Ka Nupepa Kuokoa, Volume III, Number 26, 25 June 1864 — He Mele inoa no KALALAKUIKA WAIOKALEHUA. [ARTICLE]

He Mele inoa no KALALAKUIKA WAIOKALEHUA.

Auhea wale ana oe E ke Kanianaakamoa, O ke ao paha keia Ke olowalu mai nei, Ka leo o ka Niau Ilaila olua la, Kuu pau na kihikihi E ue e oi oe, I ka holo a Bunibeti A kela koa nui, Nana i hooheu aku Na lae o Rusini, Aupuni kipikipi O ke kela o ke ao nei, Li ka i-o o Tureke, O kalakala Beretane, Kunahihi Herene, O ke kumakena ia, Ke anapu nei ka uwila, He alele waha ole ia E hali nei i ka Nu! I lohe na Aupuni, Aupuni ku kaawale Ma na lewa o ke kai, O ka moana Iniana, Hao na pea Burumi Haliilua i ke kai, Akahi au a ike I ka mea ino he aloha, Ke luaiele nei Me he wai paila la, Okeoke kuu puuwai Hakukoi kuu nui kino, I ke au a ka manao, I manao aku no wau O oe ko'u hoa like, E lai ai ke kaunu E kuu ai o ka noke, I ke kai o Bapine, Aole ka e hiki Hao aku nei Makalii, Noho i ka Polikua, Ke kalewa hele nei Na keiki Kaupahi, Hao mai paihiihi. Ka ihona o ke Kaona, Pukui lua i ke anu Hi-ki-kii ka ua o ena, He aloha lai keia E ke Kanianaakamoa. NA D. KEAUOKALAIHAEHAE. Auhea wale ana oe, A e Kalaolelo, Wai i Kilauea, Helelei na waimaka, Ko maka ka'u i ike, Ko ihu kai honi ia, kai no o ka pono ia, Aole ka ua nei, Kui aku nei ka hohono, I ke kihi o ka aina. Kaulana hewa nei kono, I ke alu a na manu, E hauwalaau nei, Elua no kaua, E alo nei i ka leo, I ke anu o Kalaponi, Punia iho nei au, I ka hana nui a loko, Mai noho a henehene, He alanui ua maa, Ua hele ia a kupa, Mai na kupuna mai, A loaa mai o Keawe, A o Keawe o lalo, Lawe ae a iniki, Ke kaula Makinikela, Puliki mai a paa, A Puai lonalena ole. I niniu pono ka huila, Kapena puhipuhi ahi, Ke hele ino nei, Ua inu paha i ka bia, Kiaha wai hookohu, Hoawaawa puuwai, Wai awe ula o Mareka, Aupuni Melemele, Aina Omaomao, Ilaila kuu ike ana, I ka Nu Hou o Tahiti, Ke koehe lua nei, Na hupa i ke ahiahi, I ka welo a ka lipine, Hoi luuluu i ke kula, I ke aka a ka makani, He aloha lai keia, A e Kalaolelo, JOHN KELIIOKAMOKU. Auhea wale ana oe, E Kaehakonikoni, Eia mai no wau, Ko hoa alo i ke anu, Alo aku ai kaua, I ke alu a na leo, A na pili makamaka, Kaua pu kai ike, I ka nani o Daimana, Kukui malamalama, No ke aupuni Keleawe, Paa mai nei Ehuehu, Kela koakoa nui, O ka ihu Kaminomino, Monia mai a paa, Haoa mai i ka Oma, Ke puhi okaoka ia, I waiho ai o ka Nau, Pa kiaha ke aloha, Na keiki Puukani, Ma kuu puuwai oe, A i ka helu e kahi, O ka papa naauao, Ua pau ko'u koina, I ka Ahaolelo mua, Mai noho a hana mai, He kikane ko moku, Aole au ilaila, E i ae au i Malio, Kuu hoa e kohu ai, Pii aku a iho mai, I ka nani o ka Biuta, Kuhao i ka malie, Ua kohu no ka'u hana He loaa na kuu lima, Lalau ma ka hikina E ike anei oe, I ka hana a ka mea kumu Aohe wai kohu ole, Waiala o ka Oliva, He ala kupukupu, Na pua Kiliona, Haiamu na manu, Hoolai o Aromea, I ka nani o Pikaka,

He aloha lai keia, A e Kaehakonikoni, MRS. M. KAMAKAHIKI. Auhea wale ana oe, A e Kaehaokekino, Eia mai no wau, A o Maunakamara, Ke ala o kuu kino, Honi aku nei ka Hikina, Paoa i ke Komohana, He ala Kupaoa, Ku pouli ka ikena. Me he ua noenoe la, Pa ka makani Moae, Lu i ka pua o ka rose, Ula pu na kahawai, Muliwai o Lokolewa, Ua lewa kuu nui kino Ke hele nei ka manao, Laau o Keamolewa, O ka lewa ka'u i ike, Kuhi no wau o oe, I ka olu o ke ahiahi, I ka pili o ke aumoe, Moe au a hoolai, O ke kani a ke Kahuli, Huli ae nei kuu kino, I ke Duke o ke Aupuni, Eue kapakahi aku, Alaa me Kumukumu, I hooneenee ole, Kuikahi ka noho ana, Na kanaka Hawaii, Ma Amerika nei, E i ala hookuli, E i ala aloha ole, Haliu pono mai, Ko kino me ko maka, Eia mai maua. Puhiolali o ka Hema, Mai hoohemahema oe, I ka berita ua paa, O hemo auanei, Ka uwepa o ke Aupuni, Ehia kau makahiki, E pipii ai o ka wai, Waihona olu i anei, He aloha lai keia, A e Kaehaokekino, MRS. MARY LUMAHAI. Jacksonville, Oregona, Mei 28, 1864.