Ka Nupepa Kuokoa, Volume I, Number 6, 1 January 1862 — He Mele aloha nou e ka Nupepa Kuokoa, i keia makahiki hou. [ARTICLE]

He Mele aloha nou e ka Nupepa Kuokoa, i keia makahiki hou.

Ke oli aku nei makou, I ke mele no ka makahiki hou. He mele Ia he alohn, Nou e ka Nupepa Kuokoa, O ka Nupepa no oe, Lawa pono ai na iini, Pau pono na makemake, Kuene pono na ikehala, Mai hoohala mai oe, I kou kaapuni hele ana, Ma keia mau Mokupuni. Ma na Helu elima i hala, Aohe lokomaikai a koe, O ka Nupepa Kuokoa. Ua lilo na Helu elima, I mau Helu manuahi, Pa iho i ka Ahahui, Aohe lai a koe, Hipahipa hulo ke aloha, Nou e ka Nupepa Kuokoa; A he keu no oe a keu, Keu oe o ka lokomaikai, Aohe lua ma ke Kaona, Ka hookuu i ka Ahahui, Ka makua nana i hookumu, Ka Nupepa Kuokoa. Akahi oe a ike, I ka hana a ke Kuokoa, Ku oe a kaawale. A hana oe i kau hana. Aohe mea keakea, I kou hoohehelo ana, Ma na kai ewalu, Ewalu no tausani pepa, Ua helu na hapa nui a koe; Aole pela kou hoa hele, O ka ohi no kana a pau loa, Pau e no na huna kapu, Pau pu me na huna noa. Auhea wale ana oe, E ka Nupepa Kuokoa, Hoa hele o ka Hoku, Ka Hoku o ka Pakipika, Pehea ko Ahahui, E naue ae i na Hotele, Ilaila na mea ono, A ka maka e ike ai, Hoonuu oe a kena, A kena kena i ka Nupepa, I ka Nupepa la o ke aha ? Nupepa o ke Kuokoa, Kupono ke Kuokoa, I imiia e Haalilio, Ua lilo ka la Kuokoa, La hauoli Aupuni, Ma na moku Hawaii nei. Akahi au a ike, I ko ia nei kamahao, Ku kilakila i ka lai, Ka naue a ke Kuokoa, Kohu Kapena oia la, I ka alo i ka ino nui, Nui na huaolelo, I loaa mai ia nei, Ia nei mai kaua, I ka olu o ka Palai, A lai ia mai au, E na leo kaumaha, O ka Hoku o ka Pakipika. Ua ike no kakou, O ka mea mua lilo i hope, O ka mea hope lilo imua, Pela paha na Nupepa, Ua hala e aku ka Hoku, Ka Hoku Pakipika, O ka Helu 14 keia, Akahi no a puka, Ka Nupepa Kuokoa, Ka la mua o ka makahiki, Ua nani ua lai oe, Ua hiehie ke noho mai, Ua onaona ke ike aku, Pau ole na mea ono. O ka Nupepa Kuokoa, Ua hai kumu ia aku, Kau hana i hiki mai ai, Ma na mea ono ke ai, Imua o na hanauna hou, I ai lakou a ono, A mauu ke moni aku, A halulu i ke kumu kileo, Ko leo kai pane mai, Ma ka lewa o Kaleponi, Poniia oe a paa, Ua paa oe i Maleka, Kahi nana oe i lawe mai,

Na hua kumu o ke poo, Ke poo o ke Kuokoa, O ke poo iho ia, Kahi i waiho ai ka noonoo, O ka noonoo kai onipaa, Hoopaa iho oe a paa, I paa pono ai ko puni, Ko puni o ka Nupepa, Ka Nupepa Kuokoa, Kai huakai ka Ahahui, Ma na alanui o ke Kaona, Me na papale kalali, Me na Lipine Kuokoa, Aohe wewelo a koe, Kapalili lua i ka umauma, No Hae o ke Kuokoa. Ku mai e ka Luna Nui, Hooponopono i ka Ahahui, Kahea I ka poe makemake, Mai Hawaii a Niihau, Na Misionari a pau, Me na hoahanau pu, Na kumu me na haumana, Kokua i ke Kuokoa. W. N. P. HUI KUOKOA.