Ka Nupepa Kuokoa, Volume I, Number 6, 1 January 1862 — Page 3

Ka Nupepa Kuokoa

a me kou lalau. E pane pololei mai ko Fatuhiva e like me ke ano o ka niniau, a o oe, he ole loa kau.
                Aole oe i wehewehe pono mai nei, i akaka kuu hoopilimeaai, e kapa pono mai ai oe he laau no Olaa. O kuu lawe ana anei a heluhelu i ka Nupepa Kuokoa, me ka uku aku i na dala elua ($2.00) no ka makahiki, ka mea e lilo ai au i hoopilimeaai? Ina pela, ua pau loa ka poe lawe i ka Nupepa Kuokoa i ka hoopilimeaai, no ka lawe ana e heluhelu, me ka uku aku i na dala elua, no ka makahiki. A e loaa koke iho oe he hoopilimeaai mamuli o Mila, a i ole, o Kauwahi; No ko lawe ana i ka Hoku o ka Pakipika, a heluhelu no hoi paha, me ka uku i na dala elua no ka makahiki. Pela ea! Ahe! pela ka!
                Aole no ka hoopilimeaai ka'u lawe ana i ka Nupepa Kuokoa; aole no au i pilipili aina aku ia Wini, e aho paha oe ua launa pu olua, aia olua ma ke kulanakauhale hookahi, a eia makou i ka Mokupuni e; kupono io no oe ke kapaia he hoopilimeaai mamuli o Mila.
                Na'u anei i kapa he "Ahahui Kuokoa?" Aole au i kapa iki pela. Lalau io no hoi oe la. Eia io no au i ka Mokupuni e: na'u aku nei ka i kapa "he Ahahui Kuokoa;" e pono io no ke kapaia oe o Kaleilalau, aole o Kaleilehua. No ka mea, he lalau wale no kau hana; aole kulike iki me ka'u i kakau ai ma ia Nupepa Kuokoa, o ka la 2 o Dekemaba. Ina he manao kou malaila, e olelo pololei oe, a kulike hoi me ke ano o ko'u manao. Ua pau paha ea? Ina pela; eia ka mea i koe.
                Mai kamailio naaupo oe, aole hoi e hookomo ma ka Nupepa i na manao lalau, a me ka hawawa, o ikeia oe e ka lehulehu, he naaupo, a e heneheneia oe; e like me keia. Mai olelo hou mai, o ku i ka nuku eueu.
KANAKA HAWAII .

He mau mea hoonaauao i keia lahui Hawaii .

E ka Nupepa Kuokoa e Aloha oe:—
                Eia malalo nei he papa hoike i na mea a ke Akua i papa mai ai, aole e pono ke mare pu. I keia manawa, ua malama ole ia na mea a ke Akua i papa mai ai. Nolaila, ke manao nei au e hoolaha aku i keia mau mea kapu i papaia e ke Akua. Oia hoi keia, aole e pono i ke kane ke mare.
                1 I kona kupunawahine ponoi, 2 I ka wahine a kona kupunakane, 3 I kupunawahine o kana wahine. 4 I ke kaikuahine o kona makuakane. 5 I ke kaikuaana a me ke kaikaina o kona makuahine 6 I ka wahine a ke kaikaina o kona makuakane. 7 I ka wahine a ke kaikaina o kona makuahine. 8 I ke kaikuahine o ka makua kane o ka wahine. 8 I ke kaikaina o ka makuahine o ka wahine. 10 I kona makuahine ponoi. 11 I ka wahine a kona makuakane. 12 I ka makuahine a kona wahine. 13 I kana kaikamahine iho. 14 I ke kaikamahine a kanu wahine. 15 I ka wahine a kana keiki kane. 16 I kona kaikuahine. 17 I ke kaikaina o ka wahine. 18 I ka wahine a ke kaikuaana a me ke kaikaina. 19 I ke kaikamahine a ke keiki kane. 20 I ke kaikamahine a ke kaikamahine. 21 I ka wahine a ke keiki kane a kana keiki kane. 22 I ka wahine a ke keiki kane a kana kaikamahine. 23 I ke kaikamahine a ke keiki kane a kana wahine. 24 I ke kaikamahine a ke kaikamahine a kana wahine. 25 I ke kaikamahine a kona kaikaina. 26 I ke kaikamahine a kona kaikuahine. 27 I ka wahine a ke keiki kane a kona kaikaina. 28 I ka wahine a ke keiki kane a kona kaikuahine. 29 I ke kaikuahine a ke kaikunane o kana wahine. 30 I ke kaikamahine a ke kaikaina a kana wahine.
                Aole e pono i ka wahine ke mare. 1 I kona kupunakane 2 I ke kane a kona kupunawahine. 3 I ke kupuna kane a kona kane. 4 I ke kaikaina a ke kaikuaana a kona makuakane. 5 I ke kaikunane o kona makuahine. 6 I ke kane a ke kaikuahine, o kona makuakane. 7 I ke kane a ke kaikaina o kona makuahine. 8 I ke kaikaina o ka makuakane o kana kane. 9 I ke kaikunane o ka makuahine o kana kane. 10 I ka makuakane ponoi. 11 I ke kane a ka makuahine. 12 I ka makuakane o kana kane. 13 I kana keiki kane. 14 I ke keiki kane a kana kane. 15 I ke kane a kana kaikamahine. 16 I kona kaikunane. 17 I ke kaikaina a ke kaikuaana a kana kane. 18 I ke kane a ke kaikuaana a me ke kaikaina. 19 I ke keiki kane a kana kaikamahine. 20 I ke keiki kane a kana keiki kane. 21 I ke kane a ke kaikamahine a kana keiki kane. 22 I ke kane a ke kaikamahine a kana kaikamahine. 23 I ke keiki kane a ke keiki kane a kana kane. 24 I ke keiki kane a ke kaikamahine a kana kane. 25 I ke keiki kane a ke kaikunane. 26 I ke keiki kane a ke kaikaina a me ke kaikuaana. 27 I ke kane a ke kaikamahine a ke kaikunane. 28 I ke kane a ke kaikamahine a ke kaikuaana a me ke kaikaina. 29 I ke keiki kane a ke kaikuaana a me ke kaikaina o ke kane. 30 I ke keiki kane a ke kaikuahine o ke kane.
                O ka makua i kakauia ma keia papa, ka makua ponoi nana ke keiki hanau ai. O na kaikuaana, a me na kaikaina, a me na kaikuahine iloko o keia papa, he mau hoahanau ponoi lakou, na ka makua hookahi. I na e mare lakou kekahi me kekahi, ua haumia kahi moe o lakou, a ua moekolohe no hoi. Aka, i na he okoa ko ke kane makua, a he okoa ko ka wahine, a mare pu laua, aohe laua e ahewaia ma keia kanawai maluna ae.
                O ka mare ana ma ke Kanawai o ke Akua, o ka lilo ana o ke kane a me ka wahine i io hookahi. Ma ia hope ua hookahi no laua, aole elua, e like me na kanaka Hawaii nei; nolaila, aole e pono ke kaawale hou, ua paa no a hiki i ka make. No keia mea, ke kau leo aku nei au i ko'u lahui, e huli a e nana i na mea i kauia ma keia Kanawai, i ole ai oukou e mare huikau, a haumia ko oukou wahi moe. Owai la o ko'u lahui e ku e mai ana ia'u, no keia mau mea a'u i hoike ae nei maluna? Owai la hoi o ko'u lahui e kokua mai ana ia'u, no keia mea hookahi?
J. U. KAWAINUI.
Kamoiliili, Kona, Oahu, Nov. 25, 1861.

Palapala Aloha no Dina Mala-o.

                Ua make oia i ka la 25 o Augate, M. H. 1871, ma Hamakualoa, Maui Hikina; a ua hele aku oia, e like me ka aoao mau o ke ao nei; a ua haalele mai ia'u e ola nei. Aka, e hai au i kona ano me ko maua noho ana; ua noho pono ko maua noho ana, ua oluolu loa, he hoahanau oia no ka Ekalesia o Lahaina, aole i kina kona noho hoahanau ana, ua kupaa loa oia ma ka pono o Kristo, ua ikaika oia ma ka pono a hiki i kona la i make ai, a ua kauoha mai kela ia'u mamua ae o ka la i make ai, ua ninau ae oia, "O ka la hea keia?" Hai aku makou, o ka Poalima keia, ninau hou mai kela, "A hea hiki mai ka la Sabati?" Hai aku makou, "A kela la aku." I mai la kela, "O ko'u la ia e make ai." I hou mai la no kela, "E Daniela, e kuai oe i kekahi wahi aina o kaua, a loaa mai ke dala, hookaa aku oe i ka aie o kaua i ke aupuni o ke Akua." Olelo aku au, "Aole o kaua aie i koe." Olelo hou mai la no kela, "He aie no i ka Halepule ma Keanae, umi dala, ($10.00) ma Lahaina, he umi dala, ($10.00) no ka aie kumu ma Kawaiahao, no ka hoouna misionari, eono dala, ($6.00) oia ko kaua aie, ae aku la au, ae, ua akaka ae la he aie.
                A hiki io mai la ka la Sabati, o kona la ia i make ai, ua kupono e like me kana olelo mua ana i ka Poalima. Eia kekahi, mamua ae o kona la i make ai, aloha mai no oia i kana kumu aloha, ia D. Balauina kane, a me Balauina wahine, i na hoa kuka ona ma ka pono, a me Lilia Kukunaokala, Nahinu, Kealoha, o'u hoa luhi ma na pono a pau, pela kana mau olelo mamua ae o kona wa make. O kona mau makahiki o kona ola ana, 54.

Kanikau Aloha no Dina Mala-o.

Ia Kaulialia kuu hoanoano,
O ke ano aloha oe, o kuu wahine,
O kuu wahine ka hoi ka mea aloha,
Mai ke alanui hooke kanaka,
Ala laula ke hele, e kuu wahine i ka hono o na aina.
Mai ke kai maokioki o Hauola,
Mai ka wai kahe huna i ke pili.
Hemo ku pili kaawale e ke hoa,
Kuu hoa i ka makani kolonahe he Aa,
E wehe aku ana i ka lau o ka ulu o Lele,
Lele ke aloha mokumoku i ka manao,
Manao aku au i hoapili no'u ke anu me ke koekoe,
Anu maeele i ka ua ulalena,
I ka ua Ulalena o Piiholo,
Kuu wahine hoapili o ke anuanu.
Kuu hoa pupuu anu o ia uka,
Oia aina koekoe ke noho—a,
E loku ana iloko o ka io ka hui,
Ka li anu haukeke i ka ua,
I kahi a maua e noho ai, me kuu wahine,
I ka ua o Hamakualoa—e, e loa—e.
Loa wale hoi ka noho ana a ke aloha,
Ke kau ana a ke aloha i kuu maka,
E haka loa nei no, aole i nalo,
Ke aloha o kuu wahine, aole i pau eia—e.
D. II.
Lahaina. Dek. 13, 1861.

Manao Aloha.

I ka Nupepa Kuokoa; Aloha pu kaua:
                Nani ka lawe ana mai o ka makani Kilioopu, i ka leo aloha o ko Fatuiva poe, a loaa makou e noho ana i ka malu kuawa o na Koolau.
                Akahi no makou a halawai me ko kakou (Batimea hou,) Kapohaku. Ua hiki mai oia ma ka la 21, a ma ia ahiahi no, ua hele oia ma Waikapu, e hoike ana i ke ano o ko Fatuiva poe kanaka, a me ke ano o ka hana a ka Hoku ma ko Nuuhiva pae aina. He nui no ka poe i akoakoa mai a piha ka hale, a kuku na kanaka iluna, no ka piha loa;  a i ko lakou lohe ana i ka leo o kekahi o ko Nuuhiva pae aina, he nui ko lakou hauoli a me ke aloha, i kolaila poe.
                A ma ka la 24, oia ka la Sabati, alaila hoike mai la oia i kana olelo ma ke Mele a Solomona (Song of Solomon) ma ka Mokuna 2:3. "Ua noho iho au malalo o kona malu me ka oluolu, a ua ono kona hua i kuu ai ana." Ma ka luakini ma Wailuku, a malaila kana hoike ana mai i ka malu o ko ke Akua poe kanaka, a pau kona hoike ana mai i na mea e pili ana ilaila; alaila hea mai la ka leo o kekahi o ko Fatuhiva poe kanaka, kekahi o na hua i loaa i ka poe paahana ma na aina pegana.
                I ko makou hoomaka ana e hoolohe aku, eia na mea a makou i lohe mua aku ai, "O na mea a ke Akua i hana ai iloko o na la eono; a me na aina i laha ai ka olelo a ke Akua i ka wa kahiko, a me na kanawai he umi a ke Akua i kau mai ai." Ia manawa, hu nui mai ke aloha i kolaila poe kanaka e noho ana i ka eleele o ka make, a pau na mea e pili ana i kolaila poe kanaka.
                A hoike mai la oia i na mea a pau e pili ana i ka poe paahana, e noho ana iloko o na aina pegana, a me na mea e pono ai ka lakou oihana, a e mau ai hoi ka ikaika. 1, O ka ai a me ka ia. 2, O na mea aahu. 3, O ka hale kahi e noho ai, a o na pilikia i loaa mai i na kamaaina; aka, iloko o keia mau pilikia i loaa mai, ua hoomanawanui no ko ke Akua poe kanaka, no ka mea, ua lana ko makou manao, "Oia pu me makou i na manawa a pau a hiki aku i ka hopena o keia ao." A nolaila i lana ai ko makou manao; a pau kona hoike ana mai i keia mau mea, a ke ninau mai nei hoi ka leo o ko Fatuiva poe, "Owai la ka poe i piha i ke aloha, a i makaukau e kokua i ka poe e noho la ma na aina pegana?" No ka mea, ke pa-e pinepine mai nei ka leo mai na aina pouli mai, e kahea mai ana i ko Hawaii nei poe i piha i ke aloha, i ka poe e noho ana iloko o ke au awaawa o ka make. A nolaila ka hauoli a me ke aloha i ka poe e noho ana iloko o ka malu o ka niu o na aina pegana.
                He ma-u ia wahi leo aloha. Ua lai no, ke hoi nei ke keiki o na wai, ua uhi kuawa i na pali.
W. L. MAULE.
Waihee, Maui, Nov. 30, 1861.

Pau ole ka epa hupo o Iapana.

E ka Nupepa Kuokoa:
                ALOHA KAUA:—Ua hookikinaia mai au e ka manao, no kela mau huaolelo maluna, "Pau ole ka epa hupo o Iapana." E ninau mai auanei paha o'u hoa, "Heaha ia mea?" Eia no, ma ka Apana kahi a'u e noho nei ma Kailua, ua ike aku au i na la Sabati a pau; i ka hele mai o kekahi poe hoahanau ma ka luakini o Iehova ke Akua, me na ili kalapu, a me na kepa e u-li-u-li ana ma ko lakou mau wawae. I ko'u ike ana, makahahi iho la au iloko o'u iho; "E like ana no anei ka hale o Iehova ke Akua nui hooweliweli me na pa holoholona? A ke mau nei no anei ka noho ana o keia lahuikanaka iloko o ke ao lipolipo o ka naaupo?" Nolaila, ke paipai aku nei au ia oe e ka Nupepa Kuokoa, ke kukini mama ahai lono. E komo aku oe ma na apana a pau kahi i laha mai ai ka olelo a ke Akua, o loaa auanei lakou i kela mau huaolelo maluna, "Pau ole ka epa hupo o Iapana." Mai hele hou mai me na ili kalapu, a me na kepa ma ko lakou mau wawae, e hoohilahila ana ia lakou iho, a me na rula kupono o ka poe maikai; a kuhihewa iho ka manao he kohu ia hele ana. Eia na rula kupono o ka hele ana i ka la Sabati, a hiki mai ua la la, e ala i ke kakahiaka, e kii no i ka lio, a e uhi na wawae i ka ili kalapu a me na kepa, e hele no i ka pule, a i ke kokoke ana i ka luakini o ke Akua, e wehe no i ka ili kalapu me ke kepa, a e waiho po no ma kahi i waiho ai ka noho o ka lio, a e komo no iloko o ka hale o ke Akua me ka maikai, a ina hana ka hoahanau me ia, aole nona kela mau huaolelo, "Pau ole ka epa hupo o Iapana."               
                Ma na uki paa o ka honua a me na uki lewa o ke ao nei. Pela no anei ma na aina naauao hohonu o ka ike, a nolaila, e o'u hoa uhai aholo o ka naauao, e pupukui nei i ke anu o ka hooilo maloko o keia Aupuni, ua ike kakou ua aoia kela lahuikanaka a ua holo ka ike ma na palena o keia mau Ailana, a ua kanaha makahiki a keu aku, eia no ke ala hou nei na mamo a Kaneiahuea, me he Aama pii pali la. Ua pau me ke mahalo.
L. KEKUAHANAI
Honuaula, Kailua, Hawaii, Dek 12, 1861.

Ka waiwai o ka naauao.

                O ka naauao, ke ku nei oia me he hale nui la i piha i na keena o kela ano keia ano, i waihoia i na waiwai he nui me ka lako i na mea maikai, he mea maikai, he mea maua ka naauao, he mea kiekie, he 'lii, he luna, he makua, he moku, he waa, he hanohano maoli no, he dala, he lole, he bipi, he lio, a me kela mea keia mea.
                He mea mana ka naauao, he mea ikaika, he mea nui, hohonu, laula, akea, aole pau i ke anaia, aole ona palena, aohe mua, aohe hope, he mea oolea, paakiki, he mea kokua ke malama ponoia, ke ku nei ka manao e hoike ia ia iho ma keia mau Mokupuni, mai Hawaii a Niihau, me he hao makeneki la, ke huki nei i ko lalo e pii iluna, a ke hoohaahaa nui i ko luna poe kiekie ilalo.
                Ke wehe nei ka naauao i ka mana o na'lii, ke hoomaikai nei me ka pulumi ia loko o kela kanaka keia kanaka, ke anai nei i ka poe huhu, hana ino, ke hooluhi nei i ka poe huhu a kiola wale ia ia, ke holo nei kona mau enemi, ke mahuka nei me he pio la, ke kukuli nei imua ona me he kanaka pule la.
                He mau lala ko ka naauao e pono ai ka noonoo, ka ike, ka noiau, ka haahaa, ke akahele, ka noho malie, ke akahai, ka hoolohe, ka hoopono, ke aloha, ka hookipa, ka manaoio, ke kuikahi, ka manawalea, a me na mea e ae e like ana. He mau hoike no hoi kekahi e maopopo ai ka waiwai o ka naauao, o ke kamana, amala, kumeka, kela humuhumu, kupa pahu, loio, lunakanawai, lunaauhau, kakauolelo, luna helu, kumukula, kahuna pule, a pela aku.
                E nana ia Solomona, o ka naauao kana i noi, oia wale no, aohe waiwai, aohe mau mea e ae, aka, ua oili mai ka mana, ka waiwai, ka hanohano, ke'lii ana, ka lanakila maluna o ka enemi, ka nui o na la, na wahine alii ehiku haneri, me ekolu haneri hoa moe, hookupu wale na'lii i ka waiwai, i ke gula, a me ke dala. O ka naauao ke kumu.
                Pela o Iosepa, Napoleona, Wasinetona, a pela ma Hawaii nei. Ua kiekie na keiki kuaaina, a like pu me na'lii, ua mana loa ma ka olelo ana, imua o kela mea keia mea, a ua koa na helehelena me he alihikaua hookahe koko ia e luku ana. Ua maopopo, ke hookauwa ia nei ka poe naaupo e ka poe naauao, ke hooluhiia nei i o ia nei me ke kuonoono ole.
                He waiwai mama ka naauao, aole like me ke kaumaha o ke dala, a me ka waiwai maoli, he kokua maikai ka naauao no kela mea keia mea, ke malama ponoia, e kokua no oia i ka ilihune, nele, e like me ka wahine kanemake, a me ke keiki makua ole, ua kapaia ka naauao. "He kumu paa imi waiwai no ke kanaka, ke malama ponoia," e like me ko na misionari hana ana, a, ke ike nei no hoi kakou ma Hawaii nei, ua kuonoonoo, a, waiwai loa ka poe naauao, ua maopopo loa no hoi, he inoa kaulana a maikai loa ko ke kanaka naauao, i oi aku mamua o ke daimana, a me ke aiai hulali o ke gula, i oi kela aku mamua o ke ala o Lipanona, a me na pua rose o Sarona.
                Nolaila, e ko'u poe hoa luhi o ke kau a me ka hooilo, o ka ua a me ka la, o kahi ai uuku, a me hahi i-a i ka miki-ao, o ke anu o Lihau, a me na kiowai o Auwaiawao, e nana ana i ke kiekie o ka puu o Paupau. E ko Punahoa i Hilo, a me ko Waioli, e alo ana i ka hu-i-hu-i anu ko-e-ko-e kawau o Hanalei, a me na mea a pau, huli pono mai kakou e kukuli hoomaikai ia "naauao a me ike," i nani ai kona inoa, a hiki mai ka milenio.
J. N. PAE.
Kaumakapili, Okatoba 21, 1861.

                E NA LUNA O KE KUOKOA. — E oluolu oukou e hooili mai, ma kou lima i na Pepa a pau e koe nei ma ko oukou mau lima, o ka Helu 1, 2, 3, 4, a me 5; no ka mea, ua nele i na Pepa o na Helu mua.

He olelo nane.

                Ke ku nei ke Aupuni Hawaii maluna o kahi papa lahilahi, eono kapuai ka loa, a eono ka laula, a hapa iniha ka manoanoa, a malalo o kahi ana e ku nei, he lua hohonu loa, aole i ike pono ia na miliona mile kuea ka hohonu; a ke hoomakaukau nei oia e hookomo i ke kaula, ma kona pu a-i, e kaawe ia ia iho, a ke paa nei ke Akua i ka piko o ke kaula, a hiki mai i kona la, a me kona manawa, e huki ia ai iluna, a lewa ae oia maluna o kahi ana e ku nei, hookuuia aku oia ilalo a make loa.
                Imua o oukou e ka poe noiau a me ka poe naauao o keia Aupuni; e imi oukou i ke ano o keia nane; a hai ae i ka lehulehu, oiai au e ike ana i ko oukou manao iluna wale no kahi i akake ai; Aole au i manao e lilo keia i enemi no oukou; aka, e like me ka haawina i loaa mai ia'u, pela hoi au e hai aku ai, a na oukou e hai ae i ka loaa.
S. MAIKAU.
Honolulu, Dekemaba 25, 1861.

Ninau Palapala aina.

                1 Aia ma ka Ainapuniole hea ke kulanakauhale o M W. P. N.?
                2 Ma ka aina hea hoi kahi i ku ai oia kulanakauhale?
                3 Ma ka aoao hea la ia mai Hawaii nei aku?
                Ua lana ko'u manao na ke kumukula ma Kawaihapai, Waialua, Oahu, e wehewehe mai i keia mau ninau me ka maopopo loa. Mai hele e makilo i ka loaa a hai, o makehewa ka inoa kumukula ia oe.
S. N. KAAUHAUNUI.
Pauoa, Honolulu, Dek. 25, 1861.

KE KUMUKUAI O NA MEA KALEPA MA HONOLULU.

Bipi Loleia, no ka paona, 4 hiki i ka 6 keneta.
                "              Ola, no ke poo, $5.00 a hiki i ka $18.00.
Hipa Loleia, no ka paona 12 1/2 keneta.
                "              Ola, no ke poo $3.00.
Puaa Loleia, no ka paona. 10 keneta.
                "              Ola uuku, $2.00 a hiki $3.00.
                "              Ola nui, $6.00 a hiki $10.00.
Pelehu kane Ola, $050 keneta
                "              wahine Ola, 37 1/2 a hiki i 25 keneta.
Moa, 25 a hiki i 37 1/2 keneta.
Kulina, no ka paona 12 1/2 keneta.
Pine,       "              "              3 keneta.
Pepeiaolaau,          "              8 1/2 keneta.
Pulu,       "              "              4 keneta.
Loli,        "              "              12 1/2 keneta, (ke nui.)
Kopaa ulaula,        "              7 a hiki 9 keneta.
                "              keokeo, "              15 keneta.
Kalekoa, ko ka Ia, 13 a 14 keneta.
Silika,      "              "              aole akaka loa.
Ahinahina.            "              16 keneta.
Uala kahiki, no ka pahu, $2.50.
                " maoli,   "              "              $1.50.
Berena, no ka paona 5 1/2 a hiki 6 1/2 keneta.

AWA HONOLULU.

                Ma kela pepa keia pepa e pai makou i na moku ku mai a holo aku. Ua inoino iki ka makani i keia mau la i hala aku, a nolaila, ua holo pono ole na moku Hawaii. Eia na moku i ku mai.
Dek. 19.— Moku Kalepa Amerika, Carrington. 24 la ma Kapalakiko mai. Komo iloko o ke awa, a holo oia ma ka la 20 no Iapana. Ka wahine hanohano, Lady Franklin kekahi maluna o ia moku.
Dek. 19. —Moku kia lua Moi, mai Lahaina mai.
Dek. 19.— Moku kia lua Kekauluohi, mai Kau ame Kona, Hawaii mai, me 116 eke pulu, 8 eke pepeiao, 150 eke kope, a me Ili kao, pipi, &c., 33 mau ee moku maluna.
Dek. 20. — moku okohola Milo, mai ka moana akau, me ka aila, penei: 50 pahu aila sepama, 1700 pahu aila kohola, a 14,000 paona iwi kohola. Nui kona loaa.
Dek. 20.— Moku kialua Odd Fellow. (Komokini.) mai Koloa mai, me 180 pahu a me 75 eke ko, 8 paila wahie, &c.
Dek. 21.— Moku kialua Neke, mai Hilo mai, me 7 eke pulu, 2 eke pepeiao, &c. Ee moku, 7 haole & 15 kanaka.
Dek. 22. — Moku mahu Kilauea, mai Hilo mai, me 46 eke pulu. 6 eke pepeiao, 27 pahu ko, 17 eke kope, 14 pipi, 27 hipa, 15 puaa, &c. Ee moku, 5 haole, 85 kanaka.
Dek. 23.— Moku kialua Wawiki. mai Molokai mai.
Dek. 25.— Moku kialua Moikeiki, mai Lahaina mai, me 2 paila wahie.
Dek. 26.— Elua moku Kalepa, pae mai keia la mai Kapalakiko mai, lawe mai nei he Eke Leta hou. Holo hou kekahi no Kina, maluna 250 Pake, a o kekahi no ka Mokupuni kukaemanu.
Dek. 27. — Moku kialua Hokulele, mai Kauai mai.
Dek. 27. — Moku kialua Bolabola Mauupaia, 24 la mai Bolabola mai, he wahie wale no ka ukana.
Dek. 28. — Moku kia kahi Express, mai Molokai mai.
Dek. 29. —Mokuahi Kilauea, mai Hawaii mai, a me na awa e ae
Dek. 30.— Moku Hana, mai Hilo a me Hana mai.

HANAU.

Dek. 5, ma Waiaha, Kona Akau, Hawaii, hanau o Okua k. Na Malimali me Keakahiwa.
Dekemaba 16, ma Kawaihapai, Waialua, Oahu, hanau o Kapewa k. ua make mailoko mai. Na Keino laua o Laamaikahiki.
Dekemaba 17, ma Ainaike. Waialua, Oahu, hanau o Luka k, Keamalu k, he mau keiki mahoe. Na Hoopili me Koiki.
Novemaba 1, ma Alae, Kipahulu, Maui, hanau o Kalua w. Na Kauhi k. me Kahanauai w.
Novemaba 3, ma Kaaawa, Koolauloa, Oahu, hanau o Mose k. Na Kahopuaiki me Kenuipoohiwi. Novemaba 29, ma Kahana, Koolauloa, Oahu, hanaua o Laikekaona. Na Samuela me Alohi
Dekemaba 21, ma Mokauea, Kalihi, Oahu, hanau o Puniakaia k. Na Kalua me Kanakaole.
Dekemaba 15, ma Waikiki kai, Oahu, hanau o Kaenai w. Na Huaili me Kino.

MARE.

Dekemaba 19, ma Paalaa, Waialua, Oahu. mareia o Koha k, me Kuiki w. Na J. S. Emesona laua i mare.

MAKE.

Dekemaba 22, ma Kahului, Kona Akau, Hawaii, make o H. P. Kapaleaumoku k.
Dekemaba 24, ma Puaa, Kona Akau, Hawaii, make o Kaumoali k.
Dekemaba 23, ma Kaumakapili, Honolulu, Oahu, make o Keloha w,
Dekemaba 23, ma ka Hale mai, Honolulu, Oahu, make o Kamakane 27 ona makahiki, hanau oia ma Kailua, Hawaii.
Dekemaba 5, ma Ouawa, Hamakualoa, Maui, make o Kawaahulihia k.
Dekemaba 6, ma Opana, Hamakua, Maui, make o Pakaekae k.
Novemaba 26, ma Olaa, Puna, Hawaii, make o Moolau w.
Novemaba 18, ma Kawaihapai, Waialua, Oahu, make o Naaihelu k.
Novemaba 20, ma Ou, Kawailoa, Waialua, Oahu, make o Kanakaole k.
Dekemaba 11, ma Kamanuwai, Honolulu, Oahu, make o Kekela k.
Dekemaba 5, ma Waimea, Oahu, make o Nahiwaku k.
Dekemaba 14, ma Waimea, Oahu, make o Kaaloa w.
Novemaba 9, ma Kamananui, Waialua, Oahu, make o Luika w.
Dekemaba 15, ma Kamananui, Waialua, Oahu, make o Kekua w.
Novemaba 1, ma Ohia, Molokai, make o Kane k.
Novemaba 8, ma Kalawao, Molokai, make o Kalunamakakala w.

                O ka malama keia (Ianuari) e uku mai ai ka poe lawe i keia pepa. O ka poe a pau, ke ike mai i ke Kilohana nani i hoomakaukauia no lakou, e hiki ia lakou ke olelo me haaheo, oia kekahi i lawe i kekahi kope nana. A ke hoomanao iho hoi oia i ku nui o na lilo o makou i hiki ai ke malama ia ia, e wikiwiki mai no ma ka uku ana mai i keia manawa, i ka uku makahiki. O ka "Kuokoa" ua like ka nui me ka Nupepa a na haole e uku nei i na dala eono, no ka makahiki, a ua oi ka nani, ka poe a pau e makemake ana e loaa ka pepa o ka la mua o Ianuari me ka Hae, e loaa no ia lakou ma ka uku ana mai he hapawalu no ka mea hookahi.

ALEMANAKA HALE KUAI, NO
1862.

 

 

 

OLELO HOOLAHA.

O KE KANAKA IA IA KA MAKAANIani i loaa'i i ke keiki, i ke kakahiaka iho nei o ka la Sabati, la 22 o Dek. nei; Ke kauohaia'ku nei e lawe mai i ke Keena o keia Nupepa, kahi ona e ukuia'ku ai.
6-lt          Kuokoa

HOONANI HALE.
MAKEPONO.

                 O KA POE A PAU E MAKEMAKE ana e loaa na mea maikai e hoonani i ko lakou mau hale, e aho e naue mai i ka Hale Kamana o ka mea nona ka inoa malalo, ma ke Alanui Hotele, a malaila e loaa'i ia lakou na PAPA KAUKAU NUI A LIILII HOI, NOHO O NA ANO A PAU. MOE O NA ANO A PAU. PAHU KUPAPAU.
                E ku mai ana mai Bosetona mai, ma ka moku George Wasinetona, ma ka malama ae nei o Ianuari, he mau mea HOONANI HALE o na ano a pau, a e kuai Emi aku no au. E hele mai e nana a Kuai iho.
C. E. WILLIAMA. (UILAMA.)
Honolulu, Ianuari 6, 1862.   6-1y.

KAMANO! KAMANO!!

1050 PAHU KAMANO MAIKAI LOA i loaa mai nei. A e kuaiia aku e like me ka makemake o ka poe kuai mai Ma kahi o H. HACKFELD & Co. (KALE MA.)
6-3m.

MAKEMAKEIA.

ILIBIPI, ILIKAO, a me ko KELEAWE kahiko.
                UA MAKEMAKEIA NA MEA I HAIIA maluna e C. Brewer & Co. (Burua mai) ma ko laua Hale Kuai i kai o ka Uapo. E uku no laua i ke kumukuai makepono no ia mau mea.
6-3m        C. BREWER & CO.

PILI HALE! PILI HALE!!
PAPA ULAULA OREGONA!

E KUAI MAKEPONO IA AKU I NA MEA e kuai koke mai me ke dala maoli, ua oi ka maikai o keia papa mamua o ka papa Oregona e laweia mai nei, a ua like loa ke kumu kuai.
6-4t         C. BREWER & Co.

WAIMANALO.

EIA KEIA LIO KEA MAIKAI ua hiki mai maanei, na Mi. Thomas Cummins i lawe mai Kapalakiko mai, he lio maikai loa keia no Kenutake mai, a noloko mai o ka Ohana Lio Medoka. E ku ana keia Lio ma Waimanalo, Koolaupoko, Oahu, me ka makaukau e hoolimalima aku i ka poe mea lio wahine e makemake ana e loaa na keiki lio maikai, me ka uku haahaa.
                E ninau ia JOHN A. CUMMINS. (KEONI KAMAKI.)
Waimanalo, Dec. 14, 1851.  5-3m

OLELO HOOLAHA.

A MAHOPE AKU O KEIA LA, AOLE E uku ka mea nona ka ina malalo i na AIE i kiiia ma kona inoa me ka Palapala Kauoha ole.
D. W. STILES
Waipio, Hawaii. Nov. 22, 1861.          4-1m.
 

H. W. SEVARANA.
Luna Kudala a mea Kalepa,
Hale Mahoe.
Alanui Aliiwahine.
5-1y

ANOANO RAIKI!
Anoano Maikai Loa !

NA MEA A PAU E MAKEMAKE ana e kanu i ka raiki, e kii mai lakou i ka anoano raiki ma ko'u wahi ma Puiwa, i Nuuanu, a i ole ia ma ka Halekuai Buke o H. M. Wini, ma Honolulu. He 10 keneta ko ka paona hookahi ke kumukuai o ua naoano la.
G. R. ROSS, (Roke.)
Puiwa, Nuuanu, Dek. 3, 1861.             5-4t

HE KIALUA KUAI
NO KA AINA.

HE MOKU HOU LOA KEIA UA kapiliia ma Kauai, a ua lako i ka heleuma, na pea, na kaula, a me na mea a pau. Ke makemake nei au e kuai i keia moku me ka mea aina, he moku no ka aina. Auhea oukou na mea aina a puni i ka holoholo moku, He 11 paha tona o keia moku, a ua kupono i ka holo pili aina.
L. MAKALE,
Hale Hookolokolo, Honolulu.            3-6t

LOLI, LALA MANO
A ME KA
Pepeiao Laau.

KE MAKEMAKE NUI NA MEA nona ka inoa malalo, e kuai i ka Loli, Lala Mano a me ka Pepeiao Laau. Me ka uku aku i ke kumukuai make pono, penei: No ka paona Loli hookahi (ke lawa ka paona i na Loli elua i ka wa maloo 12 1/2 keneta. No ka paona hookahi o ka Lala Mano, he 20 keneta. No ka Pepeiao Laau, 8 keneta no ka paona hookahi.
                O ka poe e loaa'na na mea i haiia maluna, e pono e hele mai ma ko makou hale kuai, ma ke Alanui Alii, e pili ana ma ka aoao komohana o ko Daimana ma Hale Kuai.
UTAI A ME AHEE.             (3)