Ka Nupepa Kuokoa, Volume II, Number 46, 14 November 1863 — Page 3
| This text was transcribed by: | Kalihi Uka |
| This work is dedicated to: | Kamuela Kumukahi |
Ka Nupepa Kuokoa
KE KILOHANA POOKELA NO KA LAHUI HAWAII.
Na Palapala.
E noonoo no ke koho ana i na
LUNAMAKAAINANA.
E ka Nupepa e; Aloha oe:-
E oluolu paha oe e hookomo iho i keia manao maloko o kou puhaka. Eia no ia, he pinepine, maoli kuu ike ana i na manao maloko o na iwi-hilo o kou kino puipui, ma na mea pili i ke koho ana i na Lunamakaainana, nolaila, ua lana mai ko ' u manao e hoike aku ma ke akea, i mea e ike ai ka lehulehu. Eia no ia, "He mea maikai anei ke kanaka naauao e kaena iho i koaa naauao, a he kupono anei ia kanaka ke olelo ae pela, he kanaka akamai au, a he pono oukou ke koho mai ia ' u?"
Eia ka ninau, "He hana maikai anei ia no ke kanaka naauao ke hana pela, me ke kaena hele i o a ianei, a malaila anei e pono ai ka lehulehu?" Ke hoole nei au, aole, ua nui no ka naauao o kekahi poe e komo nei i ka AHaolelo, no Lahainaluna kekahi poe o lakou. Aka, auhea ka pilikia i hemo ae o ka lehulehu i ua poe naauao nei? Auhea hoi ka pomaikai o ka lahuikanaka? Auhea ia, wahi a ka mea ninau mai? Eia ka ' u e hai aku, aole loa no. A owai hoi ka kakou Lunamakaainana i ikemaka iho nei, ua hemo na pilikia eha o ka lehulehu? Aole! he ole loa no.
Nolaila, ke waiho akea aku nei au i keia manao imua o ka lehulehu, a e nana mai hoi kakou me ka noonoo nui ana i ka pono a me ka pomaikai o ko kakou lahui holookoa e noho nei, anolaila, he mea ole ke kanaka naauao hooakamai imua o ka lehulehu, ke ole e haahaa kona naau imua o ke Akua Mana Loa, a he mea io ole hoi ke kanaka naauao hookamani imua o ke Akua a me na kanaka. Aka , o kona manao nui loa, o ka loaa o kona puu dala mai ke aupuni mai; a heaha iho la hoi ko ka lehulehu pomaikai ia ia?
Eia no kona haina, o ka u i ke kaumaha, nolaila, ke hai aku nei au, o ka uwe maoli i ke kaumaha a me ka pilikia, me ka olelo iho, "Pilikia maoli ka lehulehu." Nolaila, e aho ke koho ana i kahi kanaka kuaama ilihune, naau hoopono, a he wahi naauao kupono no nae, e aho ia mamua o ke koho ana i ke kanaka naauao hohonu. Nolaila, he naaupo ka olelo iho, he kanaka naaupo o E. Makaioulu, a he kanaka ike ole i ka oihana naauao, nolaila, ke hai aku nei au ma ke akea, a e ike mai ka Apana o Puna, Hawaii, he wahi kanaka naauao a akamai kupono o E. Makaioulu, a he kanaka naau haahaa no hoi, a he makau i ke Akua, a he kinai loa i na mea ino a pau mai kona maka aku.
Aka, o kekahi poe naauao o Puna, he poe naauao io no lakou; aka hoi, aole nae lakou i hoomaopopo i ka pono o ka lehulehu iwaena o na makahiki i hala ae nei, nolaila, ke kauleo aku nei au ma ke akea, e noonoo mua kakou i na mea e pono ai mamua ae o ka malama hope o keia makahiki, i ka mea a mau mea paha i kupono i ko kakou noonoo ana e koho i Lunamakaainana no kakou e hele i ka Ahaolelo. Mai nana kakou i ka hinuhinu o ka ipukai laau, a e koho aku ia mea i umeke ua kakou e ai ai; aka, e pono paha ia kakou ke lawe ae i kahi ipukukui paupau ekaeka o ka naauao, a e koho aku na ia, malia o ae mai ke Akua e kokua mai i keia hana nui e pono ai kakou, a e pomaikai ai kakou. Aole ka pulale pupuahulu i ke koho ana. S W B KAULAINAMOKU.
Keaaa, Puna, Hawaii, Oct. 29, 1863.
Ahahui aloha no ke kokua ana
I KA MEA I MAKE,
E KA NUPEPA KUOKOA E; ALOHA PU KAUA:
E oluolu paha oe e hookomo iho i keia mau wahi hua olelo e kau ae la maluna iloko o kou waihona, i ike mai ai ou mau kini makamaka, e noho a la mai Hawaii a hiki loa aku i Niihau. Eia ua manao a la; no ke kokua ana i ka mea i make; e like me ka mea a hai ia ae nei maluna. Oia hoi keia, o ka haawi pakahi ana aku o kela mea keia mea i komo iloko o ka hui, i na wahi hapawalu a lakou i mea e kokua ai i ka mea i make; no kekahi o ua poe hui nei. A he kumu kupono no keia o ka hui ana pela, no ka mea, o ka kekahi poe wahine, he poe wahine kane make, a pela no na kane, i nele, aole ana mau keike, a i ole ia, mau moopuna paha a pili koko paha, ke ole kekahi o keia mau mea i hai ia aku, alaila, na wai e huna ia ia ma kahi kupono, na keia poe i komo iloko o ka hui e kokua ia ia me ka maikai. Ea, aole anei keia he kumu kupono, o ka hoomahui ana o keia poe nona ke komo ana iloko o ka hui kokua i ka mea i make,
I ko ' u manao maoli ma keia, he kumu kupono maoli ka hana ana i na mea e mau ai ko lakou Ahahui aloha ana. Aole nae i pili keia mea i haiia ' ku nei i ka poe i komo ole iloko o keia Ahahui, aka, no ka poe no i komo iloko o ka Ahahui Aloha, e kokua i ka mea i make. Auhea oukou e o ' u poe hoa aloha e noho mai la i Hawaii o Keawe a hiki loa ' ku i Kauai o Mano, e lio keia i kumu na kakou e hoohalike ai me keia poe, nona ke kanu ana i ka hua maikai, aole no hoi keia he kumu e pono ole ai ia kakou ke hapai i keia hana maikai maoli, no ka mea, aole paha i pau loa ka poe e noho mai nei i ka lako i na wahi aahu kupono no ko lakou make ana. Ma ko makou mau apana o Olowalu a me Ukumehame nei, ua lai maoli no ka hoi, i na pela kekahi mau apana o keia mau Mokupuni, ka, lele maoli ka hoi ko ' u puuwai i ka olioli. Nolaila no hoi ka lana ana o kou manao e hai aku i keia mau mea ia oukou. E aloha auanei. S.K
Olowalu, Maui, Oct. 24. 1863.
Hoolaha pono ole i ka
INOA MAIKAI.
E ka Nupepa Kuokoa e; Aloha oe:
Ua halawai iho nei au, me ka Olelo Hoolaha a J S Milikaa, ma ka Helu 41 o ka la 6 o Oct., M.H 1861, e i ana he kahu Ekalesia huhu o E. Nainoa, e ike mai auanei oukou e ou mau makamaka, e noho ana mai Hawaii nei a Niihau. Ke waiho aku nei au i kou ike maka imua o oukou, o keia kanaka o J.S Milikaa, aole ma Hauola, Hamakua, Hawaii, ei la ihea keia J.S Milikaa kahi i noho ai? He keu keia o ke kanaka wahahee, in a he kanaka pono, ka mea nana keia olelo, e haule ana oia i ka wahahee, in a hoi he enemi ka mea na na i lulu, e haule ana oia i ka popilikia, ke hoole loa nei a ' u, aole au i hana pela maloko o ka Luakini, ma Maunahoano.
Eia kekahi, ke i mai nei, "He Makai no ko makou apana nei," ae, ma kuu aoao Makai, kapakahi kuu kapu, puku pau i ka lawehala, hopohopo mai nei loko, i ka lipine ulaula, hookahi o Nainoa weliweli o Hamakua, paa i ka hao, paa i ke kaula, kohu ka ilio makole ilaila, o ka hana ia a ka aoao maikai. Owau no me ke aloha.
E. NAINOA.
Kakalae Hamakua Hawaii, Oct. 26, 1863.
Make i ke Kai.
Ua make iho nei o Mr. P Hanson o Waioli, Kauai, ma ke kai, ma ke alo iho o kona hale, ma ke ahiahi o ka Poalima, la 30 Oct. iho nei.
Penei ka make ana, ua holo pu me kekahi haole e noho pu ana me ia, e auau kai, a ua hele laua iloko o na nalu nui o ia ahiahi, me ka ike ole o laua i ka ikaika loa o ke au, a no ka lilo aku o Hanehe i waho loa ma na nalu nui, a no ka huki ikaika loa o ke au malalo, aole hiki ia ia ke hoi mai, o ka palemo koke no ia, a nalowale aku. Ua huli kohe ia kona kino, aole nae i loaa a hiki i keia manawa.
Elua pakele mahunehune ana okona hea aoia kakou ma keia poino i hiki mai ai ia ia
1. O ka hele ole maloko o na nalu nui o ke kai me ke ike ole o na au o ia wahi.
2. Ua ao ia hoi kakou a pau e noho makaukau, no ka hiki ana mai o ka make no ka mea, aole kakou ike i ka la a me ka hora e hiki mai ai ia.
Hele o keia mai ke Akua mai i ka poe noho hoomaloka.
E imi ia Iehova, oiai oia makahi e loaai e hea aku ia ia, oiai oi ma kahi kokoke.
E IOANE.
Waioli, Kauai, Nov. 2. 1863
Kanikau aloha no Apigaga
KANOONOO.
Kuu kaikamahine mai na pua hala o Hamakua.
Ke hehi haaheo mai la i ka halihi o ka lehua.
E nape ana i na pua ai a ka manu.
E hoonana ana e na ke aloha i Waialoha,
Aloha oe aloha wale la.
Kuu kaikamahine mai ke ala ua o Koolau,
E nana ana i ka au mai o na hala i ke kai,
E kaapa ana i ka pakika o na pali,
O Keanae waiho mai i ke kai-e.
Aloha ino no hoi oe-aloha-e.
Hoanoano aloha ia ' u ke alo o na pali,
I walea ai kuu keiki i ka ohi pua lei.
O Apigaga wahine i ka poli o ka makua,
E aloalo ana na maka i ka leo o ka manu
Kuu keiki aloha aloha e.
Kuu keiki ma ka awapuhi pala i ka ua awe o ke Koolau,
Mai ka ua kea hehi mai iluna o ka laau,
E uwe hoonene ana i ke alo o Kamakahala,
Na puhala peeua i kai o Puhalanui,
Aloha wale ia kula, la
Kuu keiki mai ka hale halau loa a ka makani,
Mai ke ala apuupuu opilopilo e waiho mai nei la.
I kaaia e kaua ka loa ka laula o ka aina,
Kuu keiki mai ka la wela o Huelo,
Hoomaha aku kaua i ke alo o Kaukahoku,
Uumi wale kuu aloha ia oe la.
Aloha oe e ka haku kau o ka manao,
O Apigaga puni lei o Hamakua,
E holoholo ana iuka ikai o ua wahi nei la,
Ua ohuohu wale i na papahi lei a ka manu.
R.K PUOAINA.
Kaukahoku, Huelo, Maui.
OLELO HOOLAHA.
NO KA MEA, UA NOIIA MAI WAU E John Davis, e hoonoho ia ia i Luna Hooponopono i ka Waiwai o Kauwahi, no Waipio, Hawaii, i make aku nei: nolaila, ua hoikeia i na kanaka a pau hoa, ke pili, o ka Poakolu, oia ka la 25 o Novemaba, ma ka hora 9 o kakahiaka, oia ka la a me ka hora i oleloia, e hoolohe i keia noi ana a me na mea hoole i hoikeia, aia ma ka Hale Hookolokolo ma Waimea, Hawaii. J. WIGHT, Lunakanawai Kaapuni.
Kohala , Hawaii , Oka.29, 1863. 103-2t
OLELO HOOLAHA!
I ka põe ku i ka Auhau ma ka Apana
O KONA, OAHU.
O KA MEA NONA KA INOA MALALO nei, ua noho oia ma kona Keena Oihana ma kona anoLUNA AUHAU, no ka apana i oleloia maluna, ma ka hale e ku la ma ke kihi akau o ke Alanui Nuuanu a me ke Alanui Moiwahine. O na Poakolu a me na Poaono a pau, iwaena o ka hora 9 o ke kakahiaka a hiki i ka hora 4 o ke ahiahi, oia ka manawa hana. ABR FORNANDER (Abelehama) 103-3m Luna Auhau.
Na ke Aupuni.
Ua oluolu ka Moi e koho aku ia Ka Mea Hanohano CHARLES GORDON HOPKINS, hoa o ka Hale Ahaolelo o na Alii, a hoa hoi o ka Ahakukakukamalu o ke Aupuni, i Kuhina Waiwai no ka Moi.
HANAU.
Ian. 8, na Waioli, hanau o Hanaonaopio k, na P. Hanson me Laheia.
Ian 24. ma Hanalei uka, hanau o James k, na James me Moeikauhane
Ian 25, malaila no, hanau o Kulaopio k, na Kula me Papai.
Mar. 24, ma Waipa, hanau o Mama w, na Kukui me Maraeia.
Mar 26, ma Kapuoa, Waioli, hanau o Inoaole k, na Kekahu me Kealo.
Mar 28, ma Waioli, hanau o Inoaole k, na Kekahu me Kealo.
Mar 29, ma Hanalei uka, hanau o Inoaole k, ua Keoni me Ukuuku.
Apr 1, ma Hanalei uka, hanau o Kamehai k, na Kamehai me Mokoi.
Apr 2, ma Hanalei uka, hanau o Kamehai k, na Kamehai me Mokoi.
Apr 13, ma Kaunuopua, hanau o Kaiminaauao k, na Nahoa me Kaipu.
Mai. 5, ma Hanaleiuka, hanau o Kamehai k, na Kamehai me Kaaina.
Mei 12, ma Hanalei, hanau o Mere w, na J Dudoit me Maraea.
Oct. 7, ma Kalae, Molokai, hanau o Pilipo k, na Kaikiomeheula me Kapololei.
Nov. 3, ma Kaumakapili, Honolulu, hanau o Kuihewa w, na Kawae me Manoanoa.
Oct 17, ma Lipuu, Honokohau, Maui, hanau o Ulakaheo k, na Kihei me Paahao.
Sept 7, ma Kahanalea, Puna, Hawaii, hanau o C.H Kaikuaana k, na C.H Kaikuaana me Mere Kaulaihelani.
Oct 18, ma Ki, Puna, Hawaii, hanau o Kamalu w, na J.W. Punahoa me Kalakualaau.
Iulai 8, malaila no, hanau o J Kaneiaulu k, na Kaneiaulu me Hai.
Aug 7, malaila no, hanau o Aarona, ka Aarona me Luka.
Aug 14, ma Kaluakanalua, hanau o Kale k, na Kanealii me Makau.
Aug 16, ma Hanalei, hanau o Elisapeka w, na Kaukaha me Paakiha.
Au 18, ma Hanalei, hanau o Alika k, na Alika me Pauelua.
Aug 27 ma Hanalei, hanau o Kamehai k, na Kamehai me Auwe.
Sept 3, ma Waioli, hanau o Loisa w, na Niau me Anaana.
Oct. 20 ma Kapalama, Puna, Hawaii hanau o Kahale w, na Paahao, he keiki kamehai.
Ma Waipa, hanau o Kaholo kau k, na Kaiwi me Haleole.
Ma Hanalei, hanau o Ioane k, na Kuke me Kaea.
MARE.
Nov 13, ma Kapanaio, Honolulu, mare o Haupu me Kukona, na W E Clark laua i mare.
Oct. 11, ma Kalaupapa, Molokai, mare o Uwahinui me Pipi, na S.K Kuhano laua i mare.
Nov. 7, ma ia wahi no, mare o Samuel David me Mahawela Kahue, na S K Kuhano laua i mare.
Nov. 7, ma la wahi no, mare o J H Lathrop me Mary Koa, na S K Kuhano laua i mare.
Iulai 9, ma Hanalei, Kauai, mare o D Kalukahame Paakiha na D Nuuhiwa laua i mare.
MAKE.
Nov 4, ma Keauhou, Honokohau, Maui, make o Akenaka Naimuki w.
Oct. 30, ma Paaukini, Honokohau, Maui, make o D W Waihoepalolo k.
Nov. 10, ma Puulena, Manoa, make o Naiwi k,
Nov. 10, ma Palolo, Oahu, make o Paele w.
Nov 9, ma Aala, Honolulu, make o Paele w.
Nov. 9, ma Aala, Honolulu, make o Maukaa w.
Nov 10, ma Honolulu, make o Kauka Keoni Tennant, mai Kaliponia mai, he hokii kona mai i make ai.
Maraki 25, ma Hanalei, Kauai, make o Nika w.
Mar. 26, ma Waipa, Kauai, make o Maria w.
Mar. 18, ma Waioli kauai, make o kulou k.
Mar. 29, malarial no, make o Inoaole k.
Mar. 29, ma ia wahi no, make o kealo w.
Aperila 15, ma Hanalei , Kauai, make o kahilahila w.
Ap. 16, ma ia wahi no, make o Paahale w.
Apr. 18, ma Waioli, kauai, make o Hanasona k.
Apr. 26, ma Waipa, make o Nalaekolu k.
Mei 27, ma ia wahi no, make o James K.
Mei 9, ma Hanalei, Kauai, make o Kamalii w.
Mei 15, ma ia wahi no, myke o kaukani w.
Mei 20, ma ia wahi no, make o Akoni.
Mei 27, ma ia wahi no, make o Pule k.
Mei 29, ma ia wahi no, make o Heneri k.
Mei 30, ma ia wahi no, make o o Kaneineuanu w.
Iune 16, ma ia wahi no, make o o Kaneineuanu w.
Iune 17, ma Hanalei, make o Hookala k.
Iulai 8, ma ia wahi no, make o Inoaole k.
OLELO HOOLAHA.
E KUAI KUDALAIA ' NA NA LIO he 5, ma ka Pa Aupuni.
Ma Waiawa, Ewa, Oahu,
ke hiki aku i ka la 20 o Novemaba, i ka hora 19 o kakahiaka, oia ka Poalima. A he mau Lio e 4, i ka Poakahi, la 23 o Nov.,i ka hora 10 o kakahiaka. A he Lio e ae no 1, i ka Poalua, la 24 o Nov., i ka hora 10 o kakahiaka. Ke ano me ka hao malalo nei;
1 Lio kane keokeo, hao akau K, hema AF.
1 Lio Wahine hauliuli kalakoa, hao akau
1 Lio kane eleele, hao akau KN, hema P, a-i N.
1 Lio kane ahinahina, hao akau AK, hema ano e.
1 Lio wahine ulaula, hao ano e.
1 Lio kane hulupala, hao akau H, hema 3.
1 Lio kane keokeo kapuai hao, hao akau I.G.
J. KAHAUOLONO, Luna Pa Aupuni.
Waiawa, Ewa, Nov. 12, 1863.
OLELO HOOLAHA.
E KUAI KUDALAIA ' NA 1 LIO I ka Poakahi oia ka la 16 o Novemaba, hora 12 o ke awakea. He mau kio hou mai kekahi. Ke ano me ka hao malalo nei ma ka Pa Aupuni.
Ma Pauoa,
Ma ka Poakahi, Nov 16,
1 Lio kane ulaula wiwi, hao ano e.
1 Lio kane ulaula maikai, aole ike ia o ka hao.
1 Lio kane ahinahina keokeo, hao akau Re.
1 Lio kane keokeo wiwi, hao hema H.
1 Lio kane eleele kuapuka, hao akau RHK, hema LK.
1 Lio kane eleele kuapuka, hao akau NAPKZI, hema e.
1 Lio wahine ulaula wiwi, hao ano e.
1 Lio wahine ulaula wiwi, hao akau B.
I Bipi wahine eleele, na Hilipalani.
NAPUNAKO, Luna Pa Aupuni.
Pauoa, Nov. 13, 1863. 102-1t
OLELO HOOLAHA.
NO KA MEA, UA NOIIA MAI KA MEA Hanohano G M Robertson, kekahi na Lunakanawai o ka Aha Kiekie e Kamaikaopa w, e hookumu ia ia i i Luna Hooponopono Waiwai no Kamano, k., no Kamaile, Oahu, i make iho nei. No laila, ua hoike ia i na kanaka a pau loa, ke @ ka P@2 oia ka la 28 o Novemaba, i ka hora 9 o kakahiaka., oia ka la me ka hora i paa no ka hoolohe i ka aoao hana @ mau a me na mea @ hoikeia ana ma ka Hale Hookolokolo ma Honolulu, Oahu.
G. W. Brown
Kakauolelo Kokua no ka Aha Kiekie
Honolulu, Nov. 11, 1863.
Olelo Hoolaha.
NO KA MEA, UA NOIIA MAI KA MEA Hanohano G M Robertson, kekahi o na Lunakanawai a ka Aha Kiekie e S L Kapahukula, e hookohu ia ia i Luna Hooponopono Waiwai no Haule k, no Honolulu, Oahu, i make ma ka @. Nolaila, ua hoikeia i na kanaka a pau loa, ke pili, oia ka la a me kahi @[remainder of paragraph] aia ma ka Hale Hookolokolo ma Honolulu, Oahu.
G W BROWN.
Kakauolelo kokua o ka Aha Kiekie.
Honolulu, Oahu Nov. 10 1863. 163-2t
OLELO HOOLAHA
UA HOOPII MAI o KAILIANU w, KUE I kana kane o Moekaona, no Hana, Hawaii, mamua, e hoko i ko laua mare ana, no ka haalele wale ana no na makahiki, ekolu o Moekaona, i kana wahine. E hanaia keia hoopii imua o ka Mea Hanohano Ioane Ii, kekahi Lunakanawai o ka Aha Kiekie, ma ka la 28 o Okatoba, i ka hora 10 o kakahiaka, aia ma ka Hale Hookolokolo ma Honolulu, Oahu.
G W BROWN.
Kakauolelo kokua o ka Aha Kiekie.
Honolulu, Oahu. Nov 11, 1863.
OLELO HOOLAHA.
NO KA MEA, UA NOIIA MAI KA MEA Hanohano Elisha H. Allen, ka Lunakanawai Nui o ka Aha Kiekie e F H Hutchinson, Kekahuna ame Kaaipule, no ka hooiaio i na Palapala Kauoha o Timoteo Opio, no Lahaina, Maui, i make aku nei: Nolaila, ua hoikeia i na kanaka a pau loa, ke pili, o ka Poalua, oia ka la 8 o Dekemaba, i ka hora 9 o kakahiaka, oia ka ia a me ka hora i oleloia ka hoolohe i ka oiaio o keia Palapala Kauoha, aia ma ka Hale hookolokolo ma Honolulu, Oahu. JNO E BARNARD
Kakauolelo o ka Aha Kiekie.
Honolulu, Nov 9, 1863. 103-4t
OLELO HOOLAHA.
NO KA MEA, UA NOIIA MAI KA MEA Hanohano G M Robertson, kekahi Lunakanawai o ka Aha Kiekie e Keaka & Wahea, no ka hooiaio i na Palapala Kauoha o Apiki k, no Honolulu, Oahu, i make aku nei. Nolaila ua hoikeia i na kanaka a pau loa, ke pili, o ka Poaono, oia ka la 28 o Novemaba, i ka hora 9 o kakahiaka, oia ka la a me ka hora i oleloia, no ka hoolohe i ka oiaio o keia Palapala Kauoha, aia ma ka Hale Hookolokolo ma Honolulu, Oahu.
G W BROWN.
Kakauolelo o ka Aha kiekie.
Honolulu, Oahu, Nov 12, 1863. 103-+2t
OLELO HOOLAHA.
NO KA MEA, UA NOIIA MAI WAU E Kanakaole, e hoonoho ia ia i Luna Hooponopono i ka Waiwai o Puaanui, no Waipio, Hawaii, i make aku nei: Nolaila, ua hoikeia i na kanaka a pau loa, ke pai, o ka Poakolu, la ka la 25 o Novemaba, ma ka hora 9 o kakahiaka, oia ka la ame ka hora i oleloia, e hoolohe i keia noi ana a me na mea hoole i hoikeia, aia ma ka Hale Hookolokolo ma Waimea, Hawaii. J WIGHT. Lunakanawai Kaapuni.
Kohala, Hawaii. Oka. 20, 1863. 103-2t
Lio Komohewa.
E IKE AUANEI NA KANAKA A pau ma ka Mokupuni o Molokai, owau o ka mea nona ka inoa malalo iho, ke hai aku nei au ia oukou, Eia ma kuu aina kekahi Lio hele hewa e noho nei, o ka lua keia o na makahiki o ka hele ana o keia Lio maluna o kua aina, ua hoopoino i na mea kanu a me na mea alu maluna o ka aina. Ua hele aku kuu kanaka e ninau i ka mea nona keia Lio, a me ke kauoha aku e kii mai, aole nae i ii ia mai a hiki i keia wa; nolaila, ke hoolaha nei au ma ka nupepa, i ike ai na mea a pau. Penei ke ano o ka Lio, he Lio ano ulaula, he keokeo ma ka lae a hiki i ka ihu, hookahi kauai keokeo ma ka uha hope akau, aole nae i kuniia keia Lio. Nolaila, e kii koke mai oe e ka mea nona keia Lio, me ka makaukau pu mai i na dala he $15 00. A e loaa no au ia oe ma Puuohoku, a ina e kii ole mai ka mea nona keia Lio, a hala na la he kanakolu, alaila, e lilo loa keia Lio ia ' u, a e kuni no au i kou hao ponoi. MICHAEL J NOWLIEN.
Puuohoku, Molokai, Nov. 7, 1863. 103-3t
Olelo Hoolaha.
E IKE AUANEI NA KANAKA A PAU, owau o ka mea nona ka inoa malalo nei, ke papa nei au i na mea holoholona, Lio, Bipi, Hoki, Miula, Hapa, Puaa Ka, aole e hele ma kuu aina kuai, eia.
O Kahalii, Hilo, Hawaii.
e malama i ko oukou mau holoholona mai hookuu wale; o ka mea hookuli, e hopu no ko ' u hope, oia o Palau, a e hoouku e like me ke kanawai. Ina e loaa kekahi o kela mau holoholona i oleloia maluna, ina komo maloko o kuu aina kuai $1 00, no ke ae pakahi o lakou, e lilo keia olelo hoolaha i kanawai i kona la hoolahaia ' i ma ka nupepa. J KAPAKAULA.
Manoa, Oahu. Nov.11, 1863. 103-2t
OLELO HOOLAHA.
O KA OLELO HOOLAHA A KUU WAHINE mare, a Kamealani, ma ke Kuokoa, Helu 45, e olelo ana. "Elua kumu o kona hookaawale ana. O ka lawe i kona ola." "O ka hoopuka ana i na olelo hilahila." "Aole pela, a ina pela ea, pakele anei kona ola ke kii aku au, a kaili oe, oiai oia e noho koke mai ana; aole e pakele, a pela ka hoopuka ana i na olelo hilahila. Aole o neia mau kumu elua, na kumu e kaawale ai, aia a make kekahi o maua, alaila kaawale; aka, ua haalele ia mai au no ka lawa ole o kona kino ia ' u hookahi, aia i na mea e ae a nui wale e lawa ' i. Ku no i kahi olelo au "Lele no ka manu o Kauia, lele i Koiahi." E lele ana no ma o, a ma o, e ai i na mea ana i makemake ai, i lawa ' i, a maona piha pono. E mau no kuu olelo hoolaha mua nona.
IOBA KAHEMA.
Honokaupu, Honolulu, Nov 11,n1863. 103-1t
MAKEMAKEIA I WI.
KE MAKEMAKE NEI KA MEA NONA KA inoa malalo nei, e kuai aku i ka hua WI, me ka uku aku i la kumukuai makepono loa, penei.
4 Keneta no ka paona WI me ka aa.
6 Keneta no ka paona WI i maihiia ka ili.
I ka WI wale no i oo ka mea i makemakeia. E hele mai no ma ko ' u hale, ma ke Alanui Papu, makai iho o ka Hale Kuai Pea o C.H Lui ma. E BURGESS, Poikeke.
Honolulu. Nov. 13, 1863. 103-1m
OLELO HOOLAHA.
E IKE AUANEI OUKOU E NA KANAKA a pau ke nana mai i keia olelo hoolaha. Ua hele aku ka ' u wahine mare.
O Kamealani
ka inoa, a ua haalele mai ia ' u a i ko maua wahi moe, a nolaila, ke papa aku nei au ia oukou na kanaka a pau o kela ano a o kea ano, mai hoaie iki oukou ia ia a keia hope aku, a ina e hoaie oukou ia na, maluna no ona ko oukou poho.
IOBA KAHEMA.
Honokaupu, Honolulu, Oka., 24, 1863
MAKEMAKEIA,
UA MAKEMAKEIA HE 20 A HIKI I KE 40 Kanaka Paahana, no ka Aina Mahi Ko, ma Kaneohe, @. E hele ae no me ka mea nona ka inoa malalo e kamailio ai no ka uku.
R E WAKEMAN (Lapaki)
Kaneohe, Nov. 5 1863.
OLELO HOOLAHA.
KA POE JURE KANAKA MAOLI NO KA Aha Hookolokolo Kaapuni ma ka Apana elua ma Lahaina, Maui, e hoomaka ana i ka Poalua, oia ka la 3 o Dekemaba. M H 1863.
Kahunakai, Kaanamo,
Moses Kahuia, Luluka,
George Miner, Poholopu,
Kaiwiopiopio, Hauke,
W H Kaauwai, Jesse Crowningbune,
D Kahaalehu, Soloman Prerere,
Kaahawapu, Luahine,
Kahawalu, Henry Copp,
Mai, David Crowningburg,
Kapeahi, Charles Kalu,
Keawe 2, J H Kaiheekai,
David Barrows, M Kaniau.
JNO E BARNARD.
Kakauolelo o ka Aha Kiekie.
Honolulu, Nov. 6, 1863 102-4t
$20 MAKANA!
E HAAWIIA HE $20, I KA MEA NANA e hoike mai, i hoopaiia'i ka mea, a poe paha, nana e lawe nei, a e hoonee nei i keia wa, a ma keia hope aku, i ka pohaku malalo o ke ALAHAKA mauka o ka WAIPIULA, ma ke Alanui Nuuanu, ma Pualoalo.
GEO H LUCE.
Luna Alanui.
Keena Luna Alanui, Nov. 2, 1863. 102-2t
E MAKAALA!
OWAU
O KAMUELA,
KA HOA KUAI O NA
KANAKA HAWAII.
NONA KA HALE KUAI PAPA MAuka iho o ka
Hale Hookolokolo
ma Honolulu. Ke hai aku nei au ia oukou, he mau la ku wale no keia e kuu moku papa,
"CONSTITUTION!"
a ke ku mai oia, e loaa ana ia ' u na
LAKO KAPILI HALE
o kela ano, keia ano
EIA NO KE WAIHO NEI.
NA:
PAPA O KELA ANO, KEIA ANO.
LAAU HALE, o kela ano, keia ano,
PILI HALE,
PINE,
AAHO,
KEPA,
PANI PUKA,
PUKA ANIANI,
OLEPELEPE,
KUI,
PENA,
AILA PENA,
WAI HOOMALOO PENA.
IA MEA AKU, IA MEA AKU,
Ua makaukau au e kuai aku me ka oluolu i keia mau mea, a no ka maopopo no paha ia oukou he KEIKI KAMAAINA au, he hiki ia oukou e ka Lahui
Mai Hawaii a Niihau,
ke kipa mai i o ' u nei. E hiki ana no na moku papa o ' u i na manawa a pau, a hoolako mau ia ' u. He mea mau i na poe o ka hiki mai ka haanui, a me ke kaena. A he mau Luna kekahi i hoonoho ia e lakou e alako ana i ka poe maikai, me he lawehala la. Aka, he hiki ole ia ' u ke hana pela, o ko ' u ano no ka oukou e imi mai a loaa, maopopo no na hana a kakou, no ka mea, o ko Hawaii nei kupa iho la no ia o ko oukou makamaka.
KAMUELA, (Kaikaina o Kimo Pelekane)
Honolulu, Oka 15, 1863 99-3m
HALE PAI KII.
MALUNA AE O KA KEENA PAI O KA
"Nupepa Kuokoa."
Emi ka uku no ke kii. E paiia no ke ka iluna o le
ANIANI a me ka PEPA.
E hele mai e na makamaka e pai i ka oukou mau kii.
H L CHASE (Keike)
Mea Pai Kii
OLELO HOOLAHA.
Waiwai o Kamawae, no Waipouli, Kauai.
i make aku nei.
NO KA MEA, UA NOIIA MAI OWAU E A Keohokalole, no ka hookohu ia ia i Luna Hooponopono maluna o ka Waiwai o Kamawae, no Waipouli, Kauai, i make aku nei. Nolaila, ua hoikeia i na kanaka a pau, ka pali, o ka Poakahi, oia ka la 29 o Novemaba. I ka hora 10 o kakahiaka, oia ka la a me ka hora i oleloia, no ka hoolohe i ka oiaio o keia noi ana mai a me na mea hoole i hoikeia, aia ma ko'u Keena Hookolokolo ma Nawiliwili, Kauai.
H A WIDEMANN.
Lunakanawai Kaapuni, o ka Apana 4
Hoolae, Kauai, Oct. 28, 1863.
OLELO HOOLAHA
NO KA MEA, UA KOHOIA MAUA E KA Mea Hanohano G M Robikana, kekahi o na Lunakanawai o ka Aha Kiekie i mau Luna Hooponopono Waiwai no KEO, no Kapalama i make aku nei. Nolaila, ua kauohaia na mea a pau i aie ia ia, e hookaa koke mai, a o na mea ana i aie ai e hoike koke mai. KAHAPUU k.
KAEHA w,
Na Luna Hoponopono Waiwai.
Honolulu, Nov. 2, 1863.
OLELO HOOLAHA.
NO KA MEA, UA NOIIA MAI KA MEA Hanohano, G M Robertson, kekahi o na Lunakanawai o ka Aha Kiekie e H M K@wai, e hookohu ia oia i Luna Hooponopono Waiwai no @, k, no Manoa, Oahu i make aku nei. Nolaila, ua hoika ia i na kanaka a pau loa, ke pili, o ka Poakahi, oia ka la 16 o Novemaba, i ka hora 9 o kakahiaka, oia ka la a me ka hora i oleloia, no ka hoolohe i ka oiaio o keia noi ana mai a me na mea hoole i hoikeia, aia ma ka Hale Hookolokolo ma Honolulu, Oahu.
G. W. BROWN
Kakauolelo kokua no ka Aha Kiekie
Honolulu, Nov. 6, 1863 152 2t
OLELO HOOLAHA
AUHEA OUKOU E NA KANAKA A pau loa, ke hai aku nei, au akua o oukou, ua kapu loa ko'u mau aina a pau.
Ma Pahupahuapuaa,
aole no e komo wale kekahi holoholona, ka Lio, Bipi, Kao, Miula a me kela ano keia ano holonolna, ua kapu loa keia mau mea. Ina e loaa kekahi o na holoholona i oleloia maluna, maluna o ko'u aina ma ke ano komo hewa, e hoouku no e like me ka mea kupono. ANTONE ENOS.
Waikiki, Nov. 2 1863. 103-2t
OLELO HOOLAHA.
NO KA MEA, UA NOIIA MAI KA MEA Hanohano G. M. Robertson, kekahi Lunakanawai o ka Aha Kiekie e P. Naone, no ka hookohu ia ia i Luna Hooponopono Waiwai no Kiekie k., a me Nailianu w., no Waialua, Oahu, i make aku nei. Nolaila, ua hoikeia i na kanaka a pau loa, ke pili, o ka Poakahi, oia ka la 16 o Novemaba, i ka hora 9 o kakahiaka, oia ka la a mea ka hora i oleloia no kahoolohe i ka oiaio o keia noi ana mai, a me na mea hoole i hoikeia, aia ma ka Hale Hookolokolo ma Honolulu, Oahu
G. W. BROWN.
Kakauolelo kokua o ka Aha Kiekie,
Honolulu, Oahu, Nov. 2, 1863.
OLELO HOOLAHA.
UA KOHOIA KA MEA NONA KA INOA malalo i Luna Hooponopono no ka waiwai o nahaolelua, no Waihee, Maui, i make kauoha ole. O na mea i aie ia ia, e hookaa mai, a o na mea hoi ana e aie aku ai, e hele mai imua o'u me na hoike kupono no ke koi ana. O ka la 14 o Novemaba, ma ko'u home.
Waihee, Maui, Oct. 15, 1863.
OLELO HOOLAHA.
Waiwai o Pololei w, no Waimea, Kauai.
i make aku nei.
NO KA MEA, UA NOIIA MAI OWAU E Isaac K. Kauniai, no ka hooiaio ana i ka Palapala Kauoha hope loa o Pololei wl, no Waimea, Kauai, i make aku nei. Nolaila, ua hoikeia i na kanaka a pau loa, ke pili, o ka Poaha, oia ka la 3 o Dekemaba, i ka hora 10 o kakahiaka, oia ka la a me ka hora i oleloia, no ka hoolohe ika oiaio o ua palapala kauoha la, a me na mea hoole i hoikeia, aia ma ko'u Keena Hookolokolo ma Waimea, Kauai.
H. A. WIDEMANN,
Lunakanawai Kaapuni o ka Apana 1.
Hoohae, Kauai, Oka 15, 1863.
KA MOKUAHI
"ANNIE LAURIE,"
E HAALELE ANA IA HONOLULU
I KELA POAONO KEIA POAONO.
@
I KA HAPALUA O KA HORA 4 AHIAHI.
NO
LAHAINA,
ULUPALAKUA,
KAWAIHAE,
a me KONA,
@
JANSON, GREEN & CO
@
Honolulu, Aug. 29, 1863 92-2t
@[line]
@[line]
OLELO HOOLAHA
I NA KANAKA HAWAII!
Makai iho o AIGUPITA
Ma hope iho o ka Pa
O MAHUKA!
KA
Pa Kuai Papa
O
LEWERS & DICKSON,
MALAILA E LOAA AI NA PAPA O KEIA ano kela ano, keia ano, ma ke kumukuai makepono loa. E naue mai oukou e ike i ka oiaio o keia leo paipai a @ makamaka Hawaii.
NA PAPA OLEGONA,
LAAU HALE A ME NA POU,
LAAU KAOLA A ME NA PINE PA,
LAAU AAHO HALE PILI MAOLI
PAPA ULAULA, PAPA PAINA,
PAPA KEPA A ME KA AAHO,
PILI ULAULA A ME KE KEOKEO.
Eia ka mea
KUPANAHA
Ma keia hale-maanei i wiliia'i ka
PALAOA a ma ka HANA PAHU
e like loa me ko
ULAKOHEO
mamua, i kona wa e kau ana, aole i pau i ke ahi mamua; nolaila, e naue mai e makaikai.
Na Pena Keokeo a me ka Omaomao,
Na Pena Ulaula a me ka Eleele,
Poho, Kolu, Halu Pena,
KUI o na ano a pau,
LAKA o na ano a pau,
Ami, Kilou, Kui kakai moena,
Kui Nao,
Pani Hale,
Pani Aniani, Pake,
Aniani kaawale,
Pani Olepolepe.
A PELA WALE AKU.
Aole o maua hoolimalima i poe e koi aku i na kanaka e kuai mai ma ko maua wahi, aka, he hilinai no maua ma ke ano maikai o ka @ kumukuai o ka mea papa, me ka malama pono @ hana @ [to end of paragraph].
Honolulu, Oahu, @ 15, 1863.
E.P. ADAMS, ADAMU,
HALE KUAI HOI.
MA LAHAINA, MAUI.
E HELE MAI OUKOU A PAI E KA
poe o Lahaina a me Maalaea, @
HALE KUAI HOU,
kahi e kuai MAKEPONOIA @
NU HOU O NA ANO A PAU.
NA
LOLE ANO HOU ame na
LOLE KOMO,
PA, BOLA, ame na mea e ae
PENA, AILA PENA,
PALAKI PENA, ame ka
PALAKI HAMO PUNA
KOPA, KAULALIO, HO,
PAKEKE ame ka PULUMI
INIKA, AILA HAMO LAUOHO,
KAMANO, KOPAA, KUI,
KUI WAAPA, PALENA,
PAPA WAAPA
A ME NA MEA E AKU HE NUI WALE.
E P ADAMS
Lahaina Aug 24, 1863. 92-3m
Kela Humuhumu Lole.
O
C H NICHOLSON.
UA LAWE AE NEI AU I RUMI MA KA Hale o Mr. McIntyre ma ke alo mai o kahi o A D Cartwright, Esq., malaila au e loaa ai i na hora a pau o ka la. O ka poe mea hana a makemake e waiho me a'u, e hiki no ia lakou ke hana pela me ka hilinai mai; a o ka poe a pau o keia kulanakauhale a'u i aie aku ai, he mea pono no lakou ke lawe mai i ka lakou hana ia ' u, no ka mea e haawi aku no au i kekahi hapa o ko ' u uku, no ko ' u ale. E hele mai i hookahi! E hele mai a pau.
93-3m
OLELO HOOLAHA
A KA
LUNA AUHAU.
E NA KANAKA A PAU O KA APANA O Koolaupoko, Mokupuni o Oahu, ke kahea aku nei au ia oukou a pau, ka poe i ku i ka Auhau i helu ia, a i helu ole ia, no na Auhau a ke Aupuni. E hele mai oukou a pau ma Kaneohe, ma kahi o J W KEA, e hookaa mai ai i ko oukou mau auhau a pau ia ' u, mai ka hora 8 o kakahiaka a i ka hora 3 o ke ahiahi o na la noa a pau. Ina aole e kaa i ka la hope o Novemaba a mamua mai paha, e ohi ia ma ke Kanawai.
IOBA KAHEMA.
Luna Auhau o Koolaupoko
Honolulu. Nov. 5, 1863. 102 2t