Ka Nupepa Kuokoa, Volume I, Number 24, 10 May 1862 — Page 1

KA

NUPEPA KUOKOA:

Ke Kilohana Pookela no ka Lahui Hawaii.

BUKE I.  HONOLULU, MEI 10, 1862.  HELU 24.

 

He Inoa no Miki Opio.

Me he pula kau maka la,

Aahoaka moku pewa i ke kai,

O Molokini,

Ka hanai lua a ke ao,

I ka makani hoolewalewa,

I ka umauma o ka pali,

Ka manu halihali ai a ke keiki,

Ke ahai ia la,

A kau iluna o ka laau,

Ka manu ai hamu,

Maii koena ole,

Mikimiki la,

I ka wai o ka lehua,

Hoopunana i ka poli o Waahila,

Mako ole ka hale lawai-a o Hilia,

He maunu no ka i-a o Palaau,

Me he mea la i po i ke ala,

Ka uka o Hanawa,

I po iki wale i ke kai o Lehua,

Ke hanai la i ka maka o ka Opua,

Hao kiai halona i ke kai,

Hoonoho i ka Opua, ua malie,

Pele huna ana wau i kona aloha,

Mai haihai oe i ka puana a ka moe,

He uuku kanaka ia,

Me ke aloha no—e,

E aha la ka oni ae no—e.

 

Kaina ma o e amo ka hili,

O ka hili paa i ka lima,

E kii ka hili i kai o Niihau,

I Kaula, i ka moku o Kuhaimoana,

Haawi o Kuhaimoana,

I ke kaupu i ka iwa anai maka,

I ka aukuu, i ka anae,

I ka manu hoala hiamoe,

E hoolale ana ke Kioea, e lawe ke o,

Lawe ke o, lawelawe ke o,

Holo ka waa, eia ka elele,

He manu me ke Koae,

Huli hoomeamea,

O ka hulu ka'u i kii a kau,

Hoolawa wale ka hili,

O mai ka hulu,

I lawa ke kahili—e.

 

[Unuhiia no ke Kuokoa.]

KA MANU ULIULI.

HELU 2.

                OWAI LA HOI KEIA E OLELO oluolu mai nei ia'u? " He Moi pino i aloha ia oe, aole ia e aloha i kekahi mea e ae, o oe wale no." I ka manawa i pau ai oia olelo ana, lele aku ia a kau iluna o ka puka aniani. Makau loa iho la o Fololina i keia mea kupanaha, i ka olelo mai e like me ke kanaka, " Ua ae hou ia mai nei paha wau e ike hou ia oe." Ninau aku ua kaikamahine nei, " Owai oe e nei manu maikai, me ka hamo i ka hulu? " Olelo aku ua manu nei, " Ua loaa mai la no hoi ia oe kuu inoa, a o kou ike ole mai la no ka ia ia'u."

                A ninau hou aku la ua kaikamahine nei, " Owai, o ke Alii kaulana anei o ka honua nei, o Moi Kamana, oia anei keia wahi manu uuku a'u e paa nei i kuu lima?" "Auwe! e Fololina nani, he oiaio loa, a ina he mea kekahi nana au e hooluolu, oia keia mea a'u i ae ai e hooliloia o ko'u ano ia no na makahiki ehiku, mamua o kou hoolilo ana i ko'u aloha ia oe," " Ia'u," wahi a Fololina.

                Olelo aku la ia, " Ua lohe au, ua mareia olua me Kulikone; no ka mea, ua ike au i ko komo-lima, iluna o kona lima." E ike oe i ka ka hoino ana i kou inoa, ua imi lakou i mea no'u e lawe ai i kela kaikamahine pupuka ; aka, i ko'u wa i ike ai i ko'u kuhihewa, o ko'u manawa ia i haalele koke ai. He nui loa ko laua olioli i ka halawai hou ana. A olelo aku la o Fololina, " Owai la auanei kou mea nana e hoopakele, mai ka poe ki manu mai, a me na maiuu o ka Valatua pololi?" (manu nui.) O ua wahi manu nei, i ke ao, noho iho la ia iloko o ka puha laau e pee ai; a o kana hana o ke ao, o ka hoomanao e ike ia Fololina, no kona manao nui ia ia; nolaila, lele ia i ke kulanakauhale o kona Aupuni, a hiki i kona hale, komo ia ma kekahi aniani naha o ka puka, a iloko o kona lumi, a lawe mai he paa Kulapepeiao Daimana, a lawe i ke ahiahi a haawi aku ia Fololina, me ke koi aku e lei. Olelo mai la o Fololina, " He ae no au e lei, ina e hele mai oe i ke ao e ike ia'u ; aka hoi, eia wale no kaua i ka po e kamailio nei, nolaila, aole au e lei ana."

                A hoohiki aku la ua wahi manu nei, e hele mai ia i na hora a pau ana e makemake ai, a lei koke ae la kela i ua Kulapepeiao Daimana nei. I ke kakahiaka ae, hele hou no ua manu nei i ka aina ona, komo no e like me mamua, a lawe mai he paa apo lima gula maikai loa, aole i ikeia mamua, a lawe a haawi aku no Fololina. I kekahi po, lawe aku ia he Wati, i wahiia i ka moni. Olelo aku la o Fololina, " Aole pono o kou haawi mai ia'u i ka Wati; no ka mea, ina oe e hele, me he mea la aole he hopena o ka hora a'u, a ina oe e noho mai, me he mea la he moeuhane ko lakou hele ana; nolaila, aole e hiki ia'u ke haawi aku i ko lakou ana kupono."

                I ka manawa e puka mai ai ka la, hoi keia a ka poli o kona laau noho; a o kona hua kana ai, a i kekahi manawa himeni, a no ka maikai o ka ea ; nolaila, noho iho la ka poe hele e hoolohe. Aohe la i nele me ka loaa ole o kekahi mea ia Fololina, a mahope iho, nui loa na mea kamahao pii loa o ke kumukuai i loaa ia ia. Pela a elua makahiki i hala, aole o Fololina uluhua iki no kona noho paahao ana.

                Ia manawa no, he nui na kane a ua wahine lapuwale nei i hoopalau ai na ke kaikamahine ana; hoounaia na Kuhina i na aina e, e hoopalau i na Alii opio i kamaaina me Kulikone, i ko lakou wa e hiki mai ai, o ko lakou manawa no ia e hoi koke ai. A manao iho la ua wahine nei e imi i hewa no Fololina, a olelo iho la ia, ua kamailio pu kela me ko na aina e, a he Karaima nui ia no ka aina, a imi iho la ia i mea e hewa ai o Fololina.

                I kekahi po, ua aumoe loa, manao iho la laua e hele iloko o ke Towela e ninau ai ia Fololina, e noho ana laua me ua manu nei, ua hoonani o Fololina ia ia iho a maikai loa i na mea nani a pau loa. Ku iho la ua wahine nei ma ka puka e hoolohe ai, a manao iho la ia, ua lohe aku ia elua mea e olelo ana iloko, a aole no ia i kuhihewa, " E kulikone, kuu mea aloha, ua apikiia kaua." Pela ka uwe ana ae o ua wahine nei, a hookomo aku la i kona kino maloko. Heaha la ka Fololina mea i hana'i ia manawa ? Wehe koke ae la ia i ka puka aniani, i puka aku ka Manu Alii iwaho. Hele aku la laua nei a kokoke i o Fololina la, me he mau ilio hae la e nahu aku ana, a olelo aku la penei, " Ua kamaaina makou i kau hana e kue nei i ka aiaa," wahi a ua wahine nei, " A me wai ? " Pela aku o Fololina, a olelo hou aku la o Fololina, " Aole anei o oe ko'u Luna Paahao no keia mau makahiki elua ?"

                Ia ia e olelo ana, nana aku la laua nei me ka manao kamahao. Ninau aku ka Moi Wahine, " Mai hea mai ka loaa ana ia oe o keia Kulapepeiao Daimana ? " Olelo aku la o Fololina, " Iloko nei no o keia Towela kahi i loaa'i ia'u. Olelo hou aku ua wahine nei, " Aole makou e puni ana ia oe, i lawe oe i keia mau mea maikai i mea nou e kuai ai i ke Aupuni o ko makuakane." Pane mai la o Fololina, " Ina pela, maikai maoli au ke kuai aku." Huli iho la ua wahine nei ia loko o ka hale a hiki i kahi bela moe inoino o ia nei, loaa iloko olaila ke Daimana, a me ke Gula, a me na mea maikai e ae.

                Manao iho la ua wahine nei e huna i kekahi palapala, i ka manawa aole e manaoia mai ana, huna ae la keia ma ka puka uwahi ; aka, pomaikai loa i ke kau ana mai o ka Manu Uliuli malaila, a kahea mai, " E malama e Fololina ia oe iho, a e nana mai i kou enemi, ke hana nei i mea nou e manaoia ai ua kipi." Makau loa iho la ua wahine nei i keia leo; nolaila, aole ia i hana i ka mea ana i manao ai.

                Olelo aku la ua kaikamahine nei, "Ike iho la oe, ua huli na uhane e lele nei mamuli o'u." " Manao au," wahi a ka wahine, ua piha loa i ka huhu, a pane hou aku la, "Ua pili ke Diapolo mamuli ou ; aka, na ko makuakane oe e hoopolei mai." Haalele iho la ua wahine nei, a hele aku la e kuka malu i ka mea pono e hana aku ai i ke kaikamahine ; a ua oleloia, o ka mea pono ka hoomakakiu a ike i ke kokoolua o Fololina, manao iho la ua wahine nei he pono ia, a hoouna'ku i kekahi kaikamahine ilaila e moe ai, a hoohalike iho la me he kaikamahine naaupo la.

                Aole no i puni o Fololina, nana aku la ia i ua kaikamahine nei he kiu : nolaila, aole ona hele hou maka puka aniani, kahi a ua Manu Uliuli aloha nei ana e hoi mau mai ai. O ke kiu ona, o ke kiai kana hana i ka po a me ke ao, a hala hookahi mahina ; ua pauhia iho la ia e ka hiamoe nui. Ike iho la o Fololina, aole ia e ala mai, wehe ae la ia i ka puka aniani a kahea aku, " Hele mai e Manu Uliuli, ano o ka manawa keia, hele mai i o'u nei." Lohe aku la ua manu nei, a hele koke mai la ia.

                Pehea la kona olioli i ka ike hou ana ? A mahope hiki mai ka manawa e hookaawale ai, aole nae he ala iki o ke kiai o Fololina, a aloha iho la laua nei i na aloha palupalu loa. A i kekahi po mai, hele hou no o Fololina e like me mamua, a ma ka puka aniani, kahea aku, " Hele mai e Manu Uliuli, ano o ka manawa keia, hele wikiwiki mai oe i o'u nei." Hele koke mai la no ua manu nei, a hala keia po e like me ka po mua, ka ike ole ia. Olelo iho la ua mau ipo nei no koiala makemake loa i ka hiamoe ; a nolaila, e hana mau ana ia pela i na po a pau. O ka oiaio, i ke kolu o ka po, ua hala e like me kela; a i ka ha o ka po, lohe kela i ka nakeke, a hoolohe, me ka hoike ole mai e hana ana ia pela ; a ike mai la kela ma ke aiai o ka mahina, i ka manu maikai loa ma ka honua nei, e kamailio ana me ke kaikamahine Alii, ka mea nana e hamo ana a honi iho i kahi nuku uuku. I ka huaolelo hookahi, ua loheia i ka hapa nui o ka laua olelo. I ke ao ana ae, hoi ke Alii Wahine opio iluna o ka moe, a o ka manu iloko o ka laau. Hele aku la ke kiai, a hai aku la i ka Moi Wahine i ka mea ana i lohe ai, a me kona ike ana; hoouna aku la ka Moi Wahine ia Kulikone, a akaka iho la ia ia, o Kini Kamana ka Manu Uliuli, aole he mea e.

                Hoihoi hou mai la ka Moi Wahine i ke kiai, me ke hauoha aku e hoohiahiamoe loa, a o ke kaikamahine Alii hoi; puni i koiala ano, hele no keia a wehe i ka puka aniani, a kahea aku, " Hele mai e Manu Uliuli, ano o ka manawa keia, hele wikiwiki mai i o'u nei." Kahea ia ia po me ke ko ole ; no ka mea, aole kela i hiki mai, ua kauohaia e ka Moi Wahine, e kauaia ka Pahikaua, me ka Pahiumiumi, a me ka Pahi-o, ua kauia no a puni ke kumu o ka laau, i ka manawa i hoomaka ai ke Alii opio e lele, aole e hiki ae, moku na wawae, haule iho i luna o kekahi moku na eheu, a mahope, mokumoku ke kino a puni, a pakele ia i ka hoi ana i loko o kona laau ponoi. Aole ona malama i kona ola, no kona manao na Fololina i hana keia mea aloha ole.

(Aole i pau.)

 

(Unuhiia no ke Kuokoa.)

HE KAAO

NO KA POE ILIHUNE E NOHO ANA

MA NU IOKA.

HELU 1.

                O KIMO HAHAI HOLOHOLONA KA inoa o ka makuakane, o Mele ka makuahine, o Peke ke kaikamahine mua, o Maria ka muli.

                O keia poe, he poe ilihune loa, o ko lakou kapa, ka ili o na holoholona ; o ko lakou wahi hale, he ili Bipi; o ko lakou wahi moena, he ili Dia; o ka lakou ai, he ili laau, a me ka hua o na laau ; o ka lakou i-a, o ka io o ka holoholona.

                I ka noho ana o lakou nei a nui na kaikamahine a hele i ke kula, a ike laua nei; o ka muli nae o Maria, oia kai oi loa aku o ka ike mamua o na haumana a pau o ua kula nei, pela no ka oi ana mamua o ke kumu.

                I ka lohe ana o ke Alii nui o ua Aupuni nei, oia o John Kini, i ke akamai o ua kaikamahine nei, olelo ae la ia i ke Kahukula, e hoike, i ikeia ke akamai o na kaikamahine o ua kula nei, a me na keiki kane o ua kula nei o ke Aupuni.

                Olelo hou aku ke Alii, " I ahaaina nui na na keiki, ina i makaukau ka mea ai, a me na kahiko o na keiki a pau, na keiki kane a me na kaikamahine ; alaila, hoike a pau ia, ahaaina." Ia lohe ana o ua mau kaikamahine nei, hoi aku la a na makua, hai aku i na mea i oleloia e ke Kahukula, e hoomakaukau ; a olelo aku la ua mau kaikamahine nei i ko laua makuakane, " I aha la auanei ko maua wahi kapa e hele aku ai i ka hoike a me ka ahaaina ?" I aku ka makuakane, "Aia ko olua kapa o ka hulu o ka Liona, a me ka hulu o ka Bea, ina o ko olua ka paia, uwa ka pihe a haalele wale; alaila, maikai ia i ko lakou manao."

                Pii aku la ua wahi makuakane nei i ka hahai holoholona, a loaa ka Liona, a me ka Bea, lole iho la keia a pau ; hoi aku la a ka hale, kaulai a maloo, olelo aku la ia i na kaikamahine ana, " Eia ke kapa o olua la." Ae koke aku la ua mau kaikamahine nei; alaila, humuhumu iho la laua nei a paa, ninau hou mai la ua mau kaikamahine nei, " I aha la ko maua kamaa ? " I aku la kahi makuakane, " O ka ili Kao ko olua kamaa." Hana iho la ua wahi makuakane nei a paa ke kamaa ili Kao, hana hou keia i wahi papa-kaukau ili Kao, i mau wahi pa laau bitu, a me na puna laau, a me na o laau, a me na pahi niho Elepani, lawe aku la keia i ka papakaukau ili Kao, a hiki i ka hale kula, ike, mai la na haumana a pau, i keia wahi papa-kaukau kupanaha, a me ke pa, a me ke puna, a me ke o, a me ka pahi niho Elapani a ua mau kaikamahine nei, uwa mai la lakou a haalele wale. Lohe koke aku la ke Alii nui o John Kini, me kana keiki o Kinigura, i keia pihe e uwa nei, i iho la laua, " Heaha la keia pihe uwa nui ?" Pau ia pihe uwa no ka papakaukau.

                Kakali aku la laua nei, o ke kani mai o ka bele hoomakaukau, a kani ka pele, komo iho la laua nei i na kapa hulu holoholona o laua nei a paa, hele ua mau kaikamahine nei; alaila, ike houia maila no keia mea kupanaha, o na kapa hulu holoholona o laua nei; uwa hou ka pihe a haalele wale no laua nei.

                Ia manawa, kena ae la ke Alii nui i kona Kuhina ia John Mela, e hele e nana i keia haunaele nui; alaila, i ka hele ana aku o ua Kuhina nui nei, a halawai aku la ia me kekahi poe, ninau aku la ia, " Heaha la ke kumu o keia haunaele ?" Hai mai la lakou la, he mau kaikamahine, he hulu Liona ko kekahi, he hulu Bea ko kekahi, o ka laua papakaukau, he ili Kao ; o ka laua pa, he laau bitu ; o ka laua puna, he puna laau; a o ke o, he o laau ; o ka laua pahi, he niho Elepani; oia keia haunaele nui la.

                Alaila, hoi aku la keia a hai aku la i keia mau mea i oleloia mai ai i ke Alii nui, me kana keiki. Ia lohe ana o ke Alii, wela loa kona naau, no ka hilahila i kela mau mea hoohilahila, a olelo hou mai la ia i ke Kuhina, " E hele oe a i ka Ilamuku, e olelo aku oe e kipaku aku i ua mau kaikamahine la, e hele pela, mai noho iho laua i ka hoike, me ka ahaaina, ina i noho laua, a ike aku kuu maka; alaila, o kou manawa ia." O ka hele aku la no ia o ke Kuhina nui a i ka Ilamuku, a olelo aku la e like me ka ke Alii i kauoha mai ai; alaila, hele aku la ka Ilamuku a kipaku aku la e like me ka ke Alii i kauoha mai ai.

                Alaila, hoi aku la laua me ka manao kaumaha, no keia hana hoohilahila a ko laua makuakane, a hiki i ka hale ili Bipi o lakou nei, wehe laua i na kapa hulu o laua a pau ; alaila, olelo aku ke kaikuaana i ke kaikaina, e aho ko kaua make mamua o keia hoomainoino a ko kaua makuakane ; alaila, i aku ke kaikaina, he ole loa ia, aia a hoi mai ko kaua mau makua, kali laua nei a hoi mai na makua; kahea aku la o Maria i na makua e hele mai, a hele mai la na makua a ma ke alo o na kaikamahine ; alaila, kahea mai i ko laua makuakane, "E Kimo hahai holoholona." A pane mai la o Kimo, " Heaha ka'u ? " Olelo aku o Maria, " E imi oe i hana nau." I aku la ka makuakane, " O ke aha la ka'u hana ? " I mai la o Maria, " E imi no hoi paha oe a ka hana nui o ka loaa, i pau ko kakou ilihune." Olelo aku o Kimo i ke kaikamahine, " Ae, i kamana paha ka'u hana e imi aku ai. I mai ke kaikamahine, " Aole e ola ka ilihune o kakou ia hana." Ina oe e hana a pau ka mahina, ohi mai na wahi dala he umi, i kahi ai no, a i kahi i-a, o ka pau no ia, aole e ola ka ilihune." Olelo hou aku no ke kaikamahine, " E imi hou no oe i hana nau." Olelo mai ka makuakane, "I amara paha ka'u hana." Olelo hou aku ke kaikamahine, "Aole no e ola ka ilihune o kakou, ohi mai no na wahi dala, pau ae no i kahi ai, i ka i-a, a me kahi kapa, mau no nae ka ilihune."

                Olelo hou aku no ke kaikamahine, "E imi hou no oe i hana nau." I aku ka makuakane. " I kupa pahu hoi ha ka'u hana." Hoole aku no ke kaikamahine. Olelo hou aku ka makuakane, " I hooholo moku hoi ha ka'u hana.'' Hoole no ke kaimahine; pau ae la ka ka makuakane mau hana i manao ai, mahope iho olaila, hai aku la o Maria kana kaikamahine i ka hana kupono e waiwai ai, a e pau ai ka noho ilihune ana o lakou.

                E kuu makuakane, " Eia kau hana o ka lawai-a." Hookahi no la, loaa ke dala ; no ka mea, hookahi no i-a, hookahi dala, a ina he kanalima i-a, kanalima no dala, a pela'ku a hiki i ka haneri i-a, haneri no dala, a o ka pau koke no ia o ko kakou noho ilihune ana." Wahi a ua kaikamahine nei.

                Alaila, hele aku la ka makuakane i ka huli kakaki, (uwea hao,) i mea makau lawai-a nana, a hoi mai keia, kuiia a pau, anai i ke apuapu a oi, poho iho la i makau, pela kana hana ana a nui ka makau. A o na kaikamahine hoi, hele laua i ka huli lopi kuaina ma na hale humuhumu pea, a loaa ka lopi kuaina, hoi mai a ka hale, haawi aku i ka makuakane, kaa iho la ka makuakane a paa, alaila, maunu keia i ka io o na holoholona, a pau na makau i ka maunuia, hookomo iho la keia iloko o ka hokeo ana, o Hapukupauikai-a, oia ka inoa o ka hokeo ana ; alaila, olelo aku la ke kaikamahine ana, "E moe oe i keia po a wanaao, alaila holo oe i kai."

                Moe iho la ka makuakane a e like me ka ke kaikamahine i olelo ai, alaila, ala ae la keia a holo aku la a ka moana uliuli, a nalowale ke kuahiwi o ka aina ; alaila, kuu keia i na makau ilalo, paa keia, o ka noho keia a mahope o ka aina awakea, huki keia i ka makau ana, aohe i-a, o ko ia nei hoi no ia a pae iuka. Holo mai la na kaikamahine, a nana i ka waa, aohe wahi i-a, kaumaha iho la ka manao o ke kaikamahine o Maria, a o ka hapai iho la no ia o lakou nei i ka waa a kau iuka, alaila, hele ka makuakane i ka auau a hoi mai paina lakou nei a pau ka paina ana. I mai la ka makuakane, " Aohe ka hoi he loaa iki o ka i-a." Olelo mai ke kaikamahine, " Aole no he i-a o ka moana uliuli, eiae no ka i-a ma ke kuaau." I noho auanei oe a wanaao, holo oe makai, hele maua mauka a kahi no auanei a maua e ku ai, alaila, hoopololei oe i ka ihu o ka waa a pololei, alaila, kuu i ka pohaku, hookuu keia a loihi, hoopaa keia i ka iako a paa, alaila, wehe keia i ka Ipuholoholona a ianei, hana iho la keia i ka maunu a paa i ka makau, kuu aku la keia ma kekahi aoao he kanalima makau, ma kekahi aoao hoi he kanalima makau, ia kuu ana no a ia nei a kuu ilalo, hoau ae keia, e apo mai ana na i-a he kanalima, a ma kekahi aoao hoi, like pu no, huki mai la keia a hooili iluna o kahi waa o ia nei, a pela aku no ka ia nei hana ana a piha ka waa o ia nei i ka i-a, kuu hou no keia i na makau ana, ai hou ia no, huki no keia a hikii mawaho o ka omuku a maloko hoi o ke kuaiako o ka waa, alaila, hoi iho keia ka i ka liu o ka waa o ia nei.

                Me he mea la keia i paia ae la na maka o ia nei, i nana aku ka hana, e noho mai ana keia keiki kanaka maikai, oia no oe ke ahi la. Eehia iho la keia i ka ike ana'ku i keia keiki kupanaha, aole i ikeia kahi o ka hiki ana mai, moe keia a liuliu, ala ae keia e noho ana no ua keiki nei, me ke kapa Daimana, papale Daimana, na pono a pau he Daimana wale no; alaila, olelo mai la ua keiki nei, " Na'u paha ka i-a." Olelo aku la o Kimo, " Nau no ka i-a." Olelo hou aku ua keiki nei, " Holo oe i ko la i holo ai inehinei, a ka moana uliuli, a mahope o ka ainaawakea, hoi mai, aohe wahi i-a iki; nolaila, nau ka i-a o keia la." Wahi a ua keiki kupanaha nei.

                Alaila, ae aku la o Kimo hahai holoholona, "Ae, nau ka i-a o keia la." Olelo aku la o Kimo hahai holoholona, "I aha la auanei ka'u uku e haawi aku ai ia oe ? " Olelo mai la ua keiki nei, " Aole au mau kaikamahine." I aku la o Kimoi i ua keiki nei, " He mau kaikamahine no ka'u elua." Olelo mai la ua keiki nei, "O ka muli, oia ka'u wahine. Ae aku la no o Kimo, olelo hou aku la ua keiki nei, " E hoi oe a hiki iuka, alaila, kuai oe i ka i-a i ke dala, a loaa ke dala, kuai oe i apa lole, haehae oe a liilii, hana nae oe a nui, hikii ma ka laau ; a kakahiaka, nana oe ma kahi akea, alaila, kukulu oe a puni i mau laau loloa ma na puka a pela no hoi ma na hale moe, hale lio, a pela'ku, a popo hiki aku au, aole no anei au e nalo, he moku keokeo hulali, pea dala, moku dala, kaula dala, na mea dala no a pau loa, a owau hoi ia."

(Aole i pau.)

 

AHAOLELO HAWAII.

Hale o ka Poeikohoia.

                LA MUA.—Mei 1.—Ua hui mai na Luna i kohoia i keia la ma ko lakou Keena. Hoomalu mai ke Kakauolelo o ke kau i hala i na Luna oia hale, oia hoi o Mi. O. H. Gulick, a lawe aku i na palapala hookohu o ke kohoia'na o na Luna. He 23 Luna i hik imai. Ma ia hope ua lilo ka Hale i ke koho i na Luna.

Ua kohoia o           W. WEPA, Luna Hoomalu.

                                O. H. GULIKA, Kakauolelo.

                                W. KAMALENA, Kakauolelo Kope.

                                W. C. PARKE, Makai no ka Hale.

                No ke noi ana i Kahuna no ka Hale, ua nui ka hoopaapaa. Ma ke noi a Mi. Balawina, o ka rula o ka Hale o ka Poeikohoia no ka Makahiki 1860, me ka huipuia o ka pauku e pili ana no ke koho ana i ke Kahunapule, ke lilo no ka Hale i keia Kau.

                Kokua o Wilimana ia noi, me ka holoiia nae o ka pauku e ae ana i ka ukuia o ke Kahunapule. No ka mea, aohe he kumu e ukuia'i i Kahunapule, oiai he lehulehu na lala o keia Hale i hiki ke hana ia mea, me ka hooemi iho i ka lilo. Kue o Kipi, Kahookano, a me Balawina, olelo lakou he kupono ka ukuia o ke Kahunapule o ka Hale, e like me ka mea i maa, a he mea ole hoi ka lilo oia mea mamua o na mea i haawiia no na hana i like ole ka nui, me keia. Ua hooholoia ka Wilimana. A ua kohoia o Rev. Lowela Kamika i Kahunapule no ka Hale.

Ua hoopaneeia ka hana.

                LA 2.—Mei 2.—Heluheluia ka moolelo o ka Hale, a aponoia. Pule o L. Kamika ke Kahunapule. Hoopuka mai ka Luna Hoomalu i ka poe i kohoia i Komite mau no ka Hale penei:

                Komite Waiwai.—Messrs. Wilimana, Kipi, Harris, Rhodes, Kapihe.

                Komite no ko na Aina e.—Messrs. Knudsen, Kahalewai, Balawina, Kamalo, Alapai.

                Komite no na aina Aupuni, a me na Hana Hou.—Messrs. Rhodes, Knudsen, Kaauwai, Kaapa, Barenaba.

                Komite no ke Aopalapala.—Messrs. Balawina, Barenaba, Kaauwai, Rhodes, Kipi.

                Komite no na Ahahookolokolo.—Messrs. Harris, Hikikoke, Kaakua, Kahookano.

                Komite no ke Kalepa.—Messrs. Dowsett, Wilimana, Kapihe, Manini, Kahananui.

                Komite no ka mahiai, a me ka kanalima.— Messrs. Hikikoke, Kahookano, Dowsett, Nuuanu, Makaioulu.

                Komite no ke koho ana.—Messrs Knudsen. Kaauwai, Dowsett, Kipi, Barenaba.

                Komite no ka Oihana Koa.—Messrs. Manini, Kamalo, Harris, Kahalewai, Nuuanu.

                Komite no na Buke Helu.—Messrs. Kipi, Hikikoke, Alapai, Kahananui, Kahookaumaha.

 

                Hoike mai o Kanuka, o Waimea, Kauai, a me Makaioulu, o Puna, Hawaii, i ko laua mau palapala Hookohu, a Hoohikiia e like me ke Kumukanawai.

                Eia malalo iho na inoa o ka Poeikohoia no ka Hale Ahaolelo, o ka makahiki 1862.

                Oahu.—W. Wepa, J. I. Dowsett, G. Rhodes, F. Pomaikai, Honolulu; G. Barenaba, Koolaupoko; J. H. Kaakua, Waialua; A. M. Kahalewai, Koolauloa; P. F. Manini, Ewa, a me Waianae.

                Maui.—D. D. Balawina, J. D. Kahookano, Lahaina; W. H. Kaauwai, Wailuku; M. Kahananui, Hana; M. Kapihe, Makawao; J. H. Moku, Kaanapali.

                Hawaii.—L. Kaapa, S. Kipi, Hilo; C. C. Harris, Hamakua; J. A. Kahookaumaha, Kona Hema; G. N. Kamalo, Kona Akau; J. Kauhane, Kau; E. Makaioulu, Puna , P. Papaua, Kohala.

                Kauai.—V. Knudsen, Waimea; H. A. Wilimana, Koloa; A. S. Nuuanu, Hanalei.

                Molokai.—J. Alapai, H. R. Hikikoke. Ua heluheluia mai ka palapala hoopii no ka pono ole o ke kohoia'na o ka Lunamakaainana, no ka apana o Kona Akau, Hawaii.