Ka Nupepa Kuokoa, Volume I, Number 3, 16 November 1861 — HE MELE HIMENI. [ARTICLE]

HE MELE HIMENI.

1. A Hilo no makou, I ka ua kanilehua, I ke kai o Paikaka, I ke one o Hanakahi, Kohia mai makou. Ka makani o Kamoani, O ka puu lena mauka iho. Aha lai, lai, lai, Ke aloha. 2. He aloha no makou, l ka luna o Piikea, I ka wai o Kolopulepule, I ka wai kiponaia me ke kai Kilihuna e ka ua, I ka liko o ka ohia. Aha, lai, lai, lai, Ke aloha. 3. Hiki mai nei o Kaluna, Kukinikini no makou, Makai ae o Puna, O Puna anoano i ke ala, O ka milo hohoholu, O wai a Kaea. Aha, lai, lai, lai, Ke aloha. 4. Pualu ae makou, I ka wai koolihilihi, Wai maka ala a ka manu, A hiki aku i Kapoho, Poho na pea o lanake. Kahea mai kahi wahine, O Honuapo o Kawelohea. Aha, lai, lai, lai, Ke aloha. 5. Ke kai waluwalu ili, Pae makou i Kaalualu, Ka piina o Koihala, Hala mai ia kula, Hiki aku makou ma Waiohinu, O ka wai haule poo, O kau ipu makani. Aha, lai, lai, lai, Ke aloha. 6. Pa ka makani a ke ae loa, O ka wai hu o Kauwila, O ka iliili o Koloa. Oni ana Molilele au i ke kai,

Wili e ke au, wili e ka wili, Koe ke au i Halaea. Aha, lai, lai, lai, Ke aloha. 7. Kupu mai kahi manao, Kukinikini no makou, A hiki i Kaawaloa, O ka pali kapu o Keoua, I ka wai halii lua, Loaa ia makou ke 'lii lolani. Aha, lai, lai, lai, Ke aloha. 8. Ilaila makou i moe iho ai, He pohaku no ka uluna, He paku no kahi kapa. Hoeu mai nei "Papa," Ina kakou ua awakea, Eu! na keiki o Keehukai, Ina oukou Polena ma. Aha, lai, lai, lai, Ke aloha. 9. Kukinikini no makou, A hiki aku i Kamakahonu, Ike i ka lai o Ahuenaena. I ka wehi o na kou, Ka o we a ka lau niu Ka o ne laula, Aha, lai, lai, lai, Ke aloha. 10. Kamalii o Kiope, E noho ana i ka lulu, I ka olu o Hulihee, E hee ana i ka nalu o Huiha, E uwe mai ana kuu keiki, Eia mama ua hiki mai. Aha, lai, lai, lai, Ke aloha. 11. Kukinikini no makou. Pa mai ka makani, o ka mumuku, Lauwili ka pilia, Hoohaehae a ka naulu, Hiki mai o Launiu, Pa mai nei e ka Eka, Oili aku o ke Ehukai. Aha, lai, lai, lai, Ke aloha. 12. Lalau ae o Elikapeka I ka hoe uli i paa mai, Kahea ae i na keiki, Paa ia mai ke kaula waha, Hoalu ia 'ku ke kaula ihu, Oni ana i ka ale O Aloikeehukai. Aha, lai, lai, lai, Ke aloha. 13. Kahea mai Polena ma, E ka Lani—e, E ka Lani—e, Kala mai ka waa i ka holo, Pae ka waa, pae i ka ale. Hookahi no ale Hiki makou i Kawaihae. Aha, lai, lai, lai, Ke aloha. 14. Ninau mai lolani, Auhea ia waa o kakou. Pelua iho e ka makani, Hai iho Ia Kakaako, O ka waa o Pika ma. Hiki mai lanake, Hoolana ia ae. Aha, lai, iai, lai, Ke aloha. 15. Kukinikini no makou, A hiki aku i Honoipu, I ka pali o ka Moa, Kai hee nalu o puakea. Kau i ka lio Holo aku no makou, A hiki i Kapaau. Aha, lai, lai, lai, Ke aloha. 16. A Niulii i ke kai, A Neue i ka hala O Pololu i Honokane, Kakaauki i Kawailele, I ka wai kapu, A po kahikahi, A mookinikini. Aha, lai, lai, lai, Ke aloha. Hakuia e NA KAIKAMAHINE O KA EHUKAI. Honolulu, Oka. 24, 1861.