Ka Nupepa Kuokoa, Volume I, Number 38, 16 August 1862 — Page 3

Page PDF (1.63 MB)

Ka Nupepa Kuokoa.

 

20 o Aperila kona hanau ana: aka. no ko Napoliona Nui no. Ma ia la i hoomanaoia'i ke Concordat, oia ka Olelo Aelike mawaena o ka Pope me ka Emepera Napoliona, i kukulu paaia'i ka hoomana Katolika ma Far la 4 o Iulai no Amelika Huipuia, a me ka la hoihoi ea o Hawaii nei, ia kakou iho.

Na Palapala.
ME KE KAHUKULA.

KONA AKAU. HAWAII,
Poakahi, Aug. 4, 1862.
            No ke kauoha ana a ke Kahukula i na Lunakula i keia la e akoakoa mai, a ua akoakoa mai lakou. Hoopuka mai ke Kahukula i kekahi ninau, penei:
            Pehea la e hoemiia'i ko ke Aupuni lilo ana, ua noonoo nui na Lunakula i ka lakou mea e pane ai, no ka mea, ua waihoia'ku na lakou e hoopuka mai i ka lakou mea e pane mai ai. Manao o Kaikai, wahi ana, e hoohuiia na kula e noho palua ana na kumu elua ma kahi hookahi, malalo o ke kumu, hookahi. A o ka manao hoi o kekahi. e hooemiia ka uku o na kumu i $0.12 ½ ko kekahi, a he $0.25 ko kekahi, a ma ke kukakuka ana, ua hooholo likeia na manao me ko Kaikai.
            Hapai houia kekahi manao hou, e hoomaopopoia ka uku ana o na kumu ma na wahi i huiia'i malalo iho o ke kumu hookahi, a me na kumu e ae i ano like ka nui o na haumana. Ma ka noonoo ana a kukakuka no ia mea. Hoakaka mai ke Kahukula i ka hana iwaena o kekahi mau kumu no ka hapaha i hala. O ka lilo i ke kumu hookahi, nana i malama na kula elua o Honuaula, he $0.50 no ka la hookahi, a i ko ka Lunakula manao ana no na kumu elua e malama ana ia mau kula, ho $0.37½ pakahi, a ua $0.75 no laua a elua i ka la hookahi. Eia hoi keia, ua lohe mai au ia Parisa, ua huiia he elua mau kula ma Kona Hema i ke kumu hookahi, a i ka wa kikoo, ua emi ka lilo ia ia i ko na kumu elua, a ua oi aku hoi ka makaukau i ka wa o ke kumu hookahi mamua o na kumu elua. Hooholoia. Ma ke noi a Kaikai, e ukuia na kumu nana i malama i na kula elua i hapalua dala pakahi no ka la hookahi, a me kekahi mau kula e ae i ano like ka nui o na haumana ; aka, ina ua ikeia, ua holo loa ka hana a kekahi mau kumu, alaila, ua hiki no ko lakou uku maluna aku o ka hapalua ; a o na kumu e ae i emi maoli ka makaukau, a ua nuku paha na mea ao, ua hiki no i ko lakou uku ke hooemiia malalo iho o ka hapalua.
            O na kumu i emi iho ko lakou mau haumana malalo o na kula mua, ua emi no ko lakou uku malalo o ka hapaha dala. ( He hiki no nae ke nanaia ka hua o ka hana ana.)
            Hapaiia kekahi manao no ke koho ana i na kumu, noloko o na wahi i paluaia. Kukakuka mua i kumu no Keauhou, manao na Lunakula oia wahi, ua pono no na kumu elua ma ia wahi: aka, o ka hapanui, ua ku-e aku ia laua, no ka mea, ua hooholo muaia i hookahi kumu no na wahi palua o ke kumu, a i ka noonoo ana, ua kohoia o J. G. Hoapili i kumu. Ua hiki mai i Kahaluu ke kuka ana. Manao kekahi Lunakula olaila, o Nakea, e hoopau i na kumu a elua, a e kohoia o Kuahaua i kumu, no ka mea, ua makemake no makou ia ia no ka holo o ka ike ia ia i kona noho kumu ana ma kekahi mahele no ka hapaha i hala, a i ka noonoo ana, ua kohoia o Kuahaua i kumu no Kahaluu.
            Noi mai o Kaikai, e hoopauia ke kumu mua o Kaumalumalu no kona palaka, hiamoe, a hiikeiki wale no i ka wa kula, ua ae ia, a ua kohoia o G. W. Ikaika i kumu nolaila, o ke Kahukula. A hiki i Holualoa, hoopuka mai o Kealalio, a me Kaanaana na Lunakula. He pono no ke hoopau likeia na kumu a elua, a e kohoia i kumu hou me ka hoakaka ole nae i ke kumu hewa o kekahi a me kekahi, a i ko laua manao o G. W. Pilipo no ke kumu, ai ke kukakuka ana, ua kohoia o H. L. Kahaleluhi.—Hoakaka wale nae ke Kahukula nona. Ua hele kela i Hilo i ke kula, a ua noho he mau makahiki, a ua noho i Lahainaluna he mau makahiki, a i ka puka ana mai, ua noho kumuao ma Koolaupoko, he mau makahiki, a ua mau no a hiki i keia la. Ua kokoke i ka iwakalua paha na makahiki o kona malama ana i keia hana. Ua hiki aku ka noonoo ana ma Kailua. Manao o Kainuwai o J, W. Makanoanoa ke kumu. Ku-e mai o Kekuahanai mai ia J.W. Makanoanoa, a me J. H. Kaaea na kumu mua; wahi ana. Ke manao nei au o D. S. Keawe ke kumu, no ka mea, iloko o keia hapaha i hala iho nei i lilo ai ia ia kela niau kula, ua pii ae ka makaukau o na keiki. Pela ka'u ike ana i ka'u mau keiki i kekahi o na kumu mamua, aole ike, a i keia kumu iho nei, ua ike aku ia lakou ua makaukau ae. Nolaila, makemake au ia ia oia ke kumu o ka makou mau keiki a o ka noonoo ana, ua kohoia o D. S. Keawe i kumu nolaila. Ua ae hoi o G. W. Pilipo e malama hou i ke Kula Wae. Ua kohoia o Kahaluu no Honalo, ua kapaeia o Alapai.
            Hoopuka hou mai kekahi o lakou i na manao, he pono no e noonoo kakou, e nei hou aku i ka Papa Hoonaauao e hoomahuahua ae i ko kakou wahi uku no ka hapaha i elua dala ($2.00,) a i ka noonoo ana o lakou, he pono ke hoolahaia a paipai nui aku i na Lunakula ma na wahi a pau, e hoopii like i ka Papa Hoonaauao, a e uku likeia mai na Lunakula a pau, i elua dala pakahi no kela a me keia hapaha. Hooholoia. Nolaila, e na Lunakula a pau, e kuikahi like ae kakou a noi aku. He luhiluhi no hoi ka kakou wahi hana; aka, he uuku nae kahi uku. Ua akoakoa i keia la na Lunakula he 13, a me ke Kahukula. Ua aponoia na hana. Hookuuia keia halawai me ka pule i ke Akua.
LUNA HOOMALU.
Kona Akau, Hawaii, Augate 6, 1862.

He Inoa no ke Kuokoa, (Acrostic.)

            Eia he wahi mele ano hou, oia hoi ma ka olelo haole i kapaia he Acrostic, oia hoi, he mele i hakuia o ka hua mua o na lalani, ke hookuiia, loaa mai ka inoa o kekahi mea, a o kekahi kanaka paha. A ma keia mele o ka "NUPEPA KUOKOA." Ma ka olelo haole, he nui wale na mele i hakuia e like me keia i paiia.
N—ani wale keia mea o ka puka ana mai,
U—a laha ae kou inoa ma ka Mokupuni Hawaii,
P—apa akahi oe o na mea naauao,
E—aho owau kahi iloko oia aoao,
P—epa mahaloia e na mea a pau,
A—ia kou pono, ko'u inoa kekuhi e kau.
K—e "KUOKOA" ka inoa o keia pepa maikai,
U—a ae ia oe, mai ka uka a ke kai.
O—oe no ka elele mama nana e lawe,
K—eia mea laha ole, manawa lea wale,
O—oe maoli no ka oiaio, mea nanea,
A—u i pau ko'u haku ana i kou inoa nohea.
W. C. L.

Ka La 31 o Iulai,
MA WAIMEA. HAWAII.

            No kuu makemake e ike na hoa lawe nupepa o'u, mai Hawaii a Niihau ; nolaila, ua lawe mai au i kuu ikemaka, a e waiho aku imua o ka lehulehu, i mea na lakou e olelo ai iluna o Lihau, no na mea i hanaia iwaena o makou ma ka la 31 o Iulai i hala aku nei.
            E like me ke ano mau o na la 31 o Iulai i kaahope ae nei, a i mea hoi e maopopo ai ka lokomaikai o ke Akua, a me ka Moi Wahine o Beritania, ma keia la no i hoihoia mai ai ke ea o keia Aupuni. Ua kukalaia hoi e lilo keia la i la hoomanao no na makahiki e hiki hou mai ana, a oiai ua loaa mai ia kakou ma makahiki he 19 o ke Kuokoa ana, a me ka oni kapalili ana o ka Hae Hawaii.
            Ua puka mai ka la a ma ka hora 7, ua paniia na puka wai o Kulanihaakoi, ua ikeia ke kapalili ana o ka Hae Hawaii, ma kahi i hoomakaukauia no ka Ahaaina, o ke ano nui. no ko lakou luhi i ka pii i ka Pulu ma ka nahelehele, ua hoolakoia no na mea ai kupono i ka lehulehu, ua hookipaia kekahi poe haole, a ua ai no lakou i na mea ono o Hawaii nei, oia hoi, ka poi-palau, a me na kulolo, a me na i-a lawalu, a pela wale aku.
            Mahope o ka pau ana o ka Ahaaina, ua holo nui na mea a pau ma ke kahua heihei lio, kahi e ko ai ka iini a me ka makemake no ka heihei o na lio holo, i ko makou hiki ana ilaila ; aole ka he heihei, he hakaka, a oia iho la na lio holo, a malaila au e kamailio iki aku ai ia kakou.
            Ua lohe muaia keia mea i na la mamua ae nei, a oia no paha ke kumu o ka hele ana mai o kekahi poe, mai kahi loihi mai. ua hai mua mai i ka inoa o na mea hakaka, oia hoi o Kaloheaulani, keiki a Kaahunaliiole, o Kawaihae, a me Ilei, keiki a Palai, o Hamakua, ua loihi o Ilei, a pokole o Kaloheaulani, ua oi aku na makahiki o Ilei, a hapa mai ko Kaloheaulani mau makahiki.
            I ka hoomaka ana o ka hui ana o na mea hakaka, ua lilo mua ka huro ia Ilei, a mahope ia Kaloheaulani, a nolaila, ua nui ka hoomakaukau ana o na aoao a elua ia wa, aole nae i hakaka, ua hoihoiia maloko o kekahi pa, ua akoakoa mai ka lehulehu e ku poai ana mawaho o ka pa, i ka hoomaka ana o laua e hakaka, ua nui ke kaena o Ilei e eha kona hoa ia ia.
            Ua lele aku o Ilei e puliki ia Kaloheaulani, aole nae he wahi mea a paa iki, ua hele wale kela a pahee me he olali la, i kui aku ka hana, e palemo iho ana kela hala'ku la, e hoonou mai ana o Kaloheaulani i ka ala paa o Kauweleau, ku no kekee ana ka auwae, ka-u-a mea he liki, ka mau houia mai haule ilalo, a ha-ha! ka-u-a mea he haanui i ka ikaika. Ia wa, ua huro nui ka lehulehu i ka ikaika o Kaloheaulani, ua moe oni ole'ku la o Ilei i ke kai olalo.
            Ua kokoke hapaha hora paha ka waiho ana o Ilei, me ka oni ole, a ma ia hope, ua hapaiia i ka hale, ua ola no; aka, ua imi hou nae i auwae hou, me ka hoi luuluu i Hamakua, ka-u-a mea o ka liki, a oe lawe o Kukahaoa.
            Ua hoi nui na kanaka, a o ka pau no ia. Ke hooki nei au o kanaluaia mai no ka loihi.
            E mau ka ea o ko Hawaii Aupuni, a me ka welo ana o ka Hae Hawaii. Ke hoi nei ko ke anu keiki, ke kipu mai la ka ua i uka. Me ke aloha no.
Z. P. NOHOIKEANU.
Waimea, Hawaii, Augate 6,1862.

E ka Nupepa Kuokoa e : Aloha oe:
            Eia malalo iho nei he wahi Papa "Ana no ka Loa." E pai koke aku i keia papa, a e ike ai ka poe nona ka heluhelu ana i ke Kilohana Pookela o ka Lahui Hawaii. 1 Metere, ua like me na iniha 39 37-100 Enelani.
            1 Dekimetere,............ 1-10 o ka Metere.
            1 Kenitimetere............. 1 100 " "
            1 Milimetere,............ 1 - 1000 " "
            1 Dekametere,.......... 10 Metere.
            1 Hetelometele,......... 100 "
            1 Miriamatere...........10,000 "
            Me ka mahalo no.

Manao pane ia J. H. K. Kalei.

E Ka Nupepa Kuokoa e:Aloha oe:—
            Akahi no au a hui me oe, he oluolu kou manao, owau ke keu ma ka hoino ia oe; e kala mai oe ia'u iloko o kou opu ahonui. Ua ike iho au ma kou Helu 37, la 9 o Auga-te, i na manao noi a J.H.K. Kalei ia W. Piliole. Ua maikai no ia, eia ka hewa, o ka huipu ana iho o ua J.H.K. Kalei nei ia'u iloko oia noi ana e like me ne ia : " Minamina ka inoa Katolika ia olua e W. Piliole, a me P. M. Kahinalua." No kou lohe wale paha he Katolika au, nolaila oe i lea mai nei i ka huikau i Kaeleawaa.
            O J.H.K. Kalei hea oe? O Kalei Bipi kano kaa hooili ukana anei? O Kalei anei o lalo lilo o Keei ? O Kalei ilima mae wale anei i ka la? Ina ka paha ia oe ka inoa Katolika, ina ua holopono ea? Auhea oe, mai hoouluulu oe, o ku auanei na maka i ka hao a kakala.
            He lana loa ko'u manao e pane wiwo ole aku imua ou me ka haahaa, oiai ina he mea lealea ia i kou manao ana. Mai kuhi mai no hoi oe i keia wahi hapauea e hoonaue aku nei la he akamai, aole! Ua ike paha oe i o'u manao hoopaapaa ma ka Nupepa Hoku Pakipika, me kuu hoa hui o Beni no ia ano.
            Auhea ia? aole. Hokai no hoi ua hoa kaua kamalii, he hohe wale ka hope. A peia  no hoi paha anei oe? Ua aneane lawe au i ka pulupulu o ka'u ahi i ko maua wa o Beni; a he nani hoi keia nau i kii mai nei e hoonaueue, i loaa kou hoa nana e kamau i ka la luu loli o na'Lii ; a he hooilina oe no ke koena o ka'u ahi ke ae ia. E J. H. K. Kalei, mai pane hauhili i o a ianei, i mea e hoopiha wale ai i ka nupepa. A he lealea no ke keiki o Alewa ia oe ke pane mai no na la mahope, a me na olelo kohu iini kani owa i ka puuwai, e gude ana sa.
            Eia hoi ke noi mai nei oe ia W. Piliole, e hai aku i ka haina o na ninau a G. M. Koha. A haina'ku ka haina o na ninau, heaha iho ka waiwai ? Heaha ka huahelu pomaikai iloko o na ninau, a me na haina ninau ? I ko'u manao, ua hilihewa oe mawaho o ke kumu hoopaapaa, au i waiho mui nei i na ninau ia W. Piliole. I ke kukulu ana i ke kahua o ke kumu hoopaapaa, aole o na ninau ke kumu e ala-ke nei oukou e kau i luna o laila ; aka, o na olelo kahiko ke kumu o keia hele ana i ka laula ke kula o Ewa.
            E i mai paha oe auanei, no ka loaa ole ke kumu o keia hai ole aku, ke i aku nei au ia oe, aole loa e loaa ka pomaikai o ke kanaka iloko oia mea, he ninau hoopuka akamai naauao. Aka, he mau wahi ninau waiwai no; o Hooioakamai, o Likinaauao, o Kaenainoa, a me Hookiekie. I keia mau waiwai no paha la ku ke a-hua, hana ka haawe a helelei wale aku. E nana ae oe i ka poe nana i lawe mai ka naauao i Hawaii nei; aole loa au i ike hookahi o lakou e kaena ana, e hooio ana e like me keia, ole loa hookahi ma Hawaii nei a puni. Ke hooki koke nei au i ko'u kakau ana, o ke aloha kou a nui.
P. M. KAHINALUA.
Alewa, Honolulu, O'ahu, Augate 11, 1862.

He Olelo Pane aku ia
S. D. KEOLANUI A ME R. P. HEEIA.

E ka Nupepa Kuokoa e ; Aloha oe:
            Me ka lana ulumahiehie mai o kahi manao e pane wiwo ole aku imua o ka lehulehu, a me na mea nona na inoa e kau kehekeha ae la maluna. Ke hoopahupahu wale mai nei no o R.P. Heeia, i kana owili pauda ; a me he mea la, he olioli no ka loaa o na ninau a G. M. Koha ; eia ka he owili pauda ole manawa ino, no ka loaa ole. O Keolanui hoi, ke ko-o mai nei no i mau kookoo hou no G. M. Koha e nanahili ai ka hele ana, aole no hoi oe e noonoo iho, he manawa ko kakou, imi iho no hoi i kela mau ala nemonemo a G. M. Koha i waiho mai ai imua o kakou, a no kou lele kamoko wale no mawaho, aole no i loaa ka haina oiaio o kela mau ninau.
            Ke waiho hou aku nei no olua i mau ninau hou, me ka loaa ole o ka G. M. Koha mau ninau ia olua, a me kekahi mau ninau e ae no i waihoia mai imua o ka lehulehu. Hilahila ole no olua, no ka loaa ole o kela mau ala, ka mea nana e iliki mai, linalina na a-i o olua, loaa ko Kaunolu Boy, e aho no e kukulu ae i na a-i kala. He mea hewa anei no olua ke nali ana i kela mau kalo a pau? Eia ka haina pololei, "Aole ia he mea no olua e hewa ai." Aka hoi, o ka hoole honua maoli ae la no olua, me ka olelo iho, "Aole ia he mau ninau oiaio." Akaka no hoi ke ano kamalii ia olua, ka pau ole o kekahi mea, lilo hou no i kekahi mea e aku, me ka loaa ole o ka G.M. Koha mau ninau, pela hou aku ana no olua i mau ninau hou, me ka lana paha o ko olua manao, aole no e loaa ia G. M. Koha. He ukana nui io no keia. Me ka mahalo.
J.D. ILAHA.
Honolulu, Aug. 4, 1862.

AWA O HONOLULU.
No ka Moku ku mai.

            Augate 7—Maria mai Koloa mai, me 20 paila wahie, a me 14  ohua.
                9— Moku kalepa Am. Southern Cross. he 13 la mai Kapalakiko mai, ku no mawaho a holo hou aku ia la no 1 Kina, a hali aku me 26,960 paona pepeiao  laau, 2,500 paona loli.
            9— Neke, mai Hilo, Laupahoehoe a me Lahaina mai  me 46 kukaa pulu, 2 eke pepeiao laau, 3,000 poana  laiki, 3 ili bipi, 2 lio, 20 ope ku aki a me 30 ohua.
            9— Kilauea, mai Kona mai, me 10 bipi, 2 lio, 13 puaa, 180 hipa, 31 ili kao, 1 pahu home, 1 pahu waiubata,  11 pahu bipi, 60 bareka uala, 253 paona pepeiao laau, 2,300 alani, 3 eke ko, 6 pahu uwaina me na  waiwai eae no.
            11—Kamehameha IV, mai Nawiliwili mai. me 12½  paila wahie, a me 3 ohua.
                11—Hana, mai Hilo mai, me 12 kukaa pulu, 11 kukaa pepeiao laau. 2 puna, me 15 ohua. 11--Ema Ruka, mai Hanalei mai, me na waiwai he nui  wale me 14 ohua.
             12—Moikeiki, mai Kahului mai. me ka piha huita
                12—Jeannette, mai Maliko mai. me 175 pahu Ko
                14—Kekauluohi. mai Kau a me Kona mai, me 11 eke pulu. 1,197 ili kao, 2 pulu hone. 5 paila wahie 16 eke pepeiao laau. 25 eke kope, 800 niu, 19 ili bipi, 6,000 alani, 100 hala kahikime 31 ohua.
            Ke kauohaia'ku nei na Lunakula, a me na Kumukula. e hooili mai i ka inoa o ka poe Hanau, Mare. a me ka poe Make, i hoolahaia'i ma ka Nupepa Kuokoa. E kakau mawaho o ka palapala ia 11. M. Wini, Luna Pai o ke Kuokoa, aole ia e haawi ae i na Luna o ke Kuokoa.

HANAU.

                Aug. 8. ma Kapalama, Honolulu. hanau o Maunakiiohana K. na Mahuka me Kahoe.
            Aug. 7, ma Kaneohe. Koolaupoko, hanau o Haili (K.) na M. K. Ana me M. J. Noiku.
            Aug. 11. ma Kaluaaha, Molokai. hanau o Lynch (K.) na Bila me Luka.

MAKE.

                Iulai 27, ma Manoa, make o Kanakaawakea (K)
                Iulai 3, ma ia wahi no, make o Wahaani (W.)
                Aug. 9, ma ia wahi no, make o Kanakaiki (K.)
                Iulai 3. ma Kamoiliili, make o J.(K)
                Iulai 4, ma ia wahi no make o Moelua. (w.)
                Aug. 1. ma Kaumakapili, Honolulu, make o Kalapouli: Haimoeipo (K)
            Aug. 12. ma Kikihale, Honolulu, make o Pahupoko (K.)
            Aug. 10. rna Kalamaula, Molokai, make o Kalama. (K )
            Aug. 12, ma Pukoo, Molokai, make o Kalama Kekualike (K.)

HALE KEAKA!
No na kamalii keia.

                I KE AHIAHI O KEIA LA. (OIA KA POAONO.) e hana ana ka Haole Hana Mana, i kana mau hana kupanaha. Aia ma ka hora 3 e hoomaka'i i ka hana, e hamama no nae na puka o ka Hale i ka hora 2 me ka hapalua. Eia ka uku no ka palapala hookomo—maluna, he $0.50. mamua, $37½; mahope, $0.25, no kela mea keia mea i komo ae. E hele nui mai na makua me ko lakou mau keiki, e ikea ai i keia mea kupanaha. KEAKA MAIKAI! E HANA KEAKA HOU ANA KE KANAKA Hana Kupanaha, oia hoi ka Fakir o Siva, ma keia ahiahi, ma ka Hale Keaka, ma ke kihi o ke Alanui Hotele me Alanui Alakea. A e hanaia no ma keia po na mea KUPANAHA LOA. o kela ano keia ano. E hoouna ana oia i kekahi Kihei i ka hale ia ai ua kihei la. E hele mai ano! E hele lohi ole mai! O ike ole auanei oukou i na mea kupanaha e hanaia ana i keia po Poaono, la 16 o Augate. Mamua o ka hoomaka ana o ke Keaka, e hooleleia ana he baluna (opumakani.) nolaila, e na makamaka e ake ana e ike i keia mau mea kupanaha, e aho e naue kanalua ole mai.

NOTICE.
No ka Ahahui
O NA
Ekalesia maoli o Oahu.

                AUHEA OUKOU E NA KAHUNAPULE o na Ekalesia maoli ma Oahu nei? E hoomanao kakou i ko kakou halawai hapa makahiki, i ka malama o Sepatemaba. I ka hoopanee ana o keia Aha ma Kaumakapili, ua noi mai o Rev. B.W. Pareka, e halawai keia Aha. MA KANEOHE, i ka la 2 o Sepatemaba. Nolaila, mai poina kekahi Ekalesia i keia halawai. E hele makaukau na Kahunapule, me na Luna elima, no kela a me keia Ekalesia. E hoomakaia ka hana i ka Poalua. oia ka la 2 o Sepatemaba. i ka hora 10 o ke kakahiaka, iloko o ka Luakini, ma Kaneohe, Koolaupoko, me ka haiao.
I. KAMIKA. 38-tf Luna Hoomalu ma Kaumakapili.

MAKEMAKEIA!
LOLI PEPElAO LAAU!
A ME KA
LALA MANO.

                PENEI KA UKU ANA:— No ka Pepeiao Laau, 8 keneta. " " Lala Mano. 15 keneka. " " Loli Kohola. 12½ keneta. " " Loli Koko. (ke nui.) 4 keneta. " " Loli Kae. (ke nui.) 4 keneta. E hele mai ma ko maua hale kuai, ma ka aoao komohana o ka Hale Kuai o Daimana, ma Alanui Alii.
 UTAI & AHEE.
Honolulu. Aug. 1,1861. 38-tf

OLELO HOOLAHA.

                NO KA MEA UA NOIIA MAI KA MEA Hanohano G. M. Robertson), kekahi Lunakanawai o ka Aha Kiekie e Kapulemanaole e hookohu ia ia i Luna Hooponopono Waiwai no Kanekuapuu. o Honolulu. Oahu. I make aku nei: Nolaila, na hoike ia i na kanaka a pau loa, ke pili, o ka Poaono, ola ka la 23 o Augate. i ka hora 9 o kakahiaka oia ka la a me ka hora hora i oleloaa no ka hoolohe i ka oiaio o keia Palapala Kauoha, a me keia noi ana mai, a me na mea hoole i hoikeia, aia ma ka Hale Hookolokolo ma Honolulu,Oahu
JNO. E. BARNARD. Kakauolelo o ka Aha Kiekie.
Honolulu, Aug. 12. 1862. 38-2t

OLELO HOOLAHA.

                UA HOOPII MAI O H. KALILI w. KUE I kana kane o Kalanehale, no Maui, mamua e hooki i ko laua mare ana, no ka haalele wale ana no na makahiki ekolu o Kalanehale i kana wahine. E hanaia keia hoopii imua o ka Mea Hanohano, John Ii, kekahi Lunakanawai o ka Aha Kiekie, ma ka la 20 o Augate, i ka hora 9 o ke kakahiaka, aia ma ka Hale Hookolokolo, ma Honolulu, Oahu.
JNO. K. BARNARD. Kakauolelo o ka Aha Kiekie.
Honolulu, Aug. 12. 1862. 38-2t

OLELO HOOLAHA.

                UA HOOPII MAI O KAHALEIKEKA w. kue i kana kane o Pedro Ahchung, no Honolulu, Oahu, mamua e hooki i ko laua mare ana, no ka haalele wale ana no na makahiki ekolu o Pedro Ahchung i kana wahine. E hanaia keia hoopii imua o ka Mea Hanohano, John Ii, kekahi Lunakanawai o ka Aha Kiekie, ma ka la 20 o Augate, i ka hora 9 o ke kakahiaka, aia ma ka Hale Hookolokolo, ma Honolulu, Oahu.
JNO. E. BARNARD. Kakauolelo o ka Aha Kiekie.
Honolulu, Aug. 12. 1862. 38-2t

OLELO HOOLAHA.

                O NA KANAKA A PAU I AIE IA PALUPALU, a Puna. Hawaii, e hookaa mai ia'u mamua o ka la mua o Sepatemaba, a ina ua aie o Palupalu i kekahi mea e hookomo mai i ka bile aie mamua o kela la no.
D.H. HITCHCOCK. Luna Hooponopono Waiwai.
Hilo, Hawaii, Aug. 2, 1862. 38 1m

OLELO HOOLAHA.

                OWAU O J.N. KAAPA A ME K.WAIANAE na Luna Hooponopono Waiwai O.S. Laanui. i make aku nei, ma Kalihipali, Kau, Hawaii. Ke kahea aku neu maua i ka poe a pau i aie mai ia ia, e pono lakou e hoike mai mamua o ka la 31 o Augate, a o ka poe hoi a S. Laanui i aie aku ai, e pono ke hoike mai i ko lakou kuleana maloko oia manawa no. E loaa maua ma Waiohinu ia oukou.
J.N. KAAPA. K. WAIANAE. Na Luna Hooponopono Waiwai o S. Laanui.
Waiohinu, Kau, Hawaii. Iulai 29, 1862 37-1m

Olelo Hoolaha.

                NO KA MEA, UA NOI PONOIA MAI KA Mea Hanohano G.M. Robertson, kekahi Lunakanawai o ka Aha Kiekie, a A. Kalola a me J.W. Austin,ke kahu o Kahekili, ke keiki kane a Luluhiwalani a me A. Kalola. i ae ia laua, e kuai aku i ka aina Pauhala, Ewa, Mokupuni Oahu; Nolaila, eia ka mea hoakakaia, ma na mea a pau i pili e hoomaopopo o ka Poalua, oia ka la 19 o Augate o keia malama, i ka hora 9 o kakahiaka, oia ka la a me ka hora i oleloia, e hoolohe i ka manao nei a me ka manao kue ma ka hookolokolo ana, aia ma ka Hale Hookolokolo, ma Honolulu Oahu.
JNO. E. BARNARD Kakauolelo o ka Aha Kiekie
Honolulu, Aug. 5, 1862. 37-2t

NU HOU, NU HOU

                OWAU O A. CLEGHORN (AKE) UA KOMO no au iloko o kekahi HALE KUAI HOU. ka Hale Kuai. o Halewai mamua mauka ae o ka Halemahoe, a kokoke hoi i ka Baneko o Bihopa ma. Eia no ke waiho nui na mea a pau a ka naau e anoi ai, kupono loa no na kane, na wahine a me na keiki. O keia mau lole he lole. NU HOU WALE NO. A HE Makepono loa ke Kumukuai. E haele nui mai oukou e makaikai, no ka mea. aole he uku ke nana wale aku i na mea nani ma keia Hale Kuai. E hele mai e nana no oukou iho, i pau ko oukou kanalua aole no he Hale Kuai e ae ma Honolulu nei i hoolako ponoia i na Lole maikai loa a makepono loa hoi e like me ko'u A no laila, o na Kanaka a pau mai Hawaii a Niihau, aia a holo mai oukou i Honolulu nei, e naue mua mai a kuu HALE KUAI e nana a e kuai, aole e hele ma ko hai wahi ma mua, o ka hele mai imua o'u. EIA KEKAHI: Auhea oukou e na holokahiki. ke waiho la kuu Hale Kuai ma kahi kokoke loa i ka uapo. a ua hiki ia'u ke hoolako ia oukou i na mea a pau e pono ai no ka uku emi loa. 37-3m

HALE PAI KII
O
J.W. KINI.

                INA MAKAMAKA A ME KA POE NO A pau o keia mau Mokupuni ka'u e kahea nei, ina e makemake ana e paiia ko lakou kii, e hele mai no ma ko'u HALE PAI KII, ma ka aoao hikina o ka hale kuai o Daimana ma maluna ae o ka hale kuai Bipi o Wiliama Dufena. ma ka aoao makai o ke Alanui Alii e pili kokoke ana me ke Alanui Papu. Ua makaukau loa au e hooko koke aku i ka makemake o ka poe a pau ma ka Oihanai Pai Kii. a ke hilinai nei noeau ma ka'u mea i ikeia imua o ka lehulehu no ka Hana Pai Kii.
Honolulu, Aug. 7, 1862. 37-2m

OLELO HOOLAHA.

                E IKE AUANEI NA MEA HANAI HOLOHOLONA. Lio, Bipi, Hoki, Kekake, Kao a me ka Puaa. E noho ana ma Maunoni, Haleili, Haukalau, Alae, Pahoehoe a me Kaohe. Owau o ka mea nona ka mea malalo nei, ke hookapu aku nei au i kuu mau kuleana ekolu e waiho nei. Ma Maunoni hookahi kuleana; ma Makuu, elua kuleana. Aole kekahi o kela mau holoholona i haiia maluna, e komo a hoino i na mea kanu. O ka mea kue i keia rula, e uku no i ka hapalua, no ke poo hookahi e like me ke Kanawai.
M. MOEMOE. 37-4t

Olelo Hoolaha.

                UA HOOPII MAI O KAHILINAUE k. kue i kana wahine o Kamoi, no Molokai, mamua, e hooki i ko laua mare ana, no ka haalele wale ana no na Makahiki ekolu o Kamoi i kana kane. E hanaia keia hoopii imua o ka Mea Hanohano o John Ii, ka Lunakanawai o ka Aha Kiekie, ma ka la 13 o Augate. i ka hora 9 o kakahiaka, aia ma ka Hale Hookolokolo, ma Honolulu, Oahu.
JNO. E. BARNARD. Kakauolelo o ka Aha Kiekie.
Honolulu. Aug. 9. 1862. 37-2t

OLELO HOOLAHA.

UA HOOPII MAI O KUKOA w, KUE I kana kane o Kalualiona, no Wailua, Molokai, mamua, e hooki i ko laua mare ana, no ka haalele wale ana no na makahiki ekolu o Kalualiona i kana wahine. E hanaia keia hoopii imua o ka Mea Hanohano, John Ii, ka Lunakanawai o ka Aha Kiekie, ma ka la 13 o Augate. i ka hora 9 o ke kakahiaka, aia ma ka Hale Hooiokolokolo, ma Honolulu. Oahu.
JNO.E. BARNARD. Kakauolelo o ka Aha Kiekie.
Honolulu. Aug. 4. 1862 37-2t

OLELO HOOLAHA.

                E IKE AUANEI NA KANAKA A PAU, na mea waiwai maloko o ka waiwai o Mary Kalaihula, no Honolulu, Oahu, i make aku nei, o ka poe i aieia, o ka poe pili kino a pili paha ma kekahi ano e ae, na lakou e hele mai a e hoike mai ia lakou iho, imua o ka Mea Hanohano, G. M. Robertson, ka Lunakanawai o ka Aha Kiekie, ma ka Hale Hookolokolo i ke kulanakauhale o Honolulu, i ka Poaono, oia ka la 10 o Augate e hiki mai ana, i ka hora 9 o kakahiaka. Ia manawa, e hooponopono ia ka moowaiwai o Edwin J. Hall. ka Luna Hooponopono Waiwai o ka mea i make, a e hoike mai i kauwahi kumu, ina paha he kumu oiaio kana, i ole e hookoia ua moowaiwai la, a e hoopauia ka oihana a ua mea hooponopono waiwai la.
JNO. E. BARNARD. Kakauolelo o ka Aha Kiekie.
Honolulu. Aug. 4, 1862 37-3t

Olelo Hoolaha.

                KA POE JURE KANAKA MAOLI NO KA Aha Hookolokolo Kaapuni ma ka Apana ekolu ma Waimea  Hawaii, e hoomaka ana i ka Poaha, oia ka la 3 o Sepatemaba, M. H. 1862 J. G. Hoapili, Imakua, Mokuola, Luhiau,Nawali. Waiau, Issac Maui, Napuehu, Kaanaana, J. Kalua, Keawe, Kahalewai Halemana. S. Nalanipoo, D. Kahoohaiolu, Nuuanu, Kaaekuahiwi, J. Kahaawi, John Parker, Haae, T. Hoonaiwa. J. Kaaukai. Kalaimanuia, Makakio.
JNO. E. BARNARD. Kakauolelo o ka Aha Kiekie.
Honolulu. Iulai 30, 1862. 37-4t

Olelo Hoolaha.

                KA POE JURE KANAKA MAOLI NO KA AHA HOOKOLOKOLO Kaapuni ma ka Apana ekolu, ma Hilo. Hawaii, e hoomaka ana i ka Poalua, oia ka la 9 o Sepatemaba, 1862. Keaweluaole. Kaelemakule, Paakaaia, Lo, Mikaele, Haole, Kainea, Ili P. Barenapa. Paulo, Manohoa Kawaihae Hookena, Kumulae, Hanae S. Leinaholo. Halemauna. Nailima. Kuahopu, Mikaeleiki, Koea, Hairama, Kauluwale. Kahoaikaika. 
JNO. E. BARNARD. Kakauolelo o ka Aha Kiekie.
Honolulu.Aug. 1. 1862 37-3t

KA MOKUAHI
KA MOKUAHI
'KILAUEA,'
E HOLO ANA NO O " KILAUEA." MAI Honolulu aku,
NO KONA!
A me na wahi e waiho ana ma ia holo ana.

E LIKE PENEI
AUGATE.........................Poakahi, 11, 26
SEPATEMABA.................Poakahi 1, 8, 14, 22.
            E holo ana o Kilauea, no KONA, a me na wahi e waiho ana ma ia holo ana, i na Poakahi a pau o keia hapaha makahiki koe nae ka Poakahi la 15 o Augate. I loko oia pule e hoomoe iki! E haalele ana ia Kealakekua i na Poakolu, ia Kawaihae i na Poaha, e ku ana ma Honolulu i ke kakahiaka Poaono.
JANION, GREEN & CO. Luna H.S.N. CO
Honolulu. Iune, 1862. 30-tf

MOKU HOLO MAU
NO
Nawiliwili, Koloa a me Waimea, KAUAI.

                E HOLO MAU ANA KA MOKU kialua maikai mama "KALAMA," no na awa i haiia maluna, a me na awa e pili ana ma ka aoao kona o Kauai, ma keia kope aku. He hiki i na kanaka ke hilinai ia ia. F. MOKINA, Ka hope.
Honolulu, Aug. 7,1862 37-3m

OLELO HOOLAHA
I NA KANAKA HAWAII
Makai iho o AIGUPITA!
Ma hope iho o ka Pa O MAHUKA!
KA
Pa Kuai Papa
O
LUI, C. H. LEWERS

                MALAILA E LOAA AI NA PAPA O KELA ano keia ano, me ke kumukuai makepono loa, nolaila naue mai oukou e ike i ka oiaio o keia leo paipai ia OUKOU makamaka Hawaii. NA PAPA OLEGONA, LAAU HALE A ME NA POU, LAAU KAOLA A ME NA PINE PA, LAAU AAHO HALE PILI MAOLI, PAPA ULAULA, PAPA PAINA, PAPA KEPA A ME KA AAHO, PILI ULAULA A ME KE KEOKEO Eia ka mea KUPANAHA Ma keia hale—maanei i wiliia'i ka PALAOA a ma ka HANA PAI e like loa me ko ULAKOHEO mamua, i kona wa e kau ana, aole i pau i ke ahi mamua; nolaila, e naue mai e makai Na Pena Keokeo a me ka Omaomao, Na Pena Ulaula a me ka Eleele, Poho, Kolu, Hulu Pena, KUI o na ano a pau, LAKA o na ano a pau, Ami, Kilou, Kui kakai moena, Kui Nao, Pani Hale, Pani Aniani, Pake, Aniani kaawale, Pani Olepelepe. A PELA WALE AKU
Honolulu, Iulai 22, 1862. 36-3m

KA LAKO HALE Pahu Kupapau!

                AUHEA OUKOU, E KA POE E MAKEMAKE ANA E kuai ma ke ano makepono wale ! Eia no ke waiho la ma kuu Hale Paahana, ma Alanui Papu. NA PAPA KAUKAU! NA LAKO HALEI KA PAHU KUPAPAU! PAHU KOA.....$12. Ua loaa mai hoi na mea hoonani Pahu Kupapau he nui loa, a e kuaiia no ka uku makepono. A ua makaukau no hoi au e kuai aku i na mau mea hoolako hale, a ka poe e makemake ana e kuai me a'u no ke daia. Nolaila, ke makemake nei au e kuai aku i na lako hale o hai me ka uku ako i ke dala maoli, a na lako hoi i na mea hoolako hale no ke kuai aku ia hai, no ke kumukuai emi loa.
HANALE ALENA.
12-6m Alanui Papu.

OLELO HOOLAHA.

                OWAU O KA INOA MALALO IHO NEI. ke kahea ia aku nei oukou o na mea Lipi i nalowale, e kii mai ka mea nona keia mau bipi elua, eia ma Waiakea, Kalepolepo, Hilo, Hawaii, nei. Ua hopu ia no ka hehi ana i ka ai, a me ka ai ana i ke ko, &c. E kii mai me ka makaukau, oia hoi ke dala no ke poo hookahi, ($1 00 ) A pela aku ka lua. e wikiwiki mai, mai lohi a hala ka manawa. Ina e kii ole mai me ka uku i hai ia malama a hala na la he kanakolu, alaila, lilo loa keia mau bipi ia'u. Ke ano o ka bipi, bipi wahine poo molemole kikokiko keokeo ulaula, hao ana e, aole maopopo. me kana keiki, he alaula iki ma ka a-i, kookoo kona kino, aole i kuai ia. No kau malama ana i keia mau bipi, i ka lawe ana ma kahi o ka ai, a me ka hoolaa ana i ka wai. he hapaha (25 keneta) ko ka la hookahi, a pela aku. E lilo keia i kanawai mai ka la e laha ai.
J. W. K. KAPULE.
Kalepolepo, Waiakea, Hilo, Iulai 23, 1862. 37-2t