Ka Nupepa Kuokoa, Volume I, Number 55, 13 December 1862 — Na Ana. [ARTICLE+ILLUSTRATION]

Na Ana.

Ua pai iho makou maluna'e nei ike Kii o kekahi Ana. Ma kekahi mau wahi oka honua, ua nui loa na Ana nui a hohonu no hoi. Ma ka mokuaioa o Kenetuke, ua lehulehu loa na Ana a ua nunui no hoi, a o ka oi hoi o ka nui, oia no ke Ana Mammolh, aia mawaena o ke alanui e hele ana 1 Luisavili a me Nasavili, he umi mile o kona loa malalo o ka honua, a oia hoi kekahi ona mea kupanuha nui oka honua. iloko iho nei o keia wa kaua malaila, ua lilo ia mau Ana i wahi na na kipi e huna'i i ko lakou waiwai me ko lakou ai, a i wahi no hoi e huna'i i na waiwai a lakou i haowale mai ai mai ka lima mai o na poe makamaka oke aupuni, ame ko lakou mau lako kaua pu no hoi. Malaila na kip» e huna'i i ko lakou mau koa, a me ko lakou mau lio, a o na kiu a lakou ke hele e hoomakakiu i ka wa kupono e kii aku ai e hoouka i na poe enemi-o lakou, alaila, holo aku la lakou he 100 paha a keu ae, a hao mai la i ka ai, a me na mea kaua e loasL ana ma ko lakou lima, a holo loa'ku la i na kulanakauhale e puhi ai i ke ahi, a hoi aku la iloko o ua mau Ana nei, mamua o ka hiki ana i na koa aupuni, ke aua i ka lakou hana ino ana.