Ka Nupepa Kuokoa, Volume I, Number 2, 1 November 1861 — Page 1

KA

Nupepa Kuokoa.

BUKE I. HONOLULU , NOVEMABA ,1861 . HELU 2.

 

Kanikau aloha no Mrs. Maleka Ii.

Ka mea'loha nuiia i make aku la.

Kanikau aloha keia nou e Maleka,

Ka pua Oliana hoehaeha naau,

Ka opua oi kelakela o na Moku,

Ka lei hulu mamo puehu ole i ke Kauaula,

Ka pua aala hoomoani i ke kakahiaka,

I ka hoope ia e ka hau anu o Maunakea,

Ke kilohana i hoopuluia i ke kupaoa, wai hooluu ala o Olaa,

Ka hua kepau maka onaona aihue manao o ka poe ike,

Ka inika kohu oe nana e kowali paa;

Aole e hemo i ke kau a kau,

Ka maka gula e hoopahee nei i ka lau o ka manao,

E manao aku ana ia oe e ka hau paa i ka noe,

A ka noe anu o Nouaiki la e; hoi mai ke aloha,

Uwe helu mai o Kina, auwe kuu kaikamahine,

Kuu kaikamahine mai ka ia haaheo o ka aina,

Ka poe lea e haa mai la i ka moana,

I hoonuanua i na lehua o Mokaulele,

Kuu kaikamahine mai ka ua kanilehua,

E hehi ana i ke one o Waiolama,

E wili okai ana i ke one hanana o Punahoa,

Aloha o Wailuku i ka papa kahulihuli,

Mai ka wa nui o Hilo , haule iho kawakawa.

Mai ka ulu nahele hala o Upeloa, a me ka wao laau i Panaewa,

Aloha Haili i ka leo o ka pele e ne hone nei,

Kuu keiki mai ka malu o ka niu o Mokuola,

Mai ka lae loa la o Kaulainaiwi,

Kuu kaikamahine mai ke kula la i Piihonua,

Mai ka pahoehoe la a hiki aku i ka pili,

I piliia e kaua ka ua me ka la, ke anu me ke koekoe,

Kuu keiki mai ka lae loa o Kaipalaoa, a hiki i Moomooiki,

Ua hele au a ikiiki i ko aloha e noho nei,

Ua kaahea i ka iloli a ka manao,

E manao aku ana e loaa oe,

Hoohihi no a apo hewa i ko kinowailua,

Elua hana nui a loko e u nei,

O ke kuko o ka lia i ko aloha a haalele wale,

Haalele mai oe i ka pili me ko kane,

Noho hookahi ia aole kokoolua,

Kuu keiki mai ke ala haka la i Kolopulepule,

Mai ka piina la i Kuaua,

He kuaua ka waimaka e haale haloi nei,

Kuu keiki mai ka wai au la i Honolii,

Aloha ia wahi a kaua la i hele ai,

Aloha Amauulu i ka wili ko i ka hooke a na kanaka,

Aloha ka piina loa la e Paukaa, a me ka ihona ikiiki la e Pahoehoe,

Aloha ka piina loa e Kalehua, a me ka ihona la e Kawainui.

Kuu keiki mai ke kai hawanawana la e Kawaihae,

Mai ke kula loa la i Puuiki,

Aloha Aiku i ka ulu nahele i Mahiki,

A Hamakua au i ka pali kawahawaha

Kuu keiki mai ka ua kipuupuu o Waimea,

O mai ana ke anu i Lanimaomao,

Aloha ka ihona la e Hokuli, a me ka piina la i Pualaea,

A Maulua au i ka pali e Hakalau,

Aloha ka wailele o Akaka,

Ke hoaiai mai la i na pali .,

Aloha wale ia wahi e hele ai,

Aloha ke one o Haena, a me ka wahine haa o Hopoe,

Aloha ka iliili nehe la i Aalamanu, a me ka lehua ula kea o Kekila,

A Malio au ike i ka wai Lulehua,

Aloha ka lehua nee i ka papa, a me na puu o Pele la i Honolulu ,

Aloha ke one o Kaimu, a me ka niu moe o Kalapana,

Aloha o Kawelohea ka wahine noho kai

E kali ana i ka pali o Pohina,

Kuu keiki mai ka hekuwawa o Waiohinu,

Mai ka ua lele mauka o Auaulele,

Pau ka ike ana la ua haalele mai oe,

Hele aku la oe i ke ala maawe ula a Kanaloa,

Ke pai auma nei kou mau kaikunane ia oe,

Kaumaha luuluu kou poe a pau i ke aloha,

Ka moena Kina oe e panio nei ka manao,

Ke koi kahi ia nana e hoolaumania,

Ka hao mateneta oe nana e kuhikuhi mau i ka Akau,

Ke kuea oe nana e hoopololei,

Ka latio like huli aku huli mai ko laua,

Aloha wale na ale hulilau o Pailolo,

A Neke Mele e hoohio lua nei,

Hilinai kalele muku oe ma ka palekai,

Loaa iho la oe i ka pohu o ka holo;

A ka lae o Kalaau pau ka hono o na moku,

Aloha Makapuu e au nei i ke kai,

Aloha Kahaluu i ka ua poai hala,

Aloha na hala o Kahuku au ana i ke kai,

O ke kuko ae a ka manao e ike i na Waiuolewa,

A ka lae o Kaena ike i ka pohaku o Kauai ,

Loaa oe i ka wela o na pali,

Hoomaha i ka wai olu o Kamaile,

Ike aku la oe i na niu o Pokai,

I ka luaiele ia e ke kaiaulu,

Nani Puuohulu au ana i ke kai,

Ike aku oe i ke awalau o Puuloa.

A ka lai o Halaulani wehe ka olu,

Hoi kino wailua oe i ka la o Honolulu ,

Hoi luuluu kau kane me ke kaumaha o ka manao,

O kana ukana no ia e lei nei,

E kanikau ana i ka pili la ua hemo,

Ka lei a ka manao i hookohu ai e paa,

Kii mai ka make me he aihue la,

A laa, ua hala, ua lilo, ua nalo aku la,

Nalo aku la oe i ke ao Polohiwa a Kane,

Aia paha oe i ka Paredaiso o ka Haku.

Sepatemaba, 1861.                 J.  P.

 

Ninau Helu.

 

                I kuu hele ana ma ka Hale Leta, no ka hiki ana ae o na Eke Lete malaila, mai ka moku Comet mai, a loaa mai ia'u ehiku palapala, a ua akaa ae au i ko lakou mau wepa e ike ia loko, puka ae la ehiku no Popoki, a ike iho la au i ka waiwai o ua mau Leta la e owaowau hele ana, a i ko lakou oo ana, puka ae la ehiku mau uluna, aia ka, he mea e kau ai no ke poo o ua mau Popoki hookano la, hanau ae la na uluna ehiku, ehiku keiki, o na mea kanaka, hoolewa ae la lakou a hiki i kahi i kapaia he Liona, iloko o ke ao nei, ma ka aoao komohana ka helu ana, i like kona ano me ka mahina, no na huahelu 9, a o kona kapa alii i na huahelu 6. A o ka hailoaa o keia ninau, noloko no ia o na hua helu 2. Me ka lana o ko'u manao, e loaa no.

S. K. KAWAILIULA.

Honolulu , Augate 20, 1861.

 

                HAILOAA. — Na Popoki 7,— na aina kipi o ka Hema 7; na uluna 7; Ehiku Luna i komo i ka Ahaolelo nui o ke Aupuni o Amerika Hui, 7 keiki kanaka, — na nika o na moku 7; Liona, — Linekona, Peresidena o Amerika; 9 hua helu, — Mokuahana; kona kapa alii na hua helu 6,— na Nika. Pela ka lana o ko'u manao, o kona haina ia. S. D. KEOLANUI, Niuhelewai.

 

                O kekahi Loio e ninau ana i kekahi luahine, he hoike no kekahi hihia imua o kekahi Ahahookolokolo. Hoohuahualau aku la ia , "He kanaka loihi anei?" "Aole no hoi he loihi loa; ua aneane like no me oe." "He ano maikai nae paha kona?" "Aole maikai loa, ua like pu iho la no me oe." "He makaahewa anei?" "He wahi ahewa iki no; aole nae like me kou ke kakaa loa;" He hakukole maoli no ka nei hoike.

 

Kela mea keia mea o na aina e.

 

                O ka wahinemaikai, i noho maluhia ole, ua like ia me ka pua maikai, i nele i ke ala.

 

                Ma ka hele ana i kahi loihi, e ike ai kakou i ko ka Lio ikaika, a iloko hoi o na la loihi, e ike ai kakou i ko ke kanaka ano.

 

                Ua manaoia e ka poe naauao, Ekolu mile ka hohonu o ka moana Atelanika; a eha mile ka hohonu o ka moana Pakifika.

 

                  "Aohe nae paha he hau o kou wahi e noho la, e Keoni?" "Aole! o ka hoapili nae o ka hau ka mea e waiho nei ma ko'u wahi." "O ke aha?" "O ke anuanu."

 

                E Komo , heaha la kou mea i male ai? " ka ! me ka hoi kau i ka aneane e nele i kahi palule ole, a nolaila, male i mea nana e hana mai i wahi palule."

 

                O ka Hope Peresidena o Amerika Huipuia, ke Kuhina Kalaiaina, a me ke Kuhina Kaua, ma keia wa , he poe kukulu kepau lakou a pau, a ma ia hana hoi ua akamai lakou.

 

                Iloko o kekahi Hale Ahaolelo o ka poe i Kohoia, e hana ana i Kanawai no ka hooponopono ana i ka poe kuai papa, ku mai la kekahi o ka poe i kohoia, a olelo mai la, "E ka Luna Hoomalu, ua maopopo lea ia'u, he poe apiki ka poe kuai papa, no ka mea, owau kekahi i hana ma ia oihana mamua aku nei."

 

                MANUWA O SEPANIA. — O ka nui o na koa ku mau o ke aupuni o Sepania, he 100,000 koa, a he kanaha tausani koa hoomoe. Eia ka nui o na manuwa ma ia aupuni; he 44 moku pea, he 29 moku mahu, mahope ka huila, he 27 moku mahu ma ka aoao ka huila, ka huina nui o na moku a pau, hookahi haneri. O ka nui o na pu maluna he 1,200.

 

                KA PUNAHELE A KA POMAIKAI. — O Gov. Sprague (oia ke Kiaaina o Rode Ailana) paha kekahi i na punahele a ka Pomaikai; aole i kanakolu kona mau makahiki, ua hoopalauia ia Miss Kate Chase, kaikamahine a ke Kuhina Waiwai o Amerika Huipuia. Ua oleloia, o ka nui o ka waiwai o ua keiki Kiaaina la, he $10,000,000.

 

                Aia ma ka Akau o Amerika Huipuia, o Nufaonelani, a he aina paa mau i ka ohu, ua hele kekahi kanaka kuaaina o Amerika ilaila; a i kona hoi ana mai, mailaila mai, hai aku la ia i kona poe penei, "He keu o Nufonelani a ka aina ohu nui wale, manoanoa launa ole kolaila ohu, no ka mea, i ko'u wa e moe ai, kakia au i ke kui iloko o ka ohu, a kau i ko'u papale malaila, a ala'e i kakahiaka e kau ana no."

 

                POINA WALE. — Ua hele kekahi kanaka i ka hookelekele waapa; a o ua kanaka nei, he poina wale i kana mea e hana'i. Ia ia e hookelekele ana, loaa ka waapa i ke kikiao makani a hulihia. Nalowale ua kanaka nei iloko o ka hohonu, liuliu iki hoea ae la kona poo maluna o ka ili wai, a poho hou iho la, i keia poho ana a liuliu iki hoea hou ae la no; akahi no ia a hoomanao ae, ua ike no ia i ka au. O nei kanaka ka hoi ka oi o ka poina wale.

 

                HE POE 13 I KU I KA UWILA. — Ke hai mai nei na nupepa Beritania, i ka ua hekili nui ma Eseka i ka la 23 o Mei. Ma ka hale o Wiliama Boma, ua akoakoa na kane me na wahine he 13 i ka wa e ua hekili ana. Ua ku a hiolo iho ka puka uwahi o ka hale, a komo mai ka uwila iloko o ke keena e noho ana na kanaka. Ua pau loa lakou i ke kulaina, a hina ilalo. I ke ala ana o lakou, mai make loa kahi kane, a me kekahi kaikamahine. Ua pukapuka ko laua lole komo, me he mau puka la i houhouia. Aole laua i ike mai, a hala na minute he 20. Ua manaoia laua, aole e ola loa, no ka nui o ka eha i ka uwila.

                Ua moku kaawale ke kamaa o kekahi wahine, o Hana Boma. Aka, o ka poe 10 i koe, aole o lakou eha, ua ku wale no a hina. Ua make no ka uwaki o ka hale i ka uwila, a naha kekahi huila, a moku ke kaula keleawe o ka uwaki. Ma kauwahi mawaho, haule no ka huahekili, e uhai ana i na lau o na laau e ku ana, a naha liilii na aniani o na puka hale. O na manu i kau maluna o na lala, ua pau i ka make i na hua hekili. Ua nui kekahi hua, me he pohaku la.

 

                E ahaaina ana kekahi poe i kekahi la, ku ae la kekahi o ke anaina, a nonoi mai la e oluolu kona mau hoa e hoolohe aku i kona wahi manao. Kauoha mai la ia ia lakou e hoopiha i ko lakou mau kiaha i ka mea inu, a o ua mea nei e kamailio ana, ua mareia oia i ka wahine. Hai mai la ia i kona manao, "E inu kakou me ka hoomaikai i na wahine a kakou, ko kakou kokoolua o ka wa kaumaha, a me ka wa olioli, ka poe hoi nana e hoopapakolu i ko kakou mau lilo." Kuu pau launa ole no nei kanaka, hookaumaha kana mau olelo i ka poe o ka aoao palupalu.

 

                Ma Aferika, he nui loa ka poe Negero; a nolaila, he nui loa ka poe hele ilaila me na moku holo e lawe malu i na kanaka eleele olaila, a lawe ia lakou ma na aina e aku e kuai ai no ke dala. I kela mau la pokole aku nei mamua, ua hopu ia kekahi moku e lawe ana i na kanaka o ia aina me ka manao e kuai aku ma na aina e kue ole ana i ka hookauwa ana, i ke dala, aka, ua loaa e nae keia moku i ka manuwa Amerika e kiai ana ma ia moana. Laweia ka moku i hopu ia ma Mororavia, a malaila i kiolaia ai ka poe i lawe malu ia mai, mai ko lakou aina mai, 951 ka nui o ia poe, 272 kane, 97 wahine, 340 poe kamalii, a he 92 kaikamahine, ka huina a pau he 801, ua make ma ka moana he 150.

 

                NA KEIKI A VICTORIA, KE ALII O BERITANIA. — Aia ma Osborne, i ka mokupuni o Waite, he hale noho no Victoria i kekahi manawa. Maloko o ka pa hale, ua maheleia na kihapai mahiai, mahi pua no kela keiki keia keiki a ke alii. Ua kapiliia na hale hana no lakou maloko o ia pa. No na kaikamahine he hale kuke, kahi a lakou e kawili ai i ka palaoa, a kahu i ka berena a me na mea ai a lakou. No na keikikane he hale kamana, kahi i ahu ai na mea paahana kamana a pau. I kela la i keia la, aia no lakou, e mahi ana iloko o na kihapai i na mea ai, a iloko o na hale kuke na kaikamahine e kawili palaoa ana a e kuke ana, a ma ka hale kamana na keikikane e kapili ana i na mea a lakou i manao ai e hana.

                O ko Victoria manao, he pono kana mau keiki e loaa ka ike i na hana a pau, a ua oluolu loa na keiki maloko o ia mau hana. Aole i aeia lakou e holo lealea wale, he mea uhauha ia . O ka maa i na hana ka pono no na'lii a me na kamaaina.

 

                HE KAAO NO NOREWAI. — He aina ia ma ka akau komohana o Europa. Ma Saulo Norewai, ua noho mamua kekahi luahine i hoomau i ka hoe i kona waapa iloko o ke kaikuono ma kona wahi, e imi ana i kana kane i make mamua iloko o ke kaikuono. Ua kaapuni kona waapa i na la a pau i kahi hookahi, e pio ana ia ia, a e nana ana iloko o ke kai i ike i kona hoea hou ana mai.

                He lawaia kana kane. I kekahi la, luu iho la ia iloko o ke kai i ka auau. Ua puni koke ia i na ia he lehulehu e nahu ana ia ia, a ua pau ia i ka aiia e lakou. Pai ae la ia i kona lima maluna o ke kai, e kahea ana i na kokua, a ua loaa paapu na ia iloko o kona lima e nahu ana ia ia. O kona nalo no ia malalo, aole i ike houia aku. Ma ia la mai, ka hoe waa ana o kana wahine kane ole, me ka pupule e imi ana ia ia. Aohe mea hiki ke hoololi i kona manao. Ke olelo mai nei ia ua luu wale iho no ia, a mamuli ea mai.

 

                HE WAIPUILANI MA KA MOANAWAI. — Penei ka olelo ma kahi Nupepa: Hele aku kekahi poe e ahaaina ma ka nahelehele i kekahi hebedoma iho nei, ua kaaia ko lakou papaaina maloko o kekahi ululaau e kokoke ana ma kapa o ka moanawai o Masebesika, Nu Hamesire. I ka wa e kokoke ana lakou e ai, hoea mai kekahi ao naulu, me ka makani wili. Ua hapaiia na wai o ka moanawai, a ku iluna me he kiaao la, a lilo i waipuilani, a palahalaha aku ia iluna me he mamalu la. Ku malie no ia pela, a hala na minute elima paha, alaila hoomaka ia e neenee ma kapa. A hiki mai ua kia wai la i kapa, lawe ae la ia i na waapa e kau ana ma kapa, a nahaha iho la. A komo ia iloko o ka ululaau, awiliwili ae la ia i na laau, a ahai ae la i na lala me na welelau, a lawe ia ae iluna. A hiki mai ia i kahi e ai ana ka poe ahaaina, pau pu na pa me na kiaha i ka laweia'ku, a ka nahelehele. Poha ae la ua ao eleele la maluna, a haule iho ai ka wai a ka honua. Kulou na laau uliuli ilalo i ka makani. Kahea, mai kekahi o ka poe ahaaina, i na hoa ona. "E moe oukou ilalo." Moe iho la lakou, e paa ana na lima i na laau, a pakele i ka hooleleia iluna o ka makani wili. Aka, aole lakou i pakele i ka wai. Koekoe loa lakou a pau me he poe la i haule iloko o kekahi muliwai. O ke ola nae o lakou ka i pakele, aka, o ka ai me na pa aina, ua puehu liilii a lilo. He 15 paha na minute o keia hana ana, a hala aku la.

 

                NO KA IMI ANA I KA AIHUE. HE ANO E. E hele huakai ana kekahi poe he lehulehu, a i ka moe ana i ka po, aihue kekahi kanaka i ka eke dala a kekahi. Aole i ikea ka aihue, kuhikuhi wale kekahi, hoole kekahi, a hoohu iwaho i kana mea a pau o ka pakeke aole hoi loaa.

                A hele lakou ia la a po iho, moe lakou ma kekahi hale, kamailio hoi no ka nalowale o ka eke dala a me ka manao ua aihue ia, alaila ku mai la ka mea hale olelo mai la penei, Auhea oukou. Na'u e imi a loaa ka aihue ke ae mai oukou. Ae koke lakou a pau. Alaila pani ua mea hale la i ka puka o ka hale i hele ole kekahi mawaho, oia wale no, alaila puka aku la oia a noi mai ka moa kane a me ka ipu hao.

                Hoopuka aku la kekahi wahine i kona manao penei, He mea hana kupanaha keia! Olelo ua kanaka mea hale la, aole keia he mea kupanaha, he mea e imi ai i ka aihue a maopopo, e like me ka'u i olelo ae nei ia oukou.

                Popoi iho ua mea hale la i ka ipu hao maluna o ka moa, olelo mai la, o keia moa ua ike oia i ka aihue, ua maopopo ia ia kahi e waiho nei ke dala, nolaila e hoopa like oukou i ka ipu hao, a i ka pa ana i ka lima o ka aihue ma ka ipu hao, alaila oo koke ka moa, aka, i ka hoopa ana o kanaka e ae a pau aole ka aihue aole e kani ka leo o ka moa kane.

                Kukulu lalani ka mea hale i na kane a me na wahine o ka huakai, olelo aku, aia a puhi au i ke kukui, e hele mai oukou a e poai i ka ipu hao me ka hoopa aku i ka lima.

                Pela no i hana kaapuni ai lakou i ka ipu hao a hoopa i na lima aole nae i oo ka moa. Hoa hou ia ke kukui, nana ka mea hale i na lima a pau, paumaele no i ka eleele o ka ipu hao, koe kekahi kanaka, ua maemae kona lima , oia ka aihue, a no ka makau o kani mai ka moa aole oia i hoopa i ka ipu hao. Olelo ka mea hale ia ia, o oe no ka aihue, huliia iloko o kona pakeke loaa no ka eke dala, a haawiia oia iloko o ka lima o ka makai.

 

He Lio malama i kona Kahu.

 

                Ua hoike mai o Lamatena i kekahi mea ana i ike ai i kona hele ana ma na aina Hikina, i ka malama launaole o kekahi Lio Arabia i kona Kahu.

                O kekahi alii Arabia me kona mau kanaka, hele mai la i kekahi po, a powa iho la i kekahi huakai kanaka kalepa o Damaseko, a lawe aku la i na waiwai mai o lakou aku la. Aka, i ko lakou kaumaha ana i ka waiwai a lakou i hao wale ai, aia hoi, ua alualuia lakou e ke alii o Eca, a ua pepehiia kekahi o ua poe powa nei, a o kekahi poe ua nakinakiia iho i ke kaula na lima a me na wawae. E like me keia ka paa ana o kekahi kanaka o ua poe powa nei, o Abou Ela Mareka kona inoa, i kona wa i laweia mai ai a ma ka puka o ka hale lole, kahi a lakou i moe ai, malaila oia i waihoia iho ai me ka nui o ka eha ma kona kino, a moe iho la ka poe nana lakou i hoopio a me na pio pu.

                Ua hoohiaaia o ua o Abou Ela Mareko e kona mau eha, nolaila, aole hiki ia ia ke hiamoe. I waena konu o ka po e uwe ana oia i kona eha, ia manawa lohe aku la ia i ka uhuhu mai o kona Lio ma kahi kokoke; ma kona makemake nui e hoopa hou aku i kona lio, kona hoapili aloha o ka manawa loihi, o kona nee hele aku la no ia a hiki i kahi o ka lio ona i nakiiia ai, olelo aku la ia i ka lio, "E kuu makamaka aloha, pehea la auanei oe iwaena o keia poe Tureke? E hoopaa puia ana oe malalo o ka malu o ka hale lio o ke alii, me kona mau lio. Pau ka lawe ana mai a na wahine a me na keiki o ko kaua hale lole, i ka bale, ka waiu Kamelo, a me ke doura ma ko lakou poho lima e hanai mai ai ia oe; pau kou holo ana i ke one o Aigupita me ka mama i like me ko ka makani; pau kou au ana i ka muliwai o Ioredane, ka wai maikai nana i hooma'u mai i kou mau aoao: Ina e lilo ana wau i kauwa, o oe o kaua ke lanakila. O hele; o hoi a ka hale lole o kaua, kahi a'u nei o Mareko e hiki hou ole aku ai. E hookomo no oe i kou poo maloko o ko kaua hale lole i malumalu ai, a e hookau aku oe i kou ihu maluna o na lima o ka'u mau keiki.

                Pau ae la kona kamailio ana, o kona hoomaka iho la no ia e wehe me kona niho i ke kaula i paa ai ua lio nei ona a hemo, hookuu aku la ia i ua lio nei, aka, i ka hemo ana o keia lio maikai, aole oia i holo, huli pono iho la kona mau maka iluna o kona Kahu, a ike ua nakinakiia ua lio nei a paa, ka lima a me na wawae o kona kahu, alaila lalau malie iho la ia i ka aahu o kona kapa me kona niho, a hapai ae la a holo aku me ka mama nui, ma ke alanui e hele ana i ko laua home loihi ma ke kuahiwi o Arabia me ka hoomaha ole. Hiki no laua me kona kahu i ka ipuka o ko laua hale ma ke kuahiwi, a waiho aku oia ia Mareko imua o kana wahine a me kana mau keiki, a o ka hina no ia o ua lio nei ilalo a make loa iho la, no ka pau o kona aho, a uwe nui na ohana a pau o ia kuahiwi no ua lio nei, he lohea pinepineia no kona inoa ma ka waha o na Arabia e noho nei ma Ieriko, no ka nui o ko lakou aloha i keia lio.

                Pela mau paha ke ano o na lio a me na holoholona e ae, ke hana maikaiia aku lakou e na kahu.

 

                Ua oi ka pono o ke kanu ana i na manao maikai a me na hana maikai iloko o ka puuwai opiopio mamua o ke kanu ana i ka aina i ke kulina, no ka mea, he wa hu wale no ko ka naau.