nei.

He hanauna hou keia e noho nei. Aole i like lakou nei me ka poe i hume i ka Puakai a kakua i ka pau. Ua hiki mai nei ka haole iwaena o keia hanauna, a ua lawe mai i ka palapala, ka lole, ka Buke a ke Akua, me na oihana hou mai na aina e mai. Ua lawe mai lakou i na mea hoonaauao o na aina e ae, a ua nalo aku na mea kahiko o na kupuna o Hawaii nei. Ua ao ia na kanaka Hawaii i na hana a me na manao o na aina naauao.

O kekahi mea hou ka Nupepa, ka mea hoolaha koke i na manao a me na mea i hanaia ma kela aoao, a me keia aoao o ka honua. O na mea nui a pau i hanaia maloko o Farani, o Beritania, o Amerika, o Kina, a o na aina a pau, a hala ka malama hookahi, a elua malama paha, ua paiia ma ka olelo Hawaii, a ua heluhelu ia e na kanaka mai Hawaii a Niihau, ma ka nupepa i paiia ma ka lakou olelo.

Ua lawe ia mai nei e na haole ka oihana kamana, kapili hale, kapili moku, kui hao, humu lole, kalepa waiwai, wili ko, mahi kope, mahi raiki, holo lio, oo palau , ia mea aku, ia mea aku. Ua loaa i na kamaaina ka ike o ia mau mea a pau. Aole lakou e hiki ke hoi hou i ko lakou naaupo kahiko. Ina e minamina ana kekahi poe i na mea kahiko i hala, aole loa e hoi mai ana kela manawa, ke makemake nui ia e lakou.

Owai la ka mea makemake hou i ka waa i mea e holo ai ma na moana? Ua loaa na moku pea a me na moku mahu. Owai la ka mea kau hou i ka auamo maluna o kona hokua? Ua loaa ka lio holo a me ka bipi kauo kaa. Owai la ka mea haalele i kona hale laau maikai, a hoi hou aku i ka hale pili hiolo wale.

Ua pau no hoi na akua kii. Owai la ka mea e kalai hou ana i na kii laau, a me na kii pohaku paha. Ua hiki mai na kumu e hoonaauao ana i na keiki naaupo, a me na kanaka naaupo i ka olelo a ke Akua. Owai la ka mea wawahi i na hale pule a me na hale kula e ku aua ma keia pae aina, a hoi hou lakou i ka noho ana e like me na kupuna i make?

E like me ka poe o na aina naauao pela hoi maanei, e ake nui nei na kanaka i na Nupepa e hoike mai i na hana ma na aina a pau a puni ka honua. O na Nupepa ka ai hanai i ka pololi o ka manao. Malaila e kena ai ka makemake, e mahuahua ai ka ike . Aole e maona ka manao i na pepa liiliii e like mamua. E kanaka makua ana o Hawaii nei, e ake nei e like ko lakou ike me ko na haole. Mamua, aole i hiki ia lakou nei ke hoomaopopo i na manao i pili i ko ka haole ike. Aka, ke kaa nei ia wa mahope. He kamalii mamua ma na mea naauao. Ua lilo hoi i kanaka makua, i keia wa . Nolaila, aole kakou e lawa i na pepa liilii. Ke makemake nei kakou i na Nupepa e hoike mai ana i na mea a pau e hana ia ana ma na aina o ke ao nei, i na oihana, i na mea akamai, i na mea e naauao ai, a me na mea e pomaikai ai.

O ka Nupepa he hoonaauao ia i na haole aole, anei ia e hoonaauao i na kanaka Hawaii ? O ka mea hoolealea i ko lakou naau, aole anei ia e hoolealea i ko kakou. O ka mea hoomahuahua i ko lakou akamai me ka makaukau, he mea hoi ia e nui aku ai ko kakou makaukau, a me ka maikai.

Penei no ka palapala ana a kekahi haole ma Amerika, i kona mahalo ana i ka maikai o na Nupepa ma ia aina:

"E kuhikuhi mai oe i kekahi ohana keikikikane, a kaikamahine naauao, a ike auanei kahi ma ko lakou mau hale i na Nupepa he nui i heluhelu ia e lakou. Aole mea i nele i keia kumu ao maikai, e hiki ke hoomaopopo i ko lakou mana ma ka hoonaauao ana. Aole anei oe i manao i ka nui o na kumu noonoo, a me na kumu olelo a lakou e haawi mai ana no ka poe i akoakoa pu iloko o ka hale no ka ai ana, no ka nanea ana paha? Ma na Nupepa i naauao ai na keiki a kakou i na mea i hanaia ma ke ao nei a puni. Ua oluolu ko lakou noho pu ana iloko o kela hale kahi a ka Nupepa e hoike ana i na mea nui ma na aina e mai, i ke kamailio pu ana a lakou ia mau mea. O ka mea ia nana e hoomaikai ka noho pu ana o na ohana keiki ma na hana naauao, oia ka mea nui e pomaikai ai na kanaka ui o na hanauna a pau."

Nolaila la, ke makemake nei kakou i Nupepa nui; he pepa hoi e heluhelu ia e kakou a me na keiki pu a kakou: He pepa hoala mai i ke aloha i ka ike a me ka hooulu mau i ka naauao; he pepa haawi mai i ka makaukau i na hana io e loaa ai ka waiwai e like me ko na haole loaa. Pela e lanakila ai kakou maluna o ka palaualelo, a maluna hoi o na luhi make hewa.

Pela anei ko oukou makemake, e na kanaka o Hawaii nei? Aole anei i puka mai ka malamalama o ka la e imi ai kakou i na mea naauao mai Kahiki mai, a e ao ia ai hoi i na oihana o na aina naauao? Ina pela, eia no ka manawa e ala ai, a e kokua iloko o keia hana nui? eia ka manawa pono e pai ia ai na oukou he pepa maikai, a nolaila, eia hoi ka manawa e kau iho ai i ko oukou mau inoa no

"KA NUPEPA KUOKOA."

A ma ke kau inoa ana, a me ka uku ana i na DALA ELUA i keia makahiki i kela makahiki, i lilo ai oia i pepa mau e ao aku ana i ka hanauna kanaka Hawaii, i pomaikai oukou i keia wa a mahope wale aku.

Ka Nupepa Kuokoa.

He pepa ia e hoopili ole ana i kahi aoao ma kana mau olelo ana a pau. E hoolaha aku ia i na mea ike, no ka hoonaauao ana i na kanaka Hawaii a pau, i ka poe oo, a me ka poe opiopio, i na mea o kela aoao keia aoao hoomana. He aha haneri a keu o na kanaka makaukau e noho ana ma Honolulu, a ma na wahi kokoke, i kauia ko lakou mau inoa, me ka hoohiki e kokua i keia nupepa; a ke lana nei kuu manao, e hookuiia mai me lakou na inoa hou 100 a keu ma Honolulu nei. He pono no e komo keia pepa maloko o na hale a pau, a e heluheluia e na kane me na wahine a pau, i ikeia ai na hana nui ana a pau ma ka honua nei, a e lilo ai lakou i poe makaukau no na hana naauao o keia ao.

EIA KE ANO O UA PEPA LA.

1. E hoomakaia ke pai hebedoma ia ana i ka la mua o Ianuari 1862, a e hoopukaia i na la hoomalolo a pau. Aka, no ka manao nui ana o kanaka e heluhelu i na Nuhou mai na aina e mai, a e ike hoi lakou i ke ano o ua pepa la, e hoopuka ia ana na pepa kumu ekolu, mamua mai o Ianuari, iloko o na malama o Okatoba, o Novemaba, a o Dekemaba: He mea haawi wale ia mau pepa na ka poe kau inoa, me ka uku mai mamua no ka pepa o kela makahiki.

2. Ka uku no ka makahiki, ELUA DALA, e uku e ia mamua o ka hoomaka ana e pai, mamua o ka la 1 o Ianuari 1862. E kaa ilaila ka uku no ka pepa, a hiki i Dekemaba 31, 1862. Aole e aeia ka haawi hoaie wale i kekahi pepa, na ka poe i kaa ole ka lakou uku. Aka, e hiki ke kauia na inoa hou mahope aku oia wa. Aka, aole paha e hiki ke haawi aku i na pepa i pai mua ia, ke koe ole ia mau pepa maloko o ka hale pai. Ina makemake kekahi e lawe i na pepa a pau, mai ka mua a ka hope, pono no ia ia e hoomaka i kona lawe ana i ka la mua o Ianuari.

3. O ka mea hoopuka, owau no, a me ke kokua loaa mai.

4. E paiia ana ma ka pepa.

Akahi. He olelo hoike i na mea nui a maikai a pau, i hanaia ma na aina e, e ku ana i ka pono o na kanaka Hawaii ke ike.

Alua. E hoolaha ia ana na manao haole o kela aina o keia aina; ke ano o ko lakou noho ana, hana ana, ao ana, ikaika ana, kuonoono ana, ia mea ae, ia mea ae, i hiki ai i kanaka ke ike ia mau mea, a e lilo ai i poe like me na mea naauao.

Akolu. E hoolahaia hoi na oihana mahiai pono, a e hoike i na mea paahana maikai e hiki ai ke mahi e like me na haole naauao. E paipai hoi keia pepa i na hana me ka molowa ole.

Aha. A loaa mai na mea pai kii, e hoonaniia ka pepa i na kii e hoike ana i ke ano o kanaka, a me na mea o na aina e.

Alima. E kupaa ana na mea o keia pepa ma ka oiaio o na olelo a pau, aka, aole e paiia na olelo hoopaapaa o na aoao hoomana.

Aono. E ku no keia pepa ma ka malama aloha i ka Moikane, a me ka Moiwahine, i ka Haku o Hawaii, a me na alii iho, e ao aku ana i ka hoolohe i na kanawai, a me ka malama i ka moi, oia ka pono mua o na kanaka a pau.

Ahiku. E paiia ana hoi ma keia pepa, na nuhou o keia pae aina, i na lohe pono a pau e ku i ka makemake o kanaka ke heluhelu. O ka manao nui ma keia pepa, ka hoolaha aku i na mea hoonaauao a pau i ku i ko kanaka pono ke ike maopopo, i hoolikeia'i ko lakou noho ana me ko na haole.

I hiki pono ai keia mau mea a pau, e nui loa na dala e lilo iloko o ka hana ana i ke kakau lima a me ke pai ana i keia nupepa. Aole e holo ia hana ke uuku mai ka poe kokua me ko lakou mau dala kuai pepa. Ina aole e loaa mai na inoa 2,500 me ko lakou uku, e lilo ana keia hana i mea poho no'u.

Eia hoi kekahi; E palapala aku ana au i Amerika e kuai i ka pepa a me na kepau kii, a me na mea e ae he nui wale i pono ai ke pai ana. No ka mea, aole e hiki ke hanaia kela mau mea maanei. Nolaila ka pono, e uku e ia mamua na dala e hiki ai ke kuai ia mau mea, e like me ka uku e ana o na haole i ka lakou mau nupepa. Alaila e hiki no i ka mea pai ke hana i ka pepa maikai i kela hebedoma, keia hebedoma.

Penei i kakauia'i mawaho o na palapala a pau ia'u no keia pepa.

Na HENERI M. WINI,

Luna o ka Nupepa Kuokoa.

[No ka nui o na haole i ike ole i ka olelo Hawaii , a he nui paha ka poe e makemake ana e ike i ke ano, a e lawe i keia Nupepa; Nolaila, ke pai nei makou i na mea, mahope nei, ma ka olelo Beretane, i ike ai lakou;]

The Independent Press.

At the request of numerous intelligent Hawaiians, I have undertaken to print this new paper, to be called

"KU NUPEPA KUOKOA."

a newspaper to be independent in all its sayings, and published for the intelligence and instruction of all Hawaiians, of whatever age, class or religious belief. More than four hundred of the natives in and around Honolulu, have already subscribed their names, pledging to take and support it, and I trust that four hundred more names will be added to them, from Honolulu, for it ought to be taken in every native family, and read by every man and woman, that each one may know what is transpiring in the world and may grow wise and skillful. The following will be the objects, and the terms of this paper:

1.— It will commence its regular weekly issue or volume on the first day of January 1862, and be issued every Saturday. But owing to the anxiety of the natives to have foreign news and see the new paper, three specimen numbers will be issued before that date, viz: one number in October, one in November and one in December, for which no charge will be made to those who subscribe and pay for the new paper.

2. — The subscription price of the paper will be TWO DOLLARS a year, payable in advance, before January first, 1862 . The first payment of $ 2.00, will pay till December 31, 1862 . No papers after January 1, 1862 , will be allowed to be delivered on credit, or to those who have not paid in their subscriptions. But new names can be taken in at any time thereafter, whenever subscribers can pay; but back numbers cannot in all cases perhaps, be supplied to such new subscribers. Those who wish to be sure of getting all the numbers, should commence January 1.

3. — It will be conducted by myself, with such assistance as I can secure.

4. — lt will be devoted,

First — To furnishing the people with a full and interesting record of events transpiring in foreign countries — embracing whatever in this line may tend to instruct and interest them.

Second — To a dissemination of foreign ideas, both as regards mode of life, habits, business and industry; with a view to improve, expand and elevate the native mind; that the natives may rise to an equality with foreigners.

Third — To disseminate correct information regarding the best method of farming, tilling, use of labor-saving implements and machines; — in short to instruct, and encourage them in habits of industry.

Fourth — The paper will be illustrated with pictures of passing events or of men and scenes, as soon as such pictures can be obtained from New York or London .

Fifth — While the paper will stand firmly on the side of truth and religion, it will carefully avoid religious disputations.

Sixth — It will be firm and loyal to the King and Queen, the young prince and chiefs, inculcating obedience to the laws, and loyalty to the sovereign, as the first duty of every subject.

Seventh — The paper will also be devoted to local news, giving all that may be of interest transpiring in the group. In short, it will endeavor to furnish from week to week such reading matter as may tend to develop and enlarge the Hawaiian mind, and enable Hawaiians to think, feel, act and live more like foreigners.

All communications and business letters should be addressed to

HENRY M. WHITNEY,

Publisher "Ka Nupepa Kuokoa."

Mahiai Laiki.

Ano ua hiki mai ka wa pono ia kakou ke noonoo i na mea e waiwai ai kakou, a e hiki ole ia mai ai ko kakou mau ipuka hale e ka wi, ka nele, a me ka hune. Ua maopopo lea ia kakou ko kakou mau kumu loaa i na makahiki i kaahope ae nei, oia no na moku Okohola, a me na moku Kalepa, no ka mea, na ia mau moku e kuai mai ka kakou mau mea e kuai ai, a me ka haawi pu mai i ka hana na ka poe paaua. A no ia mea, ua lako mau kakou i ke dala maoli, a ua hilinai nui kakou ma ia mea wale no, me ka manao nui ole i na kumu waiwai e ae. Ua maopopo ia kakou ka nui o na moku i ku mai ma keia Pae Aina i na makahiki mamua aku nei, a ua lilo kakou a pau he poe ike maka i ka emi o na moku i oleloia maluna, a aneane aku ana paha e nui ana na moku e ku mai ana maanei ma keia hope aku, e like me na makahiki mamua. A nolaila, he pono ia kakou ke noonoo, ke huli, ke ninaninau, a ke hoomaopopo i na mea e loaa'i ia kakou ka waiwai ma keia hope aku, o lilo auanei kakou a pau he lahui ilihune. A o ke aha ko kakou mea e waiwai ai? O ka hapai like o keia lahui i ka hana mahiai. E ninau mai paha auanei kekahi poe . "Ina e mahiai makou, o ke aha ka makou mea e kanu ai i loaa'i ia makou ka waiwai? No ka mea, ke olelo mai nei oe e nele mai ana kakou i na moku okohola ma keia hope aku. A ina makou e mahiai a kanu i ke kapiki, papapa, akaakai, a me ka uala, ihea e kuai ai keia mau mea a makou i mahiai ai, a i kanu ai? Ke i mai nei hoi oe, aohe moku okohola e ku mai ana maanei ma keia hope aku, a nolaila, heaha ka pomaikai e loaa mai ana ia makou ma ka hooikaika ana ma ka mahiai?"

E kanu kakou i ka laiki, me ke kanalua ole, me ka hooikaika, a me ka manao paa. A oia ko kakou mea nana e hoowaiwai mai, alaila, lilo ka huaolelo Ulakolako i kamaaina no ka hale o kela mea keia mea e kanu ana i ka laiki. E ninau hou mai paha auanei kahi o oukou me ka olelo iho ka! kanu makou i ka laiki, i hea ka makou laiki e kuai ai? Owai ka poe nana e kuai mai? A eia kekahi, pehea makou e kanu ai, me ka lako ole i na mea a pau e pono ai ka hoomaikai ana, a me ka wae ana i ka ili o waho o ka laiki? E hoopau i ko oukou kanalua ana ma ia mea; i Honolulu nei, a me na kulanakauhale e ae o keia mau mokupuni e kuaiia'i ka oukou laiki, o ka poe nana e kuai mai oia no na haole kalepa, no ka mea, e noho mau ana ma Honolulu nei, a me na wahi e ae o keia pae aina, na haole kalepa, me ka makaukau mau i na manawa a pau e haawi aku i ke kumukuai make pono no ka laiki a ka poe kanu laiki. A ina e kanalua oukou, no ko oukou lako ole i ka mea e hoomaikai laiki; alaila, ke nonoi nei au ia oukou e hoopau ia mau manao, a me ke kuihe ana, no ka mea, e hiki mai ana ma Honolulu nei kekahi Wili Laiki na kekahi poe haole o onei, a e kukulu ana lakou i Hale Wili Laiki, e like iho nei me ka Hale Wili Palaoa ma Ulakoheo i pau ai i ke ahi i kela makahiki i hala iho nei, me ka manao oia poe e Wili i ka laiki a kela mea, keia mea, me ka hoouku aku i ka uku oluolu no ka hoomaikai ana i ka laiki a ka poe nana i kanu.

A ina e makemake ka poe nana i kanu, e kuai aku me ka ili no owaho, alaila e kuai no ka poe nona ua wili laiki nei me ka uku aku i ke kumu kuai makepono i ka poe nana i kanu, pela kakou e waiwai ai.

Aole no he pohihihi o ke kanu ana i ka laiki ua like no ka hoomakaukau ana o ka loi e kanu ai, me ka hana ana o ka loi kalo, a i ka wa e ulu ai aohe nui o ka hana i ka malama ana o ka hooponopono ana i kahi e kuai ai, oia wale no ka manawa hana, a hiki i ka wa e oo ai, elua wa e oo ai i ka makahiki hookahi a oi aku paha.

Ua hoouna aku o Kauka Poka (Dr. P: Ford ma) i kekahi mau eke laiki ana ma Kapalakiko, Calaponi e hoomaikaiia'i, a ua hoihoi ia mai, a ua nana ia e ka poe i ike i ka nana ana i ke ano o ka laiki maikai, a me ka laiki ino, a ua olelo ia e ia poe, ua like loa ka maikai o ua laiki la, me ka laiki maikai loa i kanu ia ma na wahi e ae a pau o ka honua nei.

O ke kumukuai ka o laiki me ka aa , he elima keneta no ka paona hookahi, a ina i hoomaikaiia, he oi aku na keneta o ka paona, no ka mea, eiwa keneta ke kumu kuai i keia manawa no ka paona laiki i hoomaikaiia.

O ka nui o na paona laiki iloko o ka Eka hookahi, (ke hooemi loa ia) hookahi tausani paona, a o ka loaa, ina e hooemiia ke kumu kuai i elima keneta no ka paona, 100 olala no ka eka hookahi:

O oukou o ka poe e makemake ana e ike maka i ke ano o ke kanu ana i ka laiki, e aho e hele ma Moanalua e nana'i no oukou iho, aia malaila na mala laiki a Kauka Poka e hana ia nei e na Pake paahana ona, ua oi ka pono o ka ike maka ana, mamua o ka lohe ana mai ia hai.

Kela mea keia mea o Hawaii nei.

He nui na manao i hooiliia mai no ka Nupepa Kuokoa, aka, ua piha e nae ka pepa i na manao i hiki mua mai. A nolaila, e na makamaka, e pono oukou o hoomanawanui a ia manawa'ku, mai hookekeue e na hoa.

O ka poe e makemake ana e loaa ka Pipi momona maikai, a me ka Hipa momona, maikai ke ai iho, e pono e hele ma ka HALE KUAI PIPI o CONAWELA & VIDA ma ke alanui alii; He emi loa ke kumu kuai, a he nui ka MANUAHI.

MAKAU OLE MAOLI: — Ua maopopo ia kakou ke ano o ka pali o Nuuanu he inoino, a he hiki ole ke KAA ke holo; I ka la 7 iho nei o Sept. nei, ua holo aku o G. P. Judd (Kauka) laua me Rev. E. Corwin, (Kahunapule o ka Halepule haole ma ke Alanui Papu,) maluna o ke KAA i kauoia e ka lio hookahi, a iho no laua i ka pali o Nuuanu me ko laua kau no maluna o ke kaa. Aole laua i loohia i ka poino a hiki wale i ko laua hiki ana ilalo o Kekele. O ka maka mua keia o na kaa nana i hele ka pali o Nuuanu. A he keu no hoi keia a na mea makau ole, o ka hele ana ma ke kaa ma ia alanui nihinihi. Ina e hiki mau na kaa ma keia alanui, alaila, e pomaikai ana na mea kuai o ka apana Koolau.

HANA INO IA KEKAHI KANAKA HAWAII MA JAPANA: — I ka malama o Aperila i hala aku nei, ua pepehi ino loa ia kekahi kanaka Hawaii ma Iapana, e ka poe kamaaina o ia wahi. Ua loaa ua kanaka nei i kekahi mau alii o ka moku kaua Rukini e ku ana ilaila ia manawa, a ua lawe aku ia ia maluna o ko laua moku, malaila i hanaia'i kona eha e ke Kahunalapaau o ua moku kaua la.

He pinepine ka loohia ana o na kanaka maoli i ka poino malaila, e like ke ano me keia, hele lakou ma na hale pakaukau o ia wahi, a, ilaila lakou e hui ai me na kamaaina, a iloko oia hui ana e loaa'i ka hoopaapaa ana, a me ka hakaka ana.

E na kanaka a pau o Hawaii nei, ina oukou e hele ma ia wahi, mai hoolauna'ku, ma keia mau hale pakaukau.

KAIKAMAHINE AKAMAI I KE KI PU. — Ua hele aku kekahi poe i na la mamua'ku nei, i ke kaapuni i keia mokupuni, a o kekahi o ua poe la he mea no ka aoao palupalu.

I ko lakou hele ana a hiki ma Halemano (apana o Waialua,) ua noho lakou e hooluolu malaila i kekahi mau la. A e like me ke ano mau o ka poe e hele ana i ka makaikai, pela no keia poe, hele kekahi poe i ka lelekawa, kahi poe hoi i ke kapili manu, kahi poe hele i ke ki pu. Me keia poe e hele nei i ke ki pu, ka hele ana o kela kaikamahine i haiia maluna.

Hele keia poe kipu a hoomakaukau i kekahi hoailona e ki aku ai; 145 kapuai mai kahi e ku ai ka mea e ki ana, a hiki i kahi o ka hoailona i kukuluia'i. Alaila, hoomaka ke ki ana: o ka mea mua i ki, o kekahi kanaka opiopio noloko mai o keia huakai hookahi i haiia maluna. Ki oia, a lele aku kana poka a ku, ma ka aoao o ka hoailona, elua iniha ke kaawale. Ki hou aku la ia , a hala hou no, hookahi kapuai ke kaawale mai kahi i ku ai ka hoailona, a hiki i kahi i ku ai kana poka.

Ku mai la he kaikamahine me ka Punao kau poohiwi, a kau pono ae la i ka pu ma kona poohiwi, a ki aku la me ka makau ole a me ka haalulu ole. Ia manawa, holo nui aku la ka poe e ku ana, e nana i ka hoailona i ike ia'i ke ku, a me ka ole. I ko lakou hiki ana i kahi o ka hoailona i ku ai, ike aku la lakou ua ku ka hoailona, olioli loa ka poe e makaikai ana i keia ki ana, a ua kaikamahine nei, me ka mahalo aku i kona koa a me kona akamai. E hoomanao nae kakou oiai oia e ki ana i ka pu aole ana elau ma kona aoao. He oioi keia kaikamahine a he akamai i ke ki pu . Ua loheia mai o ke kaikamahine no keia a ka mea nona o Halemano ma keia mokupuni.

Kela mea keia mea o na aina e mai.

Ua hele aku na kanaka he 575,000 imua o ka Peresidena o Amerika Huipuia, me ka ae aku e lilo i Koa, i pau koke ai ke kaua ana, o ka Akau. me ka Hema.

He 1,500 ka nui o ka poe ohi welu, ma na alanui o ke kulanakauhale o Parisa, a o ka nui o ko lakou loaa pakahi i ka la hookahi, he umikumamawalu keneta wale no.

O ka nui o ka poe i hele ma na aina e, mailoko aku o ke Aupuni Nui o Beretane a me Irelani, iloko o na makahiki he umi, mai ka makahiki 1851 a hiki i ka makahiki 1860, he 2,187,205. O ka hapa nui o keia poe , ua hele ma Amerika.

HALE KULA O KA POE ILIHUNE. — O ka nui o na Hale Kula o ka poe ilihune ma Pelekane, he 356, o ka nui o na haumana o ia mau kula, he 23,052, 192 ka nui o na Kula ma ka po, o ka nui o na haumana, he 20,900.

PU FARANI. — O ka pu kuniahi nao Farani, i hana ia ma ke kauoha ponoi a ka Moi Napoleona, ka mea nana i imi ke ano o ia pu, oia ka pu maikai loa ma ke kaua ana, i keia manawa, aole pu like ka maikai me ia.

Ua hoolimalima ia e ke Aupuni o Amerika Hui, na hale hana mea kaua a pau o Pelekane, aole e hiki ke hana i mau pu paha, a me na mea e ae a pau e pili ana i ka Oihana Kaua, no ka poe aupuni e aku, no na mahina ekolu, koe nae na Hale Hana mea kaua o ke aupuni.

Ua make kekahi haole ma Rouena, kekahi kulanakauhale ma Farani. A hooili aku la i kana dala i kekahi wahine e noho ana ma Parisa; Eia ka mea kupanaha, i ka hora i make ai o kela kanaka, oia no ka hora i make ai o ka wahine i hooili ia aku ai ka waiwai. A i ka make ana o ua wahine nei, ua hooili ia i kona waiwai a me kana dala i kela haole e noho ana ma Rouena. Kupanaha ko laua make ana i ka manawa hookahi. O ka mea nona keia ninau, na na Loio ia e hooponopono.

KAIKAMAHINE AKAMAI. — Komo aku la kekahi kaikamahine wahine maikai, ma kekahi hale kuai, e kuai i mikina lima nona, pane aku la ia i ka mea nana e kuai ana, "Heaha ke kumu kuai o keia mikina lima," ua lilo loa ka manao o ka mea nana e kuai ana ua hale kuai nei i ka mahalo i ka nani o ka helehelena o ua kaikamahine nei, nolaila, ua poina oia i na rula mau o ka poe maikai, o kona pane koke mai la no ia, "He honi ka uku, alaila, lilo ia oe na mikina lima?" Pane hou aku la ua kaikamahine nei, "Ua pono," a hahao iho la oia i na mikina lima iloko o kona waihona, a pane hou aku la i ua kanaka kuai nei, "Ke ike nei au he aie ia no kou hale kuai nei, nolaila e pono e kakau oe i ko'u inoa ma kau Buke, a hiki i ka manawa au e ohi ai, hai mai oe ia'u. O ka puka koke aku la no ia o ua kaikamahine nei, a hele aku la mai ka hale kuai aku, a hoi aku la i kona wahi.

KE KEIKI ALII OPIO O FARANI .- E like no me kona ano mau, oia kekahi i kaulana i ka la Paikau mamua aku nei ma Calausala. Maluna ia i ua la nei o kona lio keokeo uuku, a Victoria ke 'Lii Wahine o Beretane i haawi ai ia ia, ua pau loa ke anaina makaikai ka mahalo ia ia, no ka pupuahulu ole o kana mau hana, me he kanaka makua la, a me he mea la, ua maa i ka hele ana imua o ka Puali koa, o kekahi mea ona i mahalo ia ai, o kona maikai launa ole i ka holo lio, aole mea oi ae mamua ona ma ia la i ka hiehie o ka noho ana iluna o ka Lio. Ua olelo ia, he hiki wawe loa oia i ka apo ana i na mea e ao ia ana ia ia, a no kona hiki wawe loa, ke ao ia nei oia i keia manawa i na mea hoonaauao ku pono no na keiki i oi na makahiki mamua o kona, ua like loa kona akamai i ka olelo Beretane, me kona ike i ka olelo Farani.