Ka Nupepa Kuokoa, Volume I, Number 16, 15 March 1862 — Page 1

KA

NUPEPA KUOKOA

Ke Kilohana Pookela o ka Lahui Hawaii

BUKE I. HONOLULU, MARAKI 15, 1862. HELU 16.

 

He Inoa no Kalaehiku Keonekapu.

Auhea wale ana oe.

E ka puuwai kapalili
E a mai Heleuma.

Nana e kohi a paa.
Paa ia mai ko lio
I ole e holo nui.

O ka holo kauaheahe
Ka'u ia e manao nei;

I manao aku no wau
I ka lau o Ka Ohai ;

Oia lau aweawe
Lau holu i ka makani
Makani mai nei oe
Ua noho o Laka iluna ;

Ua laka no ia lio
I ka pa huipa ia
Ka huipa elau ahi

E wela ai ko ili.

E ia mai no wau
Ka makani kolonahenahe
Nana i hooipoipo
Ka lau o ke kiawe
E wili koiawe nei
I ke kula o Manana
Manana no ka eha
Ua lai no Weloka.

Oni ana la ulaiki
E pili me puukapu —

E kapu no ia kula
Ua paa ika alolio
Kuu lio poli nahenahe
I ke kula o ka ehaeha
E ha oe i ka ua noe ;

I ka ua kipuulani.

O puu Rose lani oe
No ka hau kakahiaka.

Me oe a — ke aloha
Eha koni ia mai au.

 

Auhea la hoi oe
E ka ua Lanipolua
Elua no maua,
Me kuu ipo Pua Rose
I alo i ka hau anu,
I ka ua apua kea.

He opua oe no kai
No luna ao o Lehua
Ka Lehua mai keia
Lawa pono ai ko lei.

Auhea la hoi oe
Waiaweula o Kahiki;

Ahe iki no ia noi,
A he iki hoehaeha.

Auhea oe e ka nani
E ka wai Anuenue
Ipipio ai i ke kula
I ke kula o Aipo.

Akahi po anu nui
I mehana i ka poli o ke hoa
Ahe hoa uo oe no'u
No ka lai o ke kaona.

Onaona pua hala oe
Moani ke ala ia nei ;

Ia nei mai kaua
I ka hau anu o malama ;

Malama ia ko lei
I pau ko kuhihewa;

Kuhihewa ko'u manao.

A he nani o Kaala
O ke kuahiwi kaulana
Kukilakila i ka lai ;

Ua lai no ia manu
Ua ai pua lehua ;

Ka lehua ku i ka wao—

I ka lipo o kanahele.

He pikini la he aloha
No ka hoa pukuilua ;

Lulu lima ke aloha
Na ka haole no ia pono.

E honi no e ka ihu
Ke aloha Hawaii nei.

Ku moni Eha paka oe.

Ua eha a kula oe i ka hauna poakaima.
NA UILAIKALANI.
Maraki 8, 1862.

                Ku iho la kekahi kanaka o Misouri ma ke kae o ka lua kupapau o kana wahine, a i ke kanuia ana iho o ka pahu iliko o ka lua olelo iho la ia i ka mea e ku ana ma kona aoao, "Ua poino au no ka make ana o kau mau pipi wahine, ka hipa hoi, ka lio a me ka pipi keiki ; a o ka oi hoi keia o ka poino i ka make ana o kau wahine." He kupanaha keia kanaka, ka hoohalike i ka poino ana o kiina holoholona me ka make ana o kana wahine kona hapa ponoi ?

 

HE MOOLELO NO UMI.
KEKAHI ALII KAULANA O KO
HAWAII NEI PAE AINA.

HELU 6.

                Lilo o Hawaii a puni ia Umi, a noho Aupuni ae la ia. Iloko o kona noho Aupuni ana, haawi ae la ia i aina no kona poe hoa hele, lilo o Kau ia Omaokamau ; lilo o Puna i ke aikane a Umi ; lilo o Hilo ia Kaleioku ; lilo o Hamakua ia Piimaiwaa ; lilo o Kohala ia Koi ; lilo o Kona ia Ehu ; pau ae la na Moku o Hawaii i ka haawiia e Umi no lakou.

                Ku mai o Kaleioku, a wehewehe mai i kona manao imua o ke Alii, penei kana i wehewehe ai, " E ke Alii, e hoolohe mai, ke ku nei au imua o kou alo, a me ke alo o kou mau kanaka, ke hoolilo nei oe e ke Alii, i Kahuna au nou, a o oe hoi ke Alii, e like me kau mea i ike ai no'u ma kuu ano Kahuna ana, oiai ua hooko mai ke Akua, e noho Aupuni oe, ua lanakila ae oe mailoko o kou wa ilihune, a ke lilo nei oe i Alii ai Moku no Hawaii nei, a e noho ana na kanaka malalo o kou malu, ina e ikeia he pono kau hana e ke Alii imua o na kanaka, e mau aku no kou noho Aupuni ana, ina pono ole kau hana ana e like me ko kaikuaana, he hookuli ka make, he hoolohe ke ola." Alaila, hoolako ae la o Kaleioku i ua Alii nei, me kekahi kanaka ponoi ona, oia o Omaokamau.

                Kena ae la o Kaleioku, e ku ua Alii nei iluna, ku ae la ia, a me Omaokamau, ewalu paha anana ke kaawale mawaena o laua. He hoailona keia a Kaleioku i hana aku ai i ke Alii, i mea e maopopo ai ia Kaleioku ka paa o kona Aupuni, me ka paa ole, ina e ike o Kaleioku i ka paa o kana hana ana ; alaila, e hiki ia Kaleioku, ke makia a paa kona Aupuni, ina e pono ole kana hana ana, aole e hiki ia Kaleioku, ke makia.

                A ia laua e ku ana, o ke Alii, a me Omaokamau, aia ia Omaokamau ka Laau-palau, o ka inoa o ua laau la, o Kaniaupiookalani, aole e pahu wale ia ia laau, aia no ka wa e pahu ai ia laau, a na ka aina ; alaila, pahu a ma ke ano hoailona a na Kahuna. Olelo aku o Kaleioku ia Omaokamau, " E Omaokamau e ! O ko ikaika no a pau loa ! ! Pahua i ka piko o ke Alii ! ! ! " No ka mea, ua ike o Kaleioku ia Omaokamau, he kanaka kaika i ka pahu Makaihe. Pahu aku la o Omaokamau, o wahie ka ai, o ka lele aku la no ia o ka laau, a kokoke i ka piko, o ke ku aku no ia, puka pu ma ke kua, e pale ae ana ke Alii, hala ma kekahi poohiwi, hala ka ihe mahope, me ka lele no, e hopu aku ana keia ma ka welau o ka ihe, paa no i ke Alii. Ike mai la o Kaleioku i ka hala ana o ka ihe, a me ka paa ana ma ka welau, olioli nui iho la ia.

                Alaila, i aku o Kaleioku i ko Alii, " E ke Alii, ke ike nei au, ua pono kau hana ana imua o ko'u mau maka, e like me ka'u mea i ao aku ai ia oe, e ke Alii, a me kou mau kanaka ma ka panalaau, i mea e paa'i kou Aupuni. Ke hoolilo nei au ia'u iho i keehana wawae nou, aole mea nana e kaili aku kou noho Aupuni ana. Ke i mai nei ko Akua ia'u, e like me kau pale ana i ka ihe, a hala, pela oe e noho ai i ka pono o kou Aupuni, a hala oe i ka make. E like me kou "hopu ana aku i ka welau, o ka ihe a paa, pela e paa'i ka noho Aupuni ana o kau keiki, a me kau moopuna, a pua, a mamo, a kawowo loa aku." A pau ae la, ka Kaleioku wehewehe ana.

                I ko lakou noho ana, ninau ae la ke Alii, " Auhea la na wahi elemakule, o Nunu, a ma Kamai ? " I ae la kekahi, " E i ae no." I mai la ke Alii, " E koi koke aku oukou ia laua." Kii ia aku la ua mau wahi elemakule nei, a hiki mai la, pane aku la ke Alii, " O olua mai la ia." Ae mai la laua, " Ae," O ko Umi hele no ia me ua mau wahi elemakule la, o Omaokamau, o Koi, o Piimaiwaa, a me na kanaka, e nana i ke kuahiwi o ka aina o ke Alii, i ka palena o ko laua mau aina. A hiki lakou nei iluna o Koaekea, he aina e pili ana me Waipio.

                Alaila, i aku la ke Alii i kekahi wahi elemakule ia Nunu, o kahi elemakule ikaika iki ia. " E holo oe mai keia wahi aku, a i hina ala ae no oe, holo no, ina oe i ike iho i ko maloeloe, noho iho oe, make oe ia'u." Ua lilo ia olelo a ke Alii, i mea makau na ia wahi elemakule. O ka holo aku la no ia o Nunu, me Omaokamau, ka mea i holo pu ai me Omaokamau, i ike i kahi e hana'i ua wahi elemakule nei, mamuli o ka ke Alii kauoha. Holo laua nei a ku-ku-au-au. holo no laua nei a huikau na wawae, holo no laua nei a keehi no kahi wawae i kahi wawae, a hina iho la o Nunu ilalo o ka honua, nui loa kona hanu, me ke ahaaha loa, oia no oe ; i ka puaa i make i ka welu o ka la la, ke ahaaha. A hiki aku lu o Umi me ia wahi elemakule, me Kamai, e nui ana ka hanu o Nunu, pane iho la ke Alii, " E ! make ! !" Hu ae la o Nunu, " Hu." Noho iki iho la lakou malaila a oluolu ae la o Nunu, pane mai la ke Alii ia Nunu, " Mai ko wahi au i holo mai nei a hiki i kahi a kakou e noho nei, elua Ahupuaa, o kou mau aina keia."

                Lohe iho la o Kamai, ka lua o kahi elemakule. I iho la ia ma kona naau, pela ka ka haawi ana a keia Alii i ka aina i na kanaka, he holo a moe okoa, o ka make wale aku no koe, i iho la ia ma kona naau. Oia hoi e like me ke Alii i lawelawe pono iho i ka maua mea ai, pela hoi kela e hooluhiluhi mai ai ia maua. Eia ke kumu o ke kanalua o kona naau, no kona nawaliwali, ua elemakule loa ia.

                I aku la o Umi ia Kamai, " Oia e ! e holo hoi oe ! ! " Holo aku la o Kamai laua o Piimaiwaa, mamuli o ka ke Alii kauoha ia Piimaiwaa, e holo pu laua, holo aku la a pau ke Ahupuaa hookahi, hina iho la ua wahi elemakule ia ilalo i ka honua, nui iho la kona hanu, e like me Nunu. A hiki aku la ke Alii me Nunu, pane aku la ke Alii, " E ! make ea ! ! " Hu ae la ia, " Hu." Kela hua olelo a na wahi elemakule i kau ia ae la, " Hu." Aole ia o ka haina pili pono i ka ke Alii mau hua olelo, " O u ka pono, a me ae." Aka, noloko ae o ka ikiiki paupau aho loa, a me ka naenae loa no hoi paha kekahi, nolaila i hoopuka ae ai laua, " Hu." Aka hoi, ua maopopo no i ke Alii, he " U " no ia.

                Alaila, i aku la o Umi ia laua, eia ko olua mau aina. elua o Nunu, hookahi o Kamai, ia olua no ka hooponopono o ko olua mau aina, o na mea o luna o ko olua mau aina, na olua no e ai, na olua no e hana e like me ko olua makemake, mai manao ae olua ia'u, ina olua e hooili aku i ko olua hooilina, pono no.

                Hoi ae la ke Alii ilalo o Waipio, me kona mau kanaka, a hiki lakou ilalo. O ka ke Alii hana, o ka o-o makaihe, me kona mau kanaka ponoi, o Koi, o Omaokamau, o Piimaiwaa, o keia mau kanaka ekolu o ko ke Alii mau koa keia, a ua lilo lakou i mau puu kaua, ke hiki i ka wa kaua mai, e hiki ia lakou ke hele i ke kaua, ua makaukau like no lakou i ka pana laau. O Piimaiwaa nae ka oi o lakou ; no ka mea, he pau loa ia Piimaiwaa, ka ikaika o ka uhau ana i ku laau, a me ka hahau ana iluna oka lima akau, a me ka lima hema, o Koi, he pono ikaika kona ma ka lima hema, o kona lima akau, he nawaliwali iki, o Omaokamau, he pono ikaika kona ma ka lima akau, o kona lima hema, he nawaliwali iki.

                A liuliu ka lakou noho ana ma Waipio, i aku o Kaleioku, i ke Alii, "E pono paha e kaapuni oe ia Hawaii nei a puni." Ua oluolu ia i ko ke Alii mau maka, i ka wa i lohe ia'i ka olelo a Kaleioku, i oluolu ai ka maka o ua Alii nei, kena koke aku la o Piimaiwaa, i kona luna, e hele e hai aku i na Konohiki o luna o ka aina, e auhau aku ia lakou e kalua i puaa, i ai, i i-a, e hookupu mai imua o ke Alii i na waiwai a pau, a hiki i na palena o Hamakua nei, ua oluolu ia i ka manao o kana wahi luna. A pela no hoi o Kaleioku, i kana wahi luna, no Hilo, a pela i ke aikane a ke Alii, no Puna, ia Omaokamau, no Kau, ia Ehu, no Kona, ia Koi, no Kohala, a pau ka hoolale ana a lakou uei i na luna.

                O ka hoomakaukau iho la no ia o ka hele, i aku ke Alii ia Kaleioku, "Ma Kohala kakou e hele ai, a hiki i Kawaihae." No ko ke Alii makemake loa e ike ia Kawaihae. Hoole aku o Kaleioku i ko ke Alii manao, " Aole oe e pono e ke Alii ke hele ma ka Hema, eia wale no kahi e hiki ai ia oe ke hele, ma ka Akau. Oiai kou hoomaka ana i ke kaapuni i kou Aupuni, ina hoi he Alii ae malalo loa ; nolaila, he pono no ia oe ke hele ma ka Hema.'' Ua oluolu keia mau olelo a Kaleioku imua o ko ke Alii mau maka.

                Hele aku ke Alii ma ka aoao Akau o Hamakua, me kona Kahuna, a me na hoahele, a me na kanaka makemake e hele pu me ka makai a ke Alii, he nui wale. I ko lakou hele ana ma ka Akau, he ai wale no ka keia huakai kaapuni, i na mea ai i hoomakaukau ia na ke Alii. A hala na anahulu elua, (oia elua hebedoma.) kokoke lakou e hiki aku ma kahi o Paiea, [kela hoa heenalu o Umi, i hai a ma ka Helu 2, o keia Moolelo, a no ka pau kapekepeke maloko o ia Helu, ke makemake nei ka mea nana i kakau ka hapa hope o keia Moolelo, e wehewehe a moakaka lea, i mea e ikeia i ka lawe ana a Umi, i kana aikane o Laupahoehoe, oia kela aikane a Umi, i lilo ai o Puna.]

                I ko Umi ma hele ana me Koi, aole o Piimaiwaa me Omaokamau, o Koi ma wale no laua me Umi. I ka hiki ana o laua nei ma kahakai o Laupahaoehoe, e heenalu ana o Paiea, a me na kanaka olaila, e hookani ana na kanaka ia Paiea, i ka pae i ka nalu, a me ke akamai ona. Nana aku o Umi i ko Paiea kaha ana mai i ka nalu, o ke ohu wale mai no iluna o ka nalu a pio aku la, aole he pae loa mai a hiki iuka, he pae nae ia i na kanaka olaila. Olelo leo uuku aku o Umi, i kekahi wahi kanaka kamaaina, " O ka pae iho la no ka ia, o ka ohu wale mai no iluna o ka nalu a emi aku, aole pela ka pae o ko makou wahi, he pae ko makou wahi, aia no i i ka pao a hala loa iuka o ka paala."

(Aole i pau.)

[Unuhiia no ke Kuokoa.]
CINDERELLA,

KE KAIKAMAHINE
KAMAA ANIANI LIILII.
HE KAAO.

                I kekahi manawa, e noho ana kekahi kanaka waiwai, ua make ka wahine ; no ka nui o kona aloha i ka wahine mamua aku ; nolaila, minamina loa ia i ka make ana. No ka oluolu ole o kona manao i ka lilo ana o ka wahine ; nolaila, manao iho la ia e mare hou, me ka manao, ma ia mea e oluolu hou ia e like me manuia. O keia wahine ana i makemake ai, he wahine hookano a me ka huhu, na huhu ia i na mea a pau loa, aohe ona mea e oluolu ai, o ka oluolu e hanaia'ku imua ona, me ka huhu kela e hoihoi mai ai. Elua ana mau kaikamahine me ke kane mua, o kana hana i ao ai ia laua, o ka hookano a me ka noho wale ; nolaila, o ko laua ano a me ka laua hana, ua like loa me ka makuahine ; i ka hoopokole ana, ua makemake ole ia e na mea a pau.

                O ke kane ma kona aoao, he kaikamahine no hoi kana, i like loa ka maikai o ka manao a me ke ano, me kona makuahine ponoi, ka mea a ka makuakane i minamina loa ai, me ka manao e loaa kona panihakahaka i ka wahine hou.

                I loa no a pau ka mareia ana, hoike mai la ua wahine nei i kona ano maoli, aole e hiki ia ia ke nana aku i ua kaikamahine nei, no ke akahai a me ka maikai o kona ano ; nolaila, me he mea la, hookahi kaukani ka inoino a me ka lapuwale o kana mau kaikamahine ponoi.

                Nolaila, kauoha aku la ua wahine nei, " O ka Hale-kuke kona wahi e noho ai." A ina kela e lawe mai i kekahi mea iloko o ka lumi aina, nuku aku la ua wahine nei a hiki i ko iala wa e nalo ai. O Ikana hana, ka holoi i ke pa, ke pakaukau a me na noho ; ka hana i ka moe o ua wahine nei a me na kaikamahine ana, he poe moe maikai o ka nu paikini, (o ke ano hou) me na aniani loloa a akea, i ike lakou ia lakou iho, mai ke poo a na wawae, o ua wahi kaikamahine nei, he wahi ino kona e moe ai, iluna o ka pela mauu, aohe paku makika, aohe mea e oluolu ai. Aka, noho no keia me ka hoomananui me ka olelo ole aku i ka makuakane, no ka makau o kokua kola i ka wahine : no ka mea, ua iko keia, o ka wahine ke kiaaina maluna o ko kane.

                I ka wa e pau ai kana hanu. o kona wahi e noho ai, ma ke kihi o ka pukauwahi iloko o ka lehu : nolaila, kapaia kekahi moa ona o Kalehuahi ; a o ka muli o ua mau kaikamahine nei, he oluolu iki ia mamua o ke kaikuaana, a nana i kapa ka inoa Cinikalela. O u o Cinikalela me kahi kapa nahaehae ona, ua hookahi kaukani kona nani mamua o na kaikuahine ona, (na kaikaina.) i komo i ko laua mau mea nani a puu loa,

                I ka haawi ana a ke Keiki Alii, he ahaaihula, kauohaia ka poe hanohano o ka aina a pau, a o ua mau haku wahine nei kekahi o lakou o ia helu'na ; aole nae i ike ua keiki nei i ka pono ole o ua mau kaikamahine nei ; aka, manao iho la keia no ko laua hoopunaheleia, he mau kaikamahine no ua a-o pono ia. Aole nae i kauohaia o Cinikalela, no kona ike ole a me kona lohe ole ana no ia ia.

                O ua mau kaikamahine nei, pilikia iho la no ka hoomakaukau ana uo ua la olioli nei, aohe mea like i ko laua olioli ; o ko laua manawa, ua lilo i ka noonoo ana no na lole maikai, na kamaa, a me na lole poo, i mea i no laua e manao nuiia ai. O keia mau mea, he mea hoonaukiuki ia Cinikalela ; no ka mea, oia ka mea nana e aiana, a e humuhumu ke kapa o ua mau kaikamahine nei. Hookahi wale no a laua mea e olelo ai, o na mea ! o laua e kahiko ai. Olelo ae la ke kaikaina, " O kuu weleweke akala auanei me ka lihilihi Palani, ko'u." Ke kaikaina, " O kuu pelekoki auanei i hana ai no ka hula hope iho nei ko'u e komo ai, a i mea e kokua ia ia, komo auanei au i kuu pukiki kula makalena, o kuu kaimana iloko o kuu lauoho, me keia mau mea, he oiaio e nani auanei au ke nana ia." He mau mile ka Ioa o kahi i kii ia ai o ka mea nana e hana ka lauoho ; o na mea a laua i kuai ia noloko o na hale nu hou.

                I ke kakahiaka o ka po hula, kaheaia aku o Cinikalela e hele mai e kuka pu no ka lole o ua mau kaikamahine nei ; no ka mea, ua iko laua he kaikamahine kela ua ike ma ia mea. Hai aku no keia i ka mea kupono ia ia ke olelo aku, a kokua pu aku i ka hana o ka lole pono, oia ka laua mea i makemake loa ai. Ia ia nei e hana ana i ka lole o ua mau kaikamahine nei, pane mai laua'la, " Aole anei ou makemake e hele i ka hula ?" Olelo aku keia, "E akaaka wale mai ana no olua ia'u ; aole e hiki i ka poe e like me a'u ke manao e hele i ka hula." " Ua pono oe." Wahi a laua'la, " E akaaka io ia mai auanei ke ikeia mai ka Lehuahi e hula ana iloko o ka lumi." I mea e aku paha ina ua hana i mea e inoino ai ko laua'la nanaina, aole nae keia i hana pela, hana no keia i mea no laua e maikai ai ke nana ia mai.

                He uuku loa ka mea a ua mau kaikamahine nei i ai no na la elua, no ka piha loa i ka olioli i ke kokoke mai o ka la hauoli. Ua oi aku paha mamua o ka umikumamalua kaliki i pau i ka mokumoku, no ka huki ikaika loa ia i puaniki, a maikai ke nana aku, i na wa a pau loa, mamua wale no o ke aniani. A mahope, hiki mai la ua manawa nei e kaliia ana, o ka a-e aku la no ia o laua nei iluna o ke kaa, holo ana i ka Hale Alii..

               Hahai aku la o Cinikalela me na maka ona ia laua'la, a pau ka ike aku, noho iho la i keia ma ke kihi uwe. A ike ka makuahine | papakema, ninau mai i ke kumu, "E-ake ana au," pela ka olelo ha-u-ha-u ana a Cinikalela me ka hiki ole ke pane aku i hookahi hua i koe. O ua makuahine papakema nei, he wahine kupanaha, (he kupua paha ia kakou,) he Fairy, i ka haole ; olelo aku, " E makemake ana oe e hele i ka hula, aole anei oia ka oiaio ? " " Auwe ! Ae." Pela aku ua kaikamahine nei, me ka ha-u-ha-u loa.

                Alakai aku la ua makuahine nei a ka lumi moe, olelo aku, " E holo oe iloko o ka pa mea kanu a lawe mai i ipu-pu." Holo aku la no o Cinikalela, a loaa ka ipu mua lawe mai la. Koli iho la ua luahine nei a pau ka io o loko a koe o ka alualu wale no e waho, a hoopa aka Ia i ka laau mana ana, a i kua kaa ae la ua ipu nei, ua hoonaniia i ke kula. Alaila, nana aku la ua luahine nei iloko o ka mea poi iole, e paa ana iloko eono iole, a olelo aku ia keia ia Cinikalela e wehe maile ae i ke pani, a puka puaahi mai la ua poe iole nei, a hoopa aka la keia i ka laau mana, a kua lio ahinahina ae la ua poe iole nei.

                " Eia e kuu kaikamahine, he kaa a me na lio i like loa ka maikai, me kou mau kaikaina." wahi a ua wahine nei. Kia ua kaikamahine noi a loaa ka iole nui iloko o ka mea poi iolo. a hoopa aku ia ua luahine nei i ka laau mana, a kua kanaka ae la, oia ko kaha lio.

                A olelo hou aku la ua luahine nei, "O hele a loko o ka pa mea kanu, aia mahope o ka mea ninini wai eono moo, a lawe mai." I ka wa i loaa mai ai, hoopa aku la i ka laau. a kua kanaka ae la, lolo ao la ua poe nei mahope o ke kaa, me ka makaukau a me he mea la o ka lakou hana wale no ia o ko lakou ola ana. Ololo aku ua kaikamahine nei, "Me keia mau wahi kapa weluwelu no auanei au e hele ai i ku hula ?" Hoopa aku la ua luahine noi i ka laau inana, a lilo no la ua mau wahi welu nei i lole maikai loa i hoonaniia i na mea pii o ke kumu kuai. Me keia mau mea, he mau Kamaa Aniani kekahi, a olelo aku la ua wahine noi. e hele i ka. hula.

                I ka hele ana o ua kaikamahine nei, kauoha aku ua makuahine nei, i ka wa e kani ai ka hora umikumamalua, e hoi koke mai, ina e noho iki aku ; alaila, kua ipu hou ua kaa nei, o na iole, hoi no e like me mamua na mea a pau loa.

                I ka manawa o ua kaikamahine nei i hiki aku ai, olelo e ia aku la i ke keiki a ke Alii, ua hiki aku ilaila he kaikamahine Alii, aolo i ikeia mamua, i hele mai i ka hula : hele aku la ua keiki Alii nei a me ka puka o ke kaa, a kaikai mai la i ua kaikamahine nei a hiki ilalo, hele aku la laua nei a hiki i ka lumi hula.

                I ka manawa i komo aku ai ua kaikamahine nei, aole he leo pane o loko, pau pu me ke kani ana o ka pila ; hookahi mea nana a loko, o ua kaikamahine nei i ka maikai, aohe he mea lohe ia o loko, hookahi wale no o ka hawanawana. I ka nani hoi o kolu kaikamahine ! O ka Moi no kekahi, ua elemakule loa, oia kekahi i kau pono i ua kaikamahine nei, me ka olelo pinepine aku i ka Moi wahine, " He loihi loa ka wa i hala, akahi no ia a ike i ka wahine maikai." O na wahine o loko, nana i ke ano o ka hana ana o ke kapa, i ana no ko lakou lole i kekahi la ae, he pomaikai lakou i ka loaa o ka lole e like me ia, a me ka poe nana i hana.

                Lawe aku la ke Keiki Alii a luna o ka noho maikai loa hoonoho, a mahope iho, o kona hoa ia i hula pu ai. No ka hiehie a me ke akamai o ua kaikamahine nei i ka huia ; nolaila, oi loa aku ka makemake o Ka poe o loko, a manao lakou, oia Ua wahine akamai a me ka nani o ka lakou ike ana.

                Mahope iho, laweia mai ka mea ai, a no ka lilo loa o ke Alii i ka nana i ua kaikamahine nei, aole ia i ai i kekahi mea. Ma kahi e kokoke ana i na kaikaina kona wahi i noho ai, me ka hoike ana aku i kona lokomaikai ia laua, i ka haawi ana i ka alani, a me na mea momona a ke Alii i haawi aku nana ; o laua ma ko laua ano, ua hoohuoi i ke kupanaha o ka oluolu o keia wahine a laua i ike ole ai.

                Ia lakou e kamailio ana, lohe aku la keia i ke kani ana o ka hora umikumamakahi, a me akolu hapaha ; ku ae la keia iluna, a aloha aku i ka poe o loko, a hoi me ka wikiwiki. I kona hiki ana aku i ka hale, hele aku la ia a ka makuahine papakema, e hai aku i kona aloha, me ka olelo aku e haawi ia ia i ka honua, ina ia e hiki hou i ka hula ; no ka mea. ua koi mai ke Alii ia ia.

                Ia ia e olelo ana i na mea i loaa ia ia iloko o ka hale hula, kikeke ana na kaikaina ma ka puka, a wehe aku la keia, " Aumoe maoli olua ! " wahi ana, hamama ae la ka waha, a anaanai ae la i na maka, me he mea la, akahi no a ala ae mai ka hiamoe ; o ka oiaio, aole ona make hiamoe mai ko lakou la haalele ana iho, " Ina oe i ka hula," wahi a kekahi kaikamahine. " E hai aku au ia oe, aole oe e make hiamoe iki, hiki mai nei ilaila ke kaikamahine Alii maikai loa i ikeia ! He kaukani kona lokomaikai ia maua, a haawi mai i ka alani a me na mea momona a ke Alii i haawi aku nana."