Ka Nupepa Kuokoa, Volume II, Number 17, 25 April 1863 — He kanikau no Wm. H. Mai. [ARTICLE]

He kanikau no Wm. H. Mai.

He uhane la he aloha. Nou no la e Mai, Kuu mea nui minamina, I hala e aku nei. I ke ala hoi ole mai, I ke ehu a ka makani, Polikua ka ikena, I ka maka o kuu hoa, Kuu hoa pupuu anu, I ka uka o Maina, Nani wale hoi ka ikena, Na pali o Butle, Ku kilakila i ke anu, Kahiko mai i ke anu, Hookio mai kanahele, Hele hookahi ka uhane, Aohe ukali o ka hope, Ei aku nei paha oe, I ke kula la o Uanana, Ka huina wai o Belewa, Eia la he haupu, He aloha pau ole nou, O kuu hoa alo anu, Hoa pili o kuu kino, I ka ua me ka makani, I ke anu o ka Aika, Ua loku e ka Hooilo, Noho mai la i ka mauna, Hehi ae la i na pali, Koiawe mai la i kanahele, Hele aku nei no oe, Lawe i ka lima akau, Ka makua o kuu kino, E ola'i ka hune, Noho iho nei hoi au, Me ka u me ka minamina, Kaumaha me ka luuluu, Ka ukana a ke aloha, O'u makamaka ia, O ka aina malihini, O ka nohona inea, O ka uka e Kamaina, I alawa iho kuu hana, Aole na makua, Na hoa pupuu anu Ke kula e Filemona, Piina loa e Saluke, He moena loa e Hema, Kuahiwi anu e Bikolewa, Kahiko mai i ka ohu, Au ae nei hoi au, Aole hoi oukou, Na hoa au o ke kai, O ka moana iuiu, Alanui makamaka ole, Aina hoopili wale, Kaumaha mai ka manao, Ilihia i ka makemake, Uluhua i ka lohe leo, Aikena i ka ino nui, He lohe olelo wale, I ka ino o Aliki, Akahi a ike maka, I ka wai o na pali, Piha opala aku nei, Ka huina wai e Coloma, Eia la he aloha, Pauole nou e Mai. MRS. HARIATA KULAILUA. Irish Creek, California, March 3, 1863.