Ka Nupepa Kuokoa, Volume I, Number 51, 16 November 1862 — Page 4
Ka Nupepa Kuokoa.
Ka Nupepa Kuokoa.
KA MOOLELO
—O—
MURATA.
HELU 1.
O MURATA, OIA KEKAHI O NA Generala koa loa o Napoliona mua, i a oia hoi ke kane ui hookahi o kona wa i ka hololio, a no kona koa a me kona ui; nolaila, ua mare oia ia Karolina, ke kaikuahine o Napoliona, a ma ia hope mai, ua noho oia i Moi no ke Aupuni o Napela.
Aia i Felorida o Achille, ke keiki makahiapo a Murata i noho Moi ai no na Sisili. Ua holo malu mai oia mai Farani mai, a ua noho i Amerika, ilaila i loaa'i ia ia kahi hoomaha ; no ka mea, o kahi hoomaha no ia o na poe koa he nui wale, nana i hoonaueue ae o Europa mai kona waiho malie ana. O na Moi, na'Lii, na Ilamuku, a me na poe hanohano he nui wale, ua hoio ae i Amerika, e noho ai ma ka malu o na eheu o ka Aeto.
Ekolu ano kanuka a ka wa kaua e lawe ai a hoikeike, i mea nana e hoopuiwa mai ka honua a pau, ma ka lakou mau hana koa. O ka mua, o ka poe ikaika e ake mau ana i ke kaua, a e komo holookoa ana hoi iloko o ka make. I ka wa kaua ole, aohe lakou e hiki i kahi hanohano ; no ka mea, aohe wahi a ia poe e hana'ku ai i ko lakou mau manao koa; aka, i ka wa kupikipikio, ka wa e hiki ai i ka lima kakauha a me ka naau koa ke lawe mai i kekahi Kalaunu me ka lima ikaika, oia ka wa a ia poe e ala mai ai, me ka hele iloko o na make a ke kaua, me he mea la o ko lakou wahi mau ia. O ka makamua o keia poe, o ka Ilamuku Ney (Marshall Ney)—ke koa haaheo pio ole, nona ku inoa i kapaia, " Ke Koa o na Koa."
O ka papa elua o keia poe, ka poe e makemake ana e kiola i ka lakou a pau ma ke kaua hookahi, o lakou no hoi ka poe pomaikai i ka wa o na haunaele nui. Aka, i ka wa kaua ole, ua lilo ia poe, he poe palaualelo, a he poe i kaulana no ka hana hoohaunaele a me na mea ano kolohe e ae. I ka wa kaua, he nui wale ko lakou hana ana i kekahi mau hana koa loa, a no ko lakou koa loa, ua kanu iho lakou i ko lakou inoa me ke kaulana nui, ma ke kihapai o ka wa pau ole. Ma ke poo o keia poe o Ilamuku Iunot (Marshall Junot,) ka mea nona ka inoa o ke " Kikiao Makani."
O ka papa ekolu, oia ka poe koa me ka haaheo a me ka hookiekie no hoi, i awili pu ia me ka lakou mau hana. Ua komoia ko lakou mau puuwai e ka manao ake mau no ka nani, a me ka hanohano, mai ko lakou wa opiopio mai, a e ola ana ia poe, me he mea la i ka wa o ka poe koa o ka wa kahiko. E kau muu ana no ko lakou iini i na kahua kaua, a me na wohi e hiki ai ke hana i kekahi hana nui. aole lakou e hiki ke koiia e komo ilokoo na hana e oluolu pono ai o ke ola, i na wa kaua ole. Ia poe, ua lilo ke ola he mea ole, ke ole e huipuia me kekahi mau hana koa, a me na mea kaulana e ae. I ka wa kaua ole, he moeuhane wale iho no ka hana a ia poe, me ka hele i na hana lealea e ae. Aka, i ka wa kaua, o ko lakou waiolu ia, ua hele lakou iwaena o na haunaele, me he mea la o ko lakou wahi mau ia. O na mea, e makauia ana e ka poe e ae, he mea oleia ia poe. Ma ke poo o keia poe ma ke aloha aina o Pa-trick Henry, ma ke ano koa hoi o Murata, nona ka inoa o ka " Prieux Chevalier."
Ua hanau o Iokimo Murata, i ka la 25 o ka malama o Maraki, M. H. 1767, ma Basatide, he wahi kulanakauhale uuku, he umikumamalua mile mai Cahors aku. He haku kona makuakane no kekahi wahi Hale Hotele uuku ma ia wahi. He kanaka hoopono oia, a he kanaka hana no hoi, he ohana keiki nui kona, aole nae he ano mikimiki o lakou, e like me ka mea nona keia moolelo, ua kapaia oia he keiki makau ole, e ka poe o ko lakou wahi. Ua like kona akamai i ka hololio me he kauaia Arabia la, a ma ka hololio no o kona makuakane oia i maa'i i ka hololio, a lilo ai oia i koaa mau la he kanaka akamai loa i ka hololio No kona ano koa, a me kona mikimiki no hoi; nolaila, ua lilo oia i Beniamina na kona mau makua. Ua noho kuene kona makuakane, no ka ohana o Tallyrand, a no ia mea, ua hookomoia o Iokimo Murata i ke kulanui o Cahors, me ka imi hoi i ka naauao, a me ke aoia i na mea e hiki ai ke lilo i Kahunapule. Ua koho na makua ia ia ma ka oihana kahuna; aka, aole nae oia i kupono iki no ia mea, aole e hiki ke ao aku ia ia. Ua malama ole hoi oia i na mea i aoia aku ia ia, a ua komo oia i na hana ino a pau; ua hoowahawahaia oia e kona poe kumu, a ua alohaia hoi e kona mau hoapaani. Aole i hana iki ua o Murata ke kahuna, i na mea e pili ana i kana oihana; aka, ua hana oia i na mea a pau e kue ana i ka oihana kahuna. Hoike mai na kumu i ka ino nona, a hai mai hoi i kona mau makua, aole he hana pono ia Murata, hookahi wale no o ka hana koa ka mea kupono ia ia, a ua pololei hoi ka olelo a na kumu ia hana ana. I ka haalele ana i ke Kulanui o Cahors, komo oia iloko o ke Kulanui o Toulouse. He nui na mea pono ole i oleloia nona i na la o kona noho ana ilaila, he oiaio paha, aole paha, aole i maopopo; aka, me he mea la no nae ua ku no na mea i oleloia nona. Ma ia wa, ua loaa ia ia kekahi wahine, a ua hakaka oia me kekahi mea nona ua wahine nei, a ua lilo no ia ia, o kona holo malu aku la no ia, a hiki i kekahi wahi kuaaina, ilaila oia i noho pee ai, me ua wahine nei, a hiki i ka wa i pau ai o kana wahi dala ; alaila, hoike hou mai oia ia ia iho imua o kona mau hoa. No ia hana ana ona pela; nolaila, ua kiola ae oia i kona aahu kahuna, a iloko o ka manao kaumaha, ua komo koke oia i ke koa, iloko o kekahi papa koa e hele ae ana ma ia wahi ia wa. A no kona ikiiki i na kanawai koa ; nolaila, ua kakau aku oia i kona kaikuaana, e noi ana, e hookuuia oia mai ka noho koa ana. Ua ae mai ke kaikuaana ona, ke hoi hou nae ua o Murata i ke kula. Ua ae aku oia, a ua hoi hou no hoi i ke kula ; aka, ua nui loa nae kona uiha ia noho ana ; a nolaila, ua haalele oia i ke kula, a hoi aku no hoi e noho kahulio ma ka hale o kona makuakane. Aole no hoi i liuliu, ua hoopailua oia ia noho ana, a ua komo hou aku no hoi i ke koa. Aole no i liuliu komo hou no ka hoowahawaha i ka noho ana koa, a nonoi hou no e hookuuia mai. Ma ia manawa oia i apuka ai i kekahi haole, ma ke kuai ana'ku i kekahi wahi pahu waiho paka i hamoia i ke gula, me ka olelo aku nae he gula maoli, aole nae o ke dala ke ke kumu o kona hana ana ia mea. He keiki hoa koa nona, ua makemake e haalele i ka noho koa ana, aia nae a uku aku i mau dala ; alaila, hookuuia, a nolaila kona kumu i apuka'i i ua Iudaio la.
(Aole i pau.)
Halawai Mua
—O—
KA AHA HUI MISIONARI HAWAII
—O—
CALIFONIA.
Ma ka hora ekolu o ke ahiahi o ka la 14 o Mei, M. H. 1862, ua hui makou na kanaka Hawaii o keia wahi, e kuka no na kumu nui e holo ai ka malamalama iwaena o oa Inikini e noho ana iloko o ka pouli ma Califonia nei.
Ua hoolilo ka Aha ia T. W. Kulika i Lima Hoomalu, a o Moses Nahola i Kakauolelo.
Alaila hai mai ka Luna Hoomalu i na kumu manao a ka Aha e noonoo ai;—
1. Heaha la ka mea e holo ai o ka malamalama mawaena o ka lahui Inikini ?
2. E noono ka Aha i inoa kupono no keia Aha Hui.
Alaila ku mai la o Kapuaa a hoike mai i ke ano o ka noho ana o ka lahui Inikini ma Califonia nei, a ua kokuaia e Nalau.
Ma ke noi a Kapuaa, ua lilo ka Aha ma ka noonoo ana i inoa kupono no keia Aha : A o keia ka mea i kohoia;—
KA AHA HUI MISIONARI O CALIFONIA.
A ma ke noi a Nalau, e koho ka Aha i Komite nana e noonoo i ke kumu manao akahi i hoakakaia maluna, ua lilo ka Aha ma ka balota ana.
L. H. Kapuaa, H. R. Nalau, a me J. M. Kake, oia na Komite i kohoia.
Alaila wehewehe mai ka Luna Hoomalu no ka noho ana o na Misionari ma na aina Pegana.
Ma ke noi a Nalau, e hoopaneeia ka halawai i ka la 17 o Mei, ma ka hora 7 o ke ahiahi. Ua hooholoia.
Pule ka Luna Hoomalu: a pau ia ; ua hoi nui na hoa ma ko lakou wahi.
MOSES NAHORA, Kakauolelo.
Irish Hill, Eladorado Co, Cal., Mei 14, 1862.
OLELO HOAKAKA.
O kakou kekahi o na kanaka Hawaii e noho ana ma Califonia, no ko kakou aloha i na uhane o ka poe Pegana e noho ana ma ka moana Pakipika, a ma Califonia nei, ua hoolilo ia kakou iho i Aha Hui, i kapaia, " Ka Aha Hui Misionari Hawaii o Califonia."
NA KANAWAI.
1. Na Luna o keia Aha, he Luna Hoomalu, he Kakauolelo, a me ka Puuku.
2. E kohoia na Luna o keia Aha ma ka balota ana ; e noho Luna no lakou a hala na malama eono. Aka, i na i pilikia na Luna i oleloia maluna, e hiki no i ka Aha ke balota hou i mau pani hakahaka, i ko lakou wa pilikia.
3. Na halawai. I ke ahiahi o ka Poakahi mua o keia mahina kela mahina e halawai mau ai.
Ina ua loaa mai kekahi manao a ka Aha e noonoo ai, alaila, na ka Luna Hoomalu e kauoha i na hoa o keia Aha e akoakoa mai, i ka wa kupono i kona manao.
4. Ma na halawai i na Poakahi mua o kela mahina, keia mahina, oia ka manawa e haawi mai ai kela mea keia mea i kona manawalea, e like me kona manao iho.
5. O kela hoa keia hoa e manao ana e kamailio, e pono ia ia ke ku iluna a pau kona kamailio ana, alaila e noho ilalo.
6. Aole pono o na mea elua, a ekolu paha, ke kamailio i ka wa hookahi.
7. O ka mea e kamailio ana, e pono ia ia ke kamailio imua o ka Luna Hoomalu, aole me kekahi mea e ae, ma ko ano hoopaapaa.
8. E kakauia na inoa o na lala a pau o keia Aha Hui.
9. E lilo ka Aha ma ka hoonani ana i ke Akua i hookahi hapalua hora.
10. E akoakoa mai na hoa o keia Aha mamua o ka hoonani ana i ke Akua.
11. E kahea ke Kakauolelo i na inoa o na lala o keia Aha mamua o ka hoonani ana.
HEAHA KA MEA E HOLO AI KA MALAMALAMA
MAWAENA O NA INIKINI ?
O makou o na Komite a ka Aha i hooholo ai, e imi i ke kumu nui e holo ai o ka malamalama iwaena o na Inikini.
Nolaila, eia malalo iho nei na inoa a makou i hooholo ai, e like me ke kumu manao a ka Aha iwaiho mai ai na makou e noonoo.
1. O ka pule, ke manao nei makou o ka pule ka hana nui e pono ai, a na ke Akua no e wehe mai i na naau o ka poe e noho ana iloko o ka pouli, e like me kana i hai mai ai ma Luka 10 :2. E pule nui aku i ka Haku nona ke kihapai. Pela no ma Mat. 9 : 37, 38. A ma keia mau kumu, e pono i keia Aha ke noonoo nui.
Nolaila, e pule nui aku kakou i ke Akua i hooko mai oia i ka kakou mea e manao nei, e hoola i na uhane o ka poe e noho ana iloko o ka pouli.
2. O ka lulu. I kela mahina keia mahina, e hiki no i keia Aha ke hoahu i wahi puu waiwai a waiho aku ma ka lima o ka Puuku, a nnna no e hoouna aku i ka Aha Hui Misionari Hawaii ma Honolulu, e like me ke kauoha a keia Aha, me ke noi ana i mau Kumu no na Inikini.
Oia na mea a makou i noonoo ai.
E ola "ka Aha Hui Misionari Hawaii o Califonia" i ke Akua.
Na Komite. L. H. KAPUAA, J. M. KAKE, H. R. NALAU.
He manao paipai imua o ka Aha Hui Misionari Hawaii o Califonia, no ka malama o Iune 1862. E na hoa o ka A. H. M. H. ma Califonia ; Aloha oukou :
He wahi manao paipai ko'u no ka hana a kakou e kukulu nei, e like me ke kauoha a ka Luna Hoomalu ia maua o L. H. Kapuaa, e noonoo i mau kumu manao kupono no keia Aha, e hoike aku ai hoi imua o oukou i keia la.
Ua maopopo paha ia oukou ke ano o ka kakou hana e kukulu nei, e like ke ano, a me ka hana, a me ka inoa, me lakou ka poe e hapai ana i keia oihana ma Bosetona, Ladana, a me Honolulu hoi, ma ka Pae Aina o Hawaii, a ina ua maopopo io ea, e pono ia kakou ke hoomau a hiki i ka hopena.
E like me ka olelo a ke Akua e olelo mai nei, " E aloha aku oe i kou hoalauna, e like me kou aloha ia oe iho. E aloha aku hoi oe i ka Haku i kou Akua, me kou naau a pau, a me koa manao a pau, a me kou ikaika a pau, a me kou uhane a pau," nolaila ea, e pono ia kakou ke noonoo hui i keia huaolelo o ke " aloha."
O ke aloha ke Kanawai i oi mamua o na Kanawai a pau, wahi a ka Palapala Hemolele, noloila, e hoolilo ana au i keia Kanawai i kumu manao mua no keia paipai ana, aole no hoi paha kakou i poina a palaka hoi, i ka hana a ke aloha i na makua o kakou, a me kakou pu kekahi no na makahiki he kanaha a keu aku, ma ka Pae Aina o Hawaii.
Nawai la i lawe mai ka malamalama, a mai hea mai hoi ? Ke hai aku nei au imua o oukou na hoa o keia Aha. O ke aloha ka mea nana i lawe mai, a mai Amerika Huipuia mai hoi i hoounaia mai ai, e ka poe e noho ana ke aloha iloko no na uhane o kakou, ka poe e noho ana iloko o ka pouli, a me ka naaupo.
Ma ke kulanakauhale o Bosetona, Amerika Huipuia, e noho ana ka poe aloha loa i na uhane o ka poe Pegana ma ka honua nei, a ma ia wahi i kukuluia'i he Aha Hui Misionari, e like me keia a kakou e hoohalike nei, a ma ia Aha no i kuhi ai i ke kukui, e hoomalamalama ia kakou ma Hawaii, a me na wahi e ae a pau loa.
I ka hapa hope o ka makahiki 1819, hoounaia mai e lakou na Misionari mua, oia o H. Binamu a me kona mau hoa, ma ka moku Thadeus, a ku mai la lakou ma Kailua, Hawaii, i ka malama o Apelila M. H. 1820, a o kekahi o na'lii oia moku, aia no lakou e ola ana a hiki i kela wa, o Hunnewell kona inoa.
A aeia mai e nalii ko lakou noho ana, e hana i ka lakou hana i hoounaia mai ai, alaila, hoomaka koko lakou e wehe i na ipuka o ka po, e hai mai ana, aia ke ola ma o Iesu Kristo wale no, aole ma ka mea e ae, a aole no hoi he Akua e ae ma ka honua a pau, a malalo iho o ka la, o ka mea wale i kapaia o Iesu Kristo, aia ma ka lani kona wahi, a he mana kona, a nana hoi i hana na mea a pau loa.
Ua maopopo ae la ia kakou, o ke aloha io no ka mea nana i hoomalamalama ia kakou, e like me kela mau olelo maluna, a e like me ko lakou aloha ia kakou, e pono ia kakou ke haawi i ko kakou aloha no kekahi mau lahui Pegana hou aku, e noho ana i ka pouli o ka naaupo, a me ka poelele o ka make ; e haawi io i ko kakou aloha, me ka minamina loa i ko lakou mau uhane ; e pule nui aku hoi i ke Akua me ke aloha oiaio, e nonoi aku a e paulele ia ia, i hiki ai ia ia ke hooko mai e like me ko kakou makemake. No ko kakou aloha i na uhane o ka poe Pegana e noho ana iloko o ka pouli, nolaila, ua hapai ae nei kakou i keia hana maikai, oia ke kukulu ana, a me ka hoolilo ana ia kakou iho i Aha Hui, e like me ia" i haiia maluna.
Eia ka lua o ke kumu manao i keia paipai ana, O ka manaoio; no ka mea, ina ua hapai wale no kakou i keia hana me ka manaoio ole, o ko kakou lilo no ia imau kupapau make, e like me Iakoba i olelo mai ai. O ka manaoio hana ole ua make ia, a pela hoi ke kino uhane ole.
Ke ike nei no hoi kakou i ka poe huli waiwai o ke kino, ua hui lakou me ka manao lokahi, e imi i ko lakou waiwai, ua hookumu hoi lakou me ka manaoio nui loa.
A pehea la hoi ko kakou manao no ka Aha Hui Misionari o Ladana ma Beritania ? E olelo anei kakou ua hana wale no lakou me ka manaoio ole ? Ina pela ko kakou manao ua kuhihewa kakou, kuhihewa loa !
Ua hapai lakou i keia oihana mamuli o keia kumu manao, o ka manaoio, i hooko ia e ke aloha nui iloko o ko lakou naau, no na uhane e noho ana i ka pouli a me ka malumake.
Ua kanaono paha a keu na makahiki mai ko lakou hoouna ana mai i na Misionari e hele mai ma ka Pae Aina o Tahiti, e ao mai, a e hoohuli ia lakou mai ka hewa a i ka pono, e hai ana aia ke Akua i ka lani, he Akua mana o Iehova kona inoa.
Mai ka hiki ana o na Kumu ilaila a hiki i keia wa, ua malama lakou, a pela no kekahi mau mokupuni hou aku ma ka hema, a me ke komohana, a me na mokupuni e ae ma ka hema o ka poaiwaena, e like me kakou ma Hawaiii. E na hoa o keia Aha, ua loihi o Tahiti mai Ladana mai, a pela o Hawaiii mai Amerika mai; aka, ma ke aloha a me ko lakou manaoio, aole lakou i kanalua i ka lawe ana mai i ka malamalama, a me ke ola, ma o Iesu Kristo la, no ka mea, ua hookokokeia e ke aloha a me ka manaoio.
A pehea hoi kakou ? E waiho wale anei kakou i ko kakou aloha ? Aole e haawi i keia mau uhane he lehulehu ma Califonia nei, no ka mea, ua kokoke loa kakou ia lakou la, a ke noho pu nei no hoi iwaena o lakou ! E pono i keia Aha ke noonoo nui i na kumu manao i haiia maluna o le aloha a me ka manaoio.
E pule nui aku kakou i ke Akua me ke aloha, ka manaoio, a me ka minamina loa i na uhane o na Inikini Pegana o keia aina, e lulu hoi kakou me ka manaolana loa, a mahope aku e hoiliili mai no hoi, alaila, e loaa ia kakou ko kakou uku, no ko kakou hana aloha ana aku ia lakou.
E kukulu kakou i keia hana ma ke kahua pohaku o ko kakou naau, i ole ai e hiolo a hina hoi, ke hiki i ka wa e komo mai ai ka palaka, ke kui-he, a me ke kanalua, e like me kakou i aloha ia mai ai, pela no kakou e aloha aku ai.
Oiai ua lalau ko kakou mau lima i ka oopalau, nolaila, e pono ia kakou e nana imua. E lawe hoi kakou i ka pahikaua o ka uhane, e kaua me na manao kanalua iloko o ko kakou naau, i ole ai kakou e kui-he, a hoi hope e like me ka wahine a Lota.
E na hoa, e hooikaika kakou ma na hana maikai, e hoomau hoi a hiki i ke oo ana. E aloha auanei oukou. H. R. NALAU.
KOMITE.
J. H. COLE.
LUNA KUDALA,
Ma ka Hale Pohaku o Mi. Aniani ma.
Ma ke Alanui Alii Wahine. 53-6m
H. W. SEVARANA.
Luna Kudala a mea Kalepa.
Hale Mahoe.
Alanui Aliiwahine.
33-6m
OLELO HOOLAHA.
O KA MEA NONA KA INOA MALAlo nei, ke papa aku nei oia i na kanaka, haole, a me ka pake, o kela ano kanaka keia ano kanaka a pau, e nana mai ana. Ke papa aku nei au i na mea a pau, mai hookuu wale oukou i ko oukou mau holoholona, ma ka Apana kula o
Ukumehame,
mai ka pali o Manowainui, e pili ana me Waikapu, ua kapu ia Apana kula. Ina i loaa kekahi holoholona e hele ana ma ia Apana kula i oleloia maluna, e uku mai ka mea holoholona $1.00 (hookahi dala,) me ke kao, a me ka hipa, ewalu poo $1.00 (hookahi dala.) Ina aole e loaa mai ka uku e like me na mea i oleloia maluna, alaila, e hookomo ana kuu kanaka ma ka Pa Aupuni, no ke kolohe i ka mauu o ua Apana kula la me ke kuleana ole. P. NAHAOLELUA.
Hope Luna Aina o ka Moi.
Lahaina, Maui, Maraki 31, 1862. 19-tf
ILI BIPI, ILI KAO.
E UKU AKU NO O F. S. Pratt & Co., ma ko laua Hale Kuai, ma ka
Hale Mahoe.
I ka uku makepono loa no ka mea i haiia maluna. O Mr. J. C. Spalding (Polena,) ka mea i kamaaina loihi ma ke kuai ana ma a mea, ka mea nana i hooponopono ma ia mea. 46-3m
OLELO HOOLAHA
I NA KANAKA HAWAII!
Makai iho o AIGUPITA!
Ma hope iho o ka Pa
O MAHUKA !
KA
Pa Kuai Papa
O
LUI, C. H. LEWERS,
MALAILA E LOAA AI NA PAPA O KELA ano keia ano, me ke kumukuai makepono loa, nolaila, e naue mai oukou e ike i ka oiaio o keia leo paipai ia oukou e na makamaka Hawaii.
NA PAPA OLEGONA,
LAAU HALE A ME NA POU,
LAAU KAOLA A ME NA PINE PA,
LAAU AAHO HALE PILI MAOLI,
PAPA ULAULA, PAPA PAINA,
PAPA KEPA A ME KA AAHO,
PILI ULAULA A ME KE KEOKEO.
Eia ka mea
KUPANAHA
Ma keia hale — maanei i wiliia'i ka
PALAOA a ma ka HANA PAHU,
e like loa me ko
ULAKOHEO
mamua, i kona wa e kau ana, aole i pau i ke ahi mamua ; nolaila, e naue mai e makaikai.
Na Pena Keokeo a me ka Omaomao,
Na Pena Ulaula a me ka Eleele,
Poho, Kolu, Hulu Pena,
KUI o na ano a pau,
LAKA o na ano a pau,
Ami, Kilou, Kui kakai moena,
Kui Nao,
Pani Hale,
Pani Aniani, Pake,
Aniani kaawale,
Pani Olepelepe,
A PELA WALE AKU.
Aole o'u hoolimalima i poe e koi aku i na kanaka e kuai mai ma ko'u wahi; aka, he hilinai no wai ma ke ano maikai o ka'u mau mea kuai, a me ka emi no hoi o ke kumukuai o ka'u papa, me ka malama pono hoi i ka'u oihana iho, i hoomauia mai ai ka lokomaikai, i loaa mau ia'u maua aku nei.
Honolulu, Okatoba 30, 1862. (49-3m) LUI
E MAKAALA!
OWAU
O KAMUELA,
KA HOA KUAI O NA
KANAKA HAWAII,
NONA KA HALE KUAI PAPA MAuka iho o ka
Hale Hookolokolo
ma Honolulu. Ke hai aku nei au ia oukou, he mau la ku wale no keia o kuu moku papa,
O "Francisco,"
a ke ku mai oia, e loaa ana ia'u na
LAKO KAPILI HALE
o kela ano, keia ano.
EIA NO KE WAIHO NEI.
NA:
PAPA O KELA ANO, KEIA ANO.
LAAU HALE, o kela ano, keia ano.
PILI HALE,
PINE,
AAHO,
KEPA,
PANI PUKA
PUKA ANIANI,
OLEPELEPE,
KUI,
PENA,
AILA PENA,
WAI HOOMALOO PENA.
IA MEA AKU, IA MEA AKU,
Ua makaukau au e kuai aku me ka oluolu i keia mau mea, a no ka maopopo no paha ia oukou he KEIKI KAMAAInA au, he hiki ia oukou e ka Lahui
Mai Hawaii a Niihau,
ke kipa mai i o'u nei. E hiki ana no na moku papa o'u i na manawa a pau, a hoolako mau ia'u. He mea mau i na poe o ka hiki mai ka haanui, a me ke kaena. A he mau Luna kekahi i hoonoho ia e lakou e alako ana i ka poe maikai, me he lawehala la Aka, he hiki ole ia'u ke hana pela, o ko'u ano no ka oukou e imi, mai a loaa, maopopo no na hana a kakou, no ka mea, o ko Hawaii nei kupa ihola no ia, o ko oukou makamaka.
KAMUELA. (Kaikaina o Kimo Pelekane.)
Honolulu. Sept. 19, 1862. 43-8m
J. P. HUGHES.
MEA HANA
NOHO LIO!
AIA MA KA HALE KUAI O KA mea nona ka inoa maluna nei, he Noholio Pelekane a he Noholio Meleka, a me na Noholio Wahine, o na ano a pau, na Noho Paniolo nu hou.
NA HAO WAHA a me NA KEPA o na ano a pau,
NA KAULAWAHA, a me na mea e pono ai ka lio.
NA ILI KAUO o na ano a pau.
NA EKE ILI.
NA HUIPA.
NA HAO KEEHI.
NA PALAKI LIO,
NA KAHI LIO.
A me na mea e ae a pau loa e pili ana i na lio a me na kaaholo, a e kuai ana no ia mau mea,
No ke kumukuai makepono loa!
Aia no ke wai mau nei malaila na pela mauu.
O na pela pulu, na pela hulu, a me pela uwaea. E hanaia no e like me ka mea i kauohaia mai.
Ua hanaia no na kaa lealea me ka maikai loa, a me ka makepono hoi.
Ua hana hou ia na mea a pau e pili ana i ka'u oihana me ka maikai.
E malama pono ia no na mea a pau i kauohaia mai e pili ana i ka'u oihana. E loaa no wai ia oukou ma Monikahaae, ma ke kihi o ke Alanui Hokele a me ke Alanui Papu.
J. P. HUGHES.
Honolulu, Okatoba 4, 1862. 19-45-1y
HOONANI HALE.
Makepono.
O KA POE A PAU E MAKEMAKE ana e loaa na mea maikai e hoonani i ko lakou mai hale, e aho e naue mai o ka Hale Kamana o ka mea nona ka inoa malalo, ma ke Alanui Hotele, a malaila e loaa'i ia lakou na
PAPA KAUKAU NUI A LIILII HOI,
NOHO O NA ANO A PAU,
MOE O NA ANO A PAU,
PAHU KUPAPAU.
E ku mai ana mai Bosetona mai, ma ka moku George Wasinetona, ma ka malama ae nei o Ianuari, he mau mea HOONANI HALE o na ano a pau, a e kuai Emi aku no au. E hele mai e nana a Kuai iho.
C. E. WILLIAMA. (UILANA.)
Honolulu, Iulai 2, 1862. 32-6m
HALE HANA PIULA.
O
F. H. & G. SEGELKEN.
MA KE ALANUI NUUANU, MAKAI IHO o ka Loiala Hotele. Mau mea hana, a kuai Piula, Hao, Keleawe, a me na mea e ae e pili ana i ka
Oihana, Piula,
A e hoomoe hoi i ka Piula Wai, me ka hooponopono kupono i na mea a pau e pili ana ia oihana. Ua lako mau i ka Piula Wai maikai. E hele mai e ike no oukou iho. 33-6m
KAKELA ME KUKE.
MA KA HALE POHAKU HOU, MA POLELEWA kahi kokoke i ka Halepule Betela ma Honolulu, Oahu. Na laua no e kuai i na lole o
Kela ano keia ano.
NA MEA AI,
NA BAKEKE,
NA IPU TINI,
NA PA LEPO,
NA KAMAA,
NA PAHI me na O-O,
NA PAPA me na NOHO,
NA IPUHAO,
NA NOHO LIO,
NA MEA E KAKAU,
NA PENA ME NA AILA,
NA MEA MAHIAI.
A me kela mea keia mea.
Me na laau a Dr D. Jayne.
Honolulu, Dekemaba. 1861.
HANA! HANA!!
UA MAKAUKAU AU E kepa i NA kanaka Hana Mahina, no na
KANU KO,
ma Hilo nei. Ina ua makemake kekahi kanaka e loaa i hana nona iho, ma na aina o Kaupakuea, Onomea, Kaiwiki, Paukaa, a me Amauulu paha, e hele mai ia'u, a na'u no e hoomaopopo ia oukou ka uku, a me na mea a pau e pili ana. Na'u na
D. H. HITCHCOCK.
Hilo, Hawaii, Aug. 20, 1862. 41-3m
MEA KUI POI MAIKAI LOA.
UA MAKAUKAU KA MEA NONA KA inoa malalo, e hana i
Wili Kui Poi Maikai,
i mea nana e hoowali a Poi e like me ka lima kanaka; a he mea no hoi e hoouku ana i ka luhi o ka hana ana i ka Poi no ka ohana a no ka hoopukapuka paha. Aohe luhi iki o ka hana ana, he wili malie wale no, a aia hoi ua AEAE ka Poi. Na ka wili no e kui, hoowali, a kupele hoi i ka Poi me ka malaki loa, o ka poe a pau e makemake ana i
Wili Kui Poi
no lakou, e pono e hele ma ko'u hale, ma ke Alanui Alakeu, a ilaila hoi e ike ai i ke ano o ua wili la, he emi loa ke kumukuai.
56-1m* PETER RICHMOND.
Olelo Hoolaha.
E IKE AUANEI NA MEA A PAU. O WAU o ka mea nona ka inoa malalo nei, ke hai aku nei au ma i ke akea, no ka'u wahine mare,
No Kahalehau,
no Niulii, Kohala, Hawaii, no kona haalele ana mai ia'u, i ko'u wa e waiho ana iloko o ka pilikia mai; ku kela a hele mamuli o ke koiikoni ae a ka poe ui; me ka olelo iho, opala ia mea, eia keia manawa i ka Peresidena. Nolaila, ke papa aku nei au i na mea a pau, mai ae aku ia ia ke aie aku i ko oukou waiwai ia ia. na na no e uku kona aie, aole au e hookaa, o poho oukou e like me ke Kanawai. JOHN IMAKUA. Kikihale. Honolulu. Oka. 25, 1862. 49-1m
Olelo Hoolaha.
E IKE AUANEI NA KANAKA A pau ke nana mai, owau o ka mea nona ka inoa ma-lalo iho. Eia ma ko'u lima kekahi lio hele hewa, o kona ano, he
Lio wahine hulu lokia,
aole i kuniia i ka hao, ua malama au ia ia mai kona wa uuku mai a hiki i keia manawa. E kii koke mai ka mea nona keia lio, me na dala he $10, a i olu e kii mai a hala na la he 30, mai keia la aku, e kuni no au i ko'u hao kuni i lilo ai ia ia'u.
Na KEPEA.
Niulii, Kohala, Hawaii, Oka. 6, 1862. 49 lm*
MOKU HOLO MAU!
KE HAI AKU NEI AU I NA KANAKA A PAU, e holo mau ana ka moku kiakahi, i kapaia
Express,
oia o "AINAHOU," i kela Poakahi keia Poakahi, no ka mokupuni o Molokai, a waho e ae paha. Nolaila, e pono i ko Molokai poe ke makaala ma na Awa ku moku,
MA:
PALAAU,
KAUNAKAKAI,
KAMALO,
PUKOO,
a me ONOULI.
Me ko oukou mau ukana a ohua hoi, e hooili ai maluna o keia maoku holohikiwawe loa. Ua keu aku ka holo a me ka maikai i keia wa no ka hana hou ia ana, aole hou he lio. Nolaila, e pono i kela mea keia mea ukana a ohua hoi ke hookokoke mai ma keia mau awa, a he oluolu no hoi ka uku ana.
J. W. KAIKAINAHAOLE.
Honolulu, Aug. 29, 1862. 40-6m