Ka Nupepa Kuokoa, Volume III, Number 18, 30 April 1864 — He Kanikau no M. Nakai. [ARTICLE]

He Kanikau no M. Nakai.

Kanikau aloha leeia nou e M. Nakai. Kuu wahine mai ke kai leo nui o Ipoho, Mai ka la welawela o Maiapuolo, Hoomaha aku kaua i ka malu niu o Pumauu, Kuu wahine mai ka makani huli lua o KuHuli ko Kau makani, [mukahi, Huli ko Hilo makani, Kuu wahine mai ka Ia kanaka o Puula, E haiamu ana i ka uka e ka Puumano, Oia uka a kaua e nonoho ai—e, Kuu wahine aloha nui loa hoi, Kuu hoa pili o ka la ame ka ua, Kuu wahine mai ka hale wai anu o uka, Ma ka hale loulu a ka manu i ako, Pohepohe ka maka o ka ilima ku alanui, He hoa oe no'u i ka ua kali o Malia, Malia anoai au i ko aloha, Aloha au ia oe e noho nei, Kuu wahine hoi—e ! Kuu wahine mai ka pahoehoe o Apua, Oia wahi a kaua e holoholo ai i uka i kai, Kuu wahine o ka pali kui o Uahoao, Oia uka anuanu a kaua e noho ai, Hoomaha aku kaua i ka ula a ke ahi, Kuu wahine o ka la pololi aiole, Hoomaona aku kaua i ka hua o ka ulei, Kuu mea minamina o kuu wahine, Aole oe he wahine, he makua no—e, Auwe kuu wahine! Kuu wahine o ka ua anuanu o ka mauna, Hoa alo makani o Puukoae, Oia one loa a kaua i hele ai, Hele aku kaua o ka la wela o Kau, Ke u nei au i ko aloha, Aloha no hoi oe i haalele mai nei ia'u, Ke uwe nei au i ko aloha aole no e pau ! S. Makauli.

He kanikau no keia nou e M. Nakai. Kuu makuahine aloha i hele iho nei, Kuu hoa kuka o ka pono o ke akua, Kuu hoa o ka la kanaka nui o Kalehuawehe, Wehe aku nei oe i ka pili a ke aloha, Kuu hoa o ka wai o Waiwelawela, Hoa alo makani Ia e Kukii, Ke kii mai nei ke aloha o kuu makuahine, Kuu makurthine o ka miloholu i Waiakaea, Ea hoomaha ole ke aioha ia oe e ka makua, Kuu makuahine o ka aina makamaka ole, Auwe kuu makuahine aloha—e! Mele Kawahine.