Ka Nupepa Kuokoa, Volume II, Number 12, 21 March 1863 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

Ka Nupepa Kuokoa.

 

Kanikau aloha no Kaluai.

 

Kanikau la he aloha,

Nou no e Kaluai e.

Kuu keiki,

Kuu hoa pili o ka hale kane.

Auwe kuu keiki e!

Kuu keiki o ka la wela o ka helo;

Ka ihona olu o Kahului,

Hu li ae nei au, aole oe,

Auwe kuu keiki e!

Kuu keiki mai ke one loa e Oneo,

Mai ka nalu haimuku la e Huiha,

Mai ke kai maokioki la e Kona.

Auwe kuu keiki e!

Kuu keiki mai ka lae loa,

Ehiia ka noho lae,

Mai ke a hauliuli la e ke kaha,

Mai ka makani anu la he Olauniu,

Me he nalu la ko aloha ke hiki mai.

Auwe kuu keiki e!                               KEOHOULI.

 

Kanikau la he aloha,

Nou no e Kaluai e.

Kuu keiki mai ka ua hehi mai iluna o ka laau,

Mai ka ihona ikiiki la e Ohiki.

Auwe kuu keiki e!

Kuu keiki mai ka la wela o Puowaina,

Mai ka malu ulu la e Kahoolele,

Lele ana ko aloha me he lupe la i kuu maka,

Auwe kuu keiki e!

Kuu keiki mai ka ihona olu la e Pahauopu,

Hoomaha aku kaua i ka malu kukui o Lilikoi.

Auwe kuu keiki e!                               KAPELA.

 

Kanikau la he aloha,

Nou no e Kaluai e.

Kuu kaikunane mai ka la welawela e ka papa koholua,

Mai ka la enaena e Kapohakuloa,

Mai ka malu kukui la e Nohopalena,

Mai ka piha kanaka e Ohia,

Mai ka malu panee la o ka aina,

Mai ke one loa la e Kainahonuhonu,

Auwe kuu kaikunane e!                      PAOPAO.

 

Kanikau aloha nou e Kaluai e.

Kuu kaikunane mai ka maka o ka Opua,

He hoailona ia no ka aina.

Kuu kaikunane mai ka nalu hai kaha la e Awili,

Auau ka uhane i ka wai o Ilikiwai,

Kuu kaikunane mai ka piha kanaka la o Kaulanawaa.

Kuu kaikunane mai na lehua o Puainaka,

Mai ka wai pukaiki la o ka aina.

Kuu kaikunane mai ka hau anuanu o Halekii.

Mai ka ihona loa e Waiapaoa,

Lei aku ka uhane i ka losa o Waohale.

Kuu kaikunane mai na lehua o Kalahua,

Nehe mai iluna o ka laau,

Kuu kaikunane mai ka la kuewa i ke kula,

Mai ka ai hookamalii o ka aina,

Kuu kaikunane mai ka la welawela o Hapaialii.

Mai ka ia hoala i ka hiamoe,

Lei aku ka uhane i na pua kou o Keeku,

Auwe kuu kaikunane e!                      KAHINAWE

 

Kanikau aloha nou e Kaluai,

Kuu keiki mai ka ua kokoula i ka moana,

Mai ka pea hulilua la he kehau,

Kuu keiki mai ka lai o ka ai a ke Akua,

Mai ke one loa la e Niumalu,

Auau ka uhane i ka wai o Kiope,

Mai ke kula hololio e Kahelo,

Luu aku ka uhane i ka wai o ke alo o Nahihi,

Hele aku ka uhane i ke kula e Kahuapilo,

Lei aku i ka hala e Manawaea,

Hele aku i ke one loa e Laaloa,

Kuu keiki mai ke kula wela e Makoko,

Hoomaha aku ka uhane i Keawemua,

Kuu keiki mai ka ua Kanilehua o Kanikawi,

Mai ka ohia loloa la e Mokuaikaua;

Komo aku o ka malu hala o Maiaakauaua,

Hoomaha aku i Kaieha,

Pii aku ka uhane i ka hala o Helani,

Auwe kuu keiki e!                               KEAWEHANO.

 

Kanikau aloha nou e Kaluai e.

Kuu kaikuaana o ka lai o Hanakahi,

Noho makou me ka u me ke aloha ia oe,

No kou hele ana aohe lua,

Hele aku oe i ke ala hoi ole mai,

Kuu kaikuaana mai ka wai hu o Waiokopo,

Mai ka ua kualau i ka moana,

Ke paia mai la e ka makani he Ulumano,

He manomano oe a ke aloha ole.

Auwe kuu kaikuaana e!                      OPIOPIO.

 

Kanikau aloha nou e Kaluai e.

Kuu keiki mai ka malu o ka inia la o Kamakahonu.

Mai ka hau anu la e Kupono,

Mai ka ua kaha kiki mai iluna o ke kukui,

Kuu keiki mai ka ai hoomamalo i ka wai,

Mai ka ai oho loloa i ka nahele,

Mai ka pio kani mai i ke aumoe,

Auwe kuu keiki e!                               HONUAWA.

 

He kanikau aloha no Kaluai e,

Kuu keiki mai ka pele kani hone e Ohia,

Mai ka wai malu niu o Waikuaala,

Mai ka ia weli mai i ke aumoe,

Kuu keiki mai ka la kanaka nui o Oahu a Kina loa.

Pau kuhihewa i ka uahi a ka poula la,

Kuu keiki mai ka wai puka iki o Ohelani,

Mai ka wai kau mai iluna o Kauli,

He uli ka make la nalowale oe.

Auwe kuu keiki e!                               NIAU

 

He kanikau aloha nou e Kaluai e.

Kuu kaikunane mai ka maile lau nui o Papahau.

Mai ka ulu maia la e Kaulehole,

Mai ka ihona loa la e Haleololi,

Ui ae ninau i ka makua,

Aloha olua e noho ae nei.

Kuu kaikunane mai ke kula o Puunoni,

Mai ka ihona olu o Kaneaka,

Auau ka uhane i ka wai o Kualulua,

Hoolohe i ka nehe a ka iliili o Moikeha,

Auwe kuu kaikunane e.                      MILIAMA.

 

He kanikau la he aloha,

Nou no e Kaluai e.

Kuu kaikaina o ka po ua nui o ka Hooilio,

Mai ka la ikiiki o ka Makalii,

Mai ke kai leo nui la o ka aina:

Ke lei nei no wau i ko aloha,

Kuu hoa hele o kahi mehameha,

Kuu hoa ohumu o ke kula,

Kuu kaikaina mai ka ua hehi mai iluna o ka hala,

Hala aku la oe i ka polikua a Kane,

Noho makou me ka u me ka minamina i ko aloha,

Kuu kaikaina mai ka makani kolonahe o ka aina he Kahoolawe,

Lalawe ke aloha pupuku i ke kino,

Kuu kino mauna i ko aloha.

Auwe kuu kaikaina e!                         IOELA.

 

Kanikau la he aloha,

Nou no e Kaluai,

Kuu kaikuaana mai ka makani anu la he kehau,

Pukukui aku kaua i ka papa hookahi,

Kuu kaikuaana mai ka malu kuku o Kukuihaa,

Mai ka wai huihui o ke ala a Mohio,

Hoomaha aku i ka lai o Lauhue,

He aihue ka make la nalowale oe,

Nalo na maka ike ele aku.

Kuu kaikuaana mai ka malu hale o ka makua,

Kuu kaikuaana mai ka piha kanaka o Kueomanu,

Auwe kuu kaikuaana.                         KANE.

 

Kanikau aloha nou no e Kaluai.

Kuu kane mai ka ai hua lewa i ka makani,

Kuu lei lehua ulaula i ke alo o na kahawai,

Ka i ua oliwa i mohala i ke kakahiaka, i nani mae ole i ke awakea.

Kuu kane mai ka makani hai aloha he apaapaa,

Iniki wela ka ili i ka ipoahi,

Ahi wela loko huila ia oe e ka makemake,

Auwe kuu kane e!                               PAU

 

Kanikau aloha nou no e Kaluai e.

Kuu kaikunane mai na hono eha o Lahaina,

Mai ka ihu o ka moku la o Kilauea,

Mai ke kai hanupanupa o Kalaeokalaau,

Hoolaau ke aloha hana i ke kino,

O ke kino iho la ia a ke paewa i noho ai.

Kuu kaikunane mai ka waiala a ka haole,

Mai ka ululaau makai o Ainahou,

Hou ka manao kaohi i ka puuwai,

He wai aloha na ʻ u o Waikahalulu.

Auwe kuu kaikunane e!                      POEPOE.

 

Kanikau la he alaha,

Nou nou no e Kaluai e.

Kuu hoa hele o ka ua a me ka la,

Kuu hoa pili o ke anuanu a me ke koekoe,

Kuu hoa hoolau kanaka o kahi mehameha,

Hookahi no kanaka o ka leo o ka manu,

I ke kani haanoke mai i ka pua o ka lehua,

Aloha ia uka  a kaua e hele ai,

I pili paa ai i ka po anuanu o ka Hooilo,

E kuka ai i ka la wela o ka Makalii,

Aloha ko kino i ka nalo ana,

Kapu mai nei ko leo aohe ka pane ana mai,

Aloha au o ka malu niu o Huehue,

Kahi a kaua e hoonaue kino ai, aloha oe aloha au.

Auwe kuu makuakane e!                    KALAIKINI

 

Kanikau la he aloha,

Nou no e Kaluai e,

Aloha ino no kuu keiki,

Kuu hoa hele o ka uka anoano kanaka ole,

Hookahi no kanaka o ka leo o na manu.

Auwe kuu keki e!                                PAUONO.

 

Kanikau aloha no Kaluai

Kuu kane mai ka makani kukala hale o Honolulu,

Mai ka pele kuilua hone o Kaukeano,

Anoano aloha ia ʻ u ka lai o Iwilei,

I lei aloha na ʻ u ka haupo o ko aloha,

Aloha ka ahihi o Nuuanu, a me ke kawelu o Lanihuli,

Aloha ka pua o ke Kamaakahala,

Ua hala e aku oe ua ike ia Kane me Kanaloa,

Loa ke ala i ka hele hookahi,

Ua iho nei au aole oe,

Aia paha oe i kahi ike oleia,

Ua ike i ka nani o ka aina,

I ka luana a na haole,

A na kanaka o ka aina e.

Ua lawa i ko ʻ u manao ke aloha ke hiki mai,

Hiki mai ko kino wailua ko kino pili unihi,

Ua nihi ko hele ana,

Ua ike ole aku wau i kou la a me ka manawa,

O ka lohe kai lohe mai,

Ua ike au i ka inika,

I ke aiai o ke kalana,

Ua kau peni kilaia ko la i make ai,

Ka malama pu kekahi,

Malama no ka wahine,

Ka wahine noho kuahiwi,

Ka uka i Kilauea ko aina hanau.

Auwe kuu kane e!                               KINA.

 

He kanikau na kekahi kaikamahine mamua o kona haalele ana i ka mahana o ka la.

 

            E oluolu oe e lawe aku i keia wahi mea hou a hookomo iho i loko o kou kino puipui, a hoolele aku ana na eheu o keia mau kai, i ike ko kaua kini makamaka, i ka ike e ana o keia kaikamahine i kona hora e haalele ai i ka mehana o ka la.

            Ua hala elua makahiki kona kaa ana i loko o ka mai, oia no ka mai mua i hoolaha ia mai i ka wa o Kapena Kuke, (Capt Cook.) no ka mea, ua maa na kaikamahine o keia wahi, e ake no e huki ka lihi i Honolulu i kahi o ke dala, aole nae he minamina i ke kino. I ka la 13 o Feberuari oia ka poalima, aneane mai ana e haalele ke ea o Olepau, kauoha kela i na makua elawe ia ia i waho, hapai na makua a hiki i waho.

            A mamua aku nae o ka wa mai ole, aole wahi mea a piliwi ia aku o ke kane mare, a no ka kokoke e pau ana kona ike ana i ka mehana o ka la, akahi no a loaa ae ka manao he kane, a hiki iwaho o ka hale. Uwe helu aku lao ia penei:

 

            Auwe ku make,

            Aloha ka aina,

            Aloha ka nahele,

            Aloha kahi e hele ai,

            Aloha ka uluhala,

            Aloha ka pali,

            Aloha ka lau o ka limu,

            Aloha ka nalu,

            Aloha ka iliili o Onehahe,

            Aloha ka nana ana i ke ao,

            Aloha ke kula,

            Aloha ka ihu o ka lio,

            Aloha ke kaina o ke kino.

            Aloha ka ihu o ka palau,

            Aloha ka nana ana i na kanaka.

                                    Na ka makua aku malalo nei.

            Ae, i ku la hoi kou hale i keia wahi,

            I nana oe i na kanaka,

            Aloha kaua,

                                    Na ka mea make hou iho.

            Auwe kuu kahua,

            Aloha ke kahu hanai o maua,

            Auwe kuu kaikunane-a,

            E ike ole ana ka oe e Kaie ia ʻ u,

            Auwe kuu kane-e,

            E ike ole ana ka oe e Kalawa ia ʻ u,

            Aole oe i noho i ko ʻ u pilikia:

            Lilo no oe i kou makemake,

            Aloha o ʻ u makua,

            Ua hala ko oukou la,

            O ko ʻ u la keia e hele ai,

            Mai ana oukou ia ʻ u-a,

            Haalele i ka la i ka mea mehana.

                                                            Na HOOPII.

 

            Kanikau la he aloha,

            Nou no e Hoopii,

            Kaikuaana ka mea aloha;

            I ka hele hookahi aohe lua,

            Oili kohana ka uhane,

            I ka ani ana o ka la,

            Au iho nei ka makua,

            Aole oe i loaa;

            Hele aku nei no oe,

            I ka huakai manawa ino,

            Inoino mai nei loko,

            Wehe oe la i ka piko,

            Kuu hoa hele o ke alanui,

            O ka pihana kanaka

            I ka Paheehee,

 

            Pahee aku nei no oe,

            I ka nani o ke aupuni,

            Hoa hele o na pali,

            Ku me he pali nui la.

            Ko kino i ke aloha,

            Pali o Kalehua,

            He lehua no hoi oe,

            He ikena na ka lehulehu,

            Hoa hele o Wailuku,  

            Ke luku nei e ka make,

            Ke ohi aku nei no,

            I walea no ka uhane,

            I ka bele o Haili,

            O ka hone a ka Bila,

            O ke kani a ka Piana,

            I ka nani o ke Kaona,

            I ke one o Punahoa;

            He hoa no hoi oe,

            Noloko o ka pahu hookahi.

                                                MRS. LILA HAWAII.

 

            E hoi mai oe e Hoopii-e,

            Ka wahine i ka pali o Akaka-e,

            E hoaikane oe me Huaiei-e,

            E walea olua i ke kui lehua-e,

            I lei moe ipo no ka wahine-e,

            E hoao me Kihakolohia-e,

            O ke kane ia la moeia-e,

            He uhane aloha-e,

            Nou no e Hoopii-e,

            A D. Kaawa no he makua-e,

            Nani wale ka uhane noho i Kuemanu-e,

            Ko kino makemake i ka heenalu-e,

            Mai Kuanui no a Kalehuawehe-e,

            Wehe oe i ka pili la he makua-e,

            Hele oe i ka huakai hoi ole mai-e,

            Imi oe i ka makua mau loa-e,

            Ku ana ka uhane iluna o Ahala-e,

            Ua hala oe maluna o Bila lio-e,

            Aohe loa oia kula-e,

            A ko lio i uhu ai-e,

            Ike aku la oe i kau kane-e,

            O Kalawa no he inoa-e,

            He uhane aloha-e,

            Nou no e Hoopii-e.

                                                Na D. KAAWA.

 

            Kanikau no Hoopii-e,

            He alele la ke aloha kai hiki mai-e,

            Noho oe i ka hale anu koekoe-e,

            He mai ke aloha no Hoopii-e,

            Pau ke kaina eni a ko kino-e,

            Ka hana hoi a ka manao iloko-e,

            Hele oe i ke ala hoi ole mai-e,

            He uwe helu mai o Hawawa-e,

            Aloha ino no kuu lei-a-i-e,

            Kuu minamina e noho nei-e,

            Kuu lei mae ole he aloha-e,

            Haule ka puolo waimaka a ka manao-e,

            Eia la ke hanini nei-e,

            Ke huli nei au aole oe-e,

            Ko kino wailua ka ʻ u e iki nei-e,

            Elua a ʻ u mea e manao nei-e,

            O ke kuko o ka lia a haalele wale-e,

            Pau kau hio ana-e,

            He uhane he aloha no Hoopii-e.

                                                J E N KEALOHA.

 

            Kanikau aloha keia nou e Hoopii,

            Kuu kaikuahine ka mea aloha,

            Kuu hoa hele o na pali,

            Kuu hoa luuwai o Kawainui,

            Kuu kaikuahine mai ka pali hulilua e Kalehua,

            Piina loa o Alakai,

            Akahi ke aloha a hiki mai,

            Nani wale ka luna i Kalaoa,

            Kuu hoa o ka ua me ka la,

            I ke anu hoi me ke koekoe,

            Kuu kaikuahine mai ka wai au o Honolii,

            Epopo ana ke kapa i ka lima,

            He piina la wela e Haaheo,

            He ihona olu e Halepuna,

            Kuu kaikuahine mai ka papa kahuli e Wailuku,

            Mai ka piha kanaka nui e Halekalewa,

            Mai ke one anapanapa o Waiolama,

            Mai ka ulu niu o Mokuola,

            Ua ola ka uhane o Hoopii.

                                                S L WAIKUONO.

 

            Kuu kaikamahine mai ka pihe uwa e Onehahe,

            Mai ke kai leo nui o Kalehuawehe,

            Wehe oe i ka pili a ke aloha i ka lai o Lena,

            Uwe helu mai ko kahu hanai o Kaawa,

            Kuu kaikamahine mai a lai hale o Edena,

            Kuu kaikamahine mai ka ai loloa o ka aina,

            Euwalu aku ana i ka pali eha na lima,

            Mai ka piina la wela e Kapo,

            Hoomaha aku kaua i ka welau o ka pali,

            No Kalawa hoi kekahi aloha,

            I ka ike ole ana i kana wahine,

            He uhane aloha keia nou e Hoopii.

                                                NA KAHIKOLOA

 

            Kanikau aloha-la,

            Nou no e Hoopii-la,

            Ka hele ana aku nei-la,

            Au iho nei au-la,

            Aole oe i loaa-la,

            Hele aku nei oe-la,

            I ka polia ia-la,

            Hu wale mai no kou aloha-la,

            Me he wai e ale ana-la,

            Kou aloha ia ʻ u-la,

            Kuu hoa o ka hale-la,

            O hale Kamalu-la,

            Kuu hoa imi ola-la,

            I ka aina makamaka ole-la,

            Hookahi no makamaka-la,

            O ka uhai i ke ola-la,

            O ka uhai i ke ola-la,

            I ae nei Kanaloa-la,

            He akua keia-la,

            Hu e ka aka-la,

            Aia ka wai iuka-la,

            O Kapuna ke ahi noa-la,

            Kuhi hou ke Kahuna-la,

            Aia ka wai i Wailoa-la,

            Kuu hoa o ka nalu o Paikaka-la,

            E pue ai i ke one-la,

            He uhane he aloha-la,

            Nou no e Hoopii-la.

                                                NA KAILIHAO.

 

            Kuu kaikamahine mai na wai elua,

            Huli ae nei au aole oe,

            Aia paha oe i ka welelau o ka makani,

            Kuu kaikamahine o ua aina nei,

            Hele oe haalele mai ia ʻ u,

            Kuu kaikamahine mai na hale eha,

            Mai ka wai luu poo o Kapaheehee,

            He uhane aloha keia nou e Hoopii.

                                                NA HAWAWA.

                                                Na J P IWA.

Kuhua, Hilo, Hawaii, Mar. 2, 1868.

 

OLELO HOOLAHA.

E IKE AUANEI NA KANAKA A ME na Haole, o kela ano keia ano. Owau o ka mea nona ka inoa malalo nei, ke papa aku nei au i na mea holohohua.

Lio, Hoki,

Kekake,

Puaa,

NA

Bipi,

Miula,

Hipa,

Kao.

 

Aole e hele ma kuu aina kuai, ma Maoloa, Honuaula, Maui E malama i ko oukou mau holoholona mai hookuu wale, o ka mea hookuli i keia olelo papa. E hiki no i kuu hope ke hapa a hoopaa, e hoouku e like me ke kanawai , ke papa aku nei au i na kanaka o kela wahi keia wahi, mai kii wale i na mea ulu wale, oia ka mauu, ka wahie, o na mea u l u a pau loa malama o ka aina kuai. Ina e loaa kekahi o keia mau mea i oleloia maluna, oia ka Lio, Bipi, Miula, Hoki, $ 1 00 no ke poo hookahi Hipa, Kao, Puaa 6 12 1/2 no ke poo hookahi. Ke haawi nei au ina hana a pau i kuu hope, ia Liki. Owau no o

63-2m                                                                                                                                      S KAMUELA.

 

OLELO HOOLAHA.

E IKE AUANEI NA KANAKA A PAU. owau o ka mea nona ka inoa malalo nei. Ke papa uku nei au i na mea holoholona a pau loa, aole make kino ma kuu aina i hoolimalima ai me ka Mea Hanohano C Kanana, e waiho nei ma Waikiki, mai ka hapalua aku o Kaluaokau a hiki i Pau, Na

Lio                   Bipi

Miula               Kekake,

Hipa                kao,

Puaa                Moa,

Palehu             Koloa,

 

KAKA

A ina ike a ʻ u i kekahi o na holoholona i oleloia ʻ e nei maluna, ua komohewa i keia aina mahi laiki, e hopu no au a hoopaa, a aole imua o na Kahu Kanawai, ke ole e ae mai oia i ka uku a ʻ u manao ai.                                     Y S AKANA.

            Waikiki, Oahu, Ian 12. 1863.                                                                                      62-3m

 

 

Olelo Hoolaha.

UA WEHE AE NEI AU HE

Hale Kuai hou, ma ke Alanui Papu, mawaena o Alanui Alii me Hokele, a ua hoopiha ia i na Lole MAIKAI o na ano nu hou a pau, ano nou hiki mai nei, i kuaiia e au

Ma Enelani a me Sekotia,

i ka makahiki i hala iho nei. O ka'u keiki ka mea nana e hooponopono ma ia Hale Kuai. E hele a pau e nana i ka

Lole Nu Hou!

HE LOLE NU HOU WALE NO!

E HOOMAOPOPO NO KA

Helu 10.

JOHN THOS. WATERHOUSE, (Halewai)

 

Olelo Hoolaha.

AOLE O KANAMAI O Ka Lole Nu Hou i hiki mai nei, a ua makaukau hoi no ke

KUAI NUI,

A ME KE

KUAI LIILII,

Lole kupono no na kane, na wahine , na keikikane a me na kaikamahine. A he mau

Noho Lio Maikai,

A ME NA

Kaulawaha Nu Hou

NO HOI KEKAHI, MA KO ʻ U

Hale Kuai Nei,

a me na KEPA pu hoi nana e hoohoihoi i ka Miula e holo, e like me ka holo o ka Lio.

NA PAHI A ME NA O,

A ME

Na Pa o kela ano keia ano.

&c,&c,&c,&c,&c,&c,&c,&c,&c,&c,&c,&c,

&c,&c,&c,&c,&c,&c,&c,&c,

&c,&c,&c,&c,&c,&c,

&c,&c,&c,&c,

&c,&c,

&c,

60-3m                          JOHN THOS. WATERHOUSE. (Halewai)

 

$10.00 MAKANA!

E UKU AKU NO KA MEA NONA KA inoa malalo nei i na dala makana i hana maluna, i ka mea nana e hopu ke kino.

O Kanehailua,

he lawehala i mahuka mai ka huakai paahao aku, ma ka la 25 o keia malama, oiai e hana ana ma Ainahou. A penei no ke ano o ua paahao mahuka la: 5 kapuai 6 iniha kona kiekie, ma Hilo kona one hanau. Me Keoni Miki kona noho hope ana iho nei, he 23 ka nui o kona mau makahiki: he kii moku ma kona umauma, me na hua "TALONAI," a malalo iho oia he kii heleuma, a me kekahi mau uhi e ae no ma kona lima akau; a ma kona lima hema pela no, me na inoa nae kekahi; he linalina ma na poohiwi a elua, me na opuupuu.                          W C PARKE.

Makai Kiekie.

Honolulu, Feb 27, 1863.                                                                                             66-1m

 

HALE KAMANA

A ME KA

HALE AMALA.

Ma Waialua, Oahu.

 

UA MAKAUKAU KA MEA NONA

ka inoa malalo nei, oia o William Clarke, e lawelawe ma ka

Oihana Kamana a me ka Oihana

AMALA,

ma kona Hale Oihana, ma Paalaa, Waialua, Oahu, me ke kumukuai EMI LOA, nolaila, e pono i na kanaka a pau e makemake ana i na mea e pili ana i na oihana maluna, ke hele koke mai na ko ʻ u Hale Hana.                        WILLIAM CLARKE.

Amala a me ke Kamana.

Paalaa, Waialua, Oahu, Feb 20, 1863                         65-3m

 

KA LAKO HALE

A ME NA

Pahu Kupapau!

AUHEA OUKOU, E KA POE E MAKEMAKE ANA E kuai ma ke ano makepono wale. Eia no ke waiho la ma kuu Hale Paahana, ma Alanui Papu.

NA PAPA KAUKAU!

NA LAKO HALE!

NA PAHU KUPAPAU!

PAHU KOA....$12.

            Ua loaa ma hoi na mea hoonani Pahu Kupapau he nui loa, a e kuaiia no ka uku makepono.

            A ua makaukau no hoi au e kuai aku i na mau mea hoolako hale, a ka poe e makemake ana e kuai me a ʻ u no ke dala. Nolaila, ke makemake nei au e kuai aku i na lako hale o hai me ka uku aku i ke dala maoli, a ua lako hoi i na mea hoolako hale no ke kuai aku ia hai, no ke kumukuai emi loa.                                                                  HANALE ALENA.

63-6m                                                                                                                          Alanui Papu.

 

MOKU HOLO MAU

NO

Anahola a me Maloaa,

KAUAI.

E PONO I NA KANAKA A PAU e noho ana ma na wahi i haiia maluna, ke ae maluna o ka moku kialua maikai

JEANNETTE.

            O Kahalemake, ke Kapena, he mea i akamu i ka hookele a me ka malama ana i na ohua; oia ke Kapena mua iho nei o ka moku kiakahi Ainahou. Hookahi holo ana i ka pule hookahi. E ninau i ke Kapena ma ka moku, a i oleia, ia

VON HOLT & HEUCK.

            Ma ke kihi o ke Alanui Papume Kalepa Honolulu.                            59-3m

 

I KA POE KANU LAIKI.

UA MAKAUKAU KA Hui Wili Laiki o Honolulu, e ihi i ka aa, a me ka hoomaikai i ka Laiki, he

Hookahi a me ka hapa keneta

ka uku no ka paona hookahi; a ua makaukau pu no hoi e kuai aku me ka poe mea Laiki, me ka uku aku hookahi keneta me ka hapa no ka paona hookahi, a i na he Laiki maikai loa pii ae no ke kumukuai, a ia ia no ke eke o ka Laiki e laweia mai ana ia ia. E ninau ma ka Hale Wili Lauiki, ma Apua, a i oleia, ia

S. P. FORD (Kauka Poka.)

Hope o ka Hui Wili Laiki o Honolulu.

            Aia kona keena, ma ke Keena o ke Kanikela o Amerika Huipuia, ma ka aoao hikina o Halemahoe.

 

OLELO HOOLAHA

Luna Hooponopono Waiwai.

NO KA MEA, UA HOONOHOIA KA MEA nona ka mea malalo nei i Luna Hooponopono Waiwai no Akai i make aku nei ma Honolulu, Oahu. Nolaila, ke haiia, ku nei aole no i lawa ia waiwai o ua Akai nei e hookaa ai i kona mau aie, a nolaila hoi, e hooponoponoia ana ka waiwai mamuli oia ano; a ua kauohaia na mea a pau ana i aie aku ai, e hoike mai i ko lakou kuleana iloko o ka mahina hookahi, mai keia la aku, a o na mea ha i aie mai ia ia, ke poloai ia nei lakou e hookaa mai.

C. C. HARRIS (HAILAKI.)

Honolulu, Oahu, Feb 19, 1863                                               66-4t

 

OLELO HOOLAHA

E IKE MAI AUANEI NA OHANA A PAU o kela ano keia ano,

O HAU,

ka wahine mare a ka mea nona ka inoa malalo nei. Ke papa aku nei au ia oukou e ka poe waiwai a pau, mai hoaie oukou ia ia; no ka mea, ua haalele kuma ole mai oia ia ʻ u, a me ko maua wahi moe, ua hele aku ia mamuli o ka moekolohe. Ina o ka mea hoaie aku la ia, aoe au e hookaa ʻ ku i kona ale, maluna ona ko oukou poho.                     C. B. KAHAHANA.

Halepuaa, Puna, Hawaii, Feb 19, 1863                                                           66-1m

 

J. H. COLE.

LUNA KUDALA

Ma ka Hale Pohaku o Mi. Aniani mai.

Ma ke Alanui Alii Wahine.                             59-6m

 

H W SEVARANA.

Luna Kudala a mea Kalepa.

Halo Mahoo.

Alanui Aliiwahine

59-6m

 

A S Cleghorn, AKE.

MEA KUAI LOLE

A ME NA WAIWAI E AE.

Ma ke Kuai Kukaa a ke Kuai Liilii

AIA MA KA

Hale Pohaku,

Ma ka Uwapo.

Ma ke kihi o ke Alanui Kaahumanu me Moiwahine.

 

Ma Alanui Nuuanu,

MAWAENA O

Alanui Alii me Alanui Hokele.

MA KA AOAO HIKINA O

HALEOLA.

Honolulu, Ianuari 16,1863                              60-6m

 

OLELO HOOLAHA

I NA KANAKA HAWAII!

Makai iho o AIGUPITA

Ma hope iho o ka PA

O MAHUKA!

KA

Pa Kuai Papa

O

LEWERS & DICKSON,

MALAILA E LOAA AI NA PAPA O KELA ano keia ano, me ke kumukuai makepono loa, nolaila, e nane mai oukou e ike i ka oiaio o keia leo paipai ia oukou e na makamaka Hawaii.

NA PAPA OLEGONA

LAAU HALE A ME NA POU,

LAAU KAOLA A ME NA PINE PA,

LAAU AAHO HALE PILI MAOLI,

PAPA ULAULA, PAPA PAINA,

PAPA KEPA A ME KA AAHO,

PILI ULAULA A ME KE KEOKEO.

Eia ka mea

KUPANAHA

Ma keia hale-maanei i wiliia ʻ i ka

PALAOA a a ka HANA PAHU

e like loa me ko

ULAKOHEO

mamua, i kona wa e kau ana, aole i pau i ke ahi mamua; nolaila, e naue mai e makaikai,

Na Pena Keokeo a me ka Omaomao,

Na Pena Ulaula a me ka Eleele,

Poho, Kolu, Hulu Pena,

KUI o na ano a pau,

LAKA o na ano a pau,

Ami, Kilou, Kui kakai moena,

Kui Nao,

Pani Hale,

Pani Aniani Pake,

Aniani kaawale,

Pani Olepelepe.

A PELA WALE AKU.

            Aole o maua hoolimalima i poe e koi aku i na kanaka e kuai mai ma ko maua wahi; aka, he hilinai no manama ke ano maikai o ka maua mau mea kuai, a me ke kumukuai o ka maua papa, me ka malam pono hoi i ka maua oihana iho, i hoomau ia mai ai ka domaikai, i loaa mau ia maua mamua aku nei.

            Honolulu, Okatoba 30, 1862.                         (62-3m)

 

OIHANA LOIO!

JOHN L NAILIILI, AIA KONA KEENA Oihana Loio, ma ke Alanui Nuuanu, makai iho o ka Hale Kuai o A S Cleghorn, ma ka Hale Ai o na Kanaka Hawaii, i kapaia

O HALEOLA,

ma Honolulu, Oahu. Ua makaukau oia e kokua ma ke ano Loio i ko oukou mau pilikia ma ke Kanawai, no kela hewa keia hewa i hoopii ia ai oukou, a ua makaukau no hoi oia e hana me ka maemae loa, a me ka pololei, i ko oukou mau Palapala Kuai o kela ano a me kela ano, me na Palapala Hoolimalima, me na Palapala Haawi Waiwai Paa a Waiwai Lewa, na Olelo Ae Like o kela ano a me keia ano, na Palapala Hoopaa o kela ano keia ano, na Palapala Moraki, Waiwai Paa a Waiwai Lewa, o na Palapala Hoohui o keia ano a me keia ano, a me na Palapala Hoopii i na Ahahookolokolo, no kela hewa keia hewa Kivila a Karaima, a me na Palapala Kauoha a pau, a me na Palapala a pau o kela ano a me keia ano. E ninau no ia ia no ka uku.

            Honolulu. Nov. 7, 1862.                                                         50-1y

 

OLELO HOOLAHA.

O KA MEA NONA KA INOA MALALO nei, ke papa aku nei oia i na kanaka, haole, a me ka pake, o kela ano kanaka keia ano kanaka a pau, e nana mai ana. Ke papa aku nei au i na mea a pau, mai hookuu wale oukou i ko oukou mau holoholona, ma ka Apana kula o

Ukumehame,

mai ka pali o Manowainui, e pili ana me Waikapu, ua kapu ia Apana kula. Ina i loaa kekahi holoholona e hele ana ma ia Apana kula i oleloia malun, e uku mai ka mea holoholona $ 1 00 (hookahi dala,) me ke kao, a me ka hipa, ewalu poo $ 1 00 (hookahi dala.) Ina aole e loaa mai ka uku e like me na mea i oleloia maluna, alaila, e hookomo ana kuu kanaka ma ka Pa Aupuni, no ke kolohe i ka manu o ua Apana kula la me ke kuleana ole.                P NAHAOLELUA.

Hope Luna Aina o ka Moi.

            Lahaina, Maui, Maraki 31, 1862.                                            19-tf

 

I KA POE KANU LAIKI!

E UKU AKU KA MEA NONA KA INOA MALALO NEI mai kela la aku, i ke kumukuai kiekie loa ma ke dala maoli, no ka laiki maikai, a pau e laweia mai ma ona Hale Kudala, ma ke Alanui Moiwahine, me ka hoihoi aku no i ka eke i ka poe nana ka laiki. O na kanaka a me na haole a pau e makemake ana e hooili mai i ko lakou laiki lau, a na ʻ u e kuai aku me hai ma ke kumukuai kiekie, me ka hooili pu aku hoi i ke dala ia lakou, a i ole ia e uku aku i ka lakou mau kikoo.

H W SEVERANCE (Hanale.)

Luna Kudala

Hale Mahoe, Honolulu, Ian. 16, 1863                                                60-3m

 

J P HUGHES.

MEA HANA NOHO LIO

AIA MA KA HALE KUALOA, mea nona ka inoa maluna nei, he Noholio Pelekania a he Noholio Meleka, a me na Noholio Wahine o na ano a pau, na Noho Paniolo nu hou.

NA HAO WAHA A ME NA KEPA O NA ANO A @

NA KAULAWAHA, A ME NA MEA E PONO @

NA ILI KAUO, O NA ANO A PAU.

NA EKE ILI

NA HUIPA

NA HAO KEEHI

NA PALAKI LIO

NA KAHI LIO

A me na mea e ae a pau loa e pili ana i na lio a me na @ a e kuai ana no ia mau mea.

No ke kumukuai makepono loa

Aia no ke waiho mau nei malaila na pela manu

O na pela pulu, na pela hulu, a me pala hanaia no e like me ka mea i kauohaia mai.

Ua hanaia no na kua lealea me ka maikai loa, a @ makepono hoi.

Ua hana hou ia na mea a pau e pili ana i ka@ me ka maikai

E malama pono ia no na mea a pau i kauohaia mai ana i ka ʻ u oihana. E loaa no wau ia oukou ma M@ ma ke kihi o ke Alanui Hokele a me ke Alanui Papu.

J P HUGHES.

Honolulu, Okatoba 4, 1862.

 

E MAKAALA!

OWAU

O KAMUELA

KA HOA KUAI O NA

KANAKA HAWAII

NONA KA HALE KUAI PAPA Ma uka iho o ka

Hale Hookolokolo

ma Honolulu. Ke hai aku nei au ia oukou, he mau la ku wale no keia o kuu moku papa.

"CONSTITUTION"

a ke ku mai oia, e loaa ana ia ʻ u na

LAKO KAPILI HALE

o kela ano, keia ano.

EIA NO KE WAIHO NEI.

NA:

PAPA O KELA ANO, KEIA ANO

LAAU HALE, o kela ano, keia ano

PILI HALE,

PINE,

AAHO,

KEPA,

PANI PUKA.

PUKA ANIANI.

OLEPELEPE,

KUI,

PENA, AILA PENA,

WAI HOOMALOO PENA.

IA MEA AKU, IA MEA AKU.

            Ua makaukau au e kuai aku me ka oluolu i ae mau mea, a no ka maopopo no paha ia oukou KEIKI KAMAAINA au, he hiki ia oukou e ka Lai

Mai Hawaii a Niihau

ke kipa mai i o ʻ u nei. E hiki ana no na mokuana o ʻ u i na manawa a pau, a hoolako mau ia ʻ u. I mea mau i na poe o ka hiki mai ka haanui, a mea kaena. A he mau Luna kekahi i hoonoho ia e lai e alako ana i ka poe maikai, me he lawehala la. Aka, he hiki ole ia ʻ u ke hana pela, o ko ʻ u ano no oukou e imi mai a loaa, maopopo no na hana kakou, no ka mea, o ko Hawaii nei kupa ihola @ o ko oukou makamaka.

            KAMUELA, (Kaikaina o Kimo Pelekane

Honolulu, Ian . 8, 1863                      

 

HALE HANA KAMAA

UA MAKAUKAU KA MEA NONA

ka inoa malalo iho nei, e hana i ke

KAMAA MAIKAI LOA.

no ka poe a pau e makemake ana; o na ano nu a pau @ nani me na mea oia ano i hanaia ma

Europa a me Amerika

A hele mai ma ko ʻ u hale, mauka iho o ka Hale Kua.

George C McLean,

ma ke Alanui Nuuanu.                                    W M BENNETT

Honolulu, Nov. 7, 1862.

 

KAKELA ME KUKE.

MA KA HALE POHAKU HOU, MA PALEWA kahi kokoke i ka Halepule Betela ma Honolulu Oahu. Na laua no e kuai i na lole o

Kela ano keai ano.

NA MEA AI,

NA BAKEKE,

NA IPU TINI.

NA PA LEPO,

NA KAMAA.

NA PAHI me na O-O,

NA PAPA me na NOHO.

NA IPUHAO.

NA NOHO LIO.

NA MEA E KAKAU,

NA PENA ME NA AILA,

NA MEA MAHIAI.

A me kela mea keia mea.

Me na laau a Dr D Jayne.

Honolulu, Dekemaba, 1861.

 

PAPA MAKEPONO!

AIA KA HALE KUAI O LUI (C.H LEWERS)

ALANUI PAPU, kahi e kuai oluolu ai.

NA PAPA OREGONA 1 a hiki 3 iniha,

LAAU KAOLA, oa a me na pou, a me na opaka

LAAU PA a me na PINA PA,

LAAU AHO HALEPILI,

PAPA ULAULA, PAPA PAINA,

PAPA KEPA,

PILI ULAULA a me KEOKEO

PENA KEOKEO, OMAOMAO.

ELEELE, ULAULA

POHO, GALU, HULU PENA.

KUI o na ano a pau, LAKA.

AMI, KILOU, KUI KAKIAMOENA, KUINAO

PEPA HOONANI KEENA.

PANI HALE, PANI ANIANI.

ANIANI KAAWALE , PATE

PANI OLEPELEPE.

 

            Eia ka mea kupanaha ma keia wahi, na ka mahu e hanai na pahu apo, he hikiwawe, kupanaha. E hele nui mai e kuai a e ike wale i keia KAMELO.