Ka Nupepa Kuokoa, Volume III, Number 9, 27 February 1864 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

BUKE III.      HELU  9.                    HONOLULU, FEBERUARI 27, 1864                     NA HELU A PAU 118.

"KA NUPEPA KUOKOA."

HOOPUHA MAU IA MA HONOLULU

I kela Poaono keia Poaono.

$2.00 no ka makahiki,

ME KA HOOKAA MUA MAI.

NA OLELO HOOLAHA - aole i oi mamua o 10 laina no ka hoopuka hookahi ana, $1.00; alua komo ana, he $1.50;             hookahi malama, $2.00.  E uku mua la mai ke dala o ua olelo hoolaha a pau e hoounaia mai ana e pai.

KANIKAU - he hapalua dala ka uku no ka aoao hookahi o ka pepa leta, oia hoi 4 keneta no ka lalani hookahi -               penei: he 25 lalani, $1.00; 50 lanai, $2.00; a pela'ku.

KA UKU NO NA OLELO HOOLAHA - ka uku pepa, a me ka uku o ka Kanikau, e haawila no ma ka lima o na Luna    o ke Kuokoa, a i olela e hookomo mai no ma ka leta, a hoouna mai i ka Luna Pai.

O NA UKU PEPA A PAU E HOOKAA MUA MAI NO - aole e kauia ka inoa o kekahi haole a kanaka maoli paha,                         ma ka inoa o ka poe lawe pepa ke ole e hookaa e mai mamua.  E pono ke hiipolia keia mau rula, no ka mea, he            emi no ka auhau no keia nupepa                                             H. M. WINI, (laina Pai.)

KA "NUPEPA KUOKOA."

Is published in Honolulu

EVERY SATURDAY,

$2.00 per annum…………in advance.

ADVERTISEMENTS not exceeding 10 lines, inserted once for $1.00; twice for $1.50 ; and $2.00  for one month ;             all advertisements must be paid for in advance.

KANIKAUS will be charged 1:00 per page, or 4 cts. a lines.

PAYMENTS FOR ADVERTISEMENTS, Subscriptions or Kanikaus, may be paid to any of the Agents of the             Kuokoa, or may be enclosed in a letter to the Publisher.

ALL SUBCRIPTIONS must be PREPAID.  No names, either of foreigners or natives, will be inserted on the subscription list, until paid for.  This rule must be strictly adhered to, on account of the low subscription price.

                        H. M WHITNEY. Publisher.

            Volume I and II of the KUOKOA, bound for sale, $4.00 each.

            Persons having complete sets of the above, can have them exchanged for bound volumes, by paying $2.00 each.

KA WAIWAI

0

KA OHANA O AIASA.

            CHAJA AIASA, KE KAIKAMAHIne wahine maikai ana, a me ka waiwai o kona ohana, a ke mau nei no ka hoomanaoia ana ma ka Hikina.  He pinepine loa ke kuauhauia ana o ko lakou moolelo, no ka nui o na mea kupanaha i loaa iloko o ke ola ana o kanaka, mai ka ilihune a hiki aku i ka nui loa ana o ka waiwai, a me ka hanohano.

            He kanaka o Chaja Aiasa no Iatale Komohana ; aka, ua haalele oia ia wahi i ka hopena o ke keneturia 16, e imi i waiwai nona i Hinedu.  He kanaka oia noloko mai o kekahi ohana hanohano kahiko loa mai ; aka, ua lilo loa i keia wa i kanaka ilihune.  Ua loaa mae ia ia ka naauao, oia wale no ka mea a na makua i haawi mai ai ia ia ; a ma ia hope iho, aloha keia i kekahi kaikamahine wahine maikai, i like loa no ka ilihune me ia, a ua hoohuiia laua i hookahi io malalo o ke kanawai mare.  Aka, ma ia hope iho, ike iho la oia he mea paakiki loa ka hoolako ana i na pono no ka wahine.  A no ka hiki ole ia ia ke hoolako i kana wahine, no ka mea, ua loaa mai ka pilikia ilihune ia ia ; nolaila, huli aku la kona manao i Inia, kahi nana e hoolako mau ka poe nele o ka Akau.

            Hele aku la keia me ka hai ole aku i kona poe makamaka, a o kona wahi waiwai wale no, he wahi lio, a he mau wahi dala uuku loa, i loaa mai no kekahi mau wahi mea i kuaiia aku.  Alaila, hookau aela oia i ka wahine maluna o kahi lio, a hele iho la no hoi oia ma ka aoao.  Aole i liuliu, pau na wahi dala a laua, a no ke alohaia mai ko laua wahi ola o ka hele ana'ku i kekahi mau la iho. a hiki ana laua i kela wahi kaulana i ka mehameha.  Aole hoi he hale oia wahi, nana laua e uhi iho i ka ino, a aole no hoi he lima nana laua i kokua aku.  O ka hoi hou i hope, he pilikia ia ua ikeia, a o ka hele aku imua, he. make ka hopena.  He ekolu mau la o ko laua ai ole ana, a me ko laua inu ole ana i ka wai, ia laua hoi e pue ana i ke anu a ke kehau.

            Iloko o keia wa pilikia launaole, e hanau iho ana ka wahine he wahi kaikamahine.  Alaila, kakali iho la laua nei ilaila, me ka manao e hele mai ana kekahi poe huakaihele malaila. a hala kekahi mau hora ; aka, ua kuhihewa loa laua ma ia manao ana.  No ka mea, he kakaikahi loa ka hehiia o keia waoakua e ke kapuai kanaka ; ia wa, ke aui aela ka la, a makau iho la laua no ka uhi o ka po ; no ka mea, o kahi keia o na holoholona hihiu ; a ina laua e pakele mai a lakou mai, alaila, e make ana no laua i ka pololi a ka ai.

            Ma ia manawa, hookau ae la ua o Aiasa i ka wahine ana maluna o kahi lio, a ike iho la ia ia ia iho, ua hele a nawaliwali Ioa, aohe e hiki ke hele hou aku.  O ka lawe i kahi kaikamahine, aole no hoi e hiki, ua hele no hoi ka makuahine a palupalu loa, aohe e hiki ke noho iluna o ka lio.  Nolaila, hoea mai la ka-hoopaapaa iwaena o ke aloha a me ka pilikia, a ua oi aku ka mea hope, nolaila, hooholo iho la laua e waiho i ke kaikamahine i ke alanui, a uhi iho la na makua i ua wahi kaikamahine nei i ka lau laau, a waiho iho la malalo o ke kumu laau, a hele aku la ua mau makua nei me na waimaka e helelei ana.

            Hele aku la laua nei a hala hookahi mile mai na wahi aku nei, pau ka ike ana mai a na maka o ka makuahine i ua wahi kumu laau ku hookahi nei, kahi hoi ana i waiho ai i kana kaikamahine makahiapo o ka wa oiai na niho, o kona lele iho la no ia ilalo, a uwe aela, "Auwe kuu keiki!  Auwe kuu keiki!!"  Hoao aela ia e ku iluna, aohe nae he ikaika kupono e hiki ai.  Nolaila, hele mai la ke kane a loaa pono i ka puuwai o ke aloha, a olelo mai la i ka wahine, e kii hou ae au i ke keiki.  A hiki aku la keia i kahi o ke kaikamahine i waiho ai, i loa no nea i na maka o ka makuakane a kau aku iluna o ke keiki, o ka hele mai la no ia o ka manao a uluku, kupikipikio i ke aloha, i kana kamalei wahine o ka wa ui.

            Ia ia i hiki aku ai ilaila, ike aku la oia ua poaiia'e ua wahi kaikamahine nei e ka moo Nahesa nui a puni, a manao iho la hoi keia e hamama mai ana ka waha o ua moo nei e ale aku i kahi kaikamahine ; ia wa koke no, o kona lele ino aku la no ia me ka makau ole ; no ka mea, me ia ka puuwai makee-e milimili ' ia ia nei hoi i lele aku ai, makau mai la ka moo, a holo aku la iloko o ka lua malalo o ke kumu laau, a o ko ianei lawe mai la no hoi ia i kana milimili, a hele aku la a halawai me kana wahine, me ka poino ole, a haawi aku la no hoi ia i ua kaikamahine nei i ka wahine, ka mama o ua milimili hiapo nei a laua.  Ma ia wa, noho aku la keia ma ke alo o kana puuwai Eva, a hai aku la i ka wahine i ka pomaikai o ka pakele ana o ua wahi kaikamahine nei, oia hoi, e hoea mai ana he huakaihele, a na lakou laua i kokua mai.  A hele like aku la lakou nei a hiki i Sehoa.

            Ia wa nae, e noho ana ka ohana Alii a ka Emepera Akaba alaila.  O Asipa Kana kekahi hauwa punahele a ke Alii, e noho ana ilaila, he hoahanau ia no ianei.  I ko ianei hiki ana'ku ilaila, hookipa maikai mai la oia ia lakou nei.  He mau la ma ia hope iho, hoolilo aela ia ianei i Kakauolelo nana.  Ma ia e noho ana ma ia oihana, ike iho la ke Alii i kona eleu a me ka makaukau, nolaila, hoolilo aela ka Emepera ia ianei i Alii maluna o kekahi Puali Koa Lio he tausani.  A mahope iho no, oiai e pii ana no kona eleu ma na mea e pili ana i kana oihana, ua koho hou ia no oia i Luna nui no na ohua o ke Alii ; a no ka mau no o ka pii ana o kona eleu, nolaila, ua hoolilo hou ia'e no oia i Luna Puuku Nui no ka aina.  O keia kanaka i hele a kokoke e waiho na iwi i kealanui, i ka pilikia ilihune, he mau makahiki pokole wale no mahope iho, ua lilo oia kekahi kanaka nui loa, a me ka noho hanohano nui ma ke Aupuni o Inia.

            O ke kaikamahine i hanau ai i ka waoakua, ua kapaia kona inoa o Mher-ul-Nissa, (o ka la o ka wahine.)  Ua kupono loa no ke kapaia ana o kela inoa ia ia, no ka mea, o kona kii ma ka nana ana, he ui, he nani, a oia wale no hoi ke kaikamahine wahine maikai mamua o na wahine a pau loa o ka Hikina.  Ua malama loa ia kona aoia ana ; ma ka hookani pila, ka hulahula, ka haku mele, a me ke kakau kii, aohe ona lua iwaena o na wahine.

            I kekahi la, hele aku la ke keiki a ke Alii e ike i ka makuakane o ua kaikamahine nei.  I ka pau ana'e o ka ahaaina, hoi aku la na mea a pau, a koe wale iho la no ka poe o ka helu akahi ; aka, he mea mau hoi ke komo mai o ka poe ladies, (na wahine hanohano,) ua uhiia na maka.  O ka mea hoi a Mher-ul-Nissa e kuko nui nei, ua ko maoli io no, i ka hoopio loa ia ana o ka manao o ke keiki Alii opio.  A i ko ianei wa e himeni ana, - lele aela ka hauli o ua keiki Alii nei ; a ia ianei hoi e hula ana, - ua hiki ole hoi ia iala ke noho malie iluna iho o kona noho, oiai ua piha kona puuwai i ke kuko ino a ke aloha.  O ko ianei kiekie, ke ano o ke kino, a me ke ano o kona hele ana, ma ia mau mea ka hapai ana mai a ke keiki Alii i ko ianei nani a ke kulana kiekie loa.  A i ka wa hoi e kau pono mai ai ko iala mau maka, me heaha la la, a hookuu iho la keia i kona uhi maka, a kau pono aku la imua o ke Alii me kona nani nui.

            No ka nui Ioa o ke kuko ino o ke aloha o ke keiki Alii i ua kaikamahine nei, nolaila, aole akaka o kana mea e hana ai; no ka mea, ua hoopalauia ua kaikamahine nei i ka makuakane ia Lia Afakuna, he kaukau Alii kaulana loa oia no Iukoma.  No iamea la, hoopii aku la na keiki Alii nei i ka makuakane, me ke noi aku, i kokoolua ia, a i iwiaoao hoi no kona mau la opiopio ; aka, aole nae i hookoia mai ia noi ana.  Nolaila, hoi mai la ke keiki Alii me ka hilahila, a mare aela no hoi ua kaikamahine nei i ke kane i hoopalauia'i.  Ma ia hope iho, ua pilikia loa ka mea i lilo ai ka wahine i ka punalua Alii.  O ua keiki Alii nei, aohe nae hoi e hiki ia ia ke hoike akea aku i kona huhu i ka wa e ola ana ka makuakane.  Aka nae, ike iho la hoi kela i ka inomo o ka hana a ke Alii opio, nolaila, haalele iho la oia i ka Aha Alii o Agra, a hoi i Benegala e noho ai.

            O ke aloha hoi o ua keiki Alii nei i uumi ai i ka wa e ola ana ka makuakane, ua hoi hou mai me ka papalua o ka ikaika i kona ae ana i ka noho Alii, ma ka inoa o lehangire.  Oia wale no ka mea mana i keia wa, aohe mea nana e keakea aku kona makemake.  Alaila, kauoha aela oia ia Lia Afakuna e hoi hou mai ; aka, ua hilahila maoli nae ua Alii nei i ka lawe maoli ae i ke ola o ka punalua ; nolaila, imi iho la ia ma na kumu e ae.  Aole nae he loli iki o ka manao o Lia Afakuna ; no ka mea, aole he kanaka hanohano e ae ma Ima e laweia kana wahine me ke koe o kona ola.

            O kona inoa mai na makua mai o Iileo ; na ka make ana o ka Liona ia ia ; nolaila, kapaia'i kona inoa o Lia Afakuna, oia hoi, "Ka mea nana i pepehi ka Liona."  O kona inoa kaulana loa keia ma Inia.  O Delhi, o ia kahi i noho ai o ka Aha Alii a Iehangire ia wa, o kekahi kulakauhale maikai loa ia o ka Hikina, ilaila keia i kauohaia mai ai e hele aku.

            I kona wa i hiki aku ai ilaila, haawi hou mai la ke Alii i wahi hanohano nona ; nolaila, aohe o ianei manao he ino kekahi a ke Alii e hana mai ana mahope.  No ka mea, ua manao maoli iho la oia, no ka loihi loa o ka manawa i hala, ua pau la hoi ka manao ana o ke Alii i ka wahine a laua.  Aka, ua kuhihewa loa kona manao ana pela ; no ka mea, e makemake ana ke Alii e make ia.  I kekahi la, kauoha mai la ua Alii nei o hele lakou e huli holoholona, a e hele e hoi kekahi poe e hoomakakiu a ikeia kahi o ke Tiga nui.  Mahope koke iho no, oleloia mai ana, ua ikeia hoi he Tiga nui launa ole, iloko o ka ululaau o Nidabari.  Ua oleloia mai no hoi, he nui na holoholona nui a keia Tiga i lawe ai, mai na kauhale aku o ia wahi.  Ia wa i lohe ai o ke Alii, o ke kena koke aela no hoi ia o ua Alii nei, o ua Tiga nei ka lakou e kii ai e pepehi.

            He mea mau hoi i ka huli ana a ia poe i ka holoholona, he hoopuni mua i kahi a ka holoholona i noho ai, ina aole, alaila, hele aku mawaena.  A i ka ikeia ana o ua Tiga nui nei, e kahea mai ana ke Alii, "Owai o oukou ka mea e aa a e hele e hakaka me ke Tiga?"  Ma ia wa, nana aku kekahi i kekahi me ka pane ole ; a mahope iho, huli like aela na mea a pau, a nana aku la ia Lia Afakuna ; aka, aole nae o ianei hoike aku i kona manao, ua akaka lea no ia ia ka lakou mea i nana mai ai.  A mahope iho, ekolu mau kauwa o ke Alii i hele aku no a mua ona, me ke koi aku, o lakou ka poe e hele e hakaka pakahi me ua Tiga nei.  A no ko ianei ike ana'ku la ia mea, pii aela no hoi knoa manao keikei ; no ka mea, ua manao o ia, aohe mea nana e aa aku kela holoholona weliweli.  Ua manao mua aku no hoi keia, ina aohe o lakou mea e aa i ke Tiga, alaila, oia ke hakaka aku me ua Tiga nei.  A i ka aa ana hoi o kela poe, nolaila, manao iho ai keia, ina aole oia e hakaka me ua Tiga nei, alaila, lilo ka inoa kaulana ona i mea @ nolaila, hoomaka aku la keia e olelo imua o na mea a pau, "O ka hakaka aku me ka holoholona me na mea make, aohe ia he kupono i ke kanaka ; no ka mea, ua haawi mai ke Akua i ke kanaka hemau lima, a me na aa e like me ko ka holoholona ; a he naauao hoi kekahi mea Ana i haawi mai ai i ke kanaka, i mea nana e alakai kona ikaika."

            A mahope iho o kana olelo ana, hoopaapaa nui mai la hoi na'Lii, me ka olelo ana, "aohe e hiki ke hakaka aku me ke Tiga, ke ole e lawe i na mea oi."  I aku la keia me ka maka makau ole, "Ano, e hoike aku ana au i ko oukou manao kuhihewa loa."  Ma ia manawa, o ko ianei hoolei iho la no hoi ia i ka pahi ana, a hele hookahi aku la e hakaka me ua Tiga nei.  O ka makemake maoli no keia o ua Alii nei, o ko ianei hele e hakaka me ke Tiga, i wahi non e make ai ; aka, hooaua wale aku la no ua Alii nei, a koi loa no hoi kela ; @a no ka paa loa o ko Lia Afakuna, nolaila hookuu aku la ua Alii nei me ka manao kopulu wale aku no.

            Ma ia manawa, ua penaia ka hikilele iluna o na papalina a pau loa e ku ana, aohe leo pane.  Ua kakauia e ka poe o ka Hikina ua hakaka ana nei o Lia Afakuna me ka Tiga ; aka, aohe nae he pololei loa.  Eia ka mea e akaka ai, mahope iho o ka hakaka loihi ana a laua, ua pakele mahunehune mai kona ola, ua hele a weluwelu ke kino ; aka, ua lanakila no nae no ia maluna o ke Tiga, a ua waiho iho kona kino kaupapau imua o kona alo, a ku kookehakeha aela oia me he moho la i lanakila maluna o kona enemi.  O ka manao kanalua o ua kanaka nei, ua pii hou ae, a o ka mea hoi a ke Alii i kuko ai, ua huhewa ; aka, aole nae i oki, a i ana ka manao ino ana o ke Alii ia Lia Afakuna.

            Mahope iho o ke ola ana'e o ka eha o ua o Lia Afakuna, hele mai la no hoi ia e ike i ke Alii, a ua hookipa maikaiia mai no hoi ia e ke Alii ; nolaila, aohe ona manao he hewa kekahi e hana hou ia mai ana nona.  Aka, ua uni hou no ke Alii i mea nona e make ai, i kaawale ae ai oia mai ka puuwai aloha ae ana, a i ka okoa ai hoi oia mai ke poo  a i ka hiu.  Ia lakou e luana ana, olelo malu akula ua Alii nei i kekahi kauwa ona, e hoowalewale i ka punalua a kekahi alanui haiki, alaila, holo mai maluna o ka Elepani, a heli ia ianei a pepe loa.

            I kekahi la, ia ianei i holo aku ai maluna o kahi k@, maloko aku o kekahi wahi alanui ololi a hoea mai ana ua Elepani nei, a ike aku i keia, kahea aku la keia e hookaawale ae ; aka, aole nae o lakou la hoolohe mai, o ka holo mai la no ia o ua Elepani nei a hookui ia ianei, a pepe iho la keia.  I ko ianei hina ana iho ilalo, holo aku la no hoi lakou la o ko ianei ala aela no hoi ia, hookahi no hauna i ka pahi, lele ana i kahi e ka nuku ko ka Elepani, a o ka make iho la no hoi ia o ka Elepani, a lanakila hou aela no ua Lia Afakuna nei maluna o ka mea e hana mai ana i ka ino.

            I ka wa o ianei i hehiia'i e ka Elepani, a me ka mea nui hoi a ianei i hana aku ai no ka Elepani, e nana mai ana no ua Alii nei ma ka puka aniani, a ua ike mai no hoi i ka pakele ana o ianei.  Ia wa, o ko ianei hele aku la mo hoi ia a ka Hale Alii, me ka manao ole e imi hou ana ke Alii i wahi nona e make ai, a hai aku la hoi keia i kona pakele ana i ka Elepani.

            He eono malama mahope ia iho, aohe he imi hou o ke Alii i mea no ianei e make ai.  Aka, o na mea a pau a ke Alii e hana nei, ua ike wale ia no e na mea a pau, o ka olelo hookahi wale iho la no ia.  He mea mau no nae i ke Alii ka loaa mau o ka poe nana e hooko kona makemake.

            O kekahi kanaka o Kutupa, he kupa oia no Benegala, a ua hoolimalima iho la ia he kanaha kanaka, i poe nana keia e pepehi.  Aka hoi, ua lohe e no hoi keia ia ohumu, a nolaila, aohe ona hele iki iwaho.  A no ka maopopo no ia ia, e lanakila ana no oia maluna o ka poe e kue mai ana ia ia, nolaila, aohe ona hoonoho mai i kana poe kauwa me ia iloko o ka hale ; aka, hookahi wale no nae wahi kauwa noho pu me ia.

            Mahope iho, hele mai la ua poe powa nei e hoohalua i ka hale o Lia Afakuna, a ike iho la lakou he rumi kakau palapala mahope iho o ka puka nui, a mailaila aku a komo iloko o ka rumi moe.  I ka po ana iho, i ka wa i hele ai ke kiai hale, e komo iho ana ua poe kanaka powa nei a loke o ka hale.  Mahope iho o ka poeleele ana, ua paniia na puka, a hoi no hoi keia me kona ohana e hiamoe.  O kekahi poe hoi o ua poe powa nei, manao ua pau lakou la i ka hiamoe, alaila, mihi malu aku la a komo iloko o ka rumi.  Ma ia manawa, o ka hoomakaukau iho la no hoi ia o ua poe nei e hou aku i na pahi a lakou, e kahea mai ana no kekahi kanaka o lakou, "Aiia! he mana ko kakou mai ke Alii mai ; a heaha la ka pono o kakou a pau he kanaha, e pepehi i keia kanaka hookahi, a oia kanaka hookahi hoi e hiamoe ana?"

            A lohe mahui keia i ka leo mailoko ae o kona kiamoe kino make, puoho ae la no hoi ia, a hopu aku la i ka pahi, a holo aku la keia a ma ke kihi o ka rumi ku.  A malaila kahi o lakou nei i hakaka ai me ua poe powa nei ; a he mau minute wale no, he nui ka poe o lakou i pau i ka make, a o ke koena aku o lakou, aohe mea i pakele i ka moku i ka pahi.  O ka elemakule nana i kahea a puoho ai keia, aole ia i holo ; alaila, hopu aku ia keia ma ka lima, a aloha aku la hoi keia, no ka maikai o kana hana ana mai ia ianei ; a hai aku la no hoi na elemakule nei i ka mea nana lakou i hoolimalima mai, e kue aku, a e hana aku hoi i ka hewa pepehi kanaka i ka mea hewa ole.              (Aole i pau.)

HE LA I NOHOIA IWAENA

O NA POE

KANAKA AIKANAKA.

            E like me ka makou i hai mua aku ai iloko o na pule mamua aku nei, no ka hai aku i ke ano o ka hana ia ana o kekahi haole e na kanaka aikanaka o ka mokupuni o Hivaoa, pela no makou e hooko aku ai.  Ua laweia mai e makou noloko o ka nupepa "P. C. Advertiser."

            Ua holo mai ka moku Okohola Amerika, Congress ka inoa, o Stranburg ke Kapena, mai Nu Bedeforda mai, ma ka malama o Iune, M. H. 1863, e holo ana i ka moana anu Akau o ka Pakifika.  Mahope iho o kona hiki ana i Sidene, a haalele ia wahi, holo loa aku kela a hiki i Hivaoa, kekahi o na Mokupuni o Maikonisia, e kuai ai i wai, a i ai no hoi.  I ke ku ana aku mawaho o ke awa o Puamau, ma ka la 13 o Ianuari iho nei, hoomakaukau ia iho la he mau waapa elua, a hoounaia mai la me ka lawa i na waiwai kalepa, i mea e kukai aku ai me na poe kamaaina, oia hoi na waiwai e like me ka pahi, koi, me ka pu, i mea e kukai aku ai, no ko lakou mau mea e makemake ai.

            I ka holo ana'ku o ua mau waapa nei, a ku iloko o ke awa ; aia hoi, holo mai la kekahi waapa, a o ke alii a me na kamaaina ko luna, a he ano oluolu no ko lakou, a me he mea la ma ko lakou helehelena, e ake nui ana lakou e kuai me na haole, a ua hai mai no hoi lakou i ka nui o ka lakou uala, a me na Puaa.  No ia mea, hookau ae la o Mr. Whalon ka Malamamoku, a ka mea hoi ia ia ua mau waapa nei, i na waiwai a pau o luna o kona mau waapa, a kau aku la iluna o ka waapa o na kamaaina a kau pu aku la oia, a holo aku la iuka me ua mau kamaaina nei, me ka haalele iho hoi i kona mau waapa ponoi e ku ana i ke awa.

            I ka lele ana iuka, a pii aku iloko o ke uwaawa, hoomaka koke na kamaaina e alualu i na puaa, a hookahi puaa i paa a nakinaki ia.  Oiai e alualu ana na kanaka i ka puaa ma ke awaawa, ku pu iho la o ua o Mr. Whalon me ke 'Lii, e noke ana i na kanaka i ke kahea, me he mea la, e hoolale aku ana i na kanaka e hele koke mai, no ka mea, hoomaka koke mai no na kanaka e holo mai, mai na wahi a pau o ua awaawa nei, me ka paa pu hoi i na koi, a me na pahi, a ua ano e maoli no hoi ia mau hana i ka nana aku.  I ko Mr. Whalon ike ana iho, me he mea la aohe mea maikai e manaoia ana e hana mai ia ia, alaila, olelo aku la oia i ke alii, e hoi hou laua i kahi a ka waapa i lana ai ; ma ia wa koke no, hopu aku la ke alii i ka papale o ua haole nei, a kau ae la ia mea iluna o kona poo.  I kona manao, he hoailona keia iwaena o lakou, no ka mea, ua hopu koke ia oia iloko o ia wa e na kanaka, kulaiia ilalo, a weheia kona mau wahi hapa, a waiho kohana.  Ua nakiiia kona mau lima a me na wawae i ke kaula a ke alii e paa ana ma kona lima, a ua haole nei i manao ai he kaula e nakinaki ai i ka puaa.

            Ma ia wa, hoomaka koke na kanaka e haehae i kona mau wahi lole a liilii loa, a mokumoku pu ia ae'la no hoi ke pihi, a haawi liilii ia aku la iwaena o na kanaka.  Mahope iho o ka pau ana o ia mea, hoomaka na kanaka e hali aku i ke pio a lakou, me ka iniki ana ia ia, me ka hoeha nui, me ke pelu mai hoi i kona mau manamana lima a pili i ke kua o ka lima, me ka hoohukihuki i ka ihu, a me na hana hoomainoino e ae no hoi.  A he pinepine no hoi ko lakou oki ana iho me ke koi, me ka pakele mahunehune wale iho no o kona poo.  He ekolu na hora o ko lakou hoohauoli ana ia lakou iho ma ka hana ana i na mea i hoikeia maluna'e nei.  I kona manao ana o ka hana mau paha ia, mamua o ka pepehi ana, a pela io no paha.  Hele kahi poe hanaka, a hoowalewale aku i na waapa o ua haole nei i holo mai ai iuka, a o ke O-i-a o ko Mr. Whalon waapa, ua hoomaka mai e holo ; aka, ua peahi e ia aku nae e kekahi wahi kaikamahine kamaaina, me ka hai aku hoi e hookaawale aku ka waapa, me ka ohana o Kekela ma ua kaikamahine nei i noho ai.  Kahea aku ua kaikamahine nei, "Pull away."  (E hoe aku a kaawale,) oia wale iho la no kahi h7uaolelo Enelani i loaa ia ia, me ka peahi pu aku no hoi e holo aku, mai kipa iuka.  Hoi aku la ka waapa i ka moku, me ka hoi pu ole o ko lakou alii.  Ina la paha e lele ua poe nei iuka, ina no la paha aole e nele ke kaua @ ina ua pau loa i ka pepehiia, no ka me@ le no lakou i hele me ka makaukau @ hakaka.  Ua wanana mua aku no ua wahi kaikamahine nei ia Mr. Whalon, (Welona.) mai hele iloko o ke awaawa me ke alii ; aka, aole nae i lohe a i maopopo hoi i ua haole nei, a i kona wa no i hopuia'i, ua hooikaika loa ua kaikamahine nei i ke koi ana i na kanaka i hookuuia'i ua haole nei, a ua nui kona uwe ana, aiai oia e hoomainoino ia ana.

            Hiki mai la he Misionari Hawaii, aole no i maopopo i ua haole nei kona inea, a aole no i hiki ia ia ke kamailio me ia.  Ma ia hope koke iho no, hoea mai ana he haole kamana Olelo e, a no ka hiki ole ana ia ia ke hoohemo mai i ua haole nei, nolaila, olelo mai oia, e kiai koke mai me ka imi mai hoi i mea nona e hookuuia'i.  I ka po ana iho, laweia ua pio nei, a waihoia iloko o ka hale o kekahi wahine alii, nana no i hooikaika e hookuu ia ia mai ka lima mai o ke alii, a me he mea la, mamuli o kona hooikaika ana i hoopaneeia'i kona pepehiia ana, a hiki i ka po ana.  Noho koke mai la no ka haole Olelo e i ua po nei a a-o, a o ke ano hoi o ua po nei, he po loihi, a kaumaha no hoi, i ka manao o ua haole nei, me ka manao wale ae no hoi i na manawa a pau, e wawahi inai ana na kanaka i ka hale, me ke kii mai e pepehi ia ia, mahope iho hoikeia mai ia ia, ma na rula mau ka na kanaka o ia wahi, he kapu ka hale o na 'Lii, a aohe e hiki i kekahi ke komo iloko me ka ae ole ia, a me ka hoopai ole ia i ka make.  Hiki mai la ke kakahiaka, a hoomaka mai la na kanaka e haiamu, me ka hauwalaau mai no hoi, no ka lakou pio.  Pau loa ae la kona manao no ke ola, a manao iho la ia e make io ana, no ka mea, e kii koke ia mai ana ke aliiwahine, me ka manao paa e kei aku e hookuu mai i ua haole nei, iloko o ka lima o na kanaka la manawa, lohe ae la ka haole Olelo e i ka olelo a na kanaka, ua hiki mai ka Misionari Hawaii, o Mr. Kekela a me kana wahine i ua wahi nei.  I ka wa i lohe ai o ua haole Olelo e nei i ka hoi ana mai o Kekela ma, hoouna koke aku la oia i kekahi  Kumu Hawaii e kii aku ia ia, a i ka ike ana iho o na kanaka ua kiiia o Kekela ma, o ka hookuu aela no ia o na kanaka i na lima a me na wawae o ua pio nei.

            O Rev. J. Kekela a me kana wahine, he mau Misionari Hawaii, i hoounaia mai Hawaii aku nei, a na ka poe Hawaii no hoi e malama nei i ko laua ola.  He awnawa e ae ke laua wahi i noho ia ; aka, i ka wa i hopu ia'i ka haole, ua uhaele aku laua ma kekahi Mokupuni e.  Mahope koke iho, hoi mai o Mr. Kekela, a me ke Alii nana e hoomaluhia nei i kona noho ana, a koi koki me ke kue i na kanaka no ke lakou hana hoomainoino, me ke noi pu e hookuu ia ia.  Koi mai la lakou, aia wale no ka hookuuia me ka uku.  A mahope iho o ko na kamaaina kuka ana iwaena o lakou iho, hooholo lakou e hookuu i ka haole, ke ukuia mai lakou he hookahi waapa Okohola me na hae eono, a no ia mea, hai aku o Mr. Kekela ia lakou, e lawe i kona waapa.  I keia haawi ana, kue ko Mr. Kekela Alii, no ka mea, ina pela, alaila, o ka nele loa no ia o ko lakou awaawa i ka waapa ole.  Ia wa, ala nui mai la ka hoopaapaa pumehana iwaena o na 'Lii elua, a ma ia manawa no hoi, hoike aku la o Mr. Kekela i kona makaukau e haawi i kekeki mea, a i kona mau mea a pau, ina he mea ia e hoopakele ai i ke ola o ka haole - he hana aloha lokomaikai keia, i hanaia me ka hiki ole ke hoohalikeia me na moolelo o na Misina o ka wa i hala.

            Mahope iho o ka hoopaapaa hou ana, ua hooholoia he pu-kaupoohiwi, a me kekahi mau waiwai e ae, ka uku e ola'i ka haole, a ua haawi hikiwaweia ia mea, a alakai koke ia'ku no hoi ka haole, mawaho o ka palena o ka aina o ua mau alii nei ; a ina hoi e kiiia'ku ma ia wahi, alaila, ua like no ia me ka a-a ana'ku e kaua mawaena o na poe o ua mau alii nei.  Hookaulua ua haole nei, i kona wa i koiia mai ai e hele aku iloko o ke awaawa o ke alii hou, no kona ike ole i kana mea e hana mai ai ia ia ; aka, i ka hooia ana mai a Kekela, e hele ana lakou i kona hale, kahi ona e malama ponoia ai, alaila, hele aku la ia me ka olioli nui.

            I kona hiki ana'ku ilaila, ua puiwa oia i ka ike ana'ku i @  maikai, ua hoonaaiia ma ke ano @ ano like me na hale noho @ Nu Enelani, a ua hoo@ , a me na @ kan@

            @  waapa i ke awakea @ i peahiia'ku ai e kahi @ Maikonisia.  I ka poaha, a me @ noho ua haole nei me Kekela @ wahine, a iloko hoi o ia manawa.