Ka Nupepa Kuokoa, Volume I, Number 1, 1 October 1861 — Moku Powa o na kipi i hoopihoia e ka manuwa St. Lawrenceo ke Aupuni. [ARTICLE]

Moku Powa o na kipi i hoopihoia e ka manuwa St. Lawrence o ke Aupuni.

I na la hope paha o lulai iho nei, holo aku la ka moku kaua St. Lawrence o ke Aupuni Amerikahuipu ia, ma na kai e pili ana i ka moku o Carolaina Hema. I na manawa a pau o ka la, ua hunaia kona ano manuwa, a ua like oia me he Kalepa la. Ua hoihoiia na kanaka a pau ilalo, a ua kau ia ka hae Amerika maluna loa o kona kia hope. No ke akamai loa o kona hoanoe ia 'na, aole he ike ia mai o kona ano moku Aupuni. Ke ole he poe akamai loa ka poe nana e nana mai, e ikea mai ai la kona ano, a me kona makaukau i ke kaua 'ku, i na manawa a pau. I ka la mua o Augate iho nei ahiahi, e holo malie ana oia mawaho ponoi iho i kekahi ailana e pili ana i kahakai o Carolaina Hema. Ia wa ike koke aku la ka poe o luna o ua moku Aupuni nei i kekahi moku manuwa e holo mai ana mai ke awa ku moku mai, me ka holo pololei mai i kahi o ua Moku Akau nei e ku ana, me kona kipi manao he moku kalepa. Huki ae la ka moku St. Lawrence o ka akau i kona mau pea; a pau, me he mae la e mahuka ana, aka, e hooneenee malu mai ana no nae i ki koke mai ai i na moku powa

nei o ka Hema, me ka makaukau nae e wehe i kona mau puka pu, a e hoopoho aku i ua waa kipi nei. Ike koke ia 'ku la o luna o ka papahele (ka oneki) o ua moku kipi nei, ua piha loa i na kanaka, a ike lea ia 'ku la na'lii ki pu e hahao ana a e hoopololei ana i na pu. He Hae kipi no ka hae, o ua moku nei, a kahea mai la na'lii o luna i ka poe o ka moku i manaoia he kalepa e hoopai ai i ko lakou pea, elua kahea ana mai, a no ka pane ole ia'ku. Ki mai la ua moku kipi nei me ka hikiwawe loa i na pu ekolu, 2 pu i kiia mamua iho o ka laau ihu o ka moku Kalepa e manaoia nei, a hookahi i kiia mahope, a hauIe iho la ka Pauda a me ka Lu iluna o ka oneki o ua manuwa nei o ka akau, me ka aneane e hoopoino i kekahi o na'lii o ia moku. Ia manawa koke ua huki ia na wahi o ka puka pu, a ua huki ia na pu i waho, me ka hoike aku i kana mau papapu, me ka poe nana e ki e ku ana me ke ahi e kuni ana i na pu, a ia minute hookahi ua kiia'ku kekahi papa pu mai mua a hope, naueue ke kai a me ka moku mai o a o. I ka pau ana'e o ka pohina uwahi, aia hoi, aohe moku kipi e ku ana, ua piha nae ke kai kahi i ku ai o ua moku kipi nei i ka apana laau liilii, a me na kanaka he nui wale e au ana. Ua weluwelu liilii ua moku powa la, a ua poho ke kino o ua moku la, a o na apana laau liilii e lana ana, oia wale iho no ka mea i koe o ka moku powa, a hoouna koke aku la ka moku kaua aupuni, i kona mau waapa, e kii i na kanaka kipi e au ana ma ka ili kai, a lawe mai la ia lakou maluna o ka moku aupuni, no ka hiki wawe loa o ke ki ana o ka moku aupuni i kona mau pu, a me ke poho ana o ka moku kipi; ua aneane hiki ole i na kipi i ola mai, ke hoomanao ae i na mea i hanaia mamua'ku. Pela e hana'i ka poe e kipi ana i ko lakou aupuni. O ka uku pono ia no ka poe kipi.