Ka Nupepa Kuokoa, Volume I, Number 44, 27 September 1862 — Page 1

KA

NUPEPA KUOKOA:

Ke Kilohana Pookela no ka Lahui Hawaii.

BUKE I.  HONOLULU, SEPATEMABA 27, 1862.  HELU 44.

 

He kanikau

NO KA HAKU O HAWAII.

LEO MELE—"The Mocking Bird."

He kanikau keia, keia, keia,

He kanikau keia,

Nou no e Kalani opio,

I hele aku nei, aku nei, aku nei,

I hele aku nei,

I ke ao nani ike ole ia,

Haalele hoi oe, haalele hoi oe,

Haalele hoi oe i ka pili,

Haalele hoi oe, haalele hoi oe,

I ka pili me ka Makua.

 

Pili aku la oe, la oe, la oe,

Pili aku la oe,

Me ka Makua mau loa,

Ke noho la paha oe, paha oe, paha oe,

Ke noho la paha oe,

Ma kona lima Akau,

Ike aku la oe, ike aku la oe,

Ike aku la oe i ka nani,

Ike aku la oe, ike aku la oe,

I ka nani o ke ao hiwahiwa.

 

Ke noho nei makou, makou, makou,

Ke noho nei makou,

Me ka u a me ka minamina,

Ke imi nei Iolani, Iolani, Iolani,

Ke imi nei Iolani,

Auhea la kuu lei,

Ua lilo hoi oe, ua lilo hoi oe,

Ua lilo hoi oe i ka poli,

Ua lilo hoi oe, ua lilo hoi oe,

I ka poli o na kupuna.

 

Ke u nei Emalani, Emalani, Emalani,

Ke u nei Emalani,

I ka lilo ana o ka pua,

I ka hele ana o ka Haku, o ka Haku, o ka Haku,

I ka hele ana o ka Haku,

O ka Haku o Hawaii nei,

Pauaho mai oe, pauaho mai oe,

Pauaho mai oe, pauaho mai oe,

Pauaho mai oe i ka pili,

I ka pili a kaua.

 

Uwe mai e Kalohelani, e Kalohelani, e Kalohelani,

Uwe mai e Kalohelani,

Auhea iho nei kuu Kama,

Kuu Kama i manao ai, manao ai, manao ai,

Kuu Kama i manao ai,

E paa ai o ke Kalaunu,

Aia ka oe, aia ka oe,

Aia ka oe i ka malu,

Aia ka oe, aia ka oe,

I ka malu o ka lau wi.

 

Ke noho nei o Kapuaiwa, Kapuaiwa, Kapuaiwa,

Ke noho nei Kapuaiwa,

Me ka luuluu me ke kaumaha,

I ka nalo ana aku nei, aku nei, aku nei,

I ka nalo ana aku nei,

Ka mea aloha la he Kamalei,

Au mai ke aloha, au mai ke aloha,

Au mai ke aloha i ka hele,

Au mai ke aloha, au mai ke aloha,

I ka hele ana o Kalani.  L. K. L.

 

HE MOOLELO

—NO—

NA KOA POWA O KA HEMA.

                Ua pai iho makou i keia la i ke kii o na koa powa o ka Hema, i ike ai ka poe heluhelu i keia pepa, i ke ano oia poe Kamaeu, nana e hana hoohaunaele mai nei na mokuaina komohana o Amerika Huipuia.

                Mahope mai o ka hoomaka ana o keia kaua huliamahi ma Amerika, ua ala nui mai na kanalua ano kolohe o ka moku Hema a me na moku komohana, a ua hoohui ia lakou iho, e kai hele ana io a ianei, e aihue ana, a e hao wale ana i ka waiwai o ka poe waiwai; ko ka Akau poe, a me ka Hema pu no hoi kekahi.

                He mau la mamua aku nei la, oiai e lana ana kekahi wahi moku kialua o ke Aupuni mawaho iho o Biloxi, he wahi ia e kokoke ana ma Nu Olina, ma Sipa Ailana; hoouna aku la ke Kapena o ua moku la i kona Malamamoku ma kekahi waapa me ka hae kamailio, a kauoha aku no hoi ua Kapena nei i ua Malamamoku nei e hele a e kamailio pu me na kanaka o ua wahi nei. Holo aku

 

Ka Poe Powa o ka Hema.

 

la lakou a pae iuka, aia hoi lele nui mai la ua poe koa powa nei maluna o ua poe haole nei o ka moku ; aka, ua eleu no lakou i ke kipu ana aku i ua poe kipi powa la, a pakele mahunehune mai la lakou ; ua kahaha nui lakou no keia manao ole ana o ua poe koa kipi la i ka hae hoailona no ke kamailio, me ko lakou ike ole no nae he powa ka poe nana lakou i hana ino mai. A ma ke kakahiaka ae o kekahi la, ua lele aku na koa o ka moku iuka, a ua ahai aku i ka make iloko o na hale o ua poe la. I ka hiki ana aku o na koa aupuni ma ua wahi kulanakauhale la, ua loaa ia lakou kekahi poe i hoopioia e ua poe powa la, he mau wahine kekahi me na keiki, a ua lawe aku na powa i na wahi lole maemae o ua poe nei i pio ai ia lakou, na kane me na wahine, a o ko lakou mau wahi welu kai haawiia mai i ua poe pio la. Ua pio kekahi o ua poe la i na koa aupuni, a ua pau mai no hoi na poe i hoopioia e ua poe powa la i ka hookuuia ; ekolu wahine i ahaiia mai ke alo mai o ko lakou mau kane, a no ke kii ana mai o na kane, ua pepehi menemene oleia lakou.

                Aole he manao o ia poe i ke ano o ko ke kanaka aupuni i noho ai, i na no no ka Hema, ua like no ka hana inoia; no ka mea, o na kanaka a pau e komo ana iloko o ia hana, he poe wale no maluna ponoi ae o ka ili honua ; hele aku no ia poe a aihue i mau lio no lakou, a o ka hele aku la no ia ma na alanui mehameha, e hao wale mai ai i ka waiwai a ka poe nawaliwali, a me ka poe no hoi e hiki ana ia lakou ke hoopio aku.

                O ka mokuaina o Kenetuke ua piha loa i na poka, ua hele mai na keiki ponoi a kekahi poe kanaka, a ua lawe malu aku i na lio, a hui aku no hoi me na poe powa, mai ka umi ka nui o ka pua hookahi a hiki i ka 200, i hoohui ia la lakou iho ma keia hana uko ole. A he nui wale no hoi o ia poe i hele aku, a hai hoopunipuni aku i na haole waiwai o ka Hema, e makemake ana lakou e hele e kokua mamuli o ia aoao, a i ka wa e haawiia mai o ka lio no ia mea, o ka hele aku la no ia o ua poe la i ka powa, a me ka hana'ku no hoi i na hana hoomainoino a hakihaki naau, i ka poe e loaa ana ia lakou.

                He kanaka no kekahi kulanakauhale o Vereginia, i noho no me ke ulakolako, i na mea a pau e waiolu ai keia noho ana, oiai oia e hele ana e makaikai i kekahi apana o kona aina ; aia hoi, ua loohiaia oia i kekahi o ua poe powa nei, a ua kauo hele ia ma ka lio, a aole i liuliu, hina iho la ua kanaka nei ilalo a make iho la; mamua aku nae o ka lele loa ana'e o kona ea, ua kau kekahi kanaka powa iluna ona me ke kepa, a ua houhou i kona aoao; a no ka pau maoli paha o kona aho, nolaila, ua haalele iho ka uhane i kona kino, a ua lele aku i ka poli o ka makua kahi a na eha e hiki ole ai. He menemene ole maoli no ka hana a ia poe. Eia kekahi mau hana kupanaha a ua poe powa nei, oia no ke kaahele ana ma na muliwai a pau e puhi ai i na alahaka a me na alanui hao kaamahu; me ka hana no hoi i na hana haumia nui i na poe o ka aoao palupalu i poino a haulehia iloko o ko lakou mau lima. A ua nui no hoi na kulanakauhale i puhiia i ke ahi e ia poe, a no ia mau hana ino no hoi a lakou, ua aneane e pono ke manaoia, e make ana no lakou ma na lima, o ka poe ponoi iho no o ko lakou aina hanau. He nui launa ole ka makauia o ia poe, ua hele lakou ma na wahi a pau, me ka huna iho i ko lakou ano maoli ; a ma ia mea, ua maopopo ia lakou kahi i noho ai o ka poe waiwai; nolaila, wikiwiki aku no na kiu o ua poe la, a hoike aku no i ko lakou mau hui; alaila, o ke kii mai la no ia e powa malu i ka poe waiwai; a pela iho la ka noho ana o ka hapanui o na mokuaina o ka Hema. Aole hoi pela ka Akau ! he maluhia kolaila noho ana ; ke mau la no ke Kalepa ana, a me ka noho maluhia ana o ia wahi, a aole no hoi he ano kaua o ka nana aku i ke ano o ka noho ana a na mokuaina o ka Akau. Oiai e hoi mai ana na kaamahu mai Fair Oak, kahi i hoomoana'i o na puali a Makalelana, aia hoi ua loohia ia i na koa powa, a ua kiiia mai. Ua manao no ka ka Lunamahu o na koa no o ka Akau, ke ku mai ana imua o kahi a lakou e holo aku ana; nolaila, ua hoouuku oia i ka holo o ke kaamahu o lakou. I ke kokoke ana aku no nae, o ke kau pono mai la no ia o ua poe koa nei i ka pu i ka umauma o ke alii puhi ahi o ua kaamahu nei; aka, ua hala nae ka poka. O ke kuupau ae la no ia o ua haole la i ka mahu, a holo aku la, a me ka mama nui ko lakou pakele ana mai pio i na koa powa. Ia pakele ana mai no o ua poe nei, o ke puhiia mai la uo ia o na alahaka mahope mai o lakou me ke oki hoi i na uwea telegarapa. He keu ka ia poe powa a ka poe hana ino nui wale, i keia mea he kanaka, a me ka waiwai. Aole no hoi e nele ka ili mai o ka hopena ino i na poe e hana ino ana pela.

                He pai nui no ka poe o ka Hema i ka poe powa, no ko lakou lawe ole ka i na pio. Ina e pio kekahi poe o ka Akau ia lakou, alaila, ua alakaiia'ku lakou iloko o ka ululaau, a malaila mai e loheia mai ai ke pohapoha o ka pu, a o ka haiia mai la no ia ua hookuuia ua poe la o ka Akau i pio ai; eia ka ua pau i ke kiia i ka pu.

 

HE WAHI KAAO

—NO—

KEAKA PEPA.

HELU 7.

                I KOU WA AUANEI E KII AKU AI ia Debolo, e hooponiuia auanei ia ou mau maka la, alaila, hele mai kela i o makou nei, e hana ai e like me ia a'u i hai mua aku nei ia oe. A o hele! " Ae aku la no hoi o Keaka Pepa. O ka hele aku la no ia oia nei a hiki i o Debolo la, hahau iho la keia i ka pauku laau, puoho mai la ua Debolo nei, Pane aku la o Keaka Pepa ; " E hele hoi paha kaua i kahi o au mau kaikamahine,'' ae mai la o Debolo, a e kuhi ana no hoi ua Debolo nei, aole i launa o Keaka Pepa i kekahi kaikamahine ana.

                Me he mea la i paia ae na maka o ua o Keaka Pepa, i nana aku ka hana aole o ua o Debolo, manao iho la no keia, ua hele i kahi o na kaikamahine.

                "A o ka makemake nui o Debolo, aia a koho oe i o'u mau kaikuaana, alaila, olu kela he wai ko lalo. A o hele i kahi o ko hoa lealea." A lohe o Keaka Pepa i keia mau olelo a ka wahine, ku ae la no hoi o Keaka Pepa a o ka hele aku la no ia i kahi o Debolo e like me kana i kauoha mai ai ia Keaka Pepa. A hiki keia i kahi o Debolo, hoala aku la keia, a ala ae la ua Debolo nei. I aku la o Keaka Pepa, " E hele hoi paha kaua i kahi o au mau kaikamahine, e like me kau olelo." Ae mai lo o Debolo, o ka hele aku la no ia o laua nei, a hiki i kahi e noho ana na kaikamahine.

                Komo aku la o Debolo mamua, a o Keaka Pepa aku la no hoi; i nana aku ka hana o Keaka Pepa ma kekahi aoao o ka hale, aole oia nei ike pono loa aku, no ke olinolino, a no ko ia nei makemake loa e ike i na kaikuaana o ua wahine nei aia nei, alaila, kau pono loa aku la keia i ka nana ana aia hoi; ike pono loa aku la keia i na kaikuaana, o ua wahine nei aia nei, no ka mea, akahi no a ike pono loa o Keaka Pepa i na kaikuaana, a pela no hoi laua ia Keaka Pepa, a he mea kamahao no hoi ia i ko laua ike ana i keia mea he kanaka.

                A e kuhi ana no hoi paha o Debolo a me kekahi mau kaikamahine, aole i launa o Keaka Pepa me Mele. Ia ike ana o Keaka Pepa i ua mau kaikamahine nei, aole io no hoi o ka nani a lohe mai i ke ao, a ike aku la no hoi keia i kahi wahine aia nei, ua hele io no hoi ka pili aia nei i ike ai mamua. Ua hele io mai la no hoi a hauamakaiole.

                Noho like mai la no hoi lakou la, a noho aku la no hoi laua nei. I mai la o Debolo ia Keaka Pepa, " E Keaka Pepa! Eia hoi paha a'u mau kaikamahine maikai la ; ekolu lakou, a elua a'u mau kaikamahine maikai loa. A o ke kolu, he pupuka, he luahine, a he kupono ole ia oe, e aho no ma na wahine maikai e lawe ai, i wahine nau. "

                A lohe o Keaka Pepa i keia mau olelo a Debolo, ku ae la ia iluna, a hele aku la a ma ke alo o na kaikamahine maikai, hopu iho la ia i ka mua loa, me ka olelo pu iho penei: " He oi oe o ka wahine maikai, maikai kou helehelena, maikai kou mau maka, maikai kou lauoho, maikai kou mau pua hoonani, maikai kou mau kapa, maikai kou noho, a he oi loa no oe a ka maikai mai luna a hala ilalo ; a owau nei la, he pupuka, aole oe e pili pono me au."

                Ia manawa i lohe aku ai o Debolo i na olelo a Keaka Pepa, luliluli iho la ke poo o ua Debolo nei. Hopu ae la o Keaka Pepa i ka lua, me ka olelo iho no e like me ko ka mua. A paa ka olelo ana a Keaka Pepa no laua, hopu ae la keia i kahi wahine aia nei, me ka olelo aku penei: " A o oe hoi; he oi oe o kahi wahine pupuka, pupuka kou helehelena, pupuka kou wahi kapa, pupuka kou kino, pupuka kou mau pua, a he oi loa no oe o ke pupuka, mai luna a hala ilalo, a owau nei la he pupuka, kokokohu kaua." Lele aku la no hoi keia iluna o ua wahi wahine nei, a o ka lilo loa ana no hoi ia o Keaka Pepa i kane na Mele, a me Mele hoi i wahine na Keaka Pepa imua o Debolo.

                Ia manawa, o ke ku ae la no ia o Debolo iluna, a hoi aku la i kona wahi, me ka uwe i ke aloha i ke kaikamahine, ka hooilina hoi o na hana mana. Noho iho la no hoi lakou nei, o ke ku ae la no ia o kekahi kaikamahine iluna, o ia hoi ka hanau mua, e lawe mai ana o Mela i na mea maikai a pau i pili ai ia ia. A pela no hoi ka waena.

                Ia manawa, i nana hoi aku ka hana o Keaka Pepa i ka wahine, ua pau ae la ua kino luahine nei, ua hoi ae la no a e like me mamua, a pakela ae. O ka hoi aku la no ia o laua nei a hiki i ko laua nei hale. Noho iho la no hoi laua nei, oia noho laua nei, a loihi loa, he mau makahiki paha. Olelo aku o Keaka Pepa ia Mele ka wahine, " Aloha, mai la ka hoi au i na makua, e aho paha e iho kaua ilalo. Ae mai la o Mele.

                Ia manawa, hookahi hana a Mele iloko o ia mau la, o ka hoomakaukau no ka hele ana. A makaukau laua nei e hele, kahea ae la keia i ka hale, a me na mea a pau o ka hale penei: " E ka hale! " E-o mai la ka hale " E-o." Pane aku la o Mele, '' I noho auan i oe, a i kahea mai o Debolo ia'u, alaila, E-o aku no auanei oe ea ! " Ae mai la ka hale, " Ae."

                Kauoha aku la keia i kahi moe, e like me na olelo maluna. Kauoha aku la keia i na pela uluna. A pau na mea aia nei i manao ai e kauoha, alaila, olelo aku la o Mele ia Keaka Pepa. "Eia kaua ke hele nei i kou wahi; a ke kauoha nei au i ka hale, a me kahi moe, a me ka pela uluna, i mea no kaua e make ole ai ia Debolo, malie o moe a puoho ae, kahea mai ia'u, alaila, na lakou ia e-o aku."

                "Eia kekahi, e paa oe i keia wahi hua moa, a me keia wahi apana aniani, a me keia wahi ipu wai." He mea maikai no ia i ko Keaka Pepa mau maka. O ko laua nei komo iho la no ia i na kapa hulu, a o ka lele mai la no ia o laua nei iloko o ke ahe a ka makani. A he mea hou no ia i ko Keaka Pepa ike ana, A ia laua nei e lele ana i ka lewa, me ka manao nui no nae o Debolo eia no laua nei ke noho nei.

                Iloko nae o keia lele ana mai o laua i ka honua nei, ua nui no na la. Ia moe ana o Debolo a haupu i ke kaikamahine, puoho ae la ia a kahea mai la penei; " E Mele e ! " E-o aku la ka hale, " E-o!" I iho la o ua o Debolo, " Eia'e no ka olua." O ka wili hou aku la no ia i ke kapa o ua Debolo nei moe no.

                Oia moe o ua Debolo nei, a haupu hou no i ke kaikamahine, kahea hou mai la no keia "E Mele e!" E-o aku la no hoi kahi moe, "E-o!" I iho la no ua Debolo nei, " Eia'e no ka olua." O ka wili hou aku la no ia i ke kapa o ua Debolo nei moe, o ia moe oia nei a liuliu, haupu hou ae la no keia iloko o ka moe Uhane ana. Puoho ae la no keia mai ka moe ana, a kahea hou aku la no keia "E Mele e!" E-o mai la no hoi na pela uluna, "Eo!" I iho la keia, "Eia'e no ka olua." O ka wili aku la no ia i ke kapa moe. O ia moe oia nei a liuliu, haupu hou no keia i ke kaikamahine, no ka nui o ko ia nei aloha a minamina hoi. Puoho ae la no hoi keia a kahea hou aku la keia " E Mele e!" Aohe o mai; kahea hou keia " E Mele e!" Aohe kahea mai. I iho la o Debolo "Ua hele aku la paha olua me ko kane."

                I iho la keia " Eia'e no ka olua." O ka wili aku la no ia i ke kapa moe. Oia moe oia nei a liuliu, haupu hou no keia i ke kaikamahine no ka nui o ko ia nei aloha a minamina hoi. Puoho ae la no hoi keia a kahea hou aku la no keia, " E Mele e!" Aohe o mai; kahea hou no keia, " E Mele e! aohe kahea mai. I iho la o Debolo, ua hele aku la paha olua me ko kane.

                O ke ala ae la no ia o Debolo, o ka hele aku la no ia a hiki i ka hale, i komo aku ka hana iloko o ka hale, ua hele a hihi ka punawelewele, ua kupu ka lauahue. I iho la o Debolo, Ka! aohe ka olua e kala i hele ai, e make ana nae hoi olua ia'u. Ma keia manawa a Debolo e olelo nei, aia o Keaka Pepa, a me Mele ke lele nei no i ka lewa, ua ike poahiahi nae laua nei i ka honua nei.