Ka Nupepa Kuokoa, Volume I, Number 12, 15 February 1862 — Page 1
KA
NUPEPA KUOKOA
Ke Kilohana Pookela no ka Lahui Hawaii.
BUKE I. HONOLULU, FEBERUARI 15, 1862. HELU 12.
He Mele Inoa no Luse.
He inoa keia no Luse.
O Kailiau no he makua,
O ka hana mau no Amerika,
Ka uwe olu i Nuuanu,
Mea ole ia e hana ia nei,
Hoopili hoi au ilaila,
I ka lai wale o Bosetona,
A he koa nui no hoi ae,
No ka moana Iniana,
Ina me oe ae ianei,
O ka iini pau ole a loko,
Hoolahaia aku hoi ha,
I ikeia o Ladana,
I ka wai pipii i ke kino,
I ka wai o ke aloha,
Haina ka inoa i lono,
Kalaiokekaona, he inoa.
P. KAAUA.
He inoa keia no Luse,
Hoaloikeanu he makua,
Eia hoi au o ka lipo.
O ka noe anu o ka nahele,
Koe ana i ka maka o ka Iwi,
Ua ilihia au i ko leo,
Ka wawalo a ke one o Huia,
Uhi ana i ka pua o ka Pikake,
Paa mai i ka noe Puarose,
Kohu ole i ka pua Oliva,
Inu i ka wai laha ole a ka manu,
Nolu ana i ka lau o ka niu,
Paio ka makani hoolua,
Lawe ana i ka lai o Kona,
O ka ihu o Neke ke aloha,
Au ana i ke kai o ka Iwi,
Haina ka inoa i lono
Kalaiokekaona, he inoa.
A. NAAI.
He inoa keia no Luse,
Ahiwelaikekula he makua,
Nani wale ka luna o Haupu,
Kela kuahiwi kiekie,
Hooluhi i ka ihu o ka lio,
Hoopa i ka pua o ka hau.
Ua hala ka palena e ke hoa,
Ua pau ka ike ana aku
I ke'hu kai o ka moana,
Ua ana ae nei hoi au,
Ka ukana hoi o ke aloha,
He aloha kuu lei Lilia,
Ka pua ula mau i ke kula,
He aai ka Ilima me ka Lose,
Lei kahiko no ka wahine,
I hahai e like ia la,
Me kinikohu pua Melekule,
Haina ka inoa i lono,
Kalaiokekaona, he inoa.
M. KAMAKA.
He inoa keia no Luse,
Kauaikanahele he makua,
Auhea wale oe e kaipo aloha,
A ka mea nui e eha'i o ke kino,
Kuu kino hoi alo aku i ke anu,
I ka uka mehameha i Waolani,
Laahia maua ilaila,
I ka malu hale o Hanakauluna,
Hiki mai ka manao ua ahi wela,
Mea ole ke kula o Kulaokahua,
I ka holo kainapu a na lio,
I ke kaa kowehe i ke Kaona,
Ona ka luna i eha hua,
Hu wale mai nei ke aloha,
I ka one haaheo o Puna,
I ke one haaheo o Punahoa,
Haina ka inoa i lono,
Kalaiokekaona, he inoa,
A. OPUNUI.
He inoa keia no Luse,
Weheikapili no he makua,
A he mea nui ia nolaila,
Ke kula haine hoolai,
Laahia maua i ke anu,
I ka hiki ana mai a ka mahina,
E wehe mai ana e ao,
I na kaua ua olu,
Ua uhi ka noe i na pali,
Ua pili paa mai ka manao,
Me kuu pua hana uka ole,
Aohe ke i Lihue,
Hue ana i ka lae o Kaena,
Ka uwalo a ka leo o Kaneu,
Haina ka inoa i lono. L. PUA.
HE KAAO
NO KEKAHI
KEIKI ALII.
HELU 1.
I ka manawa i nui ai ua keiki alii nei, makaukau oia e hele i ka makaikai ma na welelau o ka honua.
Hele aku la ua keiki alii nei, a loaa keia kanaka e ku ana ma ke alanui, ninau aku la keia. "E aha ana oe maanei?" I mai la kela, "E nana ana au i na aupuni a pau o ka honua." Ninau hou aku ua keiki alii nei, "He ike ka oe i na aupuni a pau o ka honua?" Ae mai la kela, "Ae." Olelo hou aku la ke keiki alii, i ka ike ana i na aupuni a pau o ka honua nei, "Owai ke aupuni i oi aku ka maikai." I mai la kela "O ke aupuni o ka moopuna a Papa ma, laua o Wakea." Olelo aku la ke keiki alii, "Aole anei ou makemake e hele pu me a'u?" I mai la kela, "He makemake no." A i ka lohe ana o ia nei i keia kanaka, o ke aupuni o ka moopuna a Papa ma, laua o Wakea, ke aupuni i oi aku ka maikai mamua o na aupuni a pau, nolaila, paa ko ia nei manao e hiki ilaila, hele aku la laua nei, aole liuliu, loaa ia laua nei keia kanaka e ku ana ma ke alanui, ninau aku la ua keiki alii nei. "E aha ana oe maanei?" Olelo mai la kela, "E kali ana au i na e kokoke e napoo ka La, alaila, holo au e hopu i ka La." I aku la ua keiki alii nei, "Paa no ia oe ka La?" Ae mai la kela. Ku lakou nei malaila, kakali a kokoke e napoo ka La, holo ua wahi kanaka nei e hopu i ka La a paa, hoi mai la ia a hiki i o laua nei la, i aku la ke alii. "Aole ou makemake e hele pu me a'u." I mai la kela, "He makemake no."
Hele aku la lakou nei i ua po nei, a loaa kekahi kanaka e moe ana i ke alanui, e haalulu ana no ka uuku o ke anu, aia a nui ke anu, alaila oluolu pono kona kino, koi aku la ke alii, "Aole ou makemake e hele pu me makou." I mai la kela, "He makemake no." Hele aku la lakou nei, loaa hou ia lakou nei kekahi kanaka e haalulu ana, no ka uuku o ka wela, aia a nui ka wela, alaila, oluolu kona kino a pau.
I aku ua keiki alii la ia ia, "Aole ou makemake e hele pu kakou?" I mai la kela, "He makemake no." Hele aku la lakou nei, e ku ana kekahi kanaka ma ke alanui, ninau aku la ke alii, "E aha ana oe maanei ?" "E ku ana au e pana i ka La." I aku la ke alii, "He ku no ka ia oe ka La ke pana?" Ae mai la kela. Ku lakou nei, a pana aku la ua kanaka nei a ku ka La, I aku la ke alii, "Aole ou makemake e hele pu kakou?" Ae mai la kela, he makemake no. Hele aku la lakou nei, loaa hou ia lakou nei kekahi kanaka, e ku ana ma ke alanui, e huli ana kona pepeiao ma ka honua, kakali iki lakou nei me ka manao he hana kana, ea ae la kona poo iluna, a ike mai la ia lakou nei, ninau aku la ke alii ia ia, ''Heaha kau hana maanei, a he aha ka mea e huli nei kou pepeiao i ka honua?" Pane mai la kela, "E hoolohe ana au i ka ohumu a Papa ma laua o Wakea." Ninau hou aku la ke alii, "Pehea ka ohumu a Papa ma laua o Wakea?" Olelo mai la kela, "E ohumu ana o Papa ma laua o Wakea, no kou hele a hiki ilaila, hoohaunaele oe i ke aupuni o ka moopuna a laua, no ka mea, ua lohe ia o oe ke kanaka oi o ka ikaika, mamua o na kanaka e, ma na aupuni a pau o ka honua." Koi aku la ke alii ia ia e hele pu me ia, a hele pu aku la lakou, hele aku la lakou nei a liuliu iki, noonoo ke alii i ka hana a ke kanaka mua i loaa ai ia ia, oia hoi ke kanaka ike i na aupuni a pau o ka honua, nolaila, kapaia iho la kona inoa o Ikeloa, mamuli o kana hana, ninau aku la ke alii. "Pehea ka loihi o kahi i koe a hiki aku kakou i ke aupuni o ka moopuna a Papa ma laua o Wakea?" I mai la o Ikeloa, i ke alii, "E hiki ana kakou i ke ahiahi." Ko lakou nei hele aku la no ia, a hiki io lakou nei i ke ahiahi. Nolaila, hoomaopopo ke alii i ka ike o keia kanaka ua like me kana olelo.
Hiki aku la lakou nei i ua aupuni nei, nana aku la lakou nei, he oi io aku ka maikai mamua o na aupuni a pau o ka honua.
[Aole i pau]
E hookipa i ke aloha, he malihini maikai.
O Rare, ka mea Hoolaka Lio Hihiu.
Iloko o ka Pepa mua, ua hoikeia aku ka hana a Rare i ka hoolaka lio ana. E laha ana keia oihana ano hou ma na aina a pau, i oihana pono maoli. E haaleleia ana na hana koikoi, he mea ino ia e lilo ai no lio i mea pono ole.
Eia kekahi hoike maloko o ka Nupepa ma Ladana, no kana hana hoolaka i kekahi lio ahiu malaila. Ua akoakoa mai ka aha kanaka nui e ike i kana hana ana. Neenee malie aku la o Rare me ka makau ole, a me ka olelo wehewehe i ke ano o kela mea keia mea e pili ana i ka hoolaka lio, ma ka hana oluolu wale aku no i mea e kinai pono ai i kona huhu. E paa ana kona lima hema ma ke kaula ili iloko o kona eke Lakeke, a e o aku ana kona lima akau ma ka lio e hooluolu ai ia ia. E nana mai ana ka lio ia ia me ka haohao i kona ano manao, makau iho la, a lele ae iluna kona poo, a ku malie iho la. Nana pono aku la na maka o Rare ia ia, a emi iho ko ka lio huhu me ka makau. Pili aku o Rare ma na wawae mua, a hoopaa aku i ke kaula ili i kekahi wawae, maluna mai o ke kapuai. Alaila hoomaka iho la ka hoopio ana.
He lio nui ikaika loa ia; i ka ike ana aku o ka poe makaikai, aole ia he paani lealea; aka, he hana nui io maoli no e hookahe ana i ka hou o ka lio a me ke kanaka. He paio, o ko ke kanaka hana naauao, a manao paa ma hekahi aoao, me ko ka lio naaupo ikaika e pale mai ana ia ia. Lele ae la ka lio iluna, a haule iho la a ku maluna o ke kuli pelu i ke kaula ili e hukiia ana, o aku la kona nuku e puhi mai ana i ke oka i haliiia malalo. Alaila, hooikaika hou kela e ala ae, a haule hou iho ma na kuli. Kahe iho la kona hou, ha mai la kona hanu, haalulu kona kino a puni, i kona hooikaika ana e pale aku i ke kaula ili. Aole no e hiki, hoomau no o Rare e huki paa ana ma ke kaula me ke akahele ana no, a pau ke aho o ka lio, a moe iho la ma ka aoao.
Ka pau no ia o ko ka lio manao ku-e, a ae wale aku no ia i ka Rare hana a pau i koe. Moe malie iho la ka lio ma kona aoao e paupauaho ana. Lalau aku o Rare i na wawae ona, a hapai ae la, a hookui i kekahi wawae me kekahi wawae, aole nae oni ka lio. Kau aku la o Rare i na wawae maluna o kona poo, e hoike aku ana i kona lanakila maluna ona. A maha iki ka lio, wehe ae la ia i na kaula e paa ana ia ia, a hoala ia mai ka lio. Alaila, ae ae la o Rare maluna o kona kua, a hooholo keaka ia ia a puni ke kahua, me ka huro nui mai o ka poe e makaikai mai ana.
Eia kekahi hoike no Rare iloko o na Nupepa o Nui Ioka, i kana ao ana mai i na haumana hoolaka lio malaila. O ka hoomoe maikai i ka lio ahiu ka mea nui iloko o ka holaka ana.
Ua alakaiia mai kekahi lio ahinahina nunui loloa, kiekie ke kino. Ua loloa kona lauoho a me ka huelo e lewalewa ana. Hai mai la kona ona, he lio ano maikai ia, aole i make kekahi ia ia; aka, ua hewa ka hana ana a ka poe i hoao i ka hoolaka ana ia ia, a i keia wa, aohe mea hiki ke hoohana ia ia, no kona ku-e ikaika mai. He lio maikai loa ia ke nana aku, he poo kiekie, me na maka haaheo, a me ke kino nui nani.
Aole i hoomaka koke o Rare i ka hana ana, ua ike pono no ia i ke ano o kela lio, he mea makau ole ia, aole e haalele koke ana i kona manao. Pa-i-pa-i lima aku o Rare ia ia, a hamohamo aku, a olelo aloha aku ia ia, i loaa mua ka manao launa. Alaila hoonee iho la ia i kona lima ma ka wawae mua, a ilalo i ke kapuai, e hoao ana i ka hoopaa i ke kaula ili malaila. Aka, ua ike ka lio i kona manao a hoole mai e kaili aku ana i kona wawae. Mahope wale iho, ua paa ka ili ilaila; alaila, hooikaika o Rare e hookomo i ka ili maloko o ke apo o ka opu, i mea e huki ai i ka wawae iluna; ia manawa ke pio loa ana. He hooikaika aku, a he pale mai ia laua a hala ka hora okoa a me ka hapa, a nui na kaula ili i moku ia ia. A komo ke kaula ili maloko aku o ke apo opu, huki ae la kela e pelu ae i ka wawae iluna. Ikaika loa ka lio e pale ae ia huki ana. Akahi no a huhu loa ka lio, a peku aku a nahu mai, a lele ae la iluna, a ku ma ke kuli, a ala hou mai iluna, ua loa kona aho, aole i pau. Kulu wale iho ka hou mai kona kino a puni, me he mea la mailoko mai o ka wai. Manao iho la ka poe makaikai, e make paha auanei o Rare i ka leleia maluna iho, ua ike nae o Rare i ke ano o kana hana. Aole ia i hookuu iki i ke kaula; paa aku no, a huki malie me ka lima maloeloe ole. Aka, ua wela loa oia no ka hana ikaika, ua ulaula mai kona helehelena. I kekahi manawa, hooleiia o Rare a iwaena o ke kahua, a holo puni mai ka lio iloko. A paa iho kona poo i ke kaula ma ka laau pa, huki kela a moku ke kaula, a hemo ke kaulawaha mai ka lima mai o Rare, lele ae la ia maluna pono o Rare e kulou ana, a holo puniia iloko o ka pa poepoe, e imi ana i kahi e pakele ai. Hooho mai na wahine makaikai mawaho mai o ka pa, a holo aku la me ka makau nui.
A hala paha na hora ekolu o keia paio ana, ua nui ka wela o laua a elua. Ua pili paapu ka huna o ke oka i ke kino o Rare i pulu i ka hou, mai ke poo a kona mau wawae, a pela no hoi ka lio; aka, aole no i pau ko laua aho. Aole i makau hou ka lio ia Rare, hoowahawaha kona manao i ka poe a pau e nana mai ana. Komo ae la ke kahu lio iloko o ke kahua e kokua ia Rare; aka, kipaku koke ka lio ia ia me ka hoehaia, o holo kela i kahi e wahi ai i kona mau eha.
Kupanaha no ka hoomanawanui ana o Rare, aole ia i huhu iki ia ia, ahonui no ia, a hoohuli ae la kela i ke poo o ka lio ma kekahi aoao, a hooholo puni ia ia, a pela e hoopau aku ai i kona aho.
A hala ka hora elima o ke ahiahi, ua hookoia ka manao o Rare, ua hookomoia ke kolopa malalo o ke apo opu, a hoohina ia ia ilalo ma ka aoao. Alaila pau ka paio ana, ua pio ke ku-e o ka lio, a lanakila o Rare. Moe malie iho la ia, a ae mai la i ka ee ana o Rare maluna ona, a hele maikai aku ia e like me ka manao o ka mea hooholo. A hoi aku ka lehulehu o ka aha kanaka me ka huro nui ana, a me ka mahalo ia ia.
Mahope iho o ka hoolaka ana i kekahi lio hihiu loa, ua kanalua ka poe e makaikai mai ana ia Rare, no ka hiki ia ia ke hoolaka i ke Zebera, kekahi o na holoholona i hiki ole ke hoolakaia. A ke pai nei makou i ke Kii o ua holoholona la; aka, pane aku o Rare, "He hiki ia'u ke hoolaka ia holooolona." A nolaila, kii aku oia i kekahi Zebera iloko o ka ka pa holoholona hihiu o Ladana; a ua hoolaka ia ma kona akamai nui imua o lakou. A lawe ae la oia i ke kau wahi lau nahelehele, a hoolei aku la iluna o ka a-i o ua Zebera la, a alakai aku la ia ia a puni ke kahua hoikeike, me ka laka kupono, a he hiki no i kekahi keiki uuku ke hooholo a milimili, a oia kekahi o na mea kaulana loa a Rare i hana'i.
He mau tausani na lio paakiki a Rare i hoolaka ai ma Amerika, ma Enelani, a ma Farani, a ma na aina a pau o Europa kahi ana i hele ai. Kaulana kona akamai ma ia mau aina a pau, no ka maikai o kana hana. Ua ao oia i na kahu lio he lehulehu e hana i na lio ma kana oihana.
Ma keia mau wahi a pau, ua laweia mai ia ia na lio kolohe loa nana e hoolaka, a ua lanakila kela maluna o lakou a pau. Aole kekahi o lakou i lanakila maluna ona. Ma ka hoomoe ana ia lakou kona akamai e kinai iho i ko lakou hana apiki.
Mai manao kakou ua hana wale o Rare i kela mau aina me ka uku ole ia, ua uku nui no ka poe i aoia e ia, a ua uku hoi ka poe makaikai wale i hapalua dala. Ua lilo ia i kanaka waiwai nui ma ia hana, a ua hoi hou mai oia i kona aina hanau e noho ai me ka hanohano. Aka, aole ia he kanaka hookiekie; he akahai no, a mea launa oluolu me na kanaka a pau. Ua hookipaia kela ma Europa, maloko o na hale o na'lii a me na moi nui, a haawi mai lakou ia ia i na makana nani; aka, ke mau nei kona akahai e like ana me kona ano kahiko, kaulana ole.
KA AIE O KE AUPUNI O ENELANI.—Ua hoomaka ia ka aie o Enelani i ke au ia Charles II., elua haneri makahiki mamua aku nei. I ka M. H. 1763, ua pii ae ka aie a hiki i ka $695,000,000. Ma ka pau ana o ke kaua me Farani, M. H. 1802, he $2,853,000,000. Iloko o na makahiki kaua he 12, a Napoleona, ua pii hou ae a hiki i ka $4,325,000,000. A ma ia wa mai ua emi hele i hope a hala na makahiki he 30, ma ka makahiki 1845, he $4,840,000,000. Ma ka pau ana o ke kaua me Rusia, ua pii hou a hiki i ka $4,000,000,000,000, o ka uku hoopanee, he 3 1-2 keneta no ka makahiki, ke hoonuiia, he $134,000,000 no ka makahiki, he $368,000 no ka la hookahi, he $15,333 no ka hora hookahi, $255.00 no ka minute, a he $4.24 no ke sekona hookahi. Nui maoli ka aie o Beritania Nui.
Olelo Wehewehe.
Ua kauoha ia mai au e ka Olelo Hoolaha a Aiona, Luna Aina ma ke kauoha a Moehonua, e pane aku, aole i oiaio ia Olelo Hoolaha, ma ka hapa hope e olelo ana, "Aole e lawai-a kekahi ma ke Kai o Kalia, o ka mea hookuli, e hoouku ia oia he hapalua dala, ($0.50") O ka la mua o Feberuari nei, oia ka la e lilo ai keia i Kanawai paa maluna o ua aina nei, i hoolahaia iho nei maloko o ka Nupepa Kuokoa, Helu 10.
O ke kumu nui i koiia mai ai au e keia Olelo Hoolaha, e kamailio aku ma ke akea, oia no ka hai loa ana ae o keia Olelo Hoolaha me ka hoopilikia loa mai ma ka uku hoopai i oleloia maluna, i na Makaainana a pau malalo iho o ka malu o ka Moi, no ko lakou hele ana aku a lawai-a ma ke Kai o Kalia, kahi hoi i aeia mai ai kela kanaka, keia kanaka, e lawe i na i-a a pau e holo ana ma ke Kai o Kalia, iloko hoi o na makahiki a pau i hala iho nei, aohe mea nana i keakea.
Aka hoi, o ka aina maloko o Kalia, i kuai ia ai e ka mea nana ke kauoha ia Aiona, ua pololei no ia; no ka mea, ua kuai lilo ia ma ke Kudala ia aina e Moehonua me ke Aupuni, koe nae ke kai lawai-a e pili ana me ua aina la i lilo, aole i komo iloko o ka Palapala Hoolilo ma ia kuai ana; no ka mea, oia no kekahi o na Kai Aupuni i hookaawaleia no na Makaainana, i wahi e lawai-a ai lakou, a pela no ma na Kai Aupuni a pau e hoopuni ana i keia Pae Aina, kahi e noho ana ka Lahuikanaka okoa. Koe aku nae na Kai i pili i na Konohiki.
E nana pu mai kakou e na Makainana i ko kakou moku e holo pololei ai a hiki i ke Kai o Kalia, e lawai-a ai i na ia a pau e holo ana malaila, oia hoi ka Pauku 384 o ko kakou Kanawai Civila, a penei ka heluhelu ana o ia Pauku:
" O na wahi lawai-a a pau e pili ana i kekahi aina o ke Aupuni, a e pili ana i ke Aupuni ma kekahi ano e ae, koe wale no na loko, e hooliloia lakou, a ma keia Kanawai, ua hooliloia no na kanaka ia mau wahi lawai-a, no na kanaka a pau, no ka manawa pau ole; aka hoi, e hiki no i ke Kuhina Kalaiaina, ke hookapu i i ka lawai-a ana ma ua mau wahi la, i mea e malu ai ua mau wahi la, ma kekahi mau manawa o ka makahiki." A ina pela na ke Kuhina Kalaiaina ka hoomalu alaila pololei, ke hoolaha akea nae ke Kuhina Kalaiaina i kona hookapu ana, e like me ka Pauku 385 malalo iho, alaila aole e hiki ia kakou ke ku a kamailio ma ke akea; no ka mea, o ko kakou Kanawai iho la no ia.
A nolaila, e pono i ka mea nona keia Olelo Hoolaha, e noi ae e hoihoi aku oia i kana olelo mailoko aku o ka Nupepa, kahi i hoolaha ai, o kela hapa hope, a e ninau mai paha auanei o Aiona, " No ke aha hoi?'' Eia, aia no ma ka Pauku 393 o ko kakou Kanaawai Civila nei no, penei ka heluhelu ana:
"O ka mea kuai aku mamua, a e kuai ana paha ma keia hope aku, i kekahi aina o ke Aupuni, a ua loaa paha ia ia ka aina ma ka hoolimalima, a ma ke ano e ae paha, aole ona kuleana e ae ma kahi lawai-a e pili ana ua aina la ana i kuai ai; aka, e like wale no me na kanaka e ae e noho ana iloko o keia Aupuni ke ole e komo ua wahi lawai-a nei iloko o kana palapala hoolilo."
A ma keia Pauku, ua hoomanoanoaia ke kulana o na Makaainana, ma na kai lawai-a o ke Aupuni, ke komo ole nae iloko o ka aina i kuai ia, a ma keia mau Pauku no hoi ua hoakaka ia aku ka pomaikai o ka Lahuikanaka okoa, e hiki ole ai i na Olelo Hoolaha hupo ke ku iluna a hehi iho i ko kakou Kanawai e hoopomaikai mai ana, oiai kakou e noho ana malalo o ko kakou Moi oluolu. E Seku aku i na Olelo Hoolaha hupo.
J. K. MAKAAINANA.