Ka Nupepa Kuokoa, Volume II, Number 12, 21 March 1863 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

KA NUPEPA KUOKOA,

 

I kela Poaono keia Poaono.

$2.00 no ka makahiki

ME KA HOOKAA MUA MAI.

----------

NA OLELO HOOLAHA-aole i oi mamua o 20 laina no ka hoopuka hookahi ana. $1.00; alua komo ana, he $1.50; hookau malama, $2.00. E uku mua ia mai ke dala o na olelo hoolaha a pau e hoounaia mai ana e pai.

KA UKU - he hapalua dala ka uku no ka aoao hookahi o ka palapela, oia hoi 2 keneta no ka lalani hookahi-penei: he 25 lalani $1.00; 50 lalani, $1.00; a pela'ku.

KA UKU NO NA OLELO HOOLAHA-ka uku pepa, a me ka uku o ke Kanikau, e haawiia no ma ka lima o na Luna o ke Kuokoa, a i oleia, e hookomo mai no ma ka lata, a hoouna mai i ka Luna Pai.

O NA UKU PEPA A PAU E HOOKAA MUA MAI NO- aole e kauia ka inoa o kekahi haole a kanaka maoli paha, ma ka inoa o ka poe lawe pepa ke ole e hookaa e mai mamua. E pono ke hookoia keia mau rula, no ka mea, he emi no ka auhau no keia nupepa.                                H.M.WINI. (Luna Pai.)

----------

"KA NUPEPA KUOKOA."

Is published in Honolulu

EVERY SATURDAY,

$2 00 per annum, in adance.

----------

ADVERTISEMENTS not exceeding 20 lines, inserted once for $1.00, twice for $1.50; and $2.00 for one month ; all advertisements must be paid for in advance.

KANIKAU will be charged .50 per page.

PAYMENTS FOR ADVERTISEMENTS, Subscriptions or Kanikaus, may be paid to any of the Agents of the Kuokoa , or may be enclosed in a letter to the Publisher.

ALL SUBSCRIPTIONS must be PREPAID. No names, either or foreigners or natives, will be inserted on the subscription list, until paid for. This rule must be strictly adhered to, in account of the low subscription price.

                                                                        H.M WHITNEY.

                                                                                    Publisher.

            Volume I of the KUOKOA, bound, for sale,$4.00 each.

            Persons having complete sets of the above, can have them exchanged for bound volumes, by paying $2.00

 

No na Ale o ka Moana.

 

Naaupo.          

Heaha la na olelo,

O na ale o ke kai!

A'u e lohe mau nei,

I na wa a pau loa;

He leo poiuiu,

He leo weliweli,

He mau ka halulu ana,

Aohe wa e pio ai,

I ka mehameha,

I ka po, a me ke ao,

Oia mau ana no.

 

Naauao

Kuu keiki aloha,

Aole ona olelo,

O ke kai e poi ana,

I na pali kahakai;

E hakaka mau ana,

Aole loa ona wa,

E hoomaha iki ai;

O ka makani kona hoa,

E poi mau nei,

A kupikipikio.

 

Naaupo

Ka makani heaha ia?

Aohe he ikea,

Mahea la kona wahi,

A i hea la e hele nei!

 

Naauao

Aole e ike ia,

Kona kino e kakou,

Hookahi mea ike,

Hookahi wale no,

O ka Mea Mana Loa,

Nana kakou i hana,

Iesu! ka Mesia,

O ka honua nei a pau.

W C L

Honolulu, Maraki 16,1863

 

Ka moolelo o na la hoouka ehiku imua o Rikemeno, mawaena o na Koa Aupuni malalo o Gen G B Makalelana, a me na Koa o ka Hema malalo o Generala Lee.

 

HELU 3.

 

            Ua lawe ae la o Gen. Makalelana ia Frazesr Farm, i wahi no kona mau koa e ku ai, me ka hoolilo ia wahi i kulana waenakonu no kona mau puali. Ua hanaia ia wahi a ikaika me na pu kuniahi nui he 19, a ua hoouluulu ae no hoi i kona mau koa ikaika loa he nui wale ilaila, a malaila oia i kali ai i ka hoouka aku a makou (na kipi.) O ka makou hana wale no o ka ho-a aku i ka enemi mai na wahi e pili ana i ke kulanakauhale alii, a ina e hana ole makou, alaila, e ilihiaia mai no makou e ka poino. He mau mea ia i waihoia mai iwaena o makou. Ua maopopo lea no ia Gen. Makalelana, ke kupiikii loa o kona kulana. Ma ka lalau wale ana o ka hana a Gen McDowell, a me ka hana ino ana a ke Kuhina Kaua E Stanton, a me ka lili a hookeke no hoi o Gen Halleck, ka Alihikaua Nui ma Wasinetona, me he mea la, ua haawiia oia i mea e kumakaua'ku ai na ka make. He lehulehu wale paha na Generala, ina e komohia iloko oia pilikia, ina la ua huli aku i wahi e maha ai iloko o ka make ana iloko o ke kaua. Aka, aole oia i kanalua no ka minute hookahi i ka kau i kona ola iloko oia wa kupilikii loa me ka poino nui no hoi i loaa ia ia, a me kona puali iloko o na la kaua eha, ma ka maka o ka pahikaua, e like me ka hana mau a na'lii kaua koa oiaio.

            Iloko nae oia mau la kaua eha, ua hooliloia ko makou poe koa me he poe iliohae la; no ka mea, ia lakou no i ike aku ai i ka maka o ka enemi, o ka holo like aku ai i ka maka o ka enemi, o ka holo like aku la no ia me ka huro nui. Aka, me ka pioloke ole, a me he mea la e paikau ana, ki mai la na koa o Makalelana me ka wiwo ole. Lele mai la na poka nui o na pukuniahi iwaena o na koa o makou, a nui iho la ka make ma ko makou aoao, a hoomaka koke iho la ka haunaele iwaena o na koa o makou, iloko hoi o ka poe e hoouka kue ana ia Makalelana. Ma ia manawa, hoouna ae la o Gen Lee i na koa kaawale a pau iloko o ke kaua, aka, no ka hoopololei ana o Gen Makalelana i kekahi o kona mau pu, me ka hooili aku no hoi i ka make nui iwaena o lakou, nolaila, ua komohiaia ia poe e ka haunaele a me ke pioloke. Ua anai ia iho na laina holookoa o makou e ka make a ka enemi (Akau) e hooili mai ana. O ka halulu ana o na pukuniahi a me ke kani ana mai no hoi o na pu kaupoohiwi o na haneri tausani e hoouka ana, hui pu ae hoi me ka leo o ka poe i hoehaia e kahea ana e kokua, aole o kanamai o ka weliweli a me ka menemene ma ia manawa. Pela iho la ka lana malie ana o ka hoouka kaua iwaena o ka aoao hoouka iloko oia wahi uuku a hala na hora ehiku, me ka emi o kekahi aoao a me kekahi aoao.

            Ua pau loa mai no na koa ku i ka wa o ko makou aoao iloko o ke kaua, a o ka papa koa o Wilcox (kipi.) ua pau loa na koa i ka hoehaia a me ka make. A ma ia hope iho i ka uhi ana mai a ka po, ua hoomahaia ke kaua, a no ka nui loa o ka maloeloe a me ka luhi o na koa, ua haule iho ma kahi a lakou i ku ai iluna o ka honua, me ka manao ole ae i ka hoa a me ka makamaka i laweia aku e ka make, a e manao wale ana no hoi i kona pomaikai wale iho no. O ka huaolelo "I wai' I wai'" wale no ka puka mai ma ka waha o na koa a pau o ko makou aoao. AKa aole nae he wahi kuluwai hookahi o na piula wai, i ka o ana mai o na lima o ka hiamoe iluna o na koa o makou, aia hoi, ua poina ia iho ka pololi a me ka makewai, ua uhiia mai no hoi ka manao ana'e ia mau mea e ka hiamoe. Ma ia manawa hiki mai la o Gen Lee, a me kona poe, me na kuemaka i hele a luuluu i ke kaumaha, e nana ana i ke ano o na koa i koe iho mai ka make ana, ame ke helehelena inaina, ame ke leo huhu, kauoha aku la ia i na puali o Gen Wise, a me Gen Magruder, e kanu i ka poe i make. Ma ia hope iho, hai aku la ia ia Gen Longstreet i na mea ana i manao ai e hana i ke kakahiaka ae, a holo aku la e makaikai i na wahi e ae o ka laina.

 

Ke ono a me ka hiku o ka la, a me ke kaua ma Malvera Hill.

 

            Oiai no e o mai ana ke alaula o ke ao, aia hoi, loheia aku la ke kani hou ana mai o ka leo halulu o na pukuniahi. Ia po mua ana iho, ua kukuluia he mau pu i hele a pili loa iloko o ka poe enemi, e Gen Anderson (kipi,) a i ka wa i maamaama iki ae ai, aia hoi, ua ike koke ia aku no e ka enemi (na Akau) a ua hoomaka koke ia aku no e ki aku ia mau pu, a ua pololei maoli no hoi ka hana ana a ka poe ki pu o ka Akau, ua kuia no na poka a pau i kiia i ua mau pu nei a ka Hema i kukulu ai ilaila. Ua pau i ka haihai na pu he ehiku, noloko ae o na pu he 12 i kau mua ia ilaila, aka, ua kupaa no nae ke alii ia ia ia mau pu. Mai ka po mai a ao ae, aole no i ai, a i hookomo aku hoi i kekahi wahi mea hooikaika kino e ae. No ka luhi launa ole i na la hoouka mua, ua hele maoli no na koa a nawaliwali, aka, aole nae i emi hope mai kekahi o lakou mai ka hooikaika ana i ka lakou mau hana. Aka, i ka puka ana mai o ka la me kona nani luaole, ua hikiia mai au e ke kanalua, no ka mea, ua maopopo i ka nana ana'ku i ko ka enemi mau puali, ua hiki hou mai ka poe kokua no lakou, a nolaila, ua hiki ia Makalelana ke lawe mai i ka poe hou e ku imoa o kona mau puali, a e hoouka mai hoi ia makou ka poe i nawaliwali no ke komo wahi ai ole.

            No ko Gen. Lee ike ana iho i ke kupilikii maoli o ke kulana o kona poe, nolaila, ua hoopuka ae oia i ke kauoha ia Gen jackson, ina e hee ko makou aoao, alaila, na Jackson e alai mai ko ka enemi alualu ana, a ua kauoha ia no hoi na luna aupuni a pau o Rikemona e hoomakaukau i na ukana a pau no

 

[image spanning top of 3rd and 4th column]

KA OHANA OLIOLI.

            Ma ke Kii maluna ae nei, e hiki ia kakou ke ike iho i ke ano o ka noho ana o na manu a me holoholona hihiu i hoolakaia, a ua kapaia ia poe o ka Ohana Olioli.

 

ka lawe aku i ka Hema. A ma ia manawa, hoopuka ae la ka Alihikaua (Gen Lee) i ke kauoha i na mahele koa malalo o Gen. Hill (2.) Longstreet Cobb Anderson, a me Whitcomb, e hoouka aku i ka enemi i ka wa hookahi.

            A oia paha ka wa i hooukaia'i o ke kaua ikaika loa, mai ka wa i hookumuia'i ke kaua a hiki i keia wa. Ua kini a lehu ka poe make ma ko makou aoao. I ka wa a Makalelana i ike mai ai i ka make nui e komo ana iloko o ko makou poe koa i na poka o na pukuniahi ana, oia no ka wa ana i kauoha ae ai i kekahi puali koa ku i ka wa ona e ki mai i na pukaupohiwi, a ua haule mai no hoi na poka iluna o makou me ka make nui, me he mau paka ua la e hiolo mai ana. Nee mai la kona mau puali imua me ke akahele, a hookokoke malie mai la no hoi a o makou la, a no ia nee ana mai a lakou la, alaila hoomaka koke iho la kekahi mau puali o makou e kiola i ka lakou mau pu, a e holo aku I ko Makalelana ike ana mai i ka haunaele nui iwaena o makou, o koiala wa no ia i hoouna koke mai ai i kona mau koa lio e hele mai e kaua ma ko makou aoao.

            Me ka hikiwawe nui, aia hoi kauoha koke ae la o Gen Anderson i kekahi mau papa koa lio ekolu, e hele e hoouka aku i ka enemi. Nani launa ole no hoi ka lakou hoouka ana mai. Ia manawam oili aku la ka poe koa Tekasa, a komo aku la iloko o na laina o na enemi, a no ka emi hope ana aku o na koa aupuni ia wa, a no ko makou alaila ana mai hoi e ka poka o na pukuniahi nui a Makalelana i kukulu ai, nolaila, ua emi hope hou mai no makou.

            I ka ike ana mai o na enemi i ke pioloke o ko makou aoao, hooho mai la lakou me ka leo nui, "Imua i Rikemona." A komo aku la keia leo iloko o na poe a pau o ka Akau, a hooho lokahi mai la mai o a o, "Imua i Rikemona." I e nui wale na koa i komo i na kaua ma Akanasasa, Misouri, a me na wahi mamao e ae no hoi ma ka Hema, a i ko lakou ike ana i keia aneane pio o ko makou aoao, aia hoi ua haule mai na kuluwaimaka, e hoike ana i ke komohia ana o ke kaumaha iloko o ka iho o ko lakou mau puuwai. A ua olelo iho no hoi ia poe, heaha la ka pomaikai i loaa iloko o ka hoomanawanui ana i keia mau la kaua eono?-a o keaha hoi ka pono i loaa mai iloko o ka hoomanawanui ana iloko o na inea he lehulehu wale? Me he mea la, ua pau i ka lilo aku ia manawa, a e hookamaaina mai ana ke kaumaha iloko o na puuwai o kela mea keia mea o makou. E hee ana na pu kaa a pau o makou, a e hee pu ana no hoi na kou, iloko no o ka hooikaika aku a na'lii e hoomau i ke kaua ana, a e hele hoi imua. Aka, aohe he paa iki mai o na kanaka o ko makou aoao. Ua hele ke koa mai ko lakou mau puuwai aku, a me he mea la ua hiki mai ka hopena o na Moku Hui o ke Hema.

            Iloko o keia mau minute o ka makaua a me ka pioloke ana, hiki mai ana o Gen. Hill (2) me kekahi mau papa koa ana i houluulu mai ai; aka, e nee mau mai ana no nae ka enemi (Akau) i o makou la, a lohe maopopo ia'ku la no hoi ka lakou hooho ana mai i ka huaolelo "Imua u Rikemona" O na koa lio keia o ko makou aoao, ua haalele iho i na koa lio, a ua komo aku iloko o ka puali koa hele wawae. Ia manawa hopu aku la o Gen Hill i ka pahu nae o ka papa koa helu 4 o Karolina Akau-ka papa koa no hoi ana i noho alii mua ai, a kahea aku la ia me ka leo nui, "Ina aole oukou e hahai mai mamuli o'u, alaila, e make hookahi no wau." Ia manawa, holo ae la kekahi mau alii koa he lehulehu wale, e alai mai i ka hiki ana mai e ka make iluna o ko lakou generala aloha. Maliu koke mai la no na koa a hooho lokahi mai la i ka leo. "E alakai e Hill, e ku ma ke poo o kau mau keiki kahiko o Karolina Akau." a wawae ae la ia mau leo iwaena o ke kahua kaua.

            Ia manawa, hoouka aku la o Hill me na loa ana i hoala'i i ka manao aloha. Kaohi mai la ka enemi i ka nee ana mai imua, a i kona ike ana mai i ka poe i hee mua mai, e hoi hou aku ana e hoouka aku ia lakou, a hoouka aku la no hoi o hill i ne enemi, me he mea la he liona i pololiia. A ma ia manawa, nui mai la ka weliweli o ka hoouka ana, aohe manawa e hahao ai i ka pu; aka, ua kaua'ku he lime he lime, a he pahi no hoi he pahi; aole no hoi he weliweli i kanamai o na mea i hana ilaila. Ua poina na manao aloha, ua nalowale ka manao menemene, ua hiamoe ia iloko o ka inaina na manao aloha aku a loha mai, iloko oia mau minute o ka hoouka ana, me ka elau a me ka pahi. Ua make iho ke keiki ma ka aoao o kona makuakane, ua poina ka makuakane i kana keiki; aole no hoi i hoomaopopo aku ke kaikuaana i kona kaikaina e waiho make ana ma kona mau kapuai; aole i lohe aku ke aikane i ka uwe a me ke kaniuhu ana mai a kana mau aikane, ma kahi e kokoke ana ia ia; ua okiia na pakii palupalu a pau o ke aloha o keia ola ana; hookahi wale no mea i komo nui ae i ka puuwai o ia poe,-o ka hoopai aku i ka enemi. Ma ia wahi kahi i loheia'ku ai o ke keiki a Maj Payton, e kahea mai ana i kokua, he 15 wale no makahiki ona a ua pau na wawae a elua i ka moku i ka poka; aka, pane aku kona makuakane, "Aia a hee ka enemi, alaila, hele mai au e kokua ia oe, he mau keiki e ae kekahi a'u e alakai ana i ka hanohano." Aka, he mau wahi kapuai pokole wale no kana i nee aku ai, o kona kuia mai la no ia i ka pu a make iho la. Ua nui launa ole no ka hana koa a hanohano no hoi i hanaia e na aoao a elua. Aole paha e hiki i na moolelo ke hoike mai i na koa i oi ae ke koa mamua o ka poe i komo ma ke kaua ia la. Aka, o ka weliweli nui o na mea i hanaia ilaila, aole no e hiki i ka poe i kahi e ke hoomaopopo mai, no ka mea, o ka poe no i kuia i ka pu a e aneane ana e make, ua hooikaika nui lakou i ko lakou mau minute hope o ke ola ana e nee aku a kokoke i kona enemi e moe koke mai ana me ke ola ana, a pepehi aku la ia ia a make.

(Aole i pau)

 

KA MOOLELO

O

KAWELONAAKALAILEHUA.

Helu 2.

A PAU AE LA KONA MAKAU A me ka weliweli no keia mea,ia manawa, hoi aku la oia a hai aku la i ke Alii i kana mea i ike ai, a ia manawa no hoomaka mai la ka ua ana o ka ua a nui loa, iloko o na la ekolu a me na po ekolu, alaila, piha'e la na kahawai i ka wai, a kahe ikaika mai la na wai o na pali, lilo mai la na pihaa a me na mea o ke kuahiwi i kai; no ka ikaika o ka wai, alaila, ia manawa, lilo pu mai la me ua keiki akua nei iloko o ke kai, iwaenakonu o na kaola o ka hohonu, a pau na la ekolu, alaila, malie iho la ka ua.

            (Maanei e waiho iki kakou i ke kamailio ana no ka lilo ana o ke keiki aku i ka wai kahe, a e haliu hou ae kakou e ike i ka ke Alii mau hana ma ia hope iho.)

 

            Ma ia hope iho, noho iho la ke Alii a hala hookahi anahulu, (umi la'i alaila, kauahaua aku la ke Alii i na kaukaualii a me na makaainana, e hele mai i ona la.

            A akoakoa mai la na mea a pau, alaila, hai aku la ke Alii i kona manao ia lakou, "Ua kauoha aku au ia oukou e hele mai imua o'u i keia la, no ka mea, ua lana mai ko'u manao, e kohoia i kiu no ko kakou aina nei, o Haupu nae ke kanaka kupono a'u i manao ai , a ina ua pono oia i ko oukou manao e noho ma ia wahi alaila, e kau like mai na lima iluna."

            Ia manawa, kau like mai la kela mea keia mea i kona lima, alaila, pane hou aku la ke Alii, "O ka poe hoole, e kau mai na lima." Aole nae kekahi mea i kau mai i kona lima, alaila, hooholoia ae la o Haupu ke kiu nui o Kauai.

            A holo ae la keia mau mea, alaila, noho iho la oia ma kana hana i haawii'ku ai, o ka nana i na waa kaua mai Oahu aku nei, ame na wahi e ae, a liuliu na la o kona noho ana ma kana oihana, a i kekahi po, nana mai la o ua o Haupu ia Oahu nei, ia manawa ike mai la oia i keia ahi nui e wena'ku aku ana maluna o na ale o ka moana, nolaila, manao iho la oia he mau waa kaua keia mai Oahu aku nei; aka, ua kuhihewa nae oia he mau waa kaua, eia ka he ahi lamalama i-a na Kalaeokaena me kona mau kanaka, alaila, hopu iho la oia i kana pohaku i kapaia o Pohakuokauai, (oia kela pohaku ma ka Lae o Kaena,) a pehu mai la oia i ua pohaku nei, a haule iho la ma ke alo o Kalaeokaena ,ia manawa, lele ae la ke kai iluna me ka ikaika loa, a lumilumiia iho la na kanaka a pau i ka make, a o ke Alii pu kekahi i make.

            (Ma keia wahi e haalele loa kakou i ke kamailio ana no Kalaeokaena, ua make aku la oia me kona mau kanaka, a e olelo hou kakou no ke keiki akua a Naniwaialeale me Kanoeoalakai, i kolo ai iloko o ka wai, a lilo i ka moana.

            I ke ao ana'e, nana mai la o Haupu, (ke kiu.) a ike mai la oia i keia mea nui mailoko ae o ka moana hohou, me he kuahiwi la ke ano, nolaila, he mea kamahao loa keia i kona ike ana, ia manawa, hele aku la oia imua o ke Alii, a hai aku la i kana mea i ike ai, a lohe ke Alii i keia mau olelo, alaila, hoouna aku la oia i kona elele ia Kukalakamanu, e hele aku e hai i ke Kahuna ia hoakalei, i na olelo a pau a Haupu i hai mai ai ia Naniwaialeale, ia manawa, hele aku la o Kukalakamanu a hiki imua o ke Kahuna, alaila, ninau mai la ke Kahuna, "Heaha kou manao i hele mai nei?"

            Hai mai la oia, "I hoounaia mai nei au e ke Alii e kii mai ia oe, e hele oe ilaila."

            Alaila, olelo aku la ke Kahuna ia Kukalakamanu, "E hoi oe a hai aku i ke Alii, ina e moe oia i keia po, a loaa ia ia kekahi moeuhane, a i kakahiaka, i kona wa e ala'i, oia no ko'u wa e hiki aku ai ilaila, alaila, hai mai oia i kana moe ia'u."

            Ia manawa, hoi aku la oia a hiki imua o ke Alii, hai aku la oia i na olelo a ke Kahuna i haiia'e nei maluna , a lohe ke Alii i keia mea, alaila, noho iho la oia me ka hoomanao, a i ka po ana iho, hoi aku la oia me kana Aliiwahine, ma ko laua wahi moe e hooluolu ai i ko laua mau kino; aka,  aole no nae laua i moe iki ia manawa, no ka mea, ua hiaaa loa ko laua mau onohi, a i ke kokoke ana aku i kekahi lihi o ke ao, ia manawa, pauhiaia iho la laua e ka hiamoe nui.

            Ia hihio ana iho no, ia manawa, ike aku la ko ke Alii uhane i ke ku ana mai o kekahi kumu laau nui ma kona alo, ua wahiia nae ke kumu o ua laau nei i ka Ahuula, a he mau manu eha e kiai ana ma kona kumu, a i ka nana ana'e o kona mau maka iluna, ike ae la oia elua wale no lala o ua laau nei, e kiwi ana kekahi lala i ka hikina, a o kekahi lala hoi, e kiwi ana ma ke komohana, o ke ano nae o ka lala ma ka hikina, he melemele kona, me kona pua, me ka lau, a me ka manu e kau ana ma ia lala, a o ka lala hoi ma ke komohana, he ulaula ke nana'ku, me ka pua e kau ana, me kona lau, a me ka manu ulaula e kau ana ma ia lala, alaila, nana pono aku la kona mau maka i ua mau lala nei, ia manawa, iho like mai la na eheu o ua mau manu nei, a hohola mai la ma kona alo, alaila, hauoli loa iho la oia i ka nana ana i ka eheu o ka manu ulaula; aka, ia  ia i alawa aku ai e nana i ka eheu o ka manu melemele, makau loa iho la oia me ka weliweli nui; no ka mea, ia ia i haka pono aku ai, ua like me ka Enuhe la kona ano, ke kikokiko alaila, hapai ae la oia i kana wahi mele, penei:

            "Aia la o ka ula o ke ahi i na kuahiwa,

            Ke ano mai la maluna mai o Huehue

            Ma ke kaha poohiwi pali o Hualalai.

            Hue aku la ka hau a ka ia welo i ka ili o ke kai.

            Welo aku la na huhui i ka malama o Makahi.

            He Alii au, he milimi na Kealohilani.

            He kama lei na na wahine i ka maka o ka Opua-e.

            O a'u pua i kui ai e le-i,

            E lei no au.

            He aloha-e."

           

            A pau ae la kana mele ana ma ka moeuhane, alaila, u-wi iho la kona kui, me ka u-u ana o kona leo, haalulu ae la kona kino, a puke ae la kona mau kuli, a no ka nui o ka leo o ua Alii nei, puoho ae la kana wahine mai ka hiamoe nui, a hoala aku la oia i ke Alii, a no ke ala ole ae i kana hooluliluli, nolaila, kuikui iho la oia, ia manawa puoho ae la ua Alii nei, me kona haalulu nui; alaila ninau aku la kana Aliiwahine ia ia, "Heaha keia ou i nui iho nei ko leo, a hoala aku nei au ia oe?"

            Alaila, hai mai la ke Aliikane i kana wahine,  i na mea a pau ana i ike ai ma ka moeuhane, i haiia'e nei maluna.

            A pau ae la ka ke Alii hai ana i kaua moeimua o ke Aliiwahine, alaila, akoakoa mai la na kaukaualii e kali ana hoi no ka hiki mai o Hoakalei, (ke Kahuna,) a i ka hoomaka ana mai o ka la e hohola i kona malamalama maluna o ka aina, ia manawa hiki mai la ke Kahuna imua o ke Alii, a hapai ae la la ua Kahuna nei i kana wahi mele, penei.

 

"Ia oni aloha i ka ulu o ka moe,

I ka oliko pua makani kaiaulu olalo,

Aloha ka lake kaiaulu oiaio,

I ka naulu e ho-a nei i ke kai,

Enaena ua koko ke kula i ka la,

I ka pehia e ka la o Makalii,

He Alii nui oe na'u e ka makemake,

E aloha la hoi au e uwe mai oe,

Oia, oia nei no-e."

 

            A pau ae la keia mele ana a ua Kahuna nei, alaila, ninau aku la oia i ke Alii. "Heaha kau moe i ka po nei?" Alaila, hai mai la ke Alii i ke Kahuna, i na mea a pau ana i ike ai ma kana moe i haiia'e nei maluna.

            Ia manawa, hai mai la ke Kahuna i ke ano o ka ke Alii moe, imua o na kaukaualii, a me ke Alii pu kekahi, o ka lala melemele au i ike ai, o kona ano, oia no kela keiki alualu a olua i hanau ai, a laweia'i e kanu; aka, ua kolo keia a noho iloko o ka wai, a iloko o na la ua nui i hala ku nei, ua laweia e ka wai a hiki i ka moana uliuli lipolipo, ua nui nae ua keiki nei a olua i keia manawa, a he kupu eu oia no ka moana, oia no kela mea a Haupu, (ke kiu) i ike ai i ka hoea ana'e mailoko ae o ka hohonu, e he kuahiwi la, oia hoi o Kuilioloa. (oia hoi ka ilio a Lono kapena Kuke, i ki ai i ka poka nui, ia Kulokuloku, a maihiia'i ka punui.)

            "A o ke ano o ka lala ma ke komohana, he ulaula kona kina, a me ka manu ulaula e kau ana maluna au i ike aku ai, oia hoi, e loaa hou aku ana ka olua keiki ma keia hope iho, oia nae ke keiki maikai loaa olua, a ma ia hope aku nae, aole e loaa hou ana ka olua keiki, o ka olua mau keiki wale iho la ia a hiki i ko olua hopena."

(Aole i pau)

 

Kanikau no Kaluaikaawaloa.

 

Aloha nui oe e Kaluaikaawaloa,

Kuu kaikamahine mai ka makani wehe kapa o ka aina,

E wehe ana i ka pili a maua kaawale oe-e,

I piliia e kaua ka ua me ka la, ke anu me ke koekoe,

Ka makani anu o ka hoolua,

Elua mea a loko e hana nei,

O ka u me ka minamina,

E hoomaeele wale nei no i kuu kino,

Ke anu o ka ua kiowao,

E-Aloha-e.

Aloha ke kaunoa luhiehu i ka la e,

Akahi hoi la a ke aloha i hiki mai ai,

Ke haku kaikoo nei loko o'u i ka minamina,

O kuu pua mae ole oe he keiki,

Aloha kuu keiki mai na pali o Hilo,

E loku mai ana ka ua i ke oho o ka ohia,

A kaua e au ai ia wai anu a ka malua,

Elua kaua i na ale kauloloa o Alenuihaha,

Kuu kaikamahine mai ka ua ula o Waimea,

E hiolo mai ana i ka lau o ke koaie,

Kuu kaikamahine mai ke pili enaena o Kawaihae.

 

[end of page]