Ka Nupepa Kuokoa, Volume III, Number 12, 19 March 1864 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

BUKE III.  HELU 12.        HONOLULU, MARAKI 19, 1864   NA HELUA A PAU 121.

 

HE UHANE KANIKAU

NO IOLANI.

Kuu kane hoi,

Aia kuu kane la i Hanaikakamalama,

I Luakaha, i Kaniakapupu,

I ka maluna o ke koa, i ka uliuli o ka palai

I ka nuku o Nuuanu ka uhane e noho ai,

E nana ana paha ia Kawainui,

A nui no ko aloha e uew no au;

            Auwe kuu kane-e.

 

Kuu kane hoi,

Aia kuu kane la i ke Kamahala,

I ke kui pua lei ahihi o Hape,

I Kaholoakeahole,

I ke kawalu o Lanihuli ka uhane e noho ai,

E nana ana paha i Naonealan,

A loa kaua a kaawale-la;

            Auwe kuu kane-e.

 

Kuu kane hoi,

Aia kuu kane la i ke kula o Kahua i ka paikau

I Kewalo, i Pawaa, i Ualakaa ka uhane e noho ai

E nana ana paha ia Kahoiwai,

O ka waiwai iho la no ia o ka maka,

O ka nana, o ka ike, o ka peahi,

O ke kuea i ka ua kuahine,

Popo a haalele i ke aloha-ia;

            Auwe kuu kane-e.

 

Kuu kane hoi,

Aia kuu kane la i ke awalau o Puuloa,

I Kapuaikaula, i ka wiliwili o Peekaua,

I Kaiona, I Kualakui ka uhane e noho ai,

E nana ana paha ia Nanakuli

Akahi no ke kuhinia i ke aloha-ia;

            Auwe kuu kane-e.

 

Kuu kane hoi,

Aia kuu kane la i Waianae,

I walea i ka makani kaiaulu o lalo,

I ka malu o ka niu o Pokai,

I ka wai auau o Kamaile,

I ka Makua ka uhane e noho ai,

E nana ana paha ia Kaena,

Akahi no lea enaena o ke aloha;

            Auwe kuu kane-e.

 

Kuu kane hoi,

Aia kuu kane la i ke kula o Kemoo

Mai ka makani anu la he Waikoloa,

E lawe ana i ke ala o ka Nene,

E hoohoni ana i ka huakai hele i ka uhane,

E nana ana paha ia Waialua,

Elua a’u mea aloha e hono hei,

O ke kane, o ke keiki;

            Auwe kuu keiki-e.

 

Kuu kane hoi,

Aia kuu kane la i Molokai,

I walea i ka lai a ke Kioea,

Mai ka makani pa mau he Moae,

E hooluolu ana i ka huakai hele,

I Lanikaula ka uhane e noho ai,

E nana ana paha i ka pali o Halawa,

Oia pali a kaua e hele wawae ai-la;

            Auwe kuu kane-e.

 

Kuu kane hoi,

Aia kuu kane la i Lahaina,

I ka malu o ka ulu ka uhane e noho ai,

E nana ana paha i ka ua Paupili,

E pili no kaua e inai pu me ka la pololi-la,

            Auwe kuu kane-e.

 

Kuu kane hoi,

Aia kuu kane la i Wailuku,

I ka aina kuahiwi lua ma uak ma kai,

I ka malu o ke Kuawa.

I ka wai nahupu o ka aina ka uhana e noho ai,

E nana ana paha i ke ahi o Kula i ka po-la;

            Auwe kuu kaua-e.

 

Kuu kane hoi,

Aia kuu kane la i ka ua ukiukiu o Makawao

Ua popoohina wale i ke kukui o Lilikoi,

I awili puia me ka ua ulalena o Piiholo,

Holo ke anu a ke kuahiwi o Haleakala,

E nana ana paha i ka hono o na moku,

            Auwe kuu kane-e.

 

Kuu kane hoi,

Aia kuu kane la i ka ale hulilua o ka moana,

Mai ka makani pa kolonahe la he eka,

Mai ka malu aea oluna o ka moku,

Mai ke kai hawanawane o Kawaihae,

Mai ka piina ikiiki o Palinui ka uhane nohoai;

E nana ana paha ia Lanimaomao,

A laa kaua a mamao-la;

            Auwe kuu kane-e.

 

Kuu kane hoi,

Aia kuu kane la i ke kaimaokioki o Kona,

E nana ana i ka wai, i ka maka o ka opua,

Aia i ka opua ka ua o ka aina,

Hoolai ae la iuka o Moonuiohua,

I ka lau o ke kukui ka uhane e noho ai,

E nana ana paha i na mea kanu a ka Lani,

I uka o Waiaha-la;

            Auwe kuu kane-e.

 

Kuu kane hoi,

Aia kuu kane la i ka malumalu o Hulihee,

I ka wai auau o Kiope,

I ka naluhee o Huiha,

I ke one o Kailua ka uhane e noho ai,

E nana ana paha i ka malie o Hipahipahulo,

Hulo pau loa ke aloha o ka Lani-la’

            Auwe kuu kane-e.

                                                Na KANIAU

 

 

Kuu kane i ka la wela o Halalii,

Mai ke kaha loa o Kalaihi,

Mai ka ulu hua i ka Hapapa,

Ke hea’la ke kupua i pono iho kaua i Po-li e,

I ka poli, i ke alo no ke kane a hele-e;

Hemo i ka lima ka ukana he aloha,

Ka mea aloha o ke kane-e; ua hele ihe nei.

 

Kuu kane i ka la o Nuuanu-e!

Awe loloa ka wai i na pali

Hoolue ke wai i kai o Polihale,

Opu iho la ka nalu o kuu aina ua ahiahi,

Ua hele ke kane ka makua o kahi makua ole,

Ke alakai o kahi ike ole i-a!

Ka mea’loha o ke kane-e; ua hele iho nei.

 

Ua ike paha oe e ka ua i kuu mea Kane?

I uka o Haneiakamulama nei la-e? aloha e:

O ka iki o ke aloha kai ia oe,

O ka nui o ke aloha kai ia’u,

Aloha kahi a kaua e noho ai,

I ka uka i Kilohana nei la,

Ka mea’loha o ke kane-e; ua hele iho nei.

 

Hele aku nei kuu kane,

Ku ke koiula i ka hope,

Ke anuenue pio i ka honua,

Ka momi ku i ka moana,

I ka la o kuu kane i hele ai-e!

O he-le ke hele wale la no kuu mea aloha,

I ka ano liula ahiahi,

Ui ae la i na hoa hele he mau akua-

Ka mea aloha o ke kane e-ua hele iho nei.

 

Kuu kane i ka ua hahi iluna o ka hala,

E loku ana i ke poo o ka Hinalo;

Loku iho la ka limu-ka-kanaka o Limunui-e;

He nu-i he nui au na kuu makua,

He milimili na kuu kane i hele aku nei,

Ka mea aloha o ke kane e-ua hele iho nei.

 

E Kaleleonakalani e-eo-he po makakai paha keia,

Aole na la he leo makakai,

O ka leo o kuu kane,

Eia la ke pa’e pa’e nei,

I ka pohu i ka lulu o Halealii hale o maua,

            E aloha-e.

 

O ke aloha ia e uluku nei ka manao,

E hakuikoi nei ka loko,

Me he kaikoo poi la i kuu manawa,

Ua eha paha au ia ia-a.

Ka mea aloha o ke kane e-ua hele iho nei.

 

E Emalani e-i-o!

He ula leo paha keia,

Aole na la he ula leo,

O ka leo o kuu kane eia la ke hea nei,

I Luka Hale o mau-a,

            Eia no wa-u.

 

Ua haalele mai oe i ka pili a kaua,

Ua hele i ka huakai lokoino,

A kana i ae pu ole ai,

Ua imi aku oe i ka luhi o kana,

I ke kamalei he keiki,

Ka mea aloha o ke kane e-ua hele iho nei.

 

Kuu kane i ka ua nui o Hanalei-e,

Ke lei nei no au i ko aloha,

E aloha ae ana i kahi a maua e noho ai o Kikiula,

Mai ke ala pahee pakika i ka wai o Kahakanawaliwali,

Mai ka limu ka-kanaka o Manuakepa,

Mai ka pua hala ai a ke Kinau,

Mai ka makani aloha o ka aina,

He Koolauahi-ne-kuu kane ho-i,

Aloha olua me ka lei aloha a kaua-e.

 

Kuu kane i na ohia o Kupakoili,

Ilihia iho nei au i ko aloha,

Aia la o ka wai puhene lehua,

A ka manu i ka hau o Kaakaopua,

I ka nahele o Kaliko,

I ke one o Kahalahala,

I ke kai o Hoohila, mai ka poli o Kihi,

            Kuu kane ho-i!

Aloha olua me ka lei o kaua-a.

 

Kuu kane i na lehua o Luluupali-e,

Luuluu iho nei au i ko aloha,

E aloha ae ana i ka wai o Kaumaka,

I ka makani lupua pahelehala o Naueikekai,

Ina aku no la i ke kula o Hanaimaa,

E hoomaalili ae aha au i kuu aloha ia olua,

E kau leo aku ana ia Kilioe,

I hoa hoonana no kuu aloha,

            Kuu kane ho-i,

Aloha olua me ka lei aloha a kau-a.

 

Kuu kane i ka pali o Haena-e;

Ua ena mai nei ka oe ia’u-a,

Kuu hoa i ka wai a Kanaulu,

I ka wai makaikai a ka malihini,

Mai ka lauae o Makana i Kaiwikui,

Mai ka wai kuauhoe a ka Lawai-a,

Mai ka pali kaili kane o Kaialau,

Mai ke ala a-u umauma o Koama-no;

            Kuu kane ho-i,

Aloha olua me ka lei aloha a kau-a.

 

Kuu kane i ka wai o Waialoha-e.

O ke aloha ka’u mea nui e noho nei,

Ike aku i ke ahi o Kamaile,

Ke kuehu mai la ke kupa i ka momoku,

Ke welo la ke ahi i ke kai o Koholaiki,

He ahi kuni na ka malihini a uli ka ili,

O ka uli o ka ili kai ikea,

Akahi hoi ka uli o ka ili i ke aloha,

            Kuu kane ho-i,

Aloha olua me ka lei aloha a kau-a.

 

Kuu kane i ka pali o Milolii-e,

Ke lolii nei au i ko aloha,

Ike aku i ka pahapaha o Poliahu,

I na hoki waluwalu ili o Waiolono,

Mai ke one kani o Noohili,

Mai ke kapa laau o Kaawaloa,

Mai ka wai liula o Mana-e,

            Kuu kane ho-i;

Aloha olua me ka lei aloha a kau-a.

 

Kuu kane i ke one o Luhi-e.

Ua luhi iho nei au i ke alo-ha;

Oia o ka ua makau pili o Peapea.

I uka no ia ua a ua ai,

O ka wai ke kahe ana i kai o Kahooma-no,

He hoa i ka wai ula iliahi o Makaweli,

Mai ka i-a hoopa kanaka o Waimea,

I-a hoowalea i ka poli o Lehu-a,

            Kuu kane ho-i;

Aloha olua me ka lei aloha a kau-a.

 

Kanikau aloha nou e Haluku i ka hale ka wai o Hanalei,

Kapekupeku i ke poo o Kahinalo,

Nalo oe i Kiijua i Hiialo,

Noho wau i kauhale a ke aloha,

Aloha ia wahi a kaua e noho ai,

O i noho ko olua aku a ko okolu aku hoi i keiki,

O’u hoa i ke ala pahee pakika i ka ua o Kahakanawliwali,

Ua wali na opa loko i ke aloha,

Nou hoi kahi aloha e Kale,

Kuu makamaka, kuu kamaaina hoi oia wahi,

O maua kai ka limu ka-kanaka o Manuakepa,

Mai ka hala ai a ke Kinau,

I inai aku ai i na ohia o Kupakeili,

Kuu hoa mai ka maha ua o Hihimanu,

Ua kino manu aku la ku Lani Konowailua,

Oia kai ka pea hala ma kai o Pooku,

I ka malu kai o Anini,

O ka hanini wale no ia a ka waimaka,

Me he paka ua’la ia e kulu nei;

Kuu kane i ka wai uahi o Namalokama,

Punawai o Mamalahoa,

He hoa no’u i ka wa kamalii o maua,

A kanaka makua aku hoi

            Mrs. HIKONI KAHOOLAKALAKA

 

He kanikau aloh akeia nou e IOLANI,

Kuu keiki umi ka waa pea kahi o ka aina-la,

Mai na pea hulilua o ke Kaona-e,

Mai ke awalau o Polihale-la,

Kuekaioki oe i na hookele-e,

I ka pukukui mamua-la,

Huli a ke aloha i Maemae-e,

O ka holo peki kainapu a na lio-la,

Eia’la ale i Kawananakoa-e,

O ka ua me ka makani-la,

Pulu kaua i ka ua Waahila-e,

Kuu a ka lio i ka holo o ke kani a ka huipa-la,

Pa papae kaua i Hanaiakamalama-e,

Kuu keiki mai ka hale mehameha hoolaukanaka aku hoi-la;

Aloha ka la nui o ka aina-e,

La kui lima o olua-la,

Oia hoi he aloha-e.

            Mrs. KAMAIKUI ROOKE.

 

KE KAAO MOOLELO

-NO-

MARY STUART!

(Mere Situata.)

KA MOIWAHINE NANI O SEKOTIA.

HELU 2.

 

HOOIKAIKA AKU LA OIA I KA holo o kona lio, a halawai me ua kanaka nei ana i ike mua ai, oia hoi he kanaka kalewa waiwai kuai, me ka haawe nui ma kona kua.

 

Kahea aku la ua keiki nei, “E, e pane mai oe i kekahi mau ninau a’u e ke kanaka maikai- a o keia mau pana dala kou uku.”

 

Pane mai la ua kanaka nei, “e ninau mai, a na’u no e hai aku ia oe i na mea a pau au e makemake ai.”

 

“Maikai kau olelo ana,” (wahi a ua keiki nei.) a ano la, e hai mai oe, ke hele nei anei au ina ke alanui e hiki pono aku ai i Edenabuga? A ina aole.-

 

“Aka, ua pololei no kau hele ana e ka mea maikai.  Aole au i ike i kou wahi i hele mai nei; aka, ke hele nei no nae oe ma ke alanui pololei e hiki aku ai i Kinirose, (Kinross.)”

 

“A, heaha ka loihi o Kinirose, mai keia wahi aku?” Wahi a ua keiki nei.

 

Hahai mai la no ua wahi kanaka nei, he umi mile ka loa, a hai pu mai no hoi i ka loa mailaila aku a hiki i Edenabuga.  A pau ia, haawi aku la ke keiki i ka apana dala ana i olelo mua ai, a huli aku loa no hoi a hele ma ke alanui ana e hele ana.  Aole i liuliu kona hele ana ku hoomaka oia e kaohi mai i kena lio, no ka mea ua maopopo lea ia ia e nawaliwali iho ana ka Lio ona.  O kahi ana e hele nei, he aina me he waoakua la, he nui no hui na puu e ku-ku ana, a he mehameha no hoi; a o ke ala nui e hele aku a i, he apuupuu loa, a he ino maoli no hoi

 

Aka, ua hoomaka mai nae ka pau ana o ka ino, a no ia mea ka maikai iki ana o Tifesia, kahi a ua keiki nei e hele ana.  He nui wale o na ao kaumaha i hoolupelupe iho ma ke alo o na lani, ua pau i ke auhee aku, puka mai la no hoi ka la, a emi mai la ka ikaika o ka makani, a aohe no hoi i liuliu, pau loa ae la kona huihui i ka o makawalu ana mai o na kukuna o ka la.

 

He elima paha mile a ua keiki nei i hele ai mahope iho o kona haalele ana i ke kanaka kalewa waiwai, a aia hoi, ike aku la ia i kekahi kanaka e holo mai an ai ona la maluna o ka lio; a i kona hookokoke ana, ike aku la ia he kanaka puipui poupou ano hoomakeaka, ka mea e hele mai ana, a o kona lio, he wahi lio puipui; a o ka helehelena o ua wahi kanaka nei, he wahi ano me he mea la he kanaka mahiai, a i ole ia, he ano kanaka mahiai, a i ole ia, he ano kanaka hanai holoholona.  Halawa aku la laua nei, a o ke aloha mau no hoi a ka halawai alanui kai hoopukaia iwaena o laua; aka, ninau aku la nae ua keiki nei, me ke ano me he mea la, aohe makemake nui i kana mea i ninau aku ai.  “Mai hea mai kau hele ana mai nei? A, heaha hoi ka nu hou a oukou o keia wahi?”

 

“Aohe no he mea hou ano nui, aka, o ka olelo wale ia no e oleloia mai nei, e mare ana ka Moiwahine Mere o Sekotia, ia Haku Danale, ua paa loa ka manao o ka Moiwahine pela-oiai hoi o na’Lii a pau o ka aoao hoole pope, ua nui loa ke kue ana ia mea.” Pela mai ua wahi kanaka nei.

 

[Maanei e wehewehe iki aku au i ke ano o ka noho ana o ia wa: O ka hoomana a ka Moiwahine Mere o Sekotia i hilinai loa ai, oia ka hoomana Katolika Hemolele oiaio o Roma, oiai hoi, o ka hoomana a kona kaikunane Lord Maury, a me kekahi mau alii ikaika e ae o Sekotia, ua hilinai lakou mamuli o ka hoomana hoole pope.  O ka manao maoli nae o ua kaikunane nei, oia no ka lawe ae i ke aupuni nona, me ka hoonele hoi i kona kaikuahine; a no ia mea, manao e kela i ola honua, ina e mare ae ke kaikuahine ona, me Haku Danale, alaila, o ka nele loa iho la no ia ona; na ia mea oia i koi e pili aku me na Lii e hiaai ana mamuli o ka aoao hoomana hoole pope, a nana no hoi i paipai aku ia lakou ehui pu mai me ia, e kue aku i ka Moiwahine. Aia a mahope aku nei kakou e ike ai i ka hohonu o ka ino a lakou i hana ku ai i ua Alii Wahine ui hiwahiwa la, a me ka nui no hoi o kona hoopakeleia’na e ke akamai, a me ke koa hiwahiwa lua ole o ke Keiki o Italia, ka mea no hoi a kakou i uhaiaholo mai nei, mai ka wa i hookumia mai nei o keia wahi moolelo.]

 

“Ae, o na’Lii hui paha ko lakou inoa e kapaia nei.” Pela aku ua keiki nei.

 

A me he mea la, ua puiwa ua wahi kanaka nei; nolaila, kokohi maoli mai la ke ano o kana kamailio ana.  Pane mai la oia: “Heaha la auanei, aole paha ia’u i ka mea haahaa loa, ka olelo ae i ko’u manao ma na hana a ka Moiwahine hanohano nui, a me na hana no hoi a kona mau alii ikaika.  U aolelo wale ae nei no au ma na mea e oleloia’na i Kinirose, (Kinross.) kahi a’u i hele mai nei ano-a.”

 

“Ae, aia paha ia wahi ma o aku nei o kela mau puu la ea?” Pela’ku ua keiki nei.

 

“Oia no.” Wahi a ua wahi kanaka nei, me ke kuhikuhi aku i kona mau lima, i kekahi kakai puu e ku koke mai ana, a pane mai la no hoi oia, “Ke manao nei au, e ke kanaka maikai, aole oe no ka Hema, a aohe no hoi oe no Enelani-a ua maopopo ia’u aohe oe no Sekotia, a aole no hoi au wahi ano Farani, a he oleloa aku no hoi ke ano Geremania ia oe.”

 

Pane mai la ua keiki nei, “Aole io no au no ia mau wahi; aka, no Itallia mai nei au, haina kou makemake.  Aka, ano ae la no hoi oe, i hoopuka’e nei i ka inoa o ka Moiwahine nani.  E lokomaikai oe ia’u ma ka hai ana mai, aia no paha ua Alii Wahine la i kona Kulanakauhale Alii ma Edenabuga.”

 

“Ua hiki ole ia’u ke pane aku ia ninau au,” wahi a ua kanaka nei, “I uku no kau olelo lokomaikai ana mai ia’u.  Aka, aia i kuaaina loa ko’u wahi, a aia no ka loheia’e o kahi mea hou, a hala loa i hope na la he nui.  Aka, e noonoo ae au. Aka, ua lohe wale mai nei nae au i Kinirose, aia ka i ke kaapuni ua Alii la, aka, poina iho la no nae hoi ia’u.” A ku loihi iho la ua wahi kanaka nei me ka ho-a-a nui.

 

“E noonoo iho oe! E huli iho!” Pela aku ua keiki Italia nei, me ke ano koikoi maoli aku no nae hoi; aka, hoonana koke ae la nae ia o puiwa loa auanei ua wahi kanaka nei, olelo hou aku la oia, “No ka mea, e kalaia mai paha wau no ko’u ninau ana, no ka mea, mai kahi a kou alanui e hele ai ina e hiki ana ia’u ke hoohaule i ko’u kiionohi iluna o ka Moiwahine a ka honua a pau i kapa ai o ka wahine maikai loa o ka honua a pau.”

 

Kokolo ae la na a-akoko o ka manao mahalo o ua wahi kanaka nei, me ka olelo aku no hoi, “E hoomaikaiia kona poo maikai.” Pii ae la ka haaheo o ua wahi kanaka nei, no ka lohe ana’ku e mahaloia ana ka Moiwahine nani o kona aupuni, a olelo hou ae la, “Ke ake nei au e hooloihiia kona ola, a e keakeaia no hoi ka poino a kona mau enemi a me ka poe e manao ino mai ana ia ia, e manao mai e hana ino mai, me ko’u manao ole i ka inoa o ia poe-ina paha o na Lii hui, a ina no hoi he poe e ae.  No ka mea, e ke kanaka maikai, ke ike nei au, he malihini oe, aka, ke komohia nei nae iloko ou ka mahalo nui no Mere Situata, (Mary Sruart,) ka nani hiwahiwa o Sekotia.  Eia nae, ina e like me ka’u e manao nei, e hele ana oe i Kinirose; alaila, e hele oe a hoomaha iho i ka hale hookipa i kapaia o ka Maid o Norewai; a ilaila oe e lohe ai mai ka waha mai o ka wahine a ka mea nona ka hale, i na mea a pau a ka Moiwahine a me ke alo alii ona e hana nei.”

 

Ia manawa,  hoomaikai aku la ke keiki Italia-no ka mea, akahi hoi hou kakou a ike ae la o Italia kona one hanau, i ua wahi kanaka nei, no kona hai ana mai i kahi i lohe ai oia i na mea e pili ana i na mea a ka Moiwahine o Sekotia; a hele aku la no hoi ua wahi kanaka nei, a hoomau aku la ua keiki nei ma kona ala e hiki ai i Kinirose; a olelo iho la oia ia ia iho.  “He oiaio, he mea nui kuu ike mua ana, ina aia i Edenabuga ka Moiwahine, a i ole ia he oleloa no hoi ka hele wale aku e he-a-a hele ai. I mai nei kahi kanaka, aia paha i Perth! Ina hoi paha e ole ka poina ana o ua wahi kanaka la i ka mea ana i lohe mai nei i Kinirose, ina la hoi palekuna. Heahea la hoi kana, ua kokoke loa no hoi o Kinirose, Nolaila, Aia no a hiki aku au ilaila, ninau kino aku no au no’u iho.”

 

Oiai oia e kamailio ana pela, aia hoi, hiki loa mai la ua keiki Italia nei ma ke kae o kekahi ululaau, a komo loa aku la no hoi oia, no ka mea, ma ua ululaau nei ka moe ana a ke alanui ana e hele nei. Aole no i liuliu kana hele ana ku hiki keia i kahi i mana’i o ua mau alanui nei; aka, no ke ano like loa no o ka meheu o ua mau alanui nei, nolaila, kunana keia i kana alanui e hele ai.

 

Aka, mahope iho o ke kuiki ana a ua keiki Italia nei, alaila, hoomanao koke ae la ia i kahi a ka lima o kahi kanaka a laua i halawai ai i kuhikuhi mai ai, oiai laua e kamailio ana no Kinirose-a hele aku la oia ma ke ala na i kuhi ai o ka ke kanaka i kuhikuhi mai ai.

 

He hapalua hora paha ka loihi o kona naku ana’ku maloko o ua alanui nei, a i kona komo loa ana aku iloko, ua nui loa ke ano ino o ke ala, a nolaila, ua lele ka oili o ua keiki Italia nei, no kona huhewa, a manao iho la ia, aole paha pela ke ano o ke alanui e holo ana a hiki i ke kulanakauhale o Kinirose.

 

A nolaila, hoomanao ae la ia i kahi i mana’i o ke alanui, a hooholo iho la ia i ka manao, e hele aku a loaa kekani mana o ke alanui ana i haalele ai-a komo aku la ia iloko o ka nahelehele; a o kekahi kumu no hoi o kona puiwa ana, o ke ano nawaliwali loa iho la o kona lio.

 

Mahope iho o ka hala ana o ka hora okoa, iloko o ka ho-a-a ana, aia hoi, hiki aku la oia ma ke kaiaulu o na pae puu ana i ike mai ai i kahi e; a he wahi alanui inoino no hoi e moe ana, ua ane nalowale no nae i ka nahelehele, a ua hinaia no hoi e na piha-a.

 

I ka haliu ana’e e nana i kahi o Kinirose i moe ai, aia hoi, ua nalowale loa, a hiki ole i ua keiki Italia nei ke i ae, aia i o, a aia i o ke kulanakauhale o Kinirose.  No ia mea la, kaha’ku keia hele iloko o ka ululaau; aka, aia nae, komo iho la ka wawae o kahi lio ona iloko o kekahi lua, a oopa iho la, me ka nawaliwali maoli no hoi.  Ua hiki oleloa i ua lio nei ona ke holo, a he oleloa hoi ka hele aku; nolaila, hooholo koke iho la oia e haalele i kona lio.  Ua lana’e kona manao e hoopau i ke ola o ua wahi lio nei ona, i pau ai kona eha mainoino ana; aka, manao hou ae la ia, malia no hoi paha o oluolu ae kona eha, a loaa mai la hoi i kekahi kamaaina e aku ola no hoi kela aole e make, nolaila, hookuu no oia i ua wahi lio nei ona.  Hoomau aku la no ua keiki nei i ka hele, a aole i liuliu-pii aku la oia iluna o kekahi kiekiena, me kona olelo ia ia iho: “He oiaio, e hiki ana no hoi paha ia’u ke hoomanao ae i ke ano o na puu a ke kanaka i kuhikuhi mai nei ia’u, na puu hoi maanei mai o kahi i kapaia o Kinirose i moe ai? A malia paha e ikea’ku no hoi na hale o ua kulanakauhale la?”

 

Oiai oia e kamailio ana pela iloko ona iho, hoomau aku la no oia i ka pii ana iluna o ka puu ana i pii ai, me ka ino nui no hoi o ke alanui ana i hele ai.  He pohaku nui e lae ana ma ke alo o ua puu nei ana i pii ai, a no ia maa, oni aku la ia e hiki ilaila, i pii ae ai a luna o ua pohaku nei nana’ku i ke ano o ka waiho ana o ka nina ma o aku o ua pauu nei.  Aka, oiai nae ua keiki nei e hele aku ana, aia hoi, hoea mai ana ma kela aoao mai o ua pohaku nei, he mea nani loa i manao mua ole ia eia- he mea hiwahiwa, a he mea hoi nana i hoolele mai i ka oili o ke a-a palupalu o ua keiki nei, a aia hoi, uakii pea loa ia ihe la ua keiki nei i kahi hookahi, no ka mea, ua eehiaia oia e ka nani o ka mea makamae ana i ike aku ai.  O ua mea nani nei ana i ike aku ai-a nana hoi i hoolele i kona oili-ka mea hoi nana i hoonaueue ka pouhana o kona mau a-a hoohukihuku mahalo, he kaikamahine maikai loa o ka helehelena, a i ka wa no i haule aku ai no onohi o ke keiki Italia iluna o ua kaikamahine nei, o ka manawa iho la no ia i komohiaia’i kona kii iloko o ka puuwai o ke keiki Italia, a me he mea la ua kahakahia kona kii iloko o ka papa hoomanao o ka naau Italia o ka maluhia, a aole no hoi i poina iki ia mea, a hiki i ka wa pau ole.

 

He oioi no hoi ka nani o ka helehelena, a me na kiko a pau o ua kaikamahine nei, ua ana like ia kona mau kii a pau, kiola koke mai la kona mau onohi elelele hiehie iluna o na helehelena o ke keiki Italia, me he mea la e ninau mai ana i kona ano, a me he mea la no hoi, ua komohia kona puuwai e ka mukau; o kona mau lehelehe, ua mehele pono ia, a ua aiai no hoi ka waihoolau o kona ili.  Aka, o na papalina, aole no i lilo loa i ke keokeo, aohe no he ano mai, a ano nawaliwali la hoi; aka, o ke aiai paha kona o ka pua Kamelia, (he pua nani loa ia.) a i ole ia, o ka Rose keokeo paha i akahi a oaka ne ka waha o ka pua, pela ka liona o ua kaikamahine nei, i kona wa i nanaia’ku ai e ko Italia hiwahiwa.

 

Haule iho la na wili o kona lauoho nani iluna o kona mau poohiwi, i opuu iki ae hoi malalo e kona papale lele; me he mea la he umikumaiwa paha kona mau makahiki.  Aole no i lilo loa kona kaii @in@ i ka loihi, a aole no hoi i ka pokole; aka, ua loihi kupono no, no ka hoaahuia ku i ka inoa “maikai,” aka, no ke ano mikioi no nae o kona pauku kino, nolaila, ua loihi mimio iki ae maluna o kona kiekie maoli. Aka, mea e wale hoi ka nani koiuiu o ua kino la, me ka hiehie lua ole no hoi! Aole no hoi i kanamai ka pololei o kona kino, a me ka mahie na hoi e kona hele ana, ke hele la ka hoi a “aneane au e hina, e hio iona,” a niwaiwa loa hoi ka nani o ua kaikamahine nei, i ka hookapukapu ana o na maka, i ka nana ana mai e kaahele ae ana ka akaaka me ka helehelena iini maluna o na kii o ke keiki Italia.

 

O kona kapa, he pukiki ua hele a pilipono, i hele no a hoonuka aku la ma ke alo i hanaia noloko mai ka lole Veleveta maikai loa a me na lole maikai e ae no hoi ma kona kino, i hanaia ma ke ano o ko Sekotia poe, a me kekahi kahei i apoia mai kona poohiwi aku a kona puhaka hema, a i ka nana ana i ke ano maikai o kona mau lole. Me ke kapae ae no hoi i na loina nani o kona kino, na ia mea no i hoike mai, he kaikamahine no ka hanauna hanohano, a he kulana kiekie hoi @.

 

“E ka wahine maikai!” Pela aku ka pane ana a ua keiki Italia nei, me ka wehe aku i kona papale mahope koke iho o ka haalele ana o ka puiwa, no kona ike mua ana ku i ka mea nani i hoea mai ai imua ona iloko o ka waonahele, me he la he kaikamahine makani no Puakei; aka, me ka manao mahalo nui no nae kona halia ana aku a kamailio pela.  “E ka wahine hanohano maikai, ke nonoi aku nei au ia oe, e kala mai ia’u, malia paha, ua hooleleia kou oili e a’u.”-

 

Hooki koke ae la ia i kona kamailio ana, a hamo ae la ia i kona mau lima ma kona lae, me ka anaanai hoi i kona mau maka-aia hoi, ua hala aku la kela! E like me ke kupanaha, a me ka hoolele oili o kona hiki ana mai, pela no kona nalowale ana ku. No ka manawa pokole, komoia iho la ka eehia nui iloko o ua keiki Italia nei, a komo-a mai la kona naau e ke ano makau, me he mea la he wahine uhane keia ana i ike koke ai no, a hala koke aku no hoi, me ka hikiwawe kupanaha.

 

Aka, ma ia wa koke no, holo aku la keia a huli ma kela aoao o ka pohaku; a ike aku la oia i ka lole eleele, a me ke kihei papamu o ua kaikamahine nei, oiai e komo aku ana ua kaikamahine nei iloko o ka alulaau mau-u.

 

“He maka’u anei kou ia’u? Pomaikai wale hoi au ina e loaa ia’u ka pomaikai o ka halawai ana me oe, i hiki ai ia’u ke hoopau aku aka i ke kumu o kou maka’i ana! Ua hana ino aku anei au ia oe? Auwe no hoi! O ka loaa ka hoi ia’u o kahi e mihi aku ai me ka nonoi aku e kala mai ia’u.”  A oiai keia mau mano uluku e hana wale ana iloko o ua keiki Italia nei, aia hoi, o kona huli aku loa no ia a kaha aku la e huli mahope o ua kaikamahine nani nei ana i ike ai; aka, iloko nae o ke kekona hookahi, aia hoi, puka hou mai la ua kaikamahine nei, mailoko mai o ka ululaau, a aia hoi eehia iho la ia, a kupaa iho la i kahi hookahi, i ka wa a kona onohi i haule aku ai iluna o na helehelena nani hemolele o ua kaikamahine nei.

 

Aka, auwe nae hoi! O kona ano ua loli ae! O kona mau onohi nani, ua kiolu mai i ke ahi o kona inaina nui, me he la, he mau pohaku daimana e a-a mai ana iloko o @@@ kahua paa, e kiola mai ana i kona malamalama mai waenakonu e kapeahi pouli nui, e hoopuni ani ia ia-a o kona kii kino, me he mea la i kona kupololei ana me kona ano ihikapu, e i mai ana, e hoolohe i kana e kamailio ai i ke Akua Wahine. He pahi ma kona lima, a me ka leo palupalu hoehoene, oiai no hoi me ka inaina kona pane ana mai. “E hoi i hope! E hoi i hope! A ina oe e alualu mai, alaila, maluna ou iho kou poino ana.”

                                                                  (Aole pau.)