Ka Nupepa Kuokoa, Volume I, Number 19, 5 April 1862 — Page 1

KA NUPEPA KUOKOA:

Ke Kilohana Pookela no ka Lahui Hawaii.

BUKE I.  HONOLULU, APERILA 5, 1862.  HELU 19.

 

Olelo Hoolaha.

                E hoopuka mau ia KA NUPEPA KUOKOA ma ka Poaono o kela pulo keia pule, a hiki i ka pau ana o ka makahiki 1862. O ka pepa wale no keia i paiia ma ke kauoha a ka Ahahui Hawaii nei, i mea o hoonaauao ai i na Kanaka maoli. E pai mau ia'na maloko o nei nupepa, na moolelo i unuhiia mailoko mai o na moolelo haole ; na nu hou a na aina e mai, a me na nu hou o ke kaua ma Amerika, a me na mea no a pau e makemakeia'na, i hanaia ma Enelani, Farani, Geremania, a me na wahi e ae a puni wale ka honua.

                A o na palapala hoi kekahi o ka poe kakau mai o keia mau mokupuni; a me na mea hou no a pau o Hawaii nei. He Buke nui ka Buke mua, no ka mea, he 57 ka nui o na pepa, ke huipuia na helu manuahi elima o ka M. H. 1861. E pau ana keia Buke i ka la 27 o Dekemaba, M. H. 1862.

Elua Dala wale no ($2.00)

ka uku no ka Buke I.

                O ka poe kanaka Hawaii a pau i makaukau i ka heluhelu, e aho e lawe i ke Kuokoa, a o ka poe a pau e makemake ana e lawe, e loaa no ia lakou ma ka uku ana i ka uku makahiki o ka pepa, ma ka lima o na Luna malalo nei. O ka poe e makemake ana e kena'ku ka lakou pepa ma ka Eke Leta, e hooili mai i na Dala Elua ma Honolulu nei, me ka hui pu mai i kahi e hoouna aku ai.

 

Na Luna o ke Kuokoa.

HILO —T. Coan, (Mi Koana.)

" S. Kipi.

LAUPAHOEHOE.—F. B. SWAIN.

PUNA.—J. Kaina.

KAU.—C. N. Spencer, (Kale.)

" W. C. Shipman, (Kipimana.)

WAIMEA.—L. Lyons, (Laiana.)

KOHALA.—E. Bond, (Bona.)

KEALAKEAKUA.— P. Cummings, (Kapena.)

" J. D. Paris, (Palika.)

KAILUA.—A. Thurston, (Kakina.)

MA MAUI.

LAHAINA.—D. D. Balawina. " J. Kahookano.

WAILUKU.— J. D. Havekost.

" W. P. Alekanedero.

WAIHEE.—S. M. Kamakau.

MAKAWAO.—George Miner, (Mahina.)

KALEPOLEPO.—J. J. Halstead, Keoni.

ULUPALAKUA.—Kapena Makee, (Ki.)

HANA.—S. Kamakahiki.

MA MOLOKAI.

KALUAAHA.—A. O. Forbes, (Polepe.)

KALAE —R. W. Meyers, (Maea.)

LANAI.—Iona Kalawaia.

MA OAHU.

KANEOHE.—B. W. Parker, (Paleka.)

KOOLAULOA.—M. Kuaea.

WAIALUA.—S. N. Emerson (Samuela.)

WAIANAE.—G. H. E. Keauiaole.

EWA.—Solomona Kahoohalahala.

MA KAUAI.

KOLOA.—J. W. Smith, (Kauka Mika.)

LIHUE.—W. H. Rice, (Laiki.)

HANALEI.—E. Johnson, (Ioane.)

WAIMEA.—G. B. Rowell, (Rowela.)

NIIHAU. — P. R. Holi.

                O ka poe a pau e noho ana ma na apana i haiia maluna, e makemake ana e lawe i "Ka Nupepa Kuokoa," e pono ia lakou ke hele e kakau i ko lakou mau inoa, a me ka uku aku i na dala o ka pepa i na Luna i haiia maluna, a na lakou e haawi mai i na Palapala Hookaa i paiia. O ka poe e noho ana ma kahi aole i haiia maluna, e loaa no ia lakou na pepa ma ka lima o ka Luna e kokoke ana io lakou la.

H. M. WINI, Luna Pai.

 

I na Luna o ka

"NUPEPA KUOKOA" KE ALOHA.

                No ka leo kalaea, a me ke kanikani pihe ana, wahi a lakou la; "A h-a-h-a, nele iho la ka ekalesia hoole Pope ma Wainee i na makua ole, make aku nei o A. Moku. a me Timoteo, me Kaiwioni, a o D. Baldwin a me M. Kenui, holo aku i na aina pouli, nele loa iho i na makua ole." Pela, i na pela io, aka e ike kakou ma keia hope.

                1. Ua komo o P. Kalaikini a me kana wahine, o ke Kiaainai i ka ekalesia, a me kekahi poe e ae.

                2. Ke kukuluia nei he mau halawai i na Poalua no na keiki, a ua kapaia mai he halawai na ka poe opiopio, maloko o keia mau halawai ke ikeia nei na keiki e pule ana, e haiolelo ana, me ka makaala maoli no. Na D. Balduin i hoomaka i keia halawai, a ke komo nei no kekahi poe hou i ka ekalesia, a i ka nana aku o ka poe i oleloia maluna, a o kekahi paha o lakou, eia no i kekahi o keia poe opiopio ka hoopono a hana pololei hoi. Nolaila, ke kauohaia nei kakou e ku ae i luna a hooko mamuli o ka pono, a malaila mau aku no a hiki i ka hope, a na ke Akua e malama mai.  Na WAHINE.

Lahaina, Marki, 31, 1862.

 

He inoa no Meleana.

Kamaiki a Hoopau,

Hii alo a Kahiwahiwa,

Auhea wale ana oe,

Ka ua noe i ka moana,

Noho i ka ili o ke kai,

Kai o Aina Hou,

Ua lilo oe i manua,

I ka hao lepo manu,

Nani wale hoi Hinahele,

E noho nei i ke anu,

Anu mai nei Hanakahi,

I ka hao a ke kehau,

Akahi au a ike,

I ka lele pi a ka Ona,

Pono ole hoi na Kela,

Ke noho ma ia moku,

Mai hoohoa aku oe,

He malama ino keia,

A hiki ae i Kaelo,

Ka malama ino o ke kau,

Ka hele nihi ae a ka ua,

Ua iho la i wai hou,

Ehia mea minamina,

O ka pua o ka Painui,

I ka lu ai ele ia,

E na manu o Mauna Loa,

Ka Iiwi maka onaona,

Ai i ka liko o ka lehua o uka,

Paa mai Hapaimamo,

I ka olu o ka nahele,

Kepukeawe aku ia,

Neenee i ke Kuahiwi,

Ua ike ia iho nei,

O ka holo a Mulehu,

O ka holu peki i ke one,

I ka lai o Ulukou,

Ua kohu ko ia nei mai,

I ka loaa o ka hoa hui,

Lilo olua i ka wai,

I ka wai olu o Maleka.

H. P. HOOPAU.

 

[Unuhiia no ke Kuokoa.]

NA MEA HUNA

-O-

KE ALO ALII

-O-

NAPELA!

HELU 3.

                LILO IHO LA KA ROSE O KATEnia i mea nui ma ka inoa o ke Counatesa di Kabano, a o kana keiki hoi lilo iho la i mea Hanohano ma kona inoa Alii Sa Robata di Kapano; a no ia mea, hooliloia iho la i ke Caunatesa di Kabano ka malama a me ka hooponopono ana i ka hooilina Moi o Napela, oia hoi ka mea Kiekie Keohana.

                Hanai iho la ke Caunatesa di Kapano i ua kaikamahine Alii nei, a lilo iho la o Sa Robata di Kabano i hoahele, i hoapaani, a me ka hoa hoi o ke ao ana i na mea o ka naauao. A ulu ae la ua kaikamahine Alii nei me ka maikai ano e o kona helehelena, a he wahine maikai maoli no ia, a no ka noho malama ia no hoi ua hoonuiia kona ui. A o Sa Robata di Kabano hoi ka hoa imi naauao o ke kaikamahine Alii he maikai loa kona kii kino a me kona helehelena, a me he mea la no hoi i hanauia mai oia i mea na ka poe o keia ao e mahalo aku ai. Hanai no nae ua makuahine nei o Robaka i ke Alii, me ke ao pu aku no hoi i ua kaikamahine nei i ke aloha aku ia Sa Robata di Kabano. A pela ke ao ana a keia wahine i ka hooilina o ke Kalaunu o ke Aupuni Hanohano o Napela.

                E hoi hou kakou i ke keiki ia Valenatino, a e hoomanao pu iho hoi kakou ua hala ae he mau makahiki he umikumamawalu mai ka hoomaka ana mai o ko kakoa mooolelo nei. Ua malama maikai loa o Anadariana ia Valenatino, ua hoolakoia oia i na mea a pau ana i makemake ai, o kona lole komo hoi, o na ano lole maikai no a pau, ua lako oia i ke dala, a o kona mau lole a me kona mau mea hoonani, aole ia mau mea i loaa i ka Moi o Napela, aka, ia ia wale no ia mea, no Aigupita a me na aina e ae o ka Hikina kahi a Anadariana i kuai ai i mea hoonani no Valenatino.

                Ua ulu ae o Valenatino he kanaka loihi, a he helehelena nani hoi kona, aole wahi e hiki ai i ka manao ke hoohalahala'ku. A eia ka mea maikai loa, he kanaka haipule oia, a aohe ona lilo ma na mea lealea o keia ao.

               He pinepine kona kaniuhu ana me ka ninau iho, "Owai la ko'u mau makua?" No ka mea, aole he hai iki aku o Anadariana i kona mau makua; aka, he hoolako nae i na mea a pau a ke keiki hanai ana e makemake ai. Ua nui ko Valenatino kaumaha ana no keia nalowale o kona mau makua, a me ke kanalua o kona manao, he keiki paha oia no ka hanauna maikai ? Aole paha. No ia kaumaha, hele aku la oia i ka halepule o ia kulanakauhale, a no ka lilo loa o kona manao ma ke kaumaha ; nolaila, aole oia i hoomaopopo i ke kaikamahine wahine maikai e noho mai ana mamua ponoi o ke kuahu; a o ia kaikamahine hoi o Dona Lusia di Alatamura. Komo aku la no oia a mamua iho o ke kuahu kukuli iho la a pule aku la, me ka ninini i kona kaumaha a pau maluna o Iesu ; a pau kona pule ana, alawa ae la na maka ona ma kahi a ke kaikuahine i noho ai, a ia wa no hoi, alawa mai la ke kaikamahine i kahi a ua keiki nei e noho ana, mino iho la na papalina o ke kaikuahine no ka hilahila ; aka, o ka naau ua lilo aku i ka mea a na onohi ona i nana'i. A pela hoi o Valenatino; ua kauo ia ko laua mau manao a elua ma ka ilina hookahi, oia hoi ka ilina hemolele o ke aloha. Aole i liuliu, ku ae la o Dona Lusia di Alatamura, a hele aku la iwaho, i kona ku ana'e haule iho la kona hainaka ; a aole no hoi i liuliu ku ae la o Valenatino a hoomaka mai la e puka iwaho; ia manawa nae, ike e aku la oia i ka hainaka; nolaila, lalau iho la ia a wikiwiki aku la e haawi ia mea i ua kaikamahine nei kona kaikuahine a laua e ike ole nei kekahi, i kekahi.

                Pane aku la o Valenatino, "E ka lede! Eia ko hainaka la." Alawa mai la o Dona Lusia, a lalau mai la i ka hainaka ona, me ka hoomaikai pu mai no ka lokomaikai o ua keiki nei. Pane mai la no nae hoi ua kaikamahine nei, "E ka mea lokomaikai, e kala mai ia'u, ke ninau aku au i kou mea i kaumaha'i; no ka mea, ua lohe aku au ma kau pule i ke kaumaha o kou naau, a ua lilo kou kaumaha i mea nana e hoopepe mai i kuu puuwai; a nolaila, ina he mea hiki ia'u ke kokua ia oe, a ke hooluolu aku i kou mau minute kaumaha, e olioli nui no au. Hoihoi wale au ina he hiki ia'u ke kapa aku ia oe he kaikunane." Pane mai la o Valenatino, "Aole o oe ke olioli, owau iho no ka pono; no ka mea, ke hai aku nei au ia oe, aole au i ike i ko'u mau makua, aole au i hoopomaikaiia mai ma ka haule ana mai o ka leo ao mai ka waha o ka makuahine, aole no hoi au i ike i ko'u kulana ma na papa o keia ao he oa makua ole au." Olelo mai la ua kaikamahine nei, "He pono ia oe ke hai mai ia'u i kou kaumaha, a e hooikaika no au e hoopau ae i kou noho pilikia ana, ina paha o kuu ola nei no ke kumukuai e uku aku ai no ia mea." Lalau mai la ua keiki nei i na lima maikai o ua o Dona Luisa nei, a haawi la i na kaomi pumehana o ke aloha, a pane aku la, "No kau mau huaolelo hoohaki naau, ke hai aku nei au ia oe, ua aneane ia mau hua e wawahi mai i kuu puuwai, ke ooki mai nei ia mau mea ia'u me he makaihe la i ke kahua kaua." "Ke hoomaikai aku nei au ia oe, me na huaolelo o ke aloha hemolele, a o kou kii ua paa ma ko'u papa hoomanao, o kou leo hoi, ua waiho pono iho ma ko'u mau pepeiao, a hele ia mau mea mai o'u aku nei, i ka wa a ka make e hoopau ae ai i ko laua waiho ana ma keia aoao o ka make." Pela ko laua kamailio hele ana a hiki ma ke kihi o ke alanui, alaila hoi aku o Don Lusia me na kahu ona, a o Valenatino hoi hele ae la ma ke ala e.

 

                "Ia wai la ka uwe ana? Ia wai la ka poino? Ia wai la ka hakaka? Ia wai la ka nuku wale ana? Ia wai la ka palapu loaa wale? Ia wai la na maka ulaula?"

                Eia. "I ka poe hoowahawaha i ka puali inu wai." (Temperance Society.) "I ka, poe e hoomau ana ma ka waina; I ka poe e hele ana e imi i ka waina i kawiliia. Mahope iho, e nahu mai me he nahesa la; a e pa mai me he moonihoawa la." Solomona 23: 39—32.

 

HE KAAO

NO KEKAHI MAU

KEIKI ALII.

                ELUA MAU KEIKI ALII E NOHO ana ma ka aina o Babulonia. O Piremusa, he keiki kane oia, he helehelena maikai loa kona, aole he mea like ma ke Aupuni a pau o Babulonia me ia.

                A o Thisbe hoi, he kaikamahine oia, nona na wili lauoho uliuli maikai ehiku, i hanaia e kona makuahine me ka hoohanohano loa, oia no hoi ka wahine ui hookahi ma ka aina a pau o Babulonia; e noho ana laua me ka Hanohano nui maloko o ka Hale Alii o Simiremisa, a ua ohiia mai na keiki Alii a pau, a me na kaikamahine Alii a pau o ka aina, i mau hoapaani no na keiki Alii, ma ke kauoha a na makua o laua, a noho pu iho la lakou ma ka Hale Alii o Simiremisa, ua apoia lakou a pau i ke apo gula, a me ka Eiki Haka i hoopaaia ma ka aoao hema, i hoailona no ka noho aloha pu ana iwaena o lakou.

                O Piremusa, a me na keiki Alii a pau o ka aina, ua paa ko lakou wahi a puni i ka papohaku mabala kiekie, aole lakou e puka mawaho, iloko wale no lakou e noho ai, a pela no hoi o Thisbe ke kaikamahine Alii, a me na kaikamahine Alii o ke Aupuni, maloko o kekahi pa okoa, e pilipu ana no nae. Aia nae iwaena o na keiki Alii, ke aloha i hoopaaia e laua, ua olioli loa laua e hoopalauia mai e na makua, ma ka hoolilo ana ia laua i io hookahi, aka, aole e hiki, aole i ae mai na makua pela. I kekahi la, ua malie loa ke ea, aole i ikeia'ku kekahi mea nana e alai aku ke aouli, a hoike mai la ka la, i kona lilelile ano e, iwaena o ka wai hooluu o na lani, a o na manu hoi o ka lewa, hoike mai la lakou i ko lakou hauoli no ua La la, ma ke oli ana i ko lakou mau mele, ala mai la hoi ka leo o ke Kahuli, a me ka pololei kani kua mauna, aole o kana mai ka hauoli o na mea a pau o ka honua, a hoolai iho la na holoholona o ke kula malalo o na kumu laau uliuli a pau, a hele ae la na holoholona a puni koko a pau o ka honua, a moe iho la ma na kapa o na muliwai, me ka hooma-u ana i ko lakou elelo, i ka wai huihui o na muliwai, a ua piha loa ke ea i ka leo olioli o na mea ola hanu, a me na mea kolo a pau o ka honua.

                A o na keiki Alii a pau, a me na kaikamahine Alii a pau, ua kahikoia lakou i na aahu nani, a ohi mai la lakou i na pua ala a pau o ke kihapai, i mau lei hoohiehie no lakou a pau, a puka aku la lakou mawaho o ka Hale Alii, nana ae la lakou i ke ano o keia la, a mahalo iho la ko lakou naau, holoholo ae la lakou iloko o ko lakou mau pa, e hoolohe ana i ka leo o na manu, a me ka leo o ka pololei kani kua mauna, a piha iho la na keiki Alii i ka hauoli nui loa. Ia Piremusa nae e ku ana ma kekahi aoao o ka pa, a o Thisbe ma kela aoao o ka pa, ua loheia nae ko laua mau leo e kekahi a me kekahi, kahea ae la laua, o kekahi ma kela aoao o ka pa, o kekahi ma keia aoao o ka pa, me ka i ana. "E ka papohaku ino! no ke aha la kou mea i hookaawale ai i na mea aloha elua ? me he mea la he mau mea lokoino, e hoino ana la kekahi i kekahi, no ka mea, ke makemake nei maua e ike aku he maka, a he maka, a e kamailio aku he waha, a he waha, i komo mai na hua olelo o ke aloha iloko o ko maua mau pepeiao, oiai e piha ana maua i ka hauoli, a me na mea a pau o ka honua, i keia la ano e." A pau ka laua kamailio ana, manao iho la laua, ua kokoke laua i kekahi a me kekahi, no ka mea, ua lohe laua i ka leo o kekahi a me kekahi, ku iho la laua ma ia wahi, a hiki i ka napoo ana o ka la, a i ka wa i uhi mai ai ke powehiwehi, oki iho la ke mele ana o na manu, a meha loa iho la ka leo o na mea a pau, a lai ku hoi ka aina, aole i loheia'ku kekahi mea hamumu ma ka honua, me he mea la ua luhi ka honua i ka hana mau, akahi no la a hoomaha, alaila, hoomaka iho la laua e aloha aku kekahi i kekahi, hoopili iho la laua i ko laua mau lehelehe i ka papohaku mabala, no ka hiki ole ia laua ke hookokoke, no ka mea, he papohaku mawaena, a pela i hoonui loaia aka ai ko laua aloha i ko ka wa mamua, a hoi aku la laua i ko laua wahi me ka iini nui o ka manao, a ano e ko laua helehelena i ua po la, i ka wa a na keiki Alii i ike mai ai ia Piremusa ko lakou Haku, hoolealea mai la lakou, no ka mea, o ka lakou hana mau ia i na po a pau, mamua o ko Piremusa moe ana, hookani Piano, hula, kela mea keia mea, i ka mea a ko lakou Haku e makemake ai, aka, i keia po, aole oia i lealea iki mai, aole no hoi oia i ekemu mai ia lakou, nana wale mai la no oia, a olelo iho la na keiki Alii ia lakou wale iho no; ua aha la ka Haku o kakou ? ua huhu paha; a hiki i ka wa moe, hoi aku la kela mea keia mea, ma kona rumi, a hoi aku la no hoi o Piremusa ma kona rumi, a me kana mau kauwa.

                A pela no hoi e Thisbe, ma ke ano o ka laua mau hana a pau, ua like loa, me he mea la ua huiia ko laua manao ma kahi hookahi, no ka mea, o ka mea a kekahi e manao ai, ua like no ia me ka mea a kekahi e manao ai, a pela no hoi ke ano o ka laua hana, aka, he kaawale ko laua mau Hale Alii, a me na kiai nana e malama kekahi a me kekahi.

                I kakahiaka nui, i ka wa a Aurora i hoonalowale aku ai i ka mana o na hoku, a hoopuka mai ia i ka la ma ka ili o ka honua, miki mua aku la o Piremusa, a holoholo ae la iloko o ke kihapai pua ala, e hoonana ana i kona aloha iwaena o na pua ala o ke kihapai.

                A pela no hoi o Thisbe, ua like loa ko laua manao ma na mea a pau, holoholo ae la no hoi o Thisbe, mawaena o kona kihapai pua, e hoonana ana ia ia iho, e like me Piremusa hana, a pela no laua i noho loihi ai iloko o ka mala, a hiki i ka aui ana o ka la, a palaka iho la na kiai, no ka nanea i ka noho loa a na keiki Alii i ka hale, a pela no hoi na kaikamahine Alii, e kuhi ana na kiai o ko lakou mau haku kekahi e noho pu ana, nolaila, aole i hele mai na kiai e nana, ua noho no na kiai ma ko lakou mau hale noho.

                Ia wa, hoomaka aku la o Piremusa e puka mawaho o ka puka pa, me ke ano makau no nae o ike ia mai e na kiai, a puka loa aku la oia mawaho o ka puka, aole he mea i ike mai ia ia, holo mama loa aku la oia, e piha ana i ka olioli, a nana ae la ma o a maanei, aole oia i ike aku i kekahi kanaka, aole hoi he mea e ae, o ke kumu laau kilika keokeo wale no e ku kokoke mai ana, nolaila, hookokoke aku la oia i ka puka pa o ke Alii wahine nana mai la o Thisbe, a ike, aia ke keiki Alii e ku ana mawaho a kona puka pa, holo mai la oia mai waena mai o na pua nani e ku ana ma ke alanui, a ike aku la o Piremusa, i iho la oia; "He oiaio no, o kou nani, ua oi pa haneli aku no ia i ko na pua o kuu kihapai, a o kou mau lauoho, e oi aku ana i ko na paku silika eponi o kuu Hale Alii, a o kou ano a pau, me he dea wahine la ia e hoea mai ana mai ka auau ana mai." Holo mai la oia a kukuli iho la ma na wawae o Piremusa, me ka i ana mai ia ia, "E kuu mea aloha, imua o'u kau kauwa wahine nei, ano, ina e loaaia mai ke alohaia imua o kau kauwa wahine, a i lealea hoi kuu Haku i ka mea a kana kauwa e noi aku ai, i hoohuiia kou olioli iloko o ka hauoli nui o kuu Uhane, a pela e pono ai kaua, ke ae ia e hookomo aku i keia mau hua olelo pokole, iloko o kou mau pepeiao." I ka wa a ke keiki Alii i lohe ai i keia mau olelo, mahalo iho la oia, me ka olelo iho, "Aia hoi; o o kau mau hua olelo, ua like me ka meli e kulu ana mai kou lehelehe iho, a he oluolu i ka maka ke nana iho, he momona hoi i ke alelo ke hoao ia." I aku la oia, "E hai mai," i mai la kela, "E hoohiki kaua ia kaua iho ma ka inoa o ke Akua, e hooliloia kaua i hookahi io." Ia wa puliki paa ae la oia i kona mau lima, a leha ae la kona mau maka i ka lani, me ka i iho iloko ona, "E hookoia mai kuu makemake." Alaila, kulu iho la na waimaka o Piremusa a haule iho la ma kona aoao hema, a moka ae la ke apo gula i paa ai kona puhaka, no ka mea, ua pehu ae la kona puuwai, aole e hiki ia ia ke hoomanawanui i kona ano aloha, aole hoi he hua olelo pono i puka mai, mai kona waha mai, i aku la oia ia Thisbe, "Aia ke kilika keokeo ke ku mai la, e hoi kaua, a loaa ia'u ka manawa pono, alaila, e hai aku no au ia oe i kuu manao o ka napoo ana o ka la, e hele kaua ma la wahi;" a pela i hoi aku ai laua i ko laua mau Hale Alii, a i ke kokoke ana e napoo ka la, holo malu aku la o Thisbe mai ka maka aku o na kiai, a me na kaikamahine, ua uhiia kona poo i na a-a koko, a hele aku la oia mawaena o ke kihapai, a puka aku ia mawaho o ka pa, holo kiki aku la oia a hiki i kahi i kapaia ka hale kiai o Ninusa, aia hoi malaila, ke kumu laau kilika keokeo, kahi a laua i olelo ai, malaila e hooko ai i ka hoohiki ana a Thisbe, noho iho la oia ma ke kumu o ka laau e kali ana ia Piremusa, a polehulehu iho la, e noho ana oia hookahi wale no ma ke kumu o ka laau, aia hoi; he punawai e kokoke mai ana ma ke kumu laau, ike aku la oia i kekahi liona wahine e palu ana i ka wai, no ka mea, ua make wai oia, holo aku la oia, a pee iho la mawaena o na pohaku nui.

                A pau ka inu ana a ka liona i ka wai, hele mai la oia ma ka aoao e kupono ana i ua laau nei, o na a-a kokoia uhiia ma ke poo o Thisbe, ua poina i kona holo ana, e waiho ana ma ke kumu o ka laau, a ike iho la ka liona, ai iho la oia ia mea, a kahe aku la ke koko e hou laula ana i na wahi a pau o ke kumu laau, a hala aku la ka liona, puka mai la o Piremusa e hele mai ana i kahi a laua i olelo ai, malaila laua e halawai ai, ike iho la oia i na meheu wawae o ka liona ma ke one, haupu wale ae la no oia me ka olelo iho, "Ua pau o Thisbe i ka liona.

                Aole i emo, ua loaa koke mai la na a-a koko, a ka liona i lawe hele aku ai, a hiki mai la oia i ka laau kilika keokeo, ike iho la oia i ke koko e mokaki ana, ma o a maanei, "Auwe! e ke kaikamahine poino." Ua loaa mai nei ia'u ke aka o kou kino make, ua oi aku anei ke kumu kuai o kou ola mamua o ko'u ? Aole anei au e hahai aku ia oe, ma kou wahi e hele ai malaila au, a ma kou wahi e make ai malaila pu me a'u. "He oiaio, ua hele mai nei oukou na liona, a ua haehae i kona kino me ko oukou mau niho, wahi ana." Lawe ae la ia i na a-a koko, a uhi iho la ia ia, honi iho la ia mea me ka waimaka, a uwe iho la me ka ehaeha loa.

                Alaila, olelo iho la oia, "E hoohui puia auanei kuu koko me kou." Unuhi ae la oia i kana pahikaua, a hou mai la i kona puuwai. A kahe aku la ke koko a puni ke kumu laau, a komo iho la i ka lepo, ua puni loa hoi na wahi a pau o ke kumu laau, a me na a-a, a hiki loa aku i ka mole o ka laau i ka ulaula o ke koko, mai na a-a mai a hiki i na hua.

                Ma keia manawa, kali iki iho la o Thisbe a liuliu iki, aole ona makemake e hoopoina i kona mea aloha, hele mai la oia mai kona wahi i pee ai, nana mai la oia iloko o ka pouli o ka po, a olelo iho la oia, i ka pakele ana mai i kela mea weliweli loa, oia hoi ka liona. I kona wa i hiki mai ai ma kahi o ke kilika keokeo, ike aku la oia, he mea ula a puni ka laau, kanalua iho la oia, me ka i iho, "Aole ka paha keia o ke kumu laau kilika keokeo." Ia ia i heie wikiwiki aku ai, ike aku la oia i kekahi mea, me he mea la he kino make e waiho ana ma ke kumu o ka laau. Hoi hope hou aku la oia, me ka makau. Aka, ua hoonui loa ia mai kona aloha no Piremusa, ia manawa, i kona manawa i hele loa aku ai a nana pono iho la kela, a ike oia no ke kino o kana mea aloha.

                Nolaila, papai ae la oia i kona umauma e puliki ana i ke kino make o kana mea aloha. Uwe ae la ia, me ka i ana, "O Piremusa, heaha keia mea au i hana ai ? ua hoopilikia loa mai oe ia'u. E hai mai e Piremusa, E Piremusa, mai hoonele ia wau i ke aloha nou. Owau no keia o Thisbe: Ea ! e hoolohe mai ia'u, e kuu mea aloha, e hoala mai oe i kou poo e kulou nei. Ea ! E Piremusa." Ia Piremusa i mahui iki ai i ka leo o Thisbe, oaka ae la kona mau maka, a ike mai la ia Thisbe, alaila, hoohui pu ia iho la laua iloko o ke koko e ulaula ana a puni.

                A ike iho la o Thisbe i ke a-a koko ma ke poo o Piremusa, a me ka pahikaua ma kona aoao. Alaila, i aku la ia, "Na kou lima ponoi no ka oe i hoeha ia oe iho. Nolaila, owau pu kekahi e koa, a o kuu aloha ua ikaika e like me kou. E hahai no au ia oe iloko o ka make, no ka mea, ua loaa ia'u ke kumu o ka make, oia wale no ko kaua mea e kaawale ai, aole e hiki ia'u ke hooloihi i kuu ola ana. E inu pu ana kaua i ke kiaha hookahi a ke aloha; aole mea e hiki ke hookaawale ae ia kaua. A o oe, a me na makua o kaua, aole he pomaikai e loaa ana ia laua, a pela no hoi ia'u, ina wau e ola