Ka Nupepa Kuokoa, Volume I, Number 48, 25 October 1862 — Page 4

Ka Nupepa Kuokoa.

MOOLELO HAWAII.

HELU 7.

No ke kaua ainoa me Kekuaokalani ma Kuamoo.

A lohe kekahi alii, ke keiki a ko Kamehameha kaikaina, o Kekuaokalani, ua ainoa ke Alii Nui o Liholiho, huhu loa iho la keia alii ia Kaahumanu, a me kona mau hoahanau a pau, no ka hooainoa ana o lakou i ke Alii a me ka noa ana o na kapu alii o lakou ; nolaila, huhu loa iho la keia alii, a he makee kapu kona. Hookaawale oia ia ia a noho ma Kaawaloa, no ka makau i ka ainoa. Mahuka aku la kekahi poe kahuna a me kekahi poe kaakaua mai o Liholiho aku a noho me Kekuaokalani.

Hooikaika aku la lakou ia Kekuaokalani, e hoopaakiki ma ka aikapu, a penei lakou i olelo ai ia ia, " Aohe hala a na'lii aia mamua, i nele ai lakou i ka aina ole, e like me keia." Haawi ae la lakou i ka aina no keia alii, pela io no ka olelo ana a koonei poe kahiko. O ka haipule ka mea ku i ka moku ; aka, o na'lii aia, he ilihune. No ia olelo a ka poe kahuna, hoopaakiki iho la keia alii ma ka aikapu, a manao iho la oia e luku i ka poe ainoa a pau e noho ana ma ka Mokupuni o Hawaii.

Haunaele iho la ka aina ia mau la, nui na'lii a me na kanaka i hahai mahope o ko Kekuaokalani manao, a uuku hoi na kanaka a me na'lii mamuli o Liholiho; no ia mea, hoounaia ka wahine a ko Kekuaokalani makuakane, o Piia kona inoa, i hoi mai ai o Kekuaokalani ma Kailua, e ainoa ai ; aka, aole ia i hoi mai ma Kailua ; a nolaila, hoomahui iho la na makaainana mamuli o ko Kekuaokalani manao, a kipi iho la kekahi kanaka no Hamakua, Hawaii, he kanaka kuaaina, o Kainapau kona inoa.

A lohe na'lii ma Kona, no keia kipi ana, hoounaia kekahi kanaka mai o Liholiho aku, o Kainapau no kona inoa, e hele e nana i ua kanaka la, a halawai lakou i Mahiki, me ua kanaka makaainana la, pepehiia iho la o Kainapau wahi alii, e Kainapau kuaaina a make loa. Elua kanaka o ke alii i make i ua kanaka makaainana la.

A loheia ka make ana o na kanaka o ke alii; alaila, Ahaolelo iho la na'lii e hele e kaua aku, e kokua no na kanaka i make ai. Olelo mai la o Kalaimoku, " Aole e pono ke kaua aku malaila ; no ka mea, aia no ke kumu o ke kaua ma Kaawaloa, o Kekuaokalani, pono paha ma Kaawaloa e kaua aku ai. O ke kaua ma Hamakua, he lau ia no ka laau ; a o ke kumu ka'u e kii, a ina e hina ke kumu, mae wale no ka lau."

Ae mai no na'lii a me na kanaka i kana mau olelo ; alaila, hoounaia o Naihe laua me Hoapili kane, e kii ia Kekuaokalani, ma ke kii makamaka aku, i akaka ka hoi mai, aele e kaua, a i hoi ole mai e kua no. A i ka ee ana o Naihe laua o Hoapili ma ka waapa, ee iho la o Keopuolani me kona hoouna ole ia e holo, a holo aku la lakou a pae ma Kaawaloa ia ahiahi, a halawai o Hoapili laua o Naihe, me Kekuaokalani.

Olelo aku la o Hoapili ia Kekuaokalani, " E, i kii mai nei au ia oe, nana mai nei au ia oe a, o oe no ke keiki a ko'u kaikuahine, kii mai nei au ia oe, e hoi kaua i Kailua, a noho pu ae me ko keiki; no ka mea, ke kaua mai nei na makaainana, ua hooili mai ka lakou kaua maluna ou, i ku mai ka lakou olelo i kou noho kaawale i kahi e ; nolaila, e hoi ae kaua a noho pu i Kailua, me ko keiki ea ; aole e kau mai kela hewa maluna ou, e huipu oe me ko keiki, a olelo pu oe me ia, aia no ia oe kou ainoa a me ka ole." Ae mai la o Kekuaokalani.

Olelo mai la o Kekuaokalani, " He hoi aku no ko'u, alina nae, e olelo pu maua me Manono, alaila hoi aku au, aole nae au e ainoa." Alaila pau ka olelo ana, a hoi aku la o Kekuaokalani imua me Manono, a hoi mai la o Hoapili ma i ka hale o Naihe. A ia po ana iho, kukala mai la kekahi luna o Kekuaokalani i kona poe kanaka, e hoomakaukau i na waa o lakou iho, no ka holo ana ma Kailua e ainoa ai." Pela ke kukala ana a ka luna ia po, a manao iho la o Hoapili ma, ua aeia ka lakou olelo.

Aka, he hoopunipuni keia hana ana ; no ka mea, ia po no, koi mai la na kanaka e pepehi ia Keopuolani a me Hoapili, hoole aku la o Kekuaokalani, a pakele iho laua. A i ke kakahiakaka ana'e, hele mai la o Kekuaokalani mai kona hale mai, me kona kanaka, a me ka pu ma ko lakou lima, a me ka pololu, a me ka ihoiho kukui, a me ke kamaa, a ku lalani mai la lakou ma ke alo o Hoapili ma, alaila, maopopo iho la, ua makaukau lakou e kaua.

Hele mai la o Kekuaokalani a noho iho la ma ke alo o Hoapili laua o Keopuolani ; alaila, i mai la o Hoapili ia Kekuaokalani, " O ka hele keia o kakou ? " Ae mai la o Kekuaokalani, " Ae." Olelo hou mai la o Hoapili, " Maluna kakou o ka waa e holo ai." Olelo mai la kela, " Mauka no au me na kanaka o'u, ua pau i ka pololi, mauka no makou a kahi e kahu umu ai me na wahi kanaka, i oia no makou." Olelo hou mai la o Hoapili, "Mai manao nui aku oe ia kanaka, o oe no a kau ae iluna o ka waa, holo ae kaua, na ia poe kanaka no paha ia e hele ae mauka ; no ka mea, o oe wale no ka'u i kii mai nei." I mai la kela, "Aole au e holo pu me oe makai, mauka aku nei no makou." Alaila, pane mai la o Keopuolani, " E, wehe hoi i ka piko la e ka hoahanau."

A pau keia olelo ana, hele aku la o Kekuaokalani mauka me na kanaka ona, a ee aku la o Hoapili ma maluna o ka waa, a ma ke kaulua o Keopuolani, a ma ke kaukahi o Hoapili. A kauoha ae la o Naihe ia Hoapili, " E holo oe a hiki ma Keauhou, e kali mai oe, a hiki aku ke keiki a kaua, alaila holo aku." A lohe o Keopuolani i keia kauoha ana a Naihe ia Hoapili, ee aku la o Keopuolani ma ko Hoapili waa, o ka holo aku la no ia a pae i Kailua.

Halawai oia me kana keiki, me ka waimaka helelei, a olelo mai ia ia, " Mai ike ole oe ia'u, mai make hoi au." Ninau mai la o Kaleimoku, " Auhea o Kekuaokalani ? " I aku la o Keopuolani, " Aia'e no mauka mai." Ninau hou o Kalanimoku, " Pehea ka oukou kii ana?" I mai la o Keepuolani, " Ua pau ke kii makamaka ana, o kau wale aku no koe." Kena aku la e Keopuolani ia Kaleimoku, e kii e kaua ia Kekuaokalani, ae mai la no kela.

A ahiahi iho, haawi ka pu, a kakahiaka ae a aui ka la, hoonoho iho la o Kaleimoku i ke kaua. A kakahiaka ae, hele aku la o Kalanimoku i ke kaua, a hoonoho iho la oia i na waa kaua eiwa, a ao aku la ia lakou, " E noho malie, mai walaau, e ikaika, e inu i ka wai awaawa, e na pokii, mai hoi hope mai, imua aku no a make, aohe hope e hoi hou mai ai."

A lohe o Kekuaokalani, i ko Kaleimoku hele ana'ku, hoouna mai la oia i poe kiu, a halawai pu ua mau kiu la me Kaleimoku, ma Lekeleke, a ki mai la ua poe kanaka kiu la i ka lakou mau pu, a ku kekahi mau kanaka o Kaleimoku i ka pu, a make. Hee aku la o Kalanimoku, a no ka uuku o ua poe kanaka kiu la, aole nae i hee loa, a hahai aku la o Kaleimoku i ua poe kanaka kiu la, a halawai lakou me Kekuaokalani ma Kuamoo, a o ke kaua iho la no ia.

Ma ke ahiahi o ia la, o ka make iho la no ia o Kekuaokalani me Manono kana wahine, no ka nui o kona aluia ; ma ka waa mai kekahi pu, mauka mai kekahi pu, poaiia oia a puni, make ai oia. A hoi mai la o Kaleimoku mai ke kaua mai. Ahaolelo iho la na'lii, a hoounaia o Hoapili e holo ma Waimea, e kaua me kela kaua makaainana, alaila holo aku la ia me na kanaka ona maluna o na waa, a pae ma Kawaihae, pii aku la a kaua iho la mauka o Waimea, a pau ua poe makaainana la i ka lukuia. O ka lanakila loa ana keia o ke aupuni ainoa, hoi mai la o Hoapili ma i Kona, a ia mau la no ke ku ana mai o na Misionari i holo mua mai ai mai Amerika mai.

(Aole i pau.)

HE WAHI KAAO

—NO—

KEAKA PEPA.

HELU 11.

A NO KA LUA OLE O NA MANU i ka lawe ana i nei mea he olelo a ke kanaka, alaila, piha ae la o loko i ka olioli nui loa. A o nei mau olelo nae a na manu e olelo nei, aohe maopopo o ke ano i ka poe a pau e hoolohe nei. A o Keaka Pepa, oia hookahi kai noonoo iki, e like me ke ano o kona hele ana mai a me kana mau hana i hana'i, aia nae hoi ua hoikeia mai e ka manu. A o ua Keaka Pepa nei ua puka iki mai kona manao hoonaauao iki i ka wahine mai loko mai o kona manao naaupo.

E waiho kakou i ka olelo ana no Keaka Pepa ma, a e hoi hou kakou ma kahi e olelo nei na manu. A pau ka olelo ana a na manu, lululu-u aku la laua nei iloko o na kiowai a hoea like mai la, a kuehu like ae la laua i ka wai o na hulu o laua, a pau ia, pane mai la kekahi manu, " Hookuku olelo, a olelo kaua la !" Pane mai la kekahi manu, " A olelo kaua la !" Pane hou mai la ka lua o ka manu, " Kainoa no hoi, noho oe me o'u mau kaikuaana, a a-o-a-o ia mai hoi oe e o'u mau kaikuaana, i kuu wahi hoi e loaa ai ia oe, i ia mai ai hoi paha oe e hopu i kuu kapa hulu, i hiki hoi oe ia'u i ka lawe iluna i ka lani, a oia hoi paha ka mea i loaa ai o ko hoa pepa ia oe. A pau hoi paha ke a-o-a-o ana a o'u mau kaikuaana ia oe, o ko hele mai no hoi paha ia a hopu i kuu kapa hulu, a pane aku ai hoi au ia oe, i ko mahaoi hilahila ole i ko lawe i kuu kapa, i mai ai no hoi paha oe ia'u, aia ka loaa aku o ko kapa hulu a ae mai oe i kuu manao. Ninau aka au ia oe, Heaha kou manao ? I mai ai hoi paha oe "I wahine au a i kane oe ; ae aku ai no hoi paha au, o kuu lilo no hoi ia ia oe. Komo au i kuu kapa hulu a paa, i aku ai hoi au ia oe e pepehi aku au ia oe a make, a o ka lehu oia ka'u e lawe ai i ka lani. I mai ai no hoi paha oe " E make loa auanei paha au ?" I aku au ia oe aole oe e make a hiki kaua iluna, hoi hou ae no oe a like me na kino ou. Pepehi ai no hoi paha au ia oe a make, o ko kaua lele no hoi ia i ka lani. A hiki kaua iluna, ola hou ae ai no hoi paha oe. O ka ha no hoi ia o ka la a hookahi la i koe, i aku ai au ia oe apopo hele e ike i ko hoa pepa, ae mai ai no hoi paha oe, o ko kaua noho no hoi paha ia a ao ae hele ai oe e hoala ia Debolo kuu makuakane.

"A ike hoi paha o Debolo ia oe, hooluhiluhiia'i oe e Debolo, a e ole hoi paha au pakele ai hoi oe, a i ka pau ana o na hana mana e ae a Debolo, olelo ai hoi ia oe e koho ia makou i wahine nau, i aku ai no hoi paha wau e koho mai oe ia'u i wahine nau i ola oe ; koho ai no hoi paha oe ia'u, o ko'u lilo no hoi ia ia oe, o ko kaua noho no hoi ia a uwe ai oe i ou mau makua, o ko kaua iho mai no hoi paha ia ilalo nei, a hiki kaua ilalo nei, hele mai ai kaua a ka puu hoomaha noho kaua ilaila a o ko iho mai no ia e ike i ou mau makua, i mai ai hoi paha au ia oe, " O iho e ike, mai noho nae hoi oe a honi aku i ko lakou ihu, e waiho hoi oe a na'u e honi, ae ai no hoi paha oe, o ko iho mai ai no hoi ia i kai nei, o ko honiia no hoi paha ia e ko ilio, a o ko lilo no ia i ka ulaia."

Pane mai la kekahi manu, " ua noonoo loa mai la au." Ua noonoo loa aku la o Keaka Pepa, o ka lele aku la no ia o kekahi manu iluna o kekahi manu, a o ke ku mai la no ia o Keaka Pepa a pii iluna o ke kaa o Mele kana wahine, a o ka holo hoi aku la no ia o lakou nei i ka hale, a ua makaukau wale na wahi manu i ka laua hana. Ia lakou nei i hala mai ai, nui mai la na leo hoo-o-ho mahope e hea ana, " Lilo ke kane a ke'Lii e ! Lilo ke kane a ke'Lii e !!"

Oia hoi o lakou nei a hiki i ka hale aniani, noho iho la lakou nei he kane a he wahine, a hoi aku la no hoi na manu a me ke kaa iluna. Noho laua nei a hapai o Mele a hanau mai la he keiki kane, a pela aku no a elima keiki kane, a eono kaikamahine, a mahope mai o lakou hanau mai o Keoni Pailama, he keiki kane oia ka hanau muli loa o ka Keaka Pepa poe keiki, a nona no hoi kekahi moolelo maikai loa. O ka huina o na keiki a Keaka ma, he umikumamalua.

A maanei, ua hoopauia ko Keaka Pepa moolelo. Me ka mahalo.

S. W. KALAMA.

Kamakela, Honolulu, Oct. 20, 1862.

[No ke Kuokoa. ]

He Palapala na ko makou

ELELE I HOLO AKU NEI I KAPALAKIKO.

ALOHA OUKOU: — Ua nui no kuu palapala ana'ku ia oukou, no na mea a'u i ikemaka'i ma Irish Creek ; aka, ua manao no au e hoike aku i hookahi palapala i koe, alaila pau ; no ka mea, ua lawa paha ka lohe ia oukou.

He mau mea hoike no na hebedoma hope o kuu noho pu ana me na hoahanau ma ia wahi. Ekolu no ko makou houluulu dala ana ma ka mahina hou, a o ka huina o na dala i loaa mai, he $33.00.

Ua nui no ko makou kukakuka ana no na mea e holo ai ka malamalama iwaena o na Ilikini ma Kaliponia nei, a ua hooholoia ka manao e kahea aku i ko oukou Ahahui Misionari, e kokua pu me ko makou Ahahui Misionari ma keia hana maikai.

Eia kekahi, ua hana makou i elua papa i mea e hui like ai makou ma ka pule. He papa mahina, a he papa hebedoma no kekahi. Okoa na mea e noi ai no kela la keia la, a ma keia hui like ana, ua lana ko makou manao e hookoia no ka makou mea e noi aku ai.

Ua hooholo like ka manao o na hoa o keia Aha ma Irish Creek i keia mau la koke no, e hanaia kekahi Pa Ilina, mawaho mai o na luakupapau o na hoa'loha i make aku nei, a ua haawiia he $19.00, a ua kuaiia no na kui, na papa, a me na mea a pau e pono ai, mamua o kuu haalele ana ia lakou. A i keia hebedoma, ua loaa mai ka palapala mai laila mai, na L. H. Kapuaa, e olelo ana, ua paa ka pa kupapau, a ua maikai no hoi ke nana aku, ua paa o waho i ke penaia, a koe o loko, aole no i pau ko makou manao no ia mea, aia a loaa hou mai kahi dala, alaila hoomaikai hou." He 42 kapuai kona loa, a ua like no me ia ka laula o ua pa la.

Eia hou kekahi mea e hauoli ai ka naau, iloko o na hebedoma hope o kuu noho ana malaila, ua hele pinepine mai o Mere Kaaiahua a me Loisa, he mau wahine kamaaina, i ka heluhelu palapala, a ma ka hooikaika ana o laua, ua loaa no ke akamai ma ka heluhelu i ka Palapala Hemolele.

Ma ka la 7 o Iulai, ua hoolilo makou ia la me ka waiho aku i na hana a pau o ke kino, a i la hookeai, a me ka hai ana'ku i ko makou hewa imua o ke Akua, a imua hoi o ka lehulehu, a me ka pule ana aku i ke Akua no na aina pouli, a no makou iho no hoi kekahi, a me ke noi aku no hoi e kokua mai ka Uhane Hemolele mawaena o makou, a e noho pono hoi. A ma ia hana ana, ua lana ka manao, a me ka hauoli nui iloko o ka Haku, a me ke aloha nui ana kekahi i kekahi. Aka, ua kaumaha loa makou ia la, no kekahi mau mea mihi hookamani, a me ka hoopunipuni loa.

Ma ka la eiwa o ko makou halawai ana, oia ka Poakolu, ua mareia e Rev. M. Smith, he Kahunapule no Coloma mai, o Mere Kenao me A. L. Kamakapu, ua maikai no ka mare ana. Ua hoonaniia oloko o ka halepule me na lau uliuli a me pua aala, a ua makai no ke nana aku.

Ma ka la 10 o Iulai, oia ko'u la i haalele ai ia Irish Creek, a me na hoa'loha a pau e noho ana malaila, me ka waimaka ko makou kaawale ana ia la. No ka pili ana o ko makou naau kekahi i kekahi, me ke aloha ; a nolaila, ua eha no ka naau i ke aloha, a ua nui no ko makou hauoli ana ia la, no ka manao lana, he manawa pokole wale no ko makou kaawale ana ma keia ao, a halawai hou ma kela kulanakauhale nani o Ierusalema Hou ! Ke hiki pau loa makou ilaila me ka naau maemae, pomaikai io.

He umi na hebedoma o kuu noho pu ana me lakou ma ia wahi. Hookipa oluolu mai lakou ia'u, a hoolako mai ma na mea e pono ai ke kino, i na la a pau o kuu noho ana me lakou, a me ka ae ole mai i ko'u makemake e uku aku ia lakou no ia mau pono. Me lakou kuu aloha nui, a mau loa aku.

Mailaila holo mai au ma ka lio, a hiki loa ma keia County Butte. Hookahi haneri mile mailaila mai a hiki ianei, me ko'u kokoolua, o A. E. Mahuka, ke kane a Waiulili, a ke noho pu nei au maanei me kekahi poe kanaka Hawaii.

O J. Kapu, oia ke kaikaina o Kenao, oia no ka luna mawaena o lakou, a e hana ana lakou i kekahi Flume nui ma kela kahawai, i mea e loaa mai ai ke gula e waiho ana malalo o ka wai.

Owau no me ke aloha nui ia oukou a pau loa. KULIKA OPIO.

Butte Co., Kalaponia, Augate 1, 1862.

MOKU HOLO MAU

Nawiliwili, Koloa a me Waimea,

KAUAI.

E HOLO MAU ANA KA MOKU kialua maikai mama

"KALAMA,"

no na awa i haiia maluna, a me na awa e pili ana ma ka aoao kona o Kauai, ma keia hope aku. He hiki i na kanaka ke hilinai ia ia. F. MOKINA, Ka hope.

Honolulu, Aug. 7, 1862. 37-3m

MOKU HOLO MAU!

KE HAI AKU NEI AU I NA KANAKA A PAU, e holo mau ana ka moku kiakahi, i kapaia

Express,

oia o "AINAHOU," i kela Poakahi keia Poakahi, no ka mokupuni o Molokai, a wahi e ae paha. Nolaila, e pono i ko Molokai poe ke makaala mana Awa ku moku,

MA:

PALAAU,

KAUNAKAKAI,

KAMALO,

PUKOO,

a me ONOULI.

Me ko oukou mau ukana a ohua hoi, e hooili ai maluna o keia moku holohikiwawe loa. Ua keu aku ka holo a me ka maikai i keia wa no ka hana hou ia ana, aole hoi he liu. Nolaila, e pono i kela mea keia mea ukana a ohua hoi ke hookokoke mai ma keia mau awa, a he oluolu no hoi ka uku ana.

J. W. KAIKAINAHAOLE.

Honolulu, Aug. 29, 1862. 40-6m

MAKEMAKEIA!

LOLI, PEPEIAO LAAU!

A ME KA

LALA MANO.

PENEI KA UKU ANA: -

No ka Pepeiao Laau,

" " Lala Mano, 15 keneta.

" " Loli Kohola, 12 1/2 keneta.

" " Loli Koko (ke nui,) 4 keneta

" " Loli Kae, (ke nui,) 4 keneta.

E hele mai ma ko maua hale kuai, ma ka aoao komohana o

ka Hale Kuai o Daimana, ma alanui Alii.

UTAI & AHEE.

Honolulu, Aug. 1, 1862. 38-3m

OLELO HOOLAHA.

E IKE AUANEI NA MEA A PAU, KE nana mai lakou; ua kapu i kela mea keia mea ke hoaie aku i kuu wahine mare,

Ia Kawao,

oiai e kaawale ana maua. (45-4t*) J. HAO.

MEA KUI POI MAIKAI LOA.

UA MAKAUKAU KA MEA NONA KA inoa malalo, e hana i

Wili Kui Poi Maikai,

i mea nana e hoowali a Poi e like me ka lima kanaka; a he mea no hoi e hoouku ana i ka luhi o ka hana ana i ka Poi no ka ohana a no ka hoopukapuka paha. Aohe luhi iki o ka hana ana, he wili malie wale no, a aia hoi ua AEAE ka Poi. Na ka wili no e kui, hoowali, a kupele hoi i ka Poi me ka malaki loa, o ka poe a pau e makemake ana i

Wili Kui Poi

no lakou, e pono e hele ma ko'u hale, ma ke Alanui Alakeu, a ilaila hoi e ike ai i ke ano o ua wili la, he emi loa ke kumukuai. (43-3m*) PETER RICHMOND.

J. H. COLE.

LUNA KUDALA,

Ma ka Hale Pohaku o Mi. Aniani ma.

Ma ke Alanui Alii Wahine. 53-6m

H. W. SEVARANA.

Luna Kudala a mea Kalepa.

Hale Mahoe.

Alanui Aliiwahine.

33-6m

OLELO HOOLAHA.

O KA MEA NONA KA INOA MALAlo nei, ke papa aku nei oia i na kanaka, haole, a me ka pake, o kela ano kanaka keia ano kanaka a pau, e nana mai ana. Ke papa aku nei au i na mea a pau, mai hookuu wale oukou i ko oukou mau holoholona, ma ka Apana kula o

Ukumehame,

mai ka pali o Manowainui, e pili ana me Waikapu, ua kapu ia Apana kula. Ina i loaa kekahi holoholona e hele ana ma ia Apana kula i oleloia maluna, e uku mai ka mea holoholona $1.00 (hookahi dala,) me ke kao, a me ka hipa, ewalu poo $1.00 (hookahi dala.) Ina aole e loaa mai ka uku e like me na mea i oleloia maluna, alaila, e hookomo ana kuu kanaka ma ka Pa Aupuni, no ke kolohe i ka mauu o ua Apana kula la me ke kuleana ole. P. NAHAOLELUA.

Hope Luna Aina o ka Moi.

Lahaina, Maui, Maraki 31, 1862. 19-tf

KA LAKO HALE

A ME NA

Pahu Kupapau!

AUHEA OUKOU, E KA POE E MAKEMAKE ANA E kuai ma ke ano makepono wale ! Eia no ke waiho ia ma kuu Hale Paahana, ma Alanui Papu.

NA PAPA KAUKAU!

NA LAKO HALE!

NA PAHU KUPAPAU!

PAHU KOA.....$12.

UA loaa na hoi na mea hoonani Pahu Kupapau he nui loa, a e kuaiia no ka uku makepono.

A ua makaukau no hoi au e kuai aku i na mau mea hoolako hale, a ka poe e makemake ana e kuai me a'u no ke dala. No-laila, ke makemake nei au e kuai aku i na lako hale o hai me ka uku aku i ke dala maoli, a ua lako hoi i na mea hoolako hale no ke kuai aku ia hai, no ke kumukuai emi loa.

HANALE ALENA.

37-6m Alanui Papu

MAKEMAKEIA.

ILI BIPI, ILI KAO, a me ke KELEAWE kahiko.

UA MAKEMAKEIA NA MEA I HAIIA maluna e C. Brewer & Co. (Burua ma,) ma ko laua Hale Kuai i kai o ka Uapo. E uku no laua i ke kumukuai makepono no ia mau mea. 46-3m C. BREWER & Co.

E Makaala! E Makaala!!

MA KAHI O C. Brewer & Co., E LOAAI I NA kanaka Hawaii ka

Waapa okohola maikai,

Pena hale o na an a pau,

Aila pena,

Wai hoomaloo pena,

A me na mea e pili ana i ka hoomaikai hale.

C. BREWER & CO., (Burua ma.)

Hale Makeke, Alanui Kaahumanu, Honolulu, Feb. 13, 1862.

37-3m

ILI BIPI, ILI KAO.

E UKU AKU NO O F. S. Pratt & Co., ma ko laua Hale Kuai, ma ka

Hale Mahoe.

I ka uku makepono loa no ka mea i haiia maluna. O Mr. J. C. Spalding (Polena,) ka mea i kamaaina loihi ma ke kuai ana ma a mea, ka mea nana i hooponopono ma ia mea. 46-m3

E MAKAALA!

OWAU

O KAMUELA,

KA HOA KUAI O NA

KANAKA HAWAII,

NONA KA HALE KUAI PAPA MAuka iho o ka

Hale Hookolokolo

ma Honolulu. Ke hai aku nei au ia oukou, he mau la ku wale no keia o kuu moku papa,

O "Francisco,"

a ke ku mai oia, e loaa ana ia'u na

LAKO KAPILI HALE

o kela ano, keia ano.

EIA NO KE WAIHO NEI.

NA:

PAPA O KELA ANO, KEIA ANO.

LAAU HALE, o kela ano, keia ano.

PILI HALE,

PINE,

AAHO,

KEPA,

PANI PUKA

PUKA ANIANI,

OLEPELEPE,

KUI,

PENA,

AILA PENA,

WAI HOOMALOO PENA.

IA MEA AKU, IA MEA AKU,

Ua makaukau au e kuai aku me ka oluolu i keia mau mea, a no ka maopopo no paha ia oukou he KEIKI KAMAAInA au, he hiki ia oukou e ka Lahui

Mai Hawaii a Niihau,

ke kipa mai i o'u nei. E hiki ana no na moku papa o'u i na manawa a pau, a hoolako mau ia'u. He mea mau i na poe o ka hiki mai ka haanui, a me ke kaena. A he mau Luna kekahi i hoonoho ia e lakou e alako ana i ka poe maikai, me he lawehala la Aka, he hiki ole ia'u ke hana pela, o ko'u ano no ka oukou e imi, mai a loaa, maopopo no na hana a kakou, no ka mea, o ko Hawaii nei kupa ihola no ia, o ko oukou makamaka.

KAMUELA. (Kaikaina o Kimo Pelekane.)

Honolulu. Sept. 19, 1862. 43-8m

Olelo Hoolaha.

KE MAKEMAKE NEI AU, KA mea nona ka inoa malalo, e kuai i na bipi kane hoounauna, ina ua lawe ia mai ma ko'u hale, ma Hilo. Penei ka'u kuai ana, ina ke bipi nui loa, laka, a ua maa i ka hoounauna ia, haawi no au mai no au he $17. Ina he emi mai ke kino o ka bipi, e hawaii no au mai ka $10 a i ka $15, e like no me ka nui a me ka maikai o ka bipi. Na'i na

D. H. HITCHCOCK.

Hilo, Hawaii, Aug. 30, 1862. 41-3m

OLELO HOOLAHA

I NA KANAKA HAWAII!

Makai iho o AIGUPITA!

Ma hope iho o ka Pa

O MAHUKA !

Pa Kuai Papa

LUI, C. H. LEWERS,

MALAILA E LOAA AI NA PAPA O KELA ano keia ano, me ke kumukuai makepono loa, nolaila, e naue mai oukou e ike i ka oiaio o keia leo paipai ia oukou e na makamaka Hawaii.

NA PAPA OLEGONA,

LAAU HALE A ME NA POU,

LAAU KAOLA A ME NA PINE PA,

LAAU AAHO HALE PILI MAOLI,

PAPA ULAULA, PAPA PAINA,

PAPA KEPA A ME KA AAHO,

PILI ULAULA A ME KE KEOKEO.

Eia ka mea

KUPANAHA

Ma keia hale — maanei i wiliia'i ka

PALAOA a ma ka HANA PAHU,

e like loa me ko

ULAKOHEO

mamua, i kona wa e kau ana, aole i pau i ke ahi mamua ; nolaila, e naue mai e makaikai.

Na Pena Keokeo a me ka Omaomao,

Na Pena Ulaula a me ka Eleele,

Poho, Kolu, Hulu Pena,

KUI o na ano a pau,

LAKA o na ano a pau,

Ami, Kilou, Kui kakai moena,

Kui Nao,

Pani Hale,

Pani Aniani, Pake,

Aniani kaawale,

Pani Olepelepe,

A PELA WALE AKU.

Honolulu, Iulai 22, 1862. 36-3m

PAPA MAKEPONO!

AIA KA HALE KUAI O LUI (C. H. LEWERS.) ALANUI PAPU, kahi e kuai oluolu ai. NA PAPA OREGONA 1 a hiki 3 iniha, LAAU KAOLA, oa a me na pou, a me na opaka e ae, LAAU PA a me na PINE PA. LAAU AHO HALEPILI. PAPA ULAULA, PAPA PAINA, PAPA KEPA, PILI ULAULA a me KEOKEO. PENA KEOKEO, OMAOMAO, ELEELE, ULAULA. POHO, GALU, HULU PENA. KUI o na ano a pau, LAKA. AMI, KILOU, KUI KAKIAMOENA, KUINAO. PEPA HOONANI KEENA. PANI HALE, PANI ANIANI. ANIANI KAAWALE, PATE. PANI OLEPELEPE.

Eia ka mea kupanaha ma keia wahi, na ka mahu e hana i na pahu apo, he hikiwawe, kupanaha. E hele nui mai e kuai a e ike wale i keia KAMELO

HOONANI HALE.

Makepono.

O KA POE A PAU E MAKEMAKE ana e loaa na mea maikai e hoonani i ko lakou mau hale, e aho e naue mai i ka Hale Kamana o ka mea nona ka inoa malalo, ma ke Alanui Hotele, a malaila e loaa'i ia lakou na

PAPA KAUKAU NUI A LIILII HOI,

NOHO O NA ANO A PAU.

MOE O NA ANO A PAU.

PAHU KUPAPAU.

E ku mai ana mai Bosetona mai, ma ka moku George Wasinetona, ma ka malama ae nei o Ianuari, he mau mea HOONANI HALE o na ano a pau, a e kuai Emi aku no au. E hele mai e nana a Kuai iho.

C. E. WILLIAMA. (UILAMA.)

Honolulu, Iulai 2, 1862. 32-6m

HALE HANA PIULA.

F. H. & G. SEGELKEN.

MA KE ALANUI NUUANU, MAKAI IHO o ka Loiala Hotele. Mau mea hana, a kuai Piula, Hao, Keleawe, a me na mea e ae e pili ana i ka

Oihana, Piula,

A e hoomoe hoi i ka Piula Wai, me ka hooponopono kupono i na mea a pau e pili ana ia oihana. Ua lako mau i ka Piula Wai maikai. E hele mai e ike no oukou iho. 33-6m

KAKELA ME KUKE.

MA KA HALE POHAKU HOU, MA POLELEWA kahi kokoke i ka Halepule Betela ma Honolulu, Oahu. Na laua no e kuai i na lole o

Kela ano keia ano.

NA MEA AI,

NA BAKEKE,

NA IPU TINI,

NA PA LEPO,

NA KAMAA,

NA PAHI me na O-O,

NA PAPA me na NOHO,

NA IPUHAO,

NA NOHO LIO,

NA MEA E KAKAU,

NA PENA ME NA AILA,

NA MEA MAHIAI.

A me kela mea keia mea.

Me na laau a Dr D. Jayne.

Honolulu, Dekemaba. 1861.

HANA! HANA!!

UA MAKAUKAU AU E kepa i NA kanaka Hana Mahina, no na

KANU KO,

ma Hilo nei. Ina ua makemake kekahi kanaka e loaa i hana nona iho, ma na aina o Kaupakuea, Onomea, Kaiwiki, Paukaa, a me Amauulu paha, e hele mai ia'u, a na'u no e hoomaopopo ia oukou ka uku, a me na mea a pau e pili ana. Na'u na

D. H. HITCHCOCK.

Hilo, Hawaii, Aug. 20, 1862. 41-3m