Ka Nupepa Kuokoa, Volume II, Number 2, 10 January 1863 — Ua pupule paha o P. [ARTICLE]

Ua pupule paha o P.

E ka Nupepa Kuokoa e; Aloha oe: Ina he mea oluolu i kou manao, a me kou mau Luna Hooponopono, e hookomo iho i ka'u wahi ukana maloko o kau kino puipui, a nau hoi ia e lawe aku ma na kihi eha o ka Pae Aina o Hawaii nei. Aia ma ka Helu 7 o ka Pakipika, o ka la 27 o Nov., ua ike au i na olelo hoonawali, a hoanapuu, a ka mea nona ka inoa e kaukehakeha e la maluna, ke paukiki mai nei o ua o P. i ka holo, me he mea la o Keliikukahaoa, me ka hoomaopopo ole i kana wahi e holo ai, a me he pupule la no hoi, wahi a kela mau muaolelo ma ke poo o keia kumu manao, a na kana mau olelo hoeha manao i kapa mai ai ia'u i ka "Hookohukohu akamai, i kona mai ia'u e pane aku ia ia me ka wiwo ole." Wahi ana e olelo mai nei, ua hana ka wau i na ninau a'u i hoopuka aku ai ma ka Helu 51 o ke Kuokoa, i manao mai ai ka poe heluhelu Kuokoa, he kanaka akamai au, ku no ka uwahi ia oe; ina pela, ke ninau aku ne au ia oe, ua hana anei o S. N. Nahakuelua, i na ninau olelo e, i paiia ma ua Helu la. Ke olelo mai nei o ua o P., owau wale no ka mea hiki ke wehewehe i ua mau ninau la, ke manao nei au, he nui no ka poe hiki ke wehewehe mai i ua ninau la, aole owau wale. U hoi! o ka ihu i-a, pehea ka hoi oe e wehewehe mai hoi paha? He palolo maoli kau kamailio ana. Ke i hou mai nei ua hoa nei, "E lilo ana ka wau i kanaka nui iwaena o kakou, no kuu hoopuka ana i ua ninau la. Auhea oe e P. lalau? E nana hou iho oe ma ka Helu 46 o ke Kuokoa, a e ike no oe i na ninau olelo e a pilipo, Piliwale, a me Kahinalua. Eia hou no ua wahi kaaka nei ke namu mai nei, e unuhi aku ka wau i ua mau wahi ninau la. Kehehe! heaha iho ka hoi ka Kahinalua unuhi mai, no ka mea, ua waihoia aku nana e hai mai ka haina kupono, a ua ike no hoi au i kona akamai i ka unuhi ana i na ninau olelo kapakahi a J. D. Ilaha, ma ka Helu 39 o ka Nupepa Kuokoa me ka mikioi loa, a i aha iho la hoi keia? I puka ma ka eke a Hagaea ea? Kihihi! auwene! pela io ka e ke hoa, ke hai aku nei au ia oe, he opala ia mea maanei, e seku aku. Nolaila, ke noi aku nei au e hai mai no o Kahinalua, aole o ka walaau wale no me he akua uwalo la no Haena, o ka lohe aku la no ia, e lulu lima kaua a hoi ae wau ua ahiahi. Me ke aloha. H. KALAIOWAIALUA. Honolulu, Dek. 10, 1862.