Ka Nupepa Kuokoa, Volume II, Number 37, 12 September 1863 — Palapala mai Kalaponi mai. [ARTICLE]

Palapala mai Kalaponi mai.

E ka Nupepa Kuokoa e ; Aloha oe : Ua hapai ia mai kuu manao makemake e na olelo a ka Luna pai o ke Kuokoa. E kahea ana ia Hawaii o Keawe, Maui o Kama, Oahu o Kakuhihewa, a me Kauai o Manokalanipo. a me Califoronia nei. na keiki kupa o ua aina kua makani la. E oleloana, " Ua paa ka moolelo o Laieikawai, i ka humuhumu Buke ia, a o ke kumukuai hookahi dala." Ae, a ka malama o October e hiki mai ana, ia wa e hoouna ia aku ai me ko makou manawalea, no na aina pekana, i mea e hiki pono aku ai. He nui ka makemake iloko o'u, e pai ia kekahi moolelo kahiko ioa, mai ka hoomaka ana mai o keia hanauna hiki wale i keia wa i mea e nalowale ole ai ma keia mau hanauna aku. Mai ka hoomaka ana mai o ka Mookuauhau mai loko mai, a hiki i keia manawa, hanau ke'lii, hanau ke kanaka, alaila, pii ka hanauna o na'lii, a hiki i keia wa. Pii hoi ka hanauna o na kanaka, a loaa kakou nei. A maloko o ia mau mahele elua i hai ia ae la maluua; alaila, akaka ke kanaka he kanaka, he kanaka kona olelo ana, pela hoi ke'lii, he Alii kona olelo ana, he Haku, he Ilamuku, ka mea nana e hoopai i ka poe hewa, a e hoopakele i ka poe pono. Hanau ke Alii e like me Kamehameha akahi. o Puou kona Kahuna, o Kaholo kona Kakaolelo, o Kalaikuahulu kona Kaula. o Kaliloa kona Kilo, o Kauakakiakahaola kona Kuhikuhipuuone. pela ko'u wahi lohe iki. Pela hoi na kaao kahiko e hana ia mai nei, e like me Kana, Kaweio, Kauahoa, Kamapuaa. a pela aku. Ina e hanaia keia moolelo, a me na Kano, a paa i ke pai Buke ia, elike me ko na nina naauao o ka honua nei, aole paha e ole ka ulu mai o ka makemake o ka naau o na keiki puni Nuhou, o ua aina ala o kaua. E kulike mai kakou, me ka manao lokahi. e olelo ana, E kuai no makou ! E kuai no makou! Ina pela ea ? Nau ia e ke Kilohana pookela o ke Aupuni Hawaii, e hookomo iho ma kahi kaawale o kou kino, i ike mai ai na kini o kaua, e noho ana mai Hawaii, a Niihau. Me ke aloha i ka Lunapai o ke Kuokoa. E. Kualawa. Missouri Bar, Yuba Co, Kal. Aug. 1, 1863