Ka Nupepa Kuokoa, Volume I, Number 51, 16 November 1862 — Page 3

Page PDF (1.59 MB)

Ka Nupepa Kuokoa.

 

ua ike lakou i ka olelo kuahaua a Linekona e hoopau ana i ka hookauwa kuapaa ana, he 17 nika i liia.

                Ua hala o Gen. Bragg a me kona puali ma kela aoao o ke Cumberland Gap, me kona puali no hoi a pau, a ua huhewa ka poe koa Akau nana lakou i alualu aku.

                —Ua loohia ia hoi na kipi ma Rike mona i ka wi, a ke kau nei ka weli oia poe no ia mea. Ke hai mai nei no hoi na nupepa oia wahi, e hoao ikaika ana na moku hao o ka Akau, e pii ae ma ka muliwai o James.

                —Ke lana nei ka manao o ka nupepa Tribune o Nu Ioka, e ike koke mai ana ka o Enelani a me Farani, i na Moku Hui o ka Hema.

                —E haalele ana na kipi ia Vereginia Komohana, a e hele loa ana i Tenesi.

                —Ke manao wale ia nei e haalele ana na kipi ia Winchester, kahi o na koa o Gen Lee laua me Jackson i hoomoana,i.

                —Ma ka mokuaina o Kenetuke, ua lanakila na koa aupuni, a ua lilo hou ia lakou ke kulanakauhale o Lekinakona, a ua kaua iki no malaila, a ua hee aku na koa powa malalo o Gen. Morgan, a ke alualu aku nei hoi na koa lio o Gen. Dumont o ka akau.

                —Ua kimopo mai na kipi ia mokupuni Helu 10, a ua kipakuia'ku no nae e na koa aupuni; iloko nae o ka poeleele a me ke kuhihewa, ua ki pu aku no na kipi ia lakou iho, a ua make no hoi he nui wale o ia poe, me ka hiki ole hoi i kahi i manaoia e lakou.

                —He kaua nui kai manaoia ma keia mau la iho, ma Winchester, aole no nae he maopopo, no ka mea, ma kekahi o na mea i loheia mai nei, e haalele ana ka na kipi ia wahi.

Enelani.

                Ke olelo wale nei na nupepa o Ladana, he olelo pepa wale no ka olelo kuahana a ka Peresidena Linekona, aia ka wahi a lakou; a lilo i ka Akau na mile kuea o ka Hema, alaila, hiki ke oleloia'e, he mea oiaio ua olelo kuahaua la a ka Peresidena o Amerika Huipuia, e pili ana i ka hoopau i ka hookauwa kuapaa ana.

                Ua holo mai kekahi mokumahu Beritania, me ka piha i na waiwai no ka Hema, ua kuia nae i ka moana me kekahi moku e ae, a ua piho ua moku la.

                Aohe hana ponoia mai o na poe o Kaneda, wahi hoi a na nupepa, me he mea la, aohe no he makemake o Enelani i ka malama mai ia wahi waiwai ole. Malia nae paha he olelo pepa wale iho no.

Farani.

                Ua loaa mai na palapala mai Mesiko mai, e hai mai ana, ua paa pono ia kulanakauhale i na koa kamaaina, a e kaua ana no hoi ia poe a hiki i ka make ana, mamua o ko lakou haawi pio ana mai ia lakou iho, i na koa o Farani.

Kina.

                Ua loheia mai ka lanakila ana o na kipi maluna o ka poe koa Aupuni, a ua lilo no hoi ia Col. Wood o ka aoao kipi, he ekolu kulanakauhale.

Iapana.

                He maluhia no ka noho ana malaila i keia mau la ; aka, e hiki koke ana nae paha iwaena o na poe kue i ka noho ana o na haole ilaila, a me ka poe e hoole ana, ke noho kolaila poe, me ka lana o ka manao, e hiki io mai ana no na kue nui o ia ano.

Auseteria

                He mau wai halana nui ma ia Aupuni, a ua nui no hoi ka waiwai i poho aku i ka wai.

 

He Wati Gula no na

HAINA BAIBALA A. J. COVERS.

                E waiho ana ka olelo hai a J. Covers, ma ka Helu 49 o ka Nupepa Kuokoa, e hai mai ana i na huaolelo "Kamaa" ma ka Baibala. E ke hoa, ke hoole aku nei ka manamana minute o keia wati gula ia oe, aole wahi pili iki o na kuhikuhi au i ke kamaa o ke Akua, he mau kamaa e wale no ia. He mea kupananaha ka hoole mua ana mai o ua keiki pii hala nei o Puna, "Aole keia he mau ninau Baibala," A ke kuhikuhi hou mai nei ma ka Baibala.

                Ea, na'u no i hai aku na ninau elua, a me ke kolu, a ke ikeia nei nau ka ! Akamai io oe!! Auhea kau mau ninau, a me ka'u mau ninau ekolu, aole ou hai mai.

                Ke hai aku nei au ia oe, aole e loaa ana ia oe ka ninau akahi, he Iole ka ninau, ka mea nana e akiaki ke Koko a Makalii, ike aku i ua mea he helelei mai no ka ua ilalo nei. Pulu elo oe la i ke anu.

                Aole no hoi e loaa ana ia oe ka ninau elua he Kauila no Puukapele, ka ninau, e kuhi ana paha oe he mama, i pii aku ka hana ou iluna, lolou kela, me he i-a la i paa i

ka makau.

                Ua lana mai ko'u manao, aole no e loaa ana ia oe ka'u mau ninau a pau loa. Owau no me ka mahalo.  G. M. KOHA.

 

Na Palapala.

 

He inoa no Kawahinemakakoa.

Maikai Haupu he nani ke olewa i ka makani,

Ka hemolele o ka uka o Kaipuhaa,

Ke alawa iho i ke alo poli o Waiehu,

Aohe kau haunu o ka poli o Aahoaka,

Ua lohia e na lima o Kalupua,

Hele a mono ka pua o ka Hiau i ka la,

Malu iho la ke aka wailiula i ke kula,

Ua kupu a ohaoha ke kino oia laau,

Pakele aku ka nui o Kawaikini,

I ka maopopo o na lehua makanoo,

Hopu ae la e Hoakalei,

Mau ka pane poona o kaliko,

Ua hele ii i Hauailiki,

Ua ike au i ka nani o Pelekane,

I ke ku moena lehua a ka manu,

Oki ka hana a ka pua o ke koolau,

I ka lawe koai ia e Kawailohia,

Eha ka puu kolu uwe no i ke anu a Kaukaopua,

Kuu pua ala i ka nahele,

Aala i ka nahele o Haiaimalama,

E malama i ke kanaka i manaoia,

A nui mai ke aloha i kuleana no ka manao e hiki ai,

Hiki mai ka inu wai o Lehua,

Halawai me Limaloa,

I ke kapa pili o Mana,

Loaa i ke aka o ka ama ko,

I koena wailiula a ka manu,

E noho ana i Papiohuli,

E huli mai oe e ke aloha ianei,

Eia mai no au ka ili hualala ole,

Ke kuea hele pololei,

Ka wai dala ia e waiho like a—i,

E nau—e iki ae au a hoi mai.

NA S. W. HOLANIKU.

 

[No na aina e mai.]

E ka Nupepa Kuokoa e; Aloha oe :

                E hiki paha ia oe ke hooiho ma ka opu ahonui o ka "Nupepa Kuokoa," i keia wahi puolo, a nau ia e lawe hele aku ma na wahi a pau ana e naue hele aku ai. I ike na makamaka, a me na hoalauna, na kaikuaana a me na kaikaina na keiki a me na moopuna, a ka mea i walea iho nei ma Jacksonavlle, Oregon State, e noho ana ma Waialua, Oahu. Ua make iho nei o P. Pole i ka la 29 o Aukake, he Puuku no ka Ekelesia ma Waialua, pela kuu lohe wale mai, ua make ia i kona wa elemakule maikai, o kona mai i make ai, he pehu ma na wawae a hiki i na uha, loihi kona waiho ana ikeia mai a make aku la, ua holo mai oia i keia aina i ka eli gula, i ka M. H. 1850, a mai ia wa mai a hiki i ka M. H. 1862, make aku la, o ka loihi o kona noho ana ma keia aina, he 11 Makahiki 7 Mahina me 29 la, a kii mai la ka Haku, hala aku la i ke alanui hoi ole mai. He luna paipai no ia no na kanaka Hawaii, ma na wahi a pau ana e launa pu aku ai me na kanaka, a ua launa pinepine no ia me Rev. F. D. Hunt, i kona manawa e noho Kahunapule ana ma California nei. Aole o P. Pole pauaho i ka paipai ana i na kanaka, me ka hooikaika nui aku e haalele i na mea e poino ai ka Uhane.

                Ke lana nei ko makou manao i na pela kona kupaa a make aku la, alaila, ua loaa ia ia ka noho oluolu ma kela ao pau ole. E aloha i na hoalauna a pau o ka mea i make. Owau no me ke aloha.

J. C. KAAIAHUA.

Salmon Falls, California, Sept. 25, 1862.

 

He Hailoaa no na Rula

O KE KANU ANA O KA PULUPALU.

E ka Nupepa Kuokoa e ; Aloha oe:

                He aloha kou, a me kou Luna nana oe i kukulu a paa ma kou kahua, a me lakou la aku hoi, ka poe e hanai mai ana i kou kino, i ole e hele a moowini e like me ka Hae H., he "Kilohana Pookela no ka lahui Hawaii."

                No ke noi ana mai o ko'u hoa hoopuka o na nupepa, ua ike iho au ma kou Helu 50, aoao 2, i na ninau a ko'u hoa, oiai au aole i ike kino ia ia ; a ma kona inoa hoi au e hoomanao nei, oia hoikeia J. H. Z. Kalunaaina, a eia iho malalo iho na ninau elima a J. H. Z. Kalunaaina, a me na haina elima a ke keiki o Kaluaolohe, Waikikiwaena.

                1. Pehea na rula o ke kanu ana o ka pulupulu ?

                Haina. E hoomakaukau e mamua i na mea hana a lako, alaila, e waele aku a maikai.

                2. Pehea ke akea o kekahi lalani mai kekahi lalani mai ?

                Haina. Ua like me 76 kapuai, a me na iniha 4.

                3. Pehea la ke akea o kekahi makalua me kahi makalua ?

                Haina. Ua like me 9 kapuai ke akea mai kahi makalua a kahi makalua, i ole e hui na lala ke hiki i ka wa e ulu ai.

                4. Ehia anoano no ka makalua hookahi

                Haina. E pono e kanu iho 2, 3, 4, anoano no ka makalua hookahi, no ka mea, e pa-la ana kekahi a e mimino ana, a koe mai ka mea koe.

                5. Ehia malama oo ka pulupulu ?

                Haina. Ina e hiki wawe ka ulu ana o ka pulupulu i ka hebedoma hookahi a me ka hapa, alaila, 3, 4 malama, alaila, e ohi oe i kona hua a nui, e wae oe i kona anoano a pau, ina i loaa ia oe ka eke 1, 2 paha, alaila, e humuhumu mua nae oe i ka eke a paa, alaila, e hele oe i o Wini la, e loaa mai auanei ia oe ka mea poepoe o ka honua.

                Oia iho la no na haina elima o na ninau elima, e ke hoa, a ina ua hewa kekahi o keia mau ninau, alaila, na ke " Kilohana Pookela e wehe ae, oiai elua mau inoa i ninau ia mai.  JOHN W. K. KAAIE.

 

He Kanikau no D. Solomona.

He kanikau aloha nou e D. Solomona,

Kuu keiki mai ka hale malu o ke Akua,

Mai ka la welawela hoi o Waianae,

Mai ka ua hehi mai iluna o ka lau o ke kalo o Kahoolenakio,

Mai ka malu kukui hoi o A-na,

Kuu hoa hele i ke kula o Papaenaena,

Enaena loko wela i ke aloha, Aloha wale,

Ka mea aloha o ke keiki—e.

Aloha aku wau o ka uluwehi o Kawela,

O ka peahi mai a ka lau o ka niu o Waipuhi,

Puili iho ana wau i ko aloha a o e nalo,

A uumi iho ana i ka waimaka a o e paa,

E kuu hoa hoomanawanui o ke anu a me ke koekoe o Kaliu—e,

Hoa alo i ka ua a me ka makani he Hoolua,

Elua maua me kuu aloha, Aloha wale,

Ka mea aloha o ke keiki—e.

Kuu hoa o ka malu o ka niu o Poka-i,

Ke ho-a ia mai la e ka makani Kaiaulu o ka aina,

Nana aku o ke kolii o ka la i ke kula o Alio,

Kuu hoa hoolono i ka owe o ke kai o Keaupuni,

Ua puni au i ko aloha e noho nei, Aloha wale,

Ka mea aloha o ke keiki—e.

Kuu hoa holo i ke kula anoano o Maili,

Hoea aku kaua o ka lae o Puuohulu,

O ka pa kolonahe a ka makani he Moae,

A-e aku kaua o ke kaha kanaka ole o Maihawa,

Hoomaha aku i ka malu Ohai o Nanakuli,

Nana aku kaua o ka haimalule a ka lau o ke Kiawe i ka makani,

O ka moani mai a ke ala o ka pua Pitate i ke kakahiaka,

Alaila, kuu ka luhi, ka maule,

Ola kaua i ka wai a ka Naulu, Aloha wale

Ka mea aloha o ke keiki—e.

NA MARETA.

Kahoolanakio, Waianae, Nov, 8, 1862.

 

AWA O HONOLULU.

No ka Moku ku mai.

Nov.       6—Moikeike, mai Kahului a me Lahaina mai, me 62 ili kao, 11 ili bipi, 2 eke pepeiao laau, 3 eke ai a ka manu, 3 eke ota, me 13 ohua.

                7—Go-ahead, mai Kauai mai, me 7 paila wahie.

                7—Molokai, mai Molokai mai, me 16 eke padi, 8 eke pe-peiao, 7 ili kao, 4 puaa, 15 paila wahie, a me 19 ohua.

                8—Kamehameha IV, mai Maliko mai, me 115 eke ko, 6 barela malakeke, 18 eke pepeiao, 9 ili bipi, 57 ili kao, im 10 ohua.

                9—Annie Laurie, mai Kau mai,

                11—Moku Okohola Am. Navy, mai ka Atika, mai, ma Hilo ae, me 1050 barela aila, 10,000 paona iwi.

                11—Neke, mai Hilo mai, me 1 lio, me 37 ohua.

                11—Ema Ruka, mai Ulupalakua a me Lahaina mai, me 127 pahu ko, 108 barela malakeke, 1 lio, i puaa me

                11—Jeannette, mai Kauai mai, me 72 barela bipi, a me 300 kiwi bipi. 13— Kamoi, mai Kahului a me Lahaina mai, me 20 bipi, 21 pahu aila bipi, me 15 ohua.

                12—Odd Fellow, mai Hanalei mai, me 187 pahu ko, 68 eke ko, 13 ili bipi, 1000 alani, 2 barela aila bipi, 4 puaa, me 40 ohua.

                13—Hana, mai Hilo a me Lahaina mai, me 15 eke pepeiao, 32 ili bipi, me 30 ohua.

                13—Moku Okohola Am. Isaac Howland, mai ka Ochotsk mai, me 2200 barela aila.

 

                Ke kauohaia'ku nei na Lunakula, a me na Kumukula, e hooili mai i ka inoa o ka poe Hanau, Mare, a me ka poe Make, i hoolahaia'i ma ka Nupepa Kuokoa. E kakau mawaho o ka palapala ia H. M. Wini, Luna Pai o ke Kuokoa; a i ole ia, e haawi ae i na Luna o ke Kuokoa.

 

HANAU.

                Nov. 6 ma Nini, Honolulu, hanau o Tamara (w,) na W. N. Pualewa me Dina Kalua.

                Nov. 9, ma Kapalama, Oahu, hanau o Iosepa Kaha(k,) na Kaha me Poopoo.

                Nov 4, ma Lupehu, Molokai, hanau o Naha (w.) na Makekau me Paalua.

                Nov. 7, ma Waiokila, Kahakuloa, hanau o Kauwahi (k,) na Paele me Pupule.

                Nov. 4, ma Papalaua, Lahaina, hanau o Caroline Kuemanu (w.) na James Kemanu me Lukia.

                Nov. 2, ma Makiki Oahu, hanau o Alapai (k.) na Kahanau-maikai me Keha.

                Nov. 11, ma Maunalua, Oahu, hanau he kaikamahine na J. H. Kanepuu me T. Kuluhiwa.

                Sept. 19, ma ia wahi no, hanau o Maile (w.) na Makue me Kanano.

                Oka. 15, ma Honolulu, Oahu, hanau o Laoke (k,) na Kani-koi me D. Hupu.

                Oka. 25, ma Kapalama, Honolulu, Oahu, hanau o Mahoe (k,) me Mahoe (w,) na Kahui me Nalauhala.

 

MARE.

                Nov. 2, ma Kapalama, Honolulu, Oahu, mare o Kaopua me Kaomea, na Rev. L. Kamika laua i mare.

                NOV. 1, ma Koloa, Wailuku, Maui, mare o H. N. Landlord me Mrs. Anne Kahauolopua, na Rev. Alexander laua i mare.

 

MAKE.

                Oka. 20, ma Moiliili, Waikiki, make o Heana (K.)

                Sept, 28, ma Waiu, Kaupo, Maui, make o Kealaua (k,)

                Oka. 2, ma Keanawai, Kaupo, Maui, make o Niopua (w.)

                Oka, 1, ma Aleamai, Hana, Maui, make o Hariaka (K.)

                Nov. 12, ma Kamanuwai, Honolulu, make o Opiopio (w.)

                Nov. 1, ma Leleo, Honolulu, make o Kalaehiku (w.)

                Oka. 27, ma Kahukuloa, make o Nua (w.)

                Oka. 12, ma Kapaloa, Wailuku, Maui, make o Kaihumoe k.

                Oka. 18, ma Apua, Honolulu, make o Kamehaiku (w.)

                Oka. 25, ma Puhihale, Waimea, Hae., make o Kalamakua w

                Oka. 1, ma Honomaele, Hana, Maui make o Kuilua (k.)

                Oka. 20, ma la wahi no, make o Kaiwi (w.)

                Oka. 6, ma Kawaipapa, Hana, Maui, make o Kamaka (k.)

                Oka. 22, ma Hamoa, Hana, Maui, make o Kalanihookaha w.

                Oka. 23, ma Hamoa, Hana, Maui, make o Kaluahinekaukua.

 

OLELO HOOLAHA.

NO KA MEA, UA NOI PONOIA MAI KA Mea Hanohano o John Ii, kekahi Lunakanawai o ka Aha Kiekie, e Kalunaiao (w,) no ka hooiaio i na Palapala Kauoha o KUKAUA, no Honolulu, Oahu, mamua i make aku nei: Nolaila, ua hoikeia i na kanaka a pau loa, ke pili, o ka Poakolu, oia ka la 3 o Dekemaba, i ka hora 9 o kakahiaka, oia ka la a me ka hora i oluolu no ka hoolohe i ka oiaio o keia Palapala Kauoha, a me keia noi ana mai, a me na mea hoole i hoikeia, oia ma ka Hale Hookolokolo, ma Honolulu, Oahu.

JNO. E. BARNARD.

Kakauolelo o ka Aha Kiekie.

Honolulu, Nov. 11, 1862.  51-2t

 

Ka La Hoomaikai.

I KA MALAMA O MEI, M. H. 1862, I ka Ahaolelo o na Misionart Amerika ma na Honolulu nei, ua kohoia o Rev. L. Kamika, laua o Rev. S. C. Demona na Komite, e hoakaka i ka la kupono i na ekalesia ma Hawaii nei, e hoomaikai aku i ke Akua, no kona lokomaikai i na kana ma keia Pae Aina, i keia makahiki e pau ana. Nolaila, ke koho nei maua ia Tarede hope o Novemaba nei, oia ka la 27, i la e hoomaikai aku i ke Akua. Emi kekahi mau manao e paipai i na Kahunapule , a me na hoahanau, i ko lakou akoakoa ana e malama ia la.

                1. No ka maluhia, kaua ole o keia Aupuni, me ko na Aina e.

                2. No ka lako pono o na kanaka, i na mea ai ma keia Pae Aina.

                3. No ka pilikia ole i ka mai ahu-lau.

                4. No ka hoolahaia'na o ka Baibala ma Hawaii nei ; a no ka hiki pono hoi i na kanaka ke hoomana aku i ke Akua ola, e like me ko lakou manao he pono?

                5. No ka nui o na Halekula, a me na Luakini, a me na kumu, e ao aku i na kanaka.

                6. No ke ola maikai o ka Moi kane, a me ka Moiwahine. E hoomanao aloha nae kakou i ko laua popilikia, a me ke kaumaha, no ka make ana o ka laua keiki aloha, "ka HAKU O HAWAII."

                He nui wale na mea e ae, e paipai ana ia kakou,e hoonani aku i ke Akua ma ke akea, me ka manao lokahi.

                Nolaila, pono i ko ke Akua poe kanaka, ma ka la i oleloia, e halawai iloko o ko lakou mau Luakini, me ka hoomaikai, me ka mililani, a me ka halelu.

L. KAMIKA.

S. C. DEMONA.

 

KA MOKUAHI

'KILAUEA,'

E HOLO ANA O "KILAUEA" MAI Honolulu aku, ma ka

Poalua, Novebama 18.

Ma ka hapalua o ka hora Eha o ke ahiahi.

NO

LAHAINA,

KALEPOLEPO,

ULUPALAKUA,

KEALAKEKUA, HONOIPU,

KAWAIHAE, KAILUA.

A ME HILO.

                I ka hoi ana mai, e holo ana no ia i KO NA a me na awa i olelo ia maluna, a ua manaoia e holo ana oia ma keia mau wahi i kela a me keia mau la he umi.

 

KA MOKUAHI

" Annie Laurie,"

E HOLO ANA KA MOKU Annie Laulie,

NAWILIWILI,

HANALEI,

WAIMEA,

a me KOLOA.

                Ma ka Poalua, Novemaba 18, ma ka hapalua o ka hora eha o ke ahiahi, a pela no ma kela Poalua keia Poalua, aia a hoolaha ia kekahi hoololi ana.  JANION, GREEN & CO.

Honolulu, Nov. 13, 1862.  51-tf

 

Olelo Hoolaha.

UA NOI MAI O Kimo Kaai (k,) OIA ka Maelo wahine mamua, i ka Mea Hanohano John Ii, kekahi o ua Lunakanawai o ka Aha Kiekie, e ae aku ia ia e mare hou, e like me ke Kanawai o ka la 22 o Iune, 1856. O ka la 26 o Noveumaba, oia ka la hana i keia hoopii,ma ka hora 10 o kakahiaka.  JNO. E. BARNARD.

Kakauolelo o ka Aha Kiekie,

Honolulu, Nov. 1862.  51-2t

 

Olelo Hoolaha.

UA HOOPII MAI O

KAHILAW AI (w,)

kue i kana kane o Kawaipua, no Koloa, Kauai, e hooki i ko laua mare ana no ka haalele wale ana no na makahiki ekolu o Kawai-pua, i kana wahine. E hanaia keia hoopii imua o ka Mea Hanohano Johu Ii, kekahi Lunakanawai o ka Aha Kiekie, ma ka la 3 o Dekemaba i ka hora 9 o kakahiaka, aia ma ka Hale Hookolokolo, ma Honolulu, Oahu.

JNO. E. BARNARD.

Kakauolelo o ka Aha Kiekie.

Honolulu, Nov. 11, 1862.  51-2t

 

Olelo Hoolaha.

UA HOOPII MAI O

KAAWAIWAI (k,)

kue i kana wahine o I. Kaeha, no Hauula, Oahu, mamua, e hooki i ko laua mare ana, no ka haalele wale ana no na makahiki ekolu o I. Kaeha, i kana kane. E hanaia keia hoopii imua o ka Mea Hanohano John Ii, kekahi Lunakanawai o ka Aha Kiekie, ma ka la 26 o Novemaba, i ka hora 9 o kakahiaka, aia ma ka Hale Hookolokolo, ma Honolulu, Oahu.

JNO. E. BARNARD.

Kakauolelo o ka Aha Kiekie.

Honolulu, Nov. 11, 1862  51-2t

 

OLELO HOOLAHA.

NO KA MEA, UA NOI IA MAI KA MEA Hanohano G. M. Robertson, ka lunakanawai o ka Aha Kiekie e Makena, e hookohu ia ia i luna hooponopono waiwai no KAMAKA, no Honolulu, Oahu, mamua, i make aku nei. Nolaila, ua hoikeia i na kanaka a pau loa, ke pili, o ka Poakahi, oia ka la 17 o Novemaba, i ka hora 9 o kakahiaka, oia ka hora i olelo ia po ka hoolohe i ka oiaio o keia noi ana a me na mea hoole i hoikeia, aia ma ka Hale Hookolokolo, ma Honolulu, Oahu.  JNO. E. BARNARD.

Kakauolelo o ka Aha Kiekie.

Honolulu, Nov. 11, 1862.  51-.2t

 

OLELO HOOLAHA.

E IKE OUKOU O KELA ANO keia ano a pau o maua na mea nona na inoa malalo iho, ke papa aku nei maua i na mea holoholona a pau: Na

Lio, Bipi,

Hoki, Kekake,

Hipa, Kao,

Puaa, Moa.

Mai hookuu wale ma ko maua mau aina ponoi.

Ma Kaaawa, Kualoa, Hakipuu,

a me ko maua aina hoolimalima,

Ma WAIAHOLE,

a mai makiikii no hoi ma ko maua wahi. E malama pono i na holoholona ma ko oukou kuleana. Ina e loaa ia maua kekahi o keia mau holoholona, ua komo keia i ka olelo i haiia maluna, e ku i ka uku e like me ke Kanawai. Mai kii wale hoi kekahi i na mea maluna o ua mau aina la, ke ku ole na mea o ke Kana-wai i haawiia ia oukou ka poe mea kuleana. Eia no ia maua wale no ka ae aku i keia poe mea holoholona.

JUDD A ME WILDER.

Kualoa, Nov. 4, 1862.  51-1m

 

OLELO HOOLAHA.

UA HELE KA LUNA KAKAU KOPE O ke Aupuni, ma ke keena oihana o ke

Kuhina Kalaiaina,

malaila e hana ai.  51-tf

 

OLELO HOOLAHA.

E IKE AUANEI NA MEA A PAU ke nana mai i keia olelo hoolaha. Owau o ka mea nona ka inoa malalo nei, ke hai aku nei au ma ke akea, eia ma ko'u lima kekahi lio i komohewa mai, me ka hoopoino i kuu mau mea kanu, nolaila, ina e ike ka mea nona keia lio, e kii koke mai me na dala($15.00.), a i na e kii ole mai a hala na la he 30, alaila, lilo loa keia lio ia'u, penei ke ano o ua lio nei. He lio kane ahinahina, keokeo ma ka lae a ka ihu, i kunuia i ka hao ma ka uha hope hema, he heo manamana, a e loaa no au ma Iole, ma nae o ka luakini.

J. H. KINILAU.

Iole, Kohala A., Hawaii, Oka. 23, 1862.  51-1m*

 

MAKEMAKEIA!

LOLI, PEPEIAO LAAU!

A ME KA

LALA MANO.

PENEI KA UKU ANA: -

No ka Pepeiao Laau,

" " Lala Mano, 13 keneta.

" " Loli Kohola, 12 1/2 keneta.

" " Loli Koko (ke nui,) 4 keneta

" " Loli Kae, (ke nui,) 4 keneta.

                E hele mai ma ko maua hale kuai, ma ka aoao komohana o

ka Hale Kuai o Daimana, ma alanui Alii.

UTAI & AHEE.

Honolulu, Aug. 1, 1862.  51-3m

 

OLELO HOOLAHA

UA HOOPII MAI O

MAIKAU (w,)

kue i kana kane o Puu, no Kaupo, Maui, mamua,e hooki i ko laua mare ana, no ka haalele wale ana no na makahiki ekolu o Puu i kana wahine. E hanaia keia hoopii imua o ka Mea Hanohano o John Ii, kekahi Lunakanawai o ka Aha Kiekie, ma ka la 19 o Novemaba, i ka hora 9 o kakahiaka, aia ma ka Hale Hookolokolo ma Honolulu, Oahu.

JNO. E. BARNARD.

Kakauolelo o ka Aha Kiekie.

Honolulu, Oka. 31, 1862.  50-2t

 

Olelo Hoolaha.

UA HOOPII MAI O

NAMAI (w,)

kue i kana kane o Namai, no Honolulu, Oahu, mamua, e hooike i ko laua mare ana, no ka haalele wale ana no na makahiki ekolu o Namai i kana wahine. E hanaia keia hoopii imua o ka Mea Hanohano o G. M. Robertson, kekahi Lunakanawai o ka Aha Kiekie, ma ka la 2 o Aperila, i ka hora 9 o kakahiaka, aia ma ka Hale Hookolokolo ma Honolulu, Oahu.

JNO. E. BARNARD.

Kakauolelo o ka Aha Kiekie.

Honolulu, Nov. 4, 1862.  50-2t

 

OLELO HOOLAHA.

UA HOOPII MAI O

KAIKUAANA(w,)

kue i kana kane o Parani, no Honolulu, Oahu, mamua, e hooki i ko laua mare ana, no ka haalele wale ana no na makahiki ekolu o Parani i kana wahine. E hanaia keia hoopii imua o ka Mea Hanohano o G. M. Robertson, kekahi Lunakanawai o ka Aha Kiekie, ma ka Hale Hookolokolo, ma Honolulu, Oahu.

JNO. E. BARNARD.

Kakauolelo o ka Aha Kiekie.

Honolulu, Nov. 5, 1862.  50-2t

 

OLELO HOOLAHA.

UA HOOPII MAI O

NAPUKANA (w,)

kue i kana kane o Kaholoaa, no Honolulu, Oahu, mamua,e hooki i ko laua mare ana, no ka haalele wale ana no na makahiki ekolu o Kaholoaa i kana wahine. E hanaia keia hoopii imua o ka Mea Hanohano o John Ii, kekahi Lunakanawai o ka Aha Kiekie, ma ka la 10 o Novemaba, i ka hora 9 o kakahiaka, aia ma ka Hale Hookolokolo, ma Honolulu, Oahu.

JNO. E. BARNARD.

Kakauolelo o ka Aha Kiekie.

Honolulu, Nov.5, 1862.  50-2t

 

OLELO HOOLAHA.

UA HOOPII MAI O

Kahalewai (w,)

kue i kana kane o Keoni(Hando,) no Honolulu, Oahu, mamua, e hooki i ko laua mare ana, no ka haalele wale ana no na makahiki ekolu o Keoni Hando, i kana wahine. E hanaia keia hoopii imua o ka Mea Hanohano o John Ii, kekahi Lunakanawai o ka Aha Kiekie, ma ka la 26 o Novemaba, i ka hora 9 o kakahiaka, aia ma ka Hale Hookolokolo, ma Honolulu, Oahu.

JNO. E. BARNARD.

Kakauolelo o ka Aha Kiekie.

Honolulu, Nov. 5, 1862.  20-2t

 

OLELO HOOLAHA.

No ka Poe i ku i ka Auhau no ka

APANA

O Kona, Mokupuni o Oahu.

                UA IKE OUKOU MA KEIA MANAWA, owau, ka mea nona ka inoa malalo, ke ohi nei au ina Dala Auhau o ke Aupuni ma ka Apana

O Kona, Oahu.

Ua ike no hoi oukou i ke Kanawai e pili ana no ka Auhau, penei: Ina aole e uku ia ka Auhau mamua o ka la mua o Deke-maba e hiki mai ana, alaila, hoopii ia oukou me ka hoonui ia aku o ko oukou Auhau, nolaila, ke kahea aku nei au ia oukou, me ka oluolu, e hele mai e uku i ka Auhau e like me ka helu ia ana e ka Luna Helu. Nolaila, ina e hele aku au i ka Apana a oukou e ohi ai i ka Auhau, mai lohi oukou i pakele me na pilikia ole o oukou. E hoouna ia ana kekahi kanaka e kahea i kahi e hui ai. Ina aole oukou e hele mai ma ka la i olelo la, alaila, pono no ia oukou ke hele mai ma ko'u hale ma Leleo, mauka o ka Hale Hana Kopa, i na kakahiaka e ka Poaha me ka Poalima mamua o ka hora eiwa. Ma ka la hoomalolo mai ka hora 9 o kakahiaka, a hiki i ka hora 4 ma ke ahiahi, ma ka hale ohi dala auhau, ma ke kihi o ke Alanui Nuuanu me Alanui Moiwahine, e pili ia ma ka Uapo.  A. FORNANDER (Apelahama.)

Luna Auhau.

Honolulu, Nov. 5,1862  50-3t

 

HALE HANA KAMAA!

UA MAKAUKAU KA MEA NONA

ka inoa malalo iho nei, e hana i ke

KAMAA MAIKAI LOA,

no ka poe a pau e makemake ana; o na ano no a pau, e like ka nani me na mea oia ano i hanaia ma

Europa a me Amerika.

A hele mai ma ko'u hale, mauka iho o ka Hale Kuai o

George C. McClean,

ma ke Alanui Nuuanu.  WM. BENNETT.

Honolulu, Nov. 7, 1862.  50-6m

 

O-o Kopala Pololei.

UA UIKI MAI NEI KA MOKU ME NA

O-o Kopala Pololei,

e hele wikiwiki mai e ka poe e makemake ana e kuai. Aia ma ka Hale Kuai Hao o  W. N. LADD (Nuke.)

                Aia ma Ke Alanui Papu, ma ka Hale Uinihepa.

Honolulu. Nov. 6, 1862.  50-2t

 

HALE KUAI BIPI.

INA KANAKA HAWAII A pau, ke hai aku nei au ia oukou, ua makaukau au e kuai aku i na makamaka a pau o ko'u one hanau, i ka

                Bipi Momona, Ka Puaa, a me ka Hipa, a me na mea no a pau e pili ana i ka oihana lole Bipi, me ke kumukuai EMI LOA. Aia ko'u hale ma ka Alanui Nuuanu, makai iho o ka Hale Puhi Palaoa R.Love. AILUENE. Honolulu, Nov. 6, 1862.  50-1m

 

MAKEMAKEIA.

ILI BIPI, ILI KAO, a me ke KELEAWE kahiko.

                UA MAKEMAKEIA NA MEA I HAIIA maluna e C. Brewer & Co. (Burua ma,) ma ko laua Hale Kuai i kai o ka Uapo. E uku no laua i ke kumukuai makepono no ia mau mea.  46-3m  C. BREWER & Co.

 

Olelo Hoolaha.

KE MAKEMAKE NEI AU, KA mea nona ka inoa malalo, e kuai i na bipi kane hoounauna, ina ua lawe ia mai ma ko'u hale, ma Hilo. Penei ka'u kuai ana, ina ke bipi nui loa, laka, a ua maa i ka hoounauna ia, haawi no au mai no au he $17. Ina he emi mai ke kino o ka bipi, e hawaii no au mai ka $10 a i ka $15, e like no me ka nui a me ka maikai o ka bipi. Na'i na

D. H. HITCHCOCK.

Hilo, Hawaii, Aug. 30, 1862.  41-3m

 

Olelo Hoolaha.

E LOHE OUKOU E NA KANAKA A ME na haole, ke papa ia aku nei oukou aole e hoaie mai ia

Manuela Port, (Pukiki.)

No ka mea, aole e hiki ia ia ke uku aku i kona mau aie, nolaila o oukou no ke poho.  50-2t*

 

E LAWE ANA MAIKAI WALE

LOLE NUHOU! LOLE NUHOU!!

INA MAKAMAKA MAI HAWAII A NIIHAU,

na Keiki Papa—a me na Kaikamahine Makaonaona o ka aina olu wale o keia Pae Moku.

E Makaala! E Makaala !

I KA

Lole nuhou!

MA KA HALE KUAI O

AKE, A. S. CLEGHORN,

ma ke kihi o ke Alanui Kaahumanu a me ka Alanui Moiwahine, mauka ponoi iho o ka Hale Mahoe, a me ka Hale Kuai ma ke Alanui Nuuanu, mauka iho o ka

Hale Aina o na Kanaka Hawaii.

                He pono ia oukou e na makemake ke kipa mua mui ma ko'u Hale Kuai mamua o ka hele ana i na hale e ae, no ka mea, malaila no e loaa ai ia oukou

NA LOLE NANI WALE,

O KELA ANO, KEIA ANO,

Oia hoi na lole Wahine umenaau,

                O ka helu akahi, na lole a pau a ka naau e ake ai, a me na waiala lu o ka Lokini, a me na lole kane no hoi, i hanaia a ai ka manu iluna. Aohe wahi hoohalahala a ka maka ke ike iho, no ka mea, ua hele wale no na mea kuai, a "Puia pu ke kula i ka nani e." E hele mai no oukou, e hanai ia oukou i ka ike ana i ua mau mea nani la.

                Eia kekahi, o ka poe a pau o na aina kua ma Oahu nei, a me na wahi e ae ma na Mokupuni o Hawaii nei, e pono e hele mai e hui me au, no ka mea, he kuai nui no kekahi

Hale Kuai O'u.

Ua lako i na ano waiwai a pau e ku la'i i ka makemake a me ka iini o ke

Kanaka a me ka Wahine Hawaii,

a he emi no hoi ko'u waiwai ma ke kuai nui ana. E kipa mai, e halo, a e kilohi mai, i pau ai ko oukou kuhihewa,i ike maka ai oukou a "Li ka io i ke anu o Hanaliki."  AKE.

Honolulu, Oct. 23, 1862.  48-3m

 

OLELO HOOLAHA.

E IKE AUANEI NA KANAKA A PAU, ke nana mai i keia olelo hoolaha, owau o ka mea nona ka inoa malalo nei, ke papa aku nei au, aole e komo kekahi maloko o ke kuleana

O KEWALO (k,)

i make ma Keauhou, Kona, Hawaii, aole e holoi i ka lole malaila, ina e komo wale kekahi me ke kuleana ole iloko, alaila, e hopu ia no e kuu luna a hanaia ma ke Kanawai, mai hoopaa oukou o pilikia oukou, a hoopai ia ma ke Kanawai, o ka mea kue i keia olelo hoolaha, e hana ia no ma ke Kanawai, komo hewa i ko hai waiwai.   J. D. N. NAKAI.

Keauhou, Kona, Hawaii, Oka. 18, 1862.  48-1m*

 

Olelo Hoolaha.

E IKE MAI NA KANAKA A PAU, OWAU o ka mea nona ka inoa malalo iho, ka hooilina waiwai o BUKI (k,)

Ma Kalukalu, Kona, Hawaii,

i make aku nei. Nolaila, ke kahea aku nei au i na mea a pau i aie ia Buki a me na mea a Buki i aie aku ai, e hele koke mai imua o'u, ma Kamanuwai, maloko o na la he 30 mai keia la aku, a e hele mai me na hoike oiaio, e hai mai i ka oiaio a me ka ole o hala na la i haiia ae la maluna, alaila, e hana no wai i na mea i maopopo ia'u e like me ka pono, owau no

49-1m*  J. KAUANUI.

 

Olelo Hoolaha.

E IKE AUANEI OUKOU E NA KANAKA a pau, owau o ka mea nona ka inoa malalo nei, ke papa aku nei au i na mea holoholona a pau.

NA:

Lio,

Bipi,

Hoki,

Kekake,

Hipa,

Kao,

Puaa,

Moa,

Palahu.

Ina e kaao kekahi holoholona iloko o kuu kuleana aina, a me ka pa hale,

Ma HOPENUI, Manoa, Oahu,

ina e loaa ia'u, a i ko'u mau kanaka paha kekahi o keia mau holoholona i haiia maluna ae, e ukuia i hookahi dala ($1.00) no ke poo hookahi, a i na i pilikia na mea kanu, e like me ka nui o ka poino, pela no e nui ai ka uku. Mai ka la e hoolahaia ae ai o ka Nupepa Kuokoa, e lilo ia i kanawai paa a mau loa aku; ina e kue kekahi i keia mau olelo maluna, e hoopii no au ma ke Kanawai no ke komohewa. Me ka mahalo.

Na N. MAKULU.

Manoa, Okatoba 29, 1863.  49-3t*

 

OLELO HOOLAHA.

KE HOOLAHA AKU NEI AU I NA Makamaka a pau o'u mai kela a keia kihi o ka Mokupuni o Molokai, ua wehe ae nei au i keia la, he hale kuai,

Ma Kaluaaha,

ma ka Mokupuni o Molokai, a ua hiki i na makamaka o'u ke hele mai e kuai i na mea o na ano a pau, e pili ana i ka hale kuai. Oia hoi na lole kane, lole wahine, aila kukui, kopaa, a me na mea e ae he nui wale.   W. R. WRIGHT.

48-4t*  (Mika Laiki )

 

OIHANA LOIO!

JOHN L. NAILIILI, AIA KONA KEENA Oihana Loio, ma ke Alanui Nuuanu, makai iho o ka Hale. Kuai o A. S. Cleghorn, ma ka Hale AI o na Kanaka Hawaii, i kapaia

O HALEOLA,

ma Honolulu, Oahu. Ua makaukau oia e kokua ma ke ano Loio i ko oukou mau pilikia ma ke Kanawai no kela hewa keia hewa i hoopii ia ai oukou, a ua makaukau no hoi oia e hana me ka maemae loa, a me ka pololei, i ko oukou mau, Palapala Kuai o kela ano a me keia ano, me na Palapala Hoolimalima, me na Palapala Haawi Waiwai Paa a Waiwai Lewa, na Olelo Ae Like o kela ano a me keia ano, na Palapala Hoopaa o kela ano keia ano, na Palapala Moraki, Waiwai Paa a Waiwai lewa, o na Palapala Hoohui o kela ano a me keia ano, a me na Palapala Hoopii i na Ahahookolokolo, no kela hewa keia hewa Kivila a Karaima, a me na Palapala Kauoha a pau, a me na Palapala a pau o kela ano a me keia ano. E ninau no ia ia no ka uku.

Honolulu, Nov. 7, 1862.  50-1y

 

OLELO HOOLAHA.

OWAU O KA MEA NONA KA INOA MA-lalo nei, ke hai aku au ma ke akea. Ua laweia ke AHI i I-a koho na ke Konohiki,

Ma Honomalino, Kona, Hawaii

nei. No ke komo ana mai maloko o ka mile hookahi e like me ka Kanawai Kivila, aoao 62 , pauka 387, a hiki i ka pau ana oia Kanawai, e pili ana i ka i-a koho a ke Konohiki; a nolaila, o ka poe a pau e lawaia ana ma ke ia mau KOA AHI,

Ainahou a me ka Maua,

e hoomanao i ka mahele o ke Konohiki a me ka lawaia. O ka mea kue i keia olelo maluna e lawe no au i ka Lunakanawai, a no ka oiaio o na olelo maluna, ke kau nei au i ko'u inoa.

D. W. KALUAIHALAWA.

Luna Malama Aina

Honomalino kai, Kona, Hawaii, Oka. 29, 1862.  50-2t*

 

KA LAKO HALE

A ME NA

Pahu Kupapau!

AUHEA OUKOU, E KA POE E MAKEMAKE ANA E kuai ma ke ano makepono wale ! Eia no ke waiho ia ma kuu Hale Paahana, ma Alanui Papu.

NA PAPA KAUKAU!

NA LAKO HALE!

NA PAHU KUPAPAU!

PAHU KOA.....$12.

                UA loaa na hoi na mea hoonani Pahu Kupapau he nui loa, a e kuaiia no ka uku makepono.

                A ua makaukau no hoi au e kuai aku i na mau mea hoolako hale, a ka poe e makemake ana e kuai me a'u no ke dala. No-laila, ke makemake nei au e kuai aku i na lako hale o hai me ka uku aku i ke dala maoli, a ua lako hoi i na mea hoolako hale no ke kuai aku ia hai, no ke kumukuai emi loa.

HANALE ALENA.

37-6m  Alanui Papu