Ka Nupepa Kuokoa, Volume I, Number 39, 23 August 1862 — Page 4

Ka Nupepa Kuokoa.

 

Mai na Aina e mai

 

                Ma ka moku Amerika Southern Cross i ku mai nei mamua'ku nei, ua loheia mai na mea mahope iho nei e pili ana i na aoao e kaua nei.

                O ka moku kaua Kipi Akansas i puka mai ai mailoko mui o ka Misisipi, ua lohea mai kona pio ana. Malia paha he oiaio, no ka mea, i ka lohe mua ana mai nei, e alualuia'na ua moku la e na puali moku kaua o Com. Faragota.

                Ke loheia mai nei mai ka akau mai o Vereginia, ka hele wikiwiki imua o ka puali koa o Gen. Pope, ke hele loa'ku la ka i ka Hema, mawaenakonu'ku o ka mokuaina o Vereginia. E maheleia'na kona mau koa i ekolu puali, he 25,000 ka nui o na koa o ka puali hookahi; hookahi ma ke awaawa o Senadoa ; hookahi ma Warenatona, a o kekahi hoi ma ke kau wahi e kokoke ana i Faredarikabuga. Aole paha e loihi ana ka manawa e hala ana i keia mau puali ke hele aku i Rikemona. Ua akaka loa no nae ma ka nana ana i na mea e hoomakaukauia mai nei e na moho kaua e lilo ana keia hoouka ana i mea hookahe nui i ke koko me ka weliweli.

                Ua holo iho nei ke kuikahi iwaena o Amerika Huipuia mo Denemaka, e ae ana e hoihoiia na nika i pio mai ka Hema mai, a kekahi mokupuni i kapaia o Sr Croix, a ilaila lakou e noho lanakila'i.

                Ua holo aku ke Kuhina o Beritania e noho nei ma Wasinetona i Enelani, o ia hoi o Lord Lyons.

 

HE WAHI KAAO

NO

KEAKA. PEPA.

HELU 2.

 

                E KAMAILIO ANA UA WAHI BIPI nei ia Keaka Pepa, me he mea la i paia hou ia'e na maka ona, i nana'ku ka hana o Keaka Pepa, ike hou aku la no keia i keia mea nui e hoea mai ana mailoko mai o ka ululaau, i iho la keia iloko ona, Ka ! ua like no keia mea e hoea mai nei me kela mea mamua a'u i ike ai; a eia ka he pipi.

                Ia ia nei no e mau loa ana ka maka i ka nana ana i ua mea nui nei, alaila, hai iho la oia i kahi pipi me ka olelo iho, " Eia hou oe no keia mea nui ke hoea mai nei la, ua like no me kela mea mua a'u i ike ai, oia hoi kela pipi i make aku nei ia oe." i mai la kahi pipi, " He pipi no ia; o ka pipi ia nana ka mala halakahiki, ua ike mai ia i ko u-hai ana ae nei i ka hala ; nolaila, e kii mai ana e make kaua. Eia nae ka'u ia oe, ina i hakaka maua ea, a e nana pono loa oe i ka hoailona a'u i olelo aku ai ia oe, oia hoi ka uwahi, i nana ae no oe a i pii pololei iluna a i hina iuka, alaila, manao ae oe ua make au ; aka hoi, i nana ae hoi oe a i hina pono mai i ko alo, alaila, manao ae no oe ua make ia'u kuu hoa paio."

                He mea maikai loa ka olelo a kahi pipi i ko Keaka Pepa mau maka. Ke kau nei no nae o Keaka Pepa iluna o ua wahi pipi nei. Ia manawa, olelo mai la kahi pipi ia Keaka Pepa, " E lele ae oe ilalo," lele ae la no hoi o Keaka Pepa. Ia manawa, ua kokoke loa mai la ua pipi nui nei. O ka hele aku la no ia o ua wahi pipi nei a halawai aku la keia me ka pipi nui. o ka hoomaka iho la no ia o laua i ka hakaka. Nana pono aku la o Keaka Pepa i ka hakaka mai o kahi pipi ana me ka pipi nui, ia manawa, hu mai ia kona aloha i ua wahi pipi nei ana. I kona nana aku ua uuku loa ua wahi pipi nei ana, a nui loa hoi kela pipi, a oia ke kumu o kona alona ana. Hoomau loa aku la oia i ka nana ana i ka hakaka mai a ua mau pipi nei, ike aku la oia i ka pii ana ae o ka uwahi iluna a ku pololei, a hina mai la i ke alo o Keaka Pepa, manao ae la no keia ua ola kahi pipi a ia nei. Ku nana aku la no o Keaka Pepa e ake no ka manao o ka hoea mai, a liuliu loa hoea mai ana ua wahi pipi nei.

                Hoi mai la a puka i o Keaka Pepa la, olelo mai kahi pipi ia Keaka Pepa, " Mai hoi e kau ae maluna a hele aku kaua," ae aku la no o Keaka Pepa. A kau ae la o Keaka Pepa iluna o kahi pipi, o ka hele aku la no ia o laua nei. Hele aku la laua nei a loihi loa, o ke ku honua iho la no ia ua wahi pipi nei, haohao iho la ko Keaka Pepa manao no keia ku honua wale iho nei no o ua wahi pipi nei. Ninau iho la o Keaka Pepa i kahi pipi, " Heaha iho nei hoi keia ku honua wale ana iho nei ou, aole hoi he kuleana o ke ku ana ?" Pane mai la kahi pipi, " O ke kuleana o kuu ku ana iho nei, e makemake ana au e ao aku ia oe, a e hoolohe mai oe i ko'u leo; no ka mea, ua maopopo ia'u kou manao he hoolohe ole.,' Pane aku la o Keaka Pepa i kahi pipi, " Ke hoolohe aku nei no au i kou leo, a ma kau mea e pane mai ai malaila no au." Alaila, ao mai ia kahi pipi me ka i mai, "Ea! ke olelo aku nei au ia oe, i hale hou aku kaua maanei aku la, a i hoea hou aku kau a ia mala mea kanu hou aku, alaila, mai hana hou oe e like me keia mau hana ana au," ae aku la o Keaka Pepa.

                Hele aku la laua nei a kokoke, ike aku la o Keaka Pepa i ka paia mai o ka waina, o ka ono aku la no ia. Hele aku la no laua nei a komo aku la laua nei iloko o ua mala waina nei a o ka hoea aku no hoi ia mawaho o ua mala waina nei, o ka u-hai ae la no ia o ua o Keaka Pepa nei i ka huihui waina, kani iho la ke uhu a ua wahi pipi nei, me ka i ae o ua wahi pipi nei, " Ka ! kainoa no paha e hoolohe oe i ka'u, aole ka! o ke kolu keia o ka pipi, ka mea nana keia mala waina, o ka ikaika o keia pipi, ua hala ae no ia maluna o kela mau pipi i make aku nei ia'u."

                Ia pau ana ae o ka olelo a ua wahi pipi nei, ike hou aku la no o Keaka Pepa i keia pipi e hoea mai ana; hai iho la no keia i ua wahi pipi nei, o ka hana mau no hoi ia a kahi pipi, o ka olelo mau ia Keaka Pepa e like me mamua, a ua lilo no hoi ia mea i mea hoopaanaau na Keaka Pepa. A kokoke mai la ua wahi pipi nei nana ka mala waina, o ka huli aku la no ia o ua wahi pipi nei. A loaa aku la ka pipi nui, o ka hoomaka iho la no ia i ka hakaka, aole i liuliu, make no ua pipi nui nei i kahi pipi uuku. Hoi mai la no keia a hiki i o Keaka Pepa la, a kahea aku la Ma wahi pipi nei ia Keaka Pepa, " E Keaka Pepa—e ! eo aku la o Keaka Pepa, " Eo." " Hele mai a kau ae maluna o'u, a hele aku kaua." Hele aku la no hoi o Keaka Pepa, a kau aku la iluna o kahi pipi, a o ka hele aku la no ia o laua nei.

                Hele aku la no laua nei a hiki hou laua nei i keia mala kulina, o ka hana mau no ia a Keaka Pepa o ka u-hai, a o ka hana mau no hoi a kahi pipi, o ka pepehi mau i na pipi nana keia mau mea kanu. Pela mau no ko laua nei hele lanakila ana a hiki i ka umi o ka pipi. Aka hoi, mamua ae o ke kokoke ana aku e hoea laua nei i ke kihapai o ka pipi umi; olelo mai la kahi pipi ia Keaka Pepa, " I hele aku auanei kaua a i komo aku kaua i ke kihapai o ka pipi umi, mai noho auanei oe a u-hai iki, no ka mea, o keia pipi ka oi o ka ikaika mamua o na pipi a pau eiwa i make mai nei ia'u ; a o ko lakou ikaika a pau ke huiia, alaila, ua like me ka ikaika o keia pipi; no ka mea o ke'lii no keia o kela mau pipi i make aku nei. A o na ano a pau o kela hua ai keia hua ai, a me na ano pua a pau, ua lako nui loa ia mau mea ma ia kihapai. A o kona ikaika ua oi ae ia mamua o ko'u wahi ikaika."

                A pau ka olelo ana a ua wahi pipi nei, o ka hele aku la no ia o laua nei a kokoke i ua mala nei, he mea e loa ka olioli o ka manao o Keaka Pepa i ke ala onaona o na pua, a me na mea nani e ae a pau o ua kihapai nei. Ia laua nei no a komo iloko o ua kihapai nei, o ka u-hai ae la no ia o ua Keaka nei i na pua ala, a honi hoomau ae la i ke ala o ke kupukupu. A lalau ae la no hoi i na hua ono momona a u-hai ae la.

                Kani iho la no ke u-hu a ua wahi pipi nei. Ia laua nei no a hoea aku ma kela aoao o ke kihapai, hoea mai la ua pipi nei me kona ano weliweli loa, no ka nui launa olo o kona huhu. Alaila, olelo aku la ua wahi pipi nei ia Keaka Pepa, " E Keaka Pepa e !" eo aku la no hoi o Keaka Pepa, " E-o," " E hele ana maua e hakaka, a i ike ae no oe i ka hoailona mau a'u i hai ai ia oe, a malaila no oe e ike ae ai i kuu lanakila maluna o kuu hoa paio; aka hoi, i nana ae no hoi oe a i ku ka hoailona ma ko ia'la wahi, alaila, manao ae oe ua make au, a o ke ala aku no kena huli aku hele ana.

                Ua maikai no hoi ia i ko Keaka Pepa mau maka. Hele aku la ua wahi pipi nei a loaa aku la ka pipi nui, o ka hakaka iho la no ia o laua nei me ka ikaika loa, hakaka laua nei a hoomaha, hakaka hou no laua nei; pela no ko laua nei noke ana i ka hakaka a nawaliwali like laua nei, A no ka pau loa o ke aho o ua wahi pipi nei no kela noke ana mai i ka hakaka me kela poe pipi, nolaila ka nawaliwali loa o ua wahi pipi nei. Oia hoomaha no o laua nei a maha, alaila, hoomaka hou laua nei i ka hakaka, ia hakaka ana o laua nei a liuliu, make iho la ua wahi pipi nei a na o Keaka Pepa. Ike aku la o Keaka Pepa i ka hina ana o ka uwahi iuka, manao ae ia keia ua make kahi pipi a ia nei.

                Uwe iho la o Keaka Pepa, a pau ka uwe ana oia nei i kahi pipi ana, o ka hele aku la no ia oia nei ma kahi a kahi pipi i kuhikuhi aku ai e hele. Oia hele no ko ia nei a liuliu loa, hoea aku la keia i ka welau o keia pali nui, a nanao hoi i lalo lilo. Ma ka hoohalike

ana, ua like me Waipio, i Hawaii .

                I ua o Keaka Pepa e ku ana i luna o ka pali, ike aku la oia i keia kanaka elemakule i hele a loloa ka lauoho, o kona kapa iho la no ia o ka lauoho, ua hele a kuakea i ka hina me he hau la ke aiai. I iho la oa wahi Keaka Pepa nei, kupanaha maoli keia kanaka e noho wale nei no i keia wahi waoakua kanaka ole.

                O ka iho aku ia no ia o ua wahi Keaka Pepa nei a hiki i kahi o oa elemakule nei, a ia ia nei i hiki ai i kahi o ua elemakule nei, aole nae he ea ae o ua elemakule nei i luna. O ka hana a ua elemakule nei, o ka Pepa hailo. A no ka ea ole ae o ka maka o ua elemakule nei i luna, papai iho la o Keaka Pepa i ke poo o ua elemakule nei, huli ae la ua elemaule nei a nana ae i luna me ka pa. ne ae, " Aio Keaka Pepa!" pane aku la o Keaka, " Aio !" Ninau mai la ua elemakule nei ia Keaka Pepa, " E hele ana oe i hea? I aku la o Keaka Pepa, " E hele ana au i ka makaikai." I mai ia ua elemakule nei ia Keaka Pepa, " Aole la hoi ou makemake e lealea me a'u, noho iho hoi i lalo e lealea, ai kaua." Ae aku la o Keaka, " Ae."

                Noho iho la o Keaka i lalo, haawi aku la ua elemakule nei i ka pepa a laua ia Keaka Pepa, kakekake ae la oia a nahaha, haawi aku la i ka puu pepa i ua elemakule nei. O ka pepa iho la no ia o laua nei, a make iho la ua elemakule nei ia Keaka Pepa; pepa hou iho la no laua nei make hou no; alua make o ua elemakule nei. Alaila, i aku la o Keaka Pepa i ua elemakule nei, " E hele ana au." I mai la ua elemakule nei ia Keka Pepa, " Alia oe e hele, e pepa hou kaua a ina i make hou au ia oe, alaila, imi no hoi au ia oe iloko o na la elima ; a ina hoi i make oe ia'u, alaila, imi no hoi oe ia'u iloko oia mau la elima, a ina e loaa ole au ia oe iloko oia mau la, alaila, make no hoi oe ia'u ; aole ou mea e pakele ae ai i kuu lima ; pela no hoi au, ina no hoi i loaa ole oe ia'u, alaila, make no hoi au ia oe."

                A pau keia olelo a ka elemakule ia Keaka Pepa, ua maikai no hoi ia i ko Keaka Pepa mau maka. O ka hoomaka iho la no ia o laua nei i ka pepa ana, oia pepa o laua nei a make iho la o Keaka Pepa i ka elemakule, o ka nalowale iho la no ia o ua elemakule nei ia manawa koke no; ke alaalawa la keia ma o a maanei, aole oia nei ike iki aku i kahi o ka nalowale hikiwawe ana.

                Noho iho la keia a liuliu, hoomaka aku la keia i ka huli i ka elemakule. Hele huli keia ma o a maanei ia la a po, aole no hoi wahi mea a loaa iki. Moe iho la keia a ao ae hele hou keia e huli, oia huli oia nei a ahiahi keia la, aole no he loaa iki. Koe aku ekolu la i koe, a elua la i hala. Moe keia a no huli hou keia, ia ia nei e huli ana, ike aku keia i keia mau kanaka elua i kahi mamao loa, hele aku la keia a kahi o ua mau kanaka nei, o ka laua hana ia manawa e oki mauu ai ana na ka lio o ke kaikamahine a Deboro. Ike mai la ua mau kanaka nei ia ia nei, aloha mai la lauo, " Aloha oe!" Aloha aku la no hoi keia.

                I mai la ua mau kanaka nei ia Keaka Pepa me ka ninau mai, " Ka! me he mea la o oe ka hoa pepa o ka elemakule ?" Pane aku la o Keaka Pepa me ka ae aku, " Ae! owau no!!"

(Aole i pau.)

 

He Kanikau no Kauoha.

 

Aloha ka uhane kino wailua o kuu keiki,

E noho ana i ka lae kahakai,

E nana ana i ka lele a ka i-a,

He i-a kau pali ia no ka aina,

He aina auanei ka hoolawehala makani,

He keiki kupa kamaaina nolaila,

Me he makani la ka uhane o kuu kaikamahine,

Hoomanawanui aku kaua i ka ale,

I loa ka i-a i ke'hu a ke kai,

Kuu keiki mai ka i-a weli mai i ka po,

Me he kukui lamalama po la,

He i-a kuehu kapa ia no ka aina,

Aloha ino no kuu kaikamahine,

Kuu hoa hele o ka iliili o Haua,

Kuu keiki o ke pili o Kuniau,

Pii aku maua o ka la welawela o lala,

Ala ae la iluna ka uhane o kuu keiki,

E nana ana i ke ahe a ka makani,

Makani lumilumi i ke oho o ka laau,

Hoolaau mai ana ka'u hene a ka makani,

Mapu mai ana kona aloha i o'u nei,

Kuu kaikamahine mai ka waa pea hulilua oKona.

MRS. KAMAKA.

He uwe, he aloha nou no e Kauoha,

He aloha na maka i ka nalo ana,

Ei aku nei paha i ka uka lilo,

I ka uka anu o Hookohu,

I walea ka uhane i ke kui pua,

Pua ula o Waiohinu, lei o Kauoha,

Huli ae ka uhaue hoi makai,

A ike i ka nani o Peleula,

Komo aku ka uhane i ka malu Ulu,

I ka malu Ulu o Koolauloa,

Iho aku kaua o ka la welawela o Omao,

Aloha kuu keiki, kuu hoa hele o Mahana,

Hana ke aloha ia'u e hana nei,

Aloha ka pahoehoe o Huakeawe,

Aloha o Kipu i ka wela o ka la,

Malumalu i ke kihei, olu i ka makani,

Hoi ae i ka malu Niu o Kupee,

Auwe ! he aloha keia nou e Kauoha,

Nana ka uhane i ka hoio a ka waa pea,

He Opua makani hiki kakahiaka ia,

O ua aina hanau nei ou,

I ka malu haimuku o Kaleiaula,

Auau aku i ka wai luu poo o Oneula,

He uwe, he loha no Kauoha.

P. PAIA.

 

He kanikau no Iosepa Kaahu.

 

Iosepa Kaahu e, aloha oe,

Kuu lehua maka onaona i Haili,

Ilihia iho nei au,

He ukana na ke aloha,

E aloha ae ana i ka lai o Koolau,

Ke hoopiha ae la iluna o Malama,

Malama ana au o ko aloha,

O ko'u kulena ia i hiki ai.

Hiki ke aloha naue pu no me ka waimaka,

Kuu makamaka o ka waieleele a ka poe ike,

Kuu hoa o ka laau ka pilipili a ka Haole,

E hoole ana au, aole ino o ka lae o Kawai,

Ia wai la kaua e pono ai e ke aloha,

Ia makana .Maunaala i ka Lauae,

I mapu ala i na pali o Nualolo.

Lolokaa ke aloha i kuu kino e noho nei,

Poahi lua i ka luna o Mamalahoa,

He hoa no'u i ka makani anu he Waiopua,

O ka pua a ala ka oe o Ainahau,

I lele moani i na kiionohi o Heletera,

E tera ae ana au i ko aloha e kuu kane,

E o mau ae ana au i paa ka pukapihi o ke akamai.

Hao mai na huaina o ka noiau,

Au wale ana au o ko'u hoa,

O ka hoa alo anu o ka nahele,

 Kani ka-aka-iki a Kaukaopua,

A ke kini hooiohelohe ua o Hihimanu,

I maunauna kuu kino ia oe e ke aloha,

O oe no kuu kai ke kepa o ka Lio holo,

I aloha ka uluhinalo nahele hala o Pooku,

Oia nahele a ala paoa i ka Hinalo,

E hoonalonalo ana au i ko aloha, aole e nalo,

O ikeia mai e ka pule o ka lana Mauliola,

Ola i na kini poloua polopea o Haalelea,

Lea ke kaunu a ka ipoahi Papala ;

Ka hoowiliwili a-u i ke kai o Koholoiki,

Ua ikiiki wale au ia oe e ke aloha,

He nui ke aloha i na kini o Hauula.

LOISA. KUALII.

Hauula, Koolauloa, Augate 18, 1862.

 

He Kanikau Aloha no Kamae.

 

He u, he aloha nou e Kamae,

Kuu wahine mai ka uka anu o Lihue,

Mai ka makani anu la he Kiu,

Kuu wahine mai ka wai halau o Wailua,

A me ka lai o Hauola,

Kuu hoa pili o ka la wela o Kuhiau,

Haalele oe i ka pili a kaua la—e,

Ke noho nei au me ka u, me ka minamina,

Kuu wahine mai ka malu kukui o Paiea,

Mai ka piha kanaka o Aieuui,

Kuu hoa o ka la o Kahiau,

Me ka haka lewa o Nualolo,

A me ke ahi lele o ka Maile,

Mai ka wai Kuauhoe a ka lawaia,

Kuu hoa pili o ka makani anu he Noe,

A me ka wai o Kemamo,

Kuu wahine o ka uka anu o Puuomao,

Honi aku o ke ala o ka Awapuhi,

I moe a hoolohe i ka leo o ke Kahuli,

Kuu wahine i ka Pahapaha o Polihale,

A me ke one kani o Nohili,

KALEO.

Nawiliwili Kauai, Aug. 18. 1852.

 

OLELO HOOLAHA

 

                I NA KANAKA HAWAII!Makai iho o AIGUPITA!Ma hope iho o ka Pa O MAHUKA! KAPa Kuai Papa o LUI, C. H. LEWERS, MALAILA E LOAA AI NA PAPA O KELA ano keia ano, me Ke KumuKuai makepono loa, nolaila, e naue mai oukou e ike i ka oiaio o keia leo paipai ia oukou e na makamaka Hawaii. NA PAPA OLEGONA, LAAU HALE A ME NA POU, LAAU KAOLA A ME NA P1NE PA, LAAU AAHO HALE PILI MAOLI, PAPA ULAULA, PAPA PAINA, PAPA KEPA A ME KA AAHO, PILI ULAULA A ME KE KEOKEO. Eia ka mea KUPANAHA Ma keia hale—maanei i wiliia'i ka PALAOA a ma ka HANA PAHU, e like loa me ko ULAKOHEO mamua, i kona wa e kau ana, aole i pau i ke ahi mamua; nolaila, e naue mai e makaikai. Na Pena Keokeo a me ka Omaomao, Na Pena Ulaula a me ka Eleele, Poho, Kolu, Hulu Pena, KUI o na ano a pau, LAKA o na ano a pau, Ami, Kilou, Kui kakai moena, Kui Nao,Pani Hale,Pani Aniani, Pake,Aniani kaawale,Pani Olepelepe.A PELA WALE AKU.

Honolulu, Iulai 22, 1862 36-3m

 

Olelo Hoolaha.

 

                OWAU O KA LUNA HOOPONOPONO O Ka waiwai o R. Keeliikolani, ke hoomalu loa aku nei au i na holoholona, aole e hele maluna o ke Ahupuaa o Kamalo, ma ka Mokupuni o Molokai, ina e hele na holoholona maluna olaila, e hopu ia no ia e kuu luna, oia o Peelua, a e hoouku ia no e like me ke Kanawai.

M. KEKUANAOA.

Honolulu, Aug. 8, 1862 37-1m

 

J. H. COLE.

 

                LUNA KUDALA. Ma ka Hale Pohaku o Mi. Aniani ma. Ma ke Alanui Alii Wahine.         33-6m

 

H. W. SEVARANA.

 

                Luna Kudala a mea Kalepa. Hale Mahoe. Alanui Aliiwahine. 33-6m

 

Olelo Hoolaha
I ka Lahui Hawaii.
PAPA, LAAU HALE, PILI HALE!
A me na lako e ae a pau, no ke kukulu ana i na hale.

                UA MAKAUKAUKAU E KUAI AKU IA OUKOU i na lako Kukulu Hale, me na Pa, a me na mea e ae a oukou i manao ai. NA PAPA O KELA ANO, KEIA ANO. LAAU HALE, o kela ano, keia ano. PILI ALE, PINE, AAHO, KEPA, PANI PUKA PUKA ANIANI, OLEPELEPE, KUI, PENA, AILA PENA, WAI HOOMALOO PENA, Ia mea aku, ia mea aku, no ke kumu kuai makepono e emi ana malalo iho o ka kekahi poe. E hiki mai ana na moku papa o'u i kela manawa keia manawa, nolaila, e lako mau ana au. E hele mai ka poe kuai mai Hawaii a Niihau, e halawai me a'u, ke keiki kamaaina, mamua o ka hele ana aku ia hai, i maopopo ia lakou ka oluolu, a e loaa no au ma ko'u wahi, mauka iho o ka Hale Hookolokolo.

KAMUELA, (kaikaina o Kimo Pelekane.)
Honolulu, Mei 15, 1862. 25-3m.

 

MEA ONO KA RAIKI!

 

                E ka poe Kanu Raiki! KE MAKEMAKE NEI KA MEA NONA ka inoa malalo iho, e kuai nui i ka Raiki, a o ka poe mea Raiki hou paha, e ulu ana aole i oo, e hiki no ke ohi mua kekahi uku hapa, ke kuai e ia ka Raiki me a'u. Eia kekahi, na'u no e hoolawa i na eke i mea e pono ai ke halihali, a e hele koke nui mai ka mea Raiki oo, a me ka mea Raiki e ulu ana e kuai me a'u. Aia ma ka Hale Kuai o KEOKI OLELO E.
Ma ke kihi o ke Alanui Papu. 35-3m

 

WAHIE ! WAHIE!!

 

                WAHIE ! WAHIE !! KE MAKEMAKE NEI KA MEA NONA KA INOA malalo ma ka inoa o ka Hui Hoomaemae Kopaa o Hono, e loaa mai na manao o ka poe e makemake ana e hana i olelo aelike e hoolako mai ma ko lakou hale hana, ma Honolulu nei. i 15 paila wahie, i kela a me keia pule. A e ae no hoi lakou e hoolimalima me kekahi poe e makemake ana e hana i olelo aelike, no na paila wahie malalo iho o ka mea i haiia maluna, aka, e hahai mai nae oukou ma ko oukou mau palapala hoakaka i ke ano o ka wahie a oukou e hooili mai ai, me ka nui o na pule i ko oukou manao e hiki ai ia oukou ke hoolako mai i ka wahie. E hoouna mai i ka oukou mau palapala e ka poe e makemake ana e kuai i ka wahie mamua'e o ka la 15 o Augate ae nei.
I. BARTLETT. Puuku o ka Hui Hoomaemae Kopaa o Honolulu. 35 -4t

 

ILI BIPI, ILI KAO.

 

                E UKU AKU NO O F.S. Pratt & Co., ma ko laua Hale Kuai, ma ka Hale Mahoe. I ka uku makepono loa no ka mea i haiia maluna. O Mr. J. C. Spalding(Polena,) ka mea i kamaaina loihi ma ke kuai ana ma a mea, ka mea nana i hooponopono ma ia mea. 32-3m

 

HALE PAI KII.

 

                KA HALE PAI KII O Chase, MA KE Keena Pai o ke Kuokoa, maluna ae, e pili la ma ka aoao hikina o ka HALE LETA. E paiia na KII o na ano a pau ma ke Aniani, Ili, Pepa, a me ka mea Laholio, &c., a e paiia no hoi ia kii iloko o na komolima a me na pane umauma, a me na mea hoomanao e ae. 32-3m H.
L. CHASE.

 

Paddy!

 

                O KA POE MAKEMAKE E KUAI MAI IA MAUA I KE Padi (oia ka hua Raiki me ka ili,) e haawi no maua i 3 keneta no ka pauna Padi oo-maikai, mai keia la aku.
G.P. JUDD a me S. SAVIDGE

Honolulu, Mei 15, 1862. 25-3m

 

OLELO HOOLAHA.

 

                O KA MEA NONA KA INOA MALALO nei, ke papa aku nei oia i na kanaka, haole, a me ka pake, o kela ano kanaka keia ano kanaka a pau, e nana mai ana. Ke papa aku nei au i na mea a pau, mai hookuu wale oukou i ko oukou mau holoholona, ma ka Apana kula o Ukumehame, mai ka pali o Manowainui, e pili ana me Waikapu, ua kapu ia Apana kula. Ina i loaa kekahi holoholona e hele ana ma ia Apana kula i oleloia maluna, e uku mai ka mea holoholona $1.00 (hookahi dala,) me ke kao, a me ka hipa, ewalu poo $1.00 (hookahi dala.) Ina aole e loaa mai ka uku e like me na mea i oleloia maluna, alaila, e hookomo ana kuu kanaka ma ka Pa Aupuni, no ke kolohe i ka mauu o ua Apana kula la me ke kuleana ole.
P. NAHAOLELUA. Hope Luna Aina o ka Moi.
Lahaina, Maui, Maraki 31, 1862. 19-tf

 

KAKELA ME KUKE.

 

                MA KA HALE POHAKU HOU, MA POLELEWA kahi kokoke i ka Halepule Betela ma Honolulu, Oahu. Na laua no e kuai i na lole o Kela ano keia ano. NA MEA AI, NA BAKEKE, NA IPU TINI, NA PA LEPO, NA KAMAA, NA PAHI me na O-O, NA PAPA me na NOHO, NA IPUHAO, NA NOHO LIO, NA MEA E KAKAU, NA PENA ME NA AILA, NA MEA MAHIAI. A me kela mea keia mea. Me na laau a Dr. D. Jayne. Honolulu, Dekemaba, 1861.

 

OLELO HOOLAHA.

 

                KE KAUOHA AKU NEI AU I NA MEA a pau, nana i AIE mai ia'u, e hookaa aku i ko'u hope, oia no O C.S. Bartow(Bako.)
E. F. BONA.
Lahaina, Mei 10, 1862. 26-3m

 

J. P. HUGHES.

 

                MEA HANA NOHO LIO! AIA MA KA HALE KUAI O KA mea nona ka inoa maluna nei, he Noholio Pelekane a he Noholio Meleka, a me na Noholio Wahine, o na ano a pau: NA HAO WAHA a me NA KEPA o na ano a pau. NA KAULAWAHA, a me na mea e pono ai ka lio. NA ILI KAUO o na ano a pau. NA EKE ILI. NA HUIPA. NA HAO KEEHI. NA PALAKI LIO. NA KAHI LIO. A me na mea e ae a pau loa e pili ana i na lio a me na kaaholo, a e kuai ana no ia mau mea, No ke kumukuai makepono loa! Aia no ke waiho mau nei malaila na pela mauu. O na pela pulu, na peia hulu, na pela mauu, a me pela lelele. E hanaia no e like me ka mea i kauohaia mai. Ua hanaia no na kaa lealea me ka maikai loa, a me ka makepono hoi. Ua hana hou ia na mea a pau e pili ana i ka'u oihana me ka maikai. E malama pono ia no na mea a pau i kauohaia mai e pili ana i ka'u oihana. E loaa no wau ia oukou ma Monikahaae, ma ke kihi o ke Alanui Hokele a me ke Alanui Papu.
J. P. HUGHES.
Honolulu, Aperila 1, 1862. 19-1y

 

E Makaala! E Makaala!!

 

                MA KAHI O C. Brewer & Co., E LOAAI I NA kanaka Hawaii ka Waapa okohola maikai, Pena hale o na ano a pau, Aila pena, Wai hoomaloo pena, A me na mea e pili ana i ka hoomaikai hale.

C. BREWER & CO., (Burua ma.)
Hale Makeke, Alanui Kaahumanu, Honolulu, Feb. 13, 1862. 37-3m

 

BIPI
MOMONA MAKEPONO.

                MA KA HALE KUAI BIPI KULANAKAUHALE o H. Conawela, malaila kahi e loaa ai ka Bipi momona, Puaa momona, a me ka Hipa momona, a me na mea e ae he nui wale oia ano, no ka uku emi loa. E hele mai na kanaka a pau, i ike maka i ka MAKEPONO, A i pau hoi ke kuhihewa. Aia ma ke Alanui Alii, ma ka aoao ma Waikiki o ka Hale Kupa Pahu, ma Polelewa.
H. CONAWELA.
Honolulu, Mar. 13, 1862. 29-3m

 

MANUAHI, MANUAHI.

 

                E IKE OUKOU E NA KANAKA a pau. eia ma ko'u Hale Kuai Bipi, ma Ulakoheo. Na io bipi momona loa o na bipi kupaluia a pau o na kuaaina mai, i laweia mai ma ko'u HALE KUAI BIPI, a he manuahi loa ke kuai ana. Maanei wale no ke keu o na Io Bipi Momona, Waliwali, a Palupalu hoi, O na io ma ka ai ana iho, aole hoohalahala iki ka puu i ka oo oia mau mea. E hiki ia'u ke kuai aku ma ka paona, a me ke o KUAI MANUAHI, me ka paona ole. Pono oukou ke hele nui mai e kuai me a'u i ike io oukou i ka oiaio o na olelo maluna. Ua loihi loa ko'u noho ana ma keia oihana, no kuu aloha loa i na keiki a me ka lehulehu a pau o ke Kaona, a me keia Mokupuni okoa, a no ka pono o ka poe ma ka moana a me ko na aina e, a ua kamaaina loa au ia oukou. E hele nui mai oukou oiai au e noho ana i Kuene na oukou. E wiki mai oukou.
J. W. KAIKAINAHAOLE.
Honolulu, Aperila 25, 1862. 22-tf

 

HALE HANA PIULA.

 

                F. H. & G. SEGELKEN. MA KE ALANUI NUUANU, MAKAI IHO o ka Loiala Hotele. Mau mea hana, a kuai Piula, Hao, Keleawe, a me na mea e ae e pili ana i ka Oihana Piula. A e hoomoe hoi i ka Piula Wai, me ka hooponopono kupono i na mea a pau e pili ana ia oihana. Ua lako mau i ka Piula Wai maikai. E hele mai e ike no oukou iho. 33-6m

 

PAPA MAKEPONO!

 

                AIA KA HALE KUAI O LUI (C. H. LEWERS.) ALANUI PAPU, kahi e kuai oluolu ai. NA PAPA OREGONA 1 a hiki 3 iniha, LAAU KAOLA, oa a me na pou, a me na opaka e ae, LAAU PA a me na PINE PA. LAAU AHO HALEPILI. PAPA ULAULA, PAPA PAINA, PAPA KEPA, PILI ULAULA a me KEOKEO. PENA KEOKEO, OMAOMAO, ELEELE, ULAULA. POHO, GALU, HULU PENA. KUI o na ano a pau, LAKA. AMI, KILOU, KUI KAKIAMOENA, KUINAO. PEPA HOONANI KEENA. PANI HALE, PANI ANIANI. ANIANI KAAWALE, PATE. PANI OLEPELEPE. Eia ka mea kupanaha ma keia wahi, na ka mahu e hana i na pahu apo, he hikiwawe, kupanaha. E hele nui mai e kuai a e ike wale i keia KAMELO. Ua hoeomi ia na Laau Oregona i keia wa, i ELUA KENETA ME KA HAPALUA no ka kapuai. 33-6m

 

Olelo Hoolaha.

 

            OWAU o O M. Kekuanaoa A ME Ioane Ii, na kahu malama waiwai o Victoria Kamamalu, ke kauoha aku nei maua i na kanaka a pau e makemake ana e hoolimalima i na aina o Victoria Kamamalu, Ia PAALAA a me KAWAILOA, ma Waialua, Oahu. A e hele oukou ia W.C. Lane, ko maua Luna malama aina, me ia oukou e kamailio pu ai, no ka uku hoolimalima, a me ka nui o na makahiki a me ka nui o na eka a ke kanaka e makemake ai e hoolimalima, a o ka mea i pono i ko maua Luna o ka maua ia e ae ai, o ka hewa o kana hana ana maluna no ia ona, aole ia me maua.  
M. KEKUANAOA.  IOANE II.  Na kahu malama waiwai o V. Kamamalu.
Honolulu. Iune 25, 1862. 32-2m

 

Wi makemakeia.

 

                HE 10.000 PAONA WI I MAKEMAKE ia i keia manawa no, a e ukuia aku no na keneta ekolu no ka paona WI hookahi, me ka iwi no owaho. A he elima keneta no ka paona hookahi ke pau ka iwi i ka maihiia. E lawe mai ia
F.HORN
Honolulu, Iune 6, l862 28-3m

 

HOONANI HALE.
Makepono.

                O KA POE A PAU E MAKEMAKE ana e loaa na mea maikai e hoonani i ko lakou mau hale, e aho e naue mai i ka Hale Kamana o ka mea nona ka inoa malalo, ma ke Alanui Hotele, a malaila e loaa'i ia lakou na PAPA KAUKAU NUI A LIILII HOI, NOHO O NA ANO A PAU. MOE O NA ANO A PAU. PAHU KUPAPAU. E ku mai ana mai Bosetona mai. ma ka moku George Wasinetona. ma ka malama ae nei o Ianuari, he mau mea HOONANI HALE o na ano a pau, a e kuai Emi aku no au  E hele mai e nana a Kuai iho.  
C. E. WILLIAMA. (UILAMA.)
Honolulu, Iulai 2 1862. 32-6m

 

KAMANO ! KAMANO !!

 

                1050 PAHU KAMANO MAIKAI LOA i kua mai nei. A e kuaiia aku e like me ka makemake o ka poe kuai mai. Ma kahi o 33-3m
H. HACKFELD & Co, (Kalema.)